౧౧. అరణసుత్తం

౮౧. ‘‘కేసూధ అరణా లోకే, కేసం వుసితం న నస్సతి;

కేధ ఇచ్ఛం పరిజానన్తి, కేసం భోజిస్సియం సదా.

‘‘కింసు మాతా పితా భాతా, వన్దన్తి నం పతిట్ఠితం;

కింసు ఇధ జాతిహీనం, అభివాదేన్తి ఖత్తియా’’తి.

‘‘సమణీధ అరణా లోకే, సమణానం వుసితం న నస్సతి;

సమణా ఇచ్ఛం పరిజానన్తి, సమణానం భోజిస్సియం సదా.

‘‘సమణం మాతా పితా భాతా, వన్దన్తి నం పతిట్ఠితం;

సమణీధ జాతిహీనం, అభివాదేన్తి ఖత్తియా’’తి.

ఛేత్వావగ్గో అట్ఠమో.

తస్సుద్దానం –

ఛేత్వా రథఞ్చ చిత్తఞ్చ, వుట్ఠి భీతా నజీరతి;

ఇస్సరం కామం పాథేయ్యం, పజ్జోతో అరణేన చాతి.

దేవతాసంయుత్తం సమత్తం.