౮. ఛేత్వావగ్గో

౧. ఛేత్వాసుత్తం

౭౧. సావత్థినిదానం. ఏకమన్తం ఠితా ఖో సా దేవతా భగవన్తం గాథాయ అజ్ఝభాసి –

‘‘కింసు ఛేత్వా [ఝత్వా (సీ.), ఘత్వా (స్యా. కం.) ఏవముపరిపి] సుఖం సేతి, కింసు ఛేత్వా న సోచతి;

కిస్సస్సు ఏకధమ్మస్స, వధం రోచేసి గోతమా’’తి.

‘‘కోధం ఛేత్వా సుఖం సేతి, కోధం ఛేత్వా న సోచతి;

కోధస్స విసమూలస్స, మధురగ్గస్స దేవతే;

వధం అరియా పసంసన్తి, తఞ్హి ఛేత్వా న సోచతీ’’తి.

౨. రథసుత్తం

౭౨. ‘‘కింసు రథస్స పఞ్ఞాణం, కింసు పఞ్ఞాణమగ్గినో;

కింసు రట్ఠస్స పఞ్ఞాణం, కింసు పఞ్ఞాణమిత్థియా’’తి.

‘‘ధజో రథస్స పఞ్ఞాణం, ధూమో పఞ్ఞాణమగ్గినో;

రాజా రట్ఠస్స పఞ్ఞాణం, భత్తా పఞ్ఞాణమిత్థియా’’తి.

౩. విత్తసుత్తం

౭౩. ‘‘కింసూధ విత్తం పురిసస్స సేట్ఠం, కింసు సుచిణ్ణో సుఖమావహతి;

కింసు హవే సాదుతరం [సాధుతరం (క.)] రసానం, కథంజీవిం [కింసుజీవిం (క.)] జీవితమాహు సేట్ఠ’’న్తి.

‘‘సద్ధీధ విత్తం పురిసస్స సేట్ఠం, ధమ్మో సుచిణ్ణో సుఖమావహతి;

సచ్చం హవే సాదుతరం రసానం, పఞ్ఞాజీవిం జీవితమాహు సేట్ఠ’’న్తి.

౪. వుట్ఠిసుత్తం

౭౪. ‘‘కింసు ఉప్పతతం సేట్ఠం, కింసు నిపతతం వరం;

కింసు పవజమానానం, కింసు పవదతం వర’’న్తి.

‘‘బీజం ఉప్పతతం సేట్ఠం, వుట్ఠి నిపతతం వరా;

గావో పవజమానానం, పుత్తో పవదతం వరోతి.

‘‘విజ్జా ఉప్పతతం సేట్ఠా, అవిజ్జా నిపతతం వరా;

సఙ్ఘో పవజమానానం, బుద్ధో పవదతం వరో’’తి.

౫. భీతాసుత్తం

౭౫. ‘‘కింసూధ భీతా జనతా అనేకా,

మగ్గో చనేకాయతనప్పవుత్తో;

పుచ్ఛామి తం గోతమ భూరిపఞ్ఞ,

కిస్మిం ఠితో పరలోకం న భాయే’’తి.

‘‘వాచం మనఞ్చ పణిధాయ సమ్మా,

కాయేన పాపాని అకుబ్బమానో;

బవ్హన్నపానం ఘరమావసన్తో,

సద్ధో ముదూ సంవిభాగీ వదఞ్ఞూ;

ఏతేసు ధమ్మేసు ఠితో చతూసు,

ధమ్మే ఠితో పరలోకం న భాయే’’తి.

౬. నజీరతిసుత్తం

౭౬. ‘‘కిం జీరతి కిం న జీరతి, కింసు ఉప్పథోతి వుచ్చతి;

కింసు ధమ్మానం పరిపన్థో, కింసు రత్తిన్దివక్ఖయో;

కిం మలం బ్రహ్మచరియస్స, కిం సినానమనోదకం.

‘‘కతి లోకస్మిం ఛిద్దాని, యత్థ విత్తం [చిత్తం (సీ. స్యా. కం. పీ.)] న తిట్ఠతి;

భగవన్తం పుట్ఠుమాగమ్మ, కథం జానేము తం మయ’’న్తి.

‘‘రూపం జీరతి మచ్చానం, నామగోత్తం న జీరతి;

రాగో ఉప్పథోతి వుచ్చతి.

‘‘లోభో ధమ్మానం పరిపన్థో, వయో రత్తిన్దివక్ఖయో;

ఇత్థీ మలం బ్రహ్మచరియస్స, ఏత్థాయం సజ్జతే పజా;

తపో చ బ్రహ్మచరియఞ్చ, తం సినానమనోదకం.

‘‘ఛ లోకస్మిం ఛిద్దాని, యత్థ విత్తం న తిట్ఠతి;

ఆలస్యఞ్చ [ఆలస్సఞ్చ (సీ. పీ.)] పమాదో చ, అనుట్ఠానం అసంయమో;

నిద్దా తన్దీ [తన్ది (సీ.)] చ తే ఛిద్దే, సబ్బసో తం వివజ్జయే’’తి.

౭. ఇస్సరియసుత్తం

౭౭. ‘‘కింసు ఇస్సరియం లోకే, కింసు భణ్డానముత్తమం;

కింసు సత్థమలం లోకే, కింసు లోకస్మిమబ్బుదం.

‘‘కింసు హరన్తం వారేన్తి, హరన్తో పన కో పియో;

కింసు పునప్పునాయన్తం, అభినన్దన్తి పణ్డితా’’తి.

‘‘వసో ఇస్సరియం లోకే, ఇత్థీ భణ్డానముత్తమం;

కోధో సత్థమలం లోకే, చోరా లోకస్మిమబ్బుదా.

‘‘చోరం హరన్తం వారేన్తి, హరన్తో సమణో పియో;

సమణం పునప్పునాయన్తం, అభినన్దన్తి పణ్డితా’’తి.

౮. కామసుత్తం

౭౮. ‘‘కిమత్థకామో న దదే, కిం మచ్చో న పరిచ్చజే;

కింసు ముఞ్చేయ్య కల్యాణం, పాపికం న చ మోచయే’’తి.

‘‘అత్తానం న దదే పోసో, అత్తానం న పరిచ్చజే;

వాచం ముఞ్చేయ్య కల్యాణం, పాపికఞ్చ న మోచయే’’తి.

౯. పాథేయ్యసుత్తం

౭౯. ‘‘కింసు బన్ధతి పాథేయ్యం, కింసు భోగానమాసయో;

కింసు నరం పరికస్సతి, కింసు లోకస్మి దుజ్జహం;

కిస్మిం బద్ధా పుథూ సత్తా, పాసేన సకుణీ యథా’’తి.

‘‘సద్ధా బన్ధతి పాథేయ్యం, సిరీ భోగానమాసయో;

ఇచ్ఛా నరం పరికస్సతి, ఇచ్ఛా లోకస్మి దుజ్జహా;

ఇచ్ఛాబద్ధా పుథూ సత్తా, పాసేన సకుణీ యథా’’తి.

౧౦. పజ్జోతసుత్తం

౮౦. ‘‘కింసు లోకస్మి పజ్జోతో, కింసు లోకస్మి జాగరో;

కింసు కమ్మే సజీవానం, కిమస్స ఇరియాపథో.

‘‘కింసు అలసం అనలసఞ్చ [కిం ఆలస్యానాలస్యఞ్చ (క.)], మాతా పుత్తంవ పోసతి;

కిం భూతా ఉపజీవన్తి, యే పాణా పథవిస్సితా’’తి.

‘‘పఞ్ఞా లోకస్మి పజ్జోతో, సతి లోకస్మి జాగరో;

గావో కమ్మే సజీవానం, సీతస్స ఇరియాపథో.

‘‘వుట్ఠి అలసం అనలసఞ్చ, మాతా పుత్తంవ పోసతి;

వుట్ఠిం భూతా ఉపజీవన్తి, యే పాణా పథవిస్సితా’’తి.

౧౧. అరణసుత్తం

౮౧. ‘‘కేసూధ అరణా లోకే, కేసం వుసితం న నస్సతి;

కేధ ఇచ్ఛం పరిజానన్తి, కేసం భోజిస్సియం సదా.

‘‘కింసు మాతా పితా భాతా, వన్దన్తి నం పతిట్ఠితం;

కింసు ఇధ జాతిహీనం, అభివాదేన్తి ఖత్తియా’’తి.

‘‘సమణీధ అరణా లోకే, సమణానం వుసితం న నస్సతి;

సమణా ఇచ్ఛం పరిజానన్తి, సమణానం భోజిస్సియం సదా.

‘‘సమణం మాతా పితా భాతా, వన్దన్తి నం పతిట్ఠితం;

సమణీధ జాతిహీనం, అభివాదేన్తి ఖత్తియా’’తి.

ఛేత్వావగ్గో అట్ఠమో.

తస్సుద్దానం –

ఛేత్వా రథఞ్చ చిత్తఞ్చ, వుట్ఠి భీతా నజీరతి;

ఇస్సరం కామం పాథేయ్యం, పజ్జోతో అరణేన చాతి.

దేవతాసంయుత్తం సమత్తం.