౯. పఠమపజ్జున్నధీతుసుత్తం

౩౯. ఏవం మే సుతం – ఏకం సమయం భగవా వేసాలియం విహరతి మహావనే కూటాగారసాలాయం. అథ ఖో కోకనదా పజ్జున్నస్స ధీతా అభిక్కన్తాయ రత్తియా అభిక్కన్తవణ్ణా కేవలకప్పం మహావనం ఓభాసేత్వా యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం అట్ఠాసి. ఏకమన్తం ఠితా ఖో సా దేవతా కోకనదా పజ్జున్నస్స ధీతా భగవతో సన్తికే ఇమా గాథాయో అభాసి –

‘‘వేసాలియం వనే విహరన్తం, అగ్గం సత్తస్స సమ్బుద్ధం;

కోకనదాహమస్మి అభివన్దే, కోకనదా పజ్జున్నస్స ధీతా.

‘‘సుతమేవ పురే ఆసి, ధమ్మో చక్ఖుమతానుబుద్ధో;

సాహం దాని సక్ఖి జానామి, మునినో దేసయతో సుగతస్స.

‘‘యే కేచి అరియం ధమ్మం, విగరహన్తా చరన్తి దుమ్మేధా;

ఉపేన్తి రోరువం ఘోరం, చిరరత్తం దుక్ఖం అనుభవన్తి.

‘‘యే చ ఖో అరియే ధమ్మే, ఖన్తియా ఉపసమేన ఉపేతా;

పహాయ మానుసం దేహం, దేవకాయ పరిపూరేస్సన్తీ’’తి.