౮. సకలికసుత్తం

౩౮. ఏవం మే సుతం – ఏకం సమయం భగవా రాజగహే విహరతి మద్దకుచ్ఛిస్మిం మిగదాయే. తేన ఖో పన సమయేన భగవతో పాదో సకలికాయ [సక్ఖలికాయ (క.)] ఖతో హోతి. భుసా సుదం భగవతో వేదనా వత్తన్తి సారీరికా వేదనా దుక్ఖా తిబ్బా [తిప్పా (సీ. స్యా. కం. పీ.)] ఖరా కటుకా అసాతా అమనాపా; తా సుదం భగవా సతో సమ్పజానో అధివాసేతి అవిహఞ్ఞమానో. అథ ఖో భగవా చతుగ్గుణం సఙ్ఘాటిం పఞ్ఞాపేత్వా దక్ఖిణేన పస్సేన సీహసేయ్యం కప్పేతి పాదే పాదం అచ్చాధాయ సతో సమ్పజానో.

అథ ఖో సత్తసతా సతుల్లపకాయికా దేవతాయో అభిక్కన్తాయ రత్తియా అభిక్కన్తవణ్ణా కేవలకప్పం మద్దకుచ్ఛిం ఓభాసేత్వా యేన భగవా తేనుపసఙ్కమింసు; ఉపసఙ్కమిత్వా భగవన్తం అభివాదేత్వా ఏకమన్తం అట్ఠంసు. ఏకమన్తం ఠితా ఖో ఏకా దేవతా భగవతో సన్తికే ఇమం ఉదానం ఉదానేసి – ‘‘నాగో వత, భో, సమణో గోతమో; నాగవతా చ సముప్పన్నా సారీరికా వేదనా దుక్ఖా తిబ్బా ఖరా కటుకా అసాతా అమనాపా సతో సమ్పజానో అధివాసేతి అవిహఞ్ఞమానో’’తి.

అథ ఖో అపరా దేవతా భగవతో సన్తికే ఇమం ఉదానం ఉదానేసి – ‘‘సీహో వత, భో, సమణో గోతమో; సీహవతా చ సముప్పన్నా సారీరికా వేదనా దుక్ఖా తిబ్బా ఖరా కటుకా అసాతా అమనాపా సతో సమ్పజానో అధివాసేతి అవిహఞ్ఞమానో’’తి.

అథ ఖో అపరా దేవతా భగవతో సన్తికే ఇమం ఉదానం ఉదానేసి – ‘‘ఆజానీయో వత, భో, సమణో గోతమో; ఆజానీయవతా చ సముప్పన్నా సారీరికా వేదనా దుక్ఖా తిబ్బా ఖరా కటుకా అసాతా అమనాపా సతో సమ్పజానో అధివాసేతి అవిహఞ్ఞమానో’’తి.

అథ ఖో అపరా దేవతా భగవతో సన్తికే ఇమం ఉదానం ఉదానేసి – ‘‘నిసభో వత, భో, సమణో గోతమో; నిసభవతా చ సముప్పన్నా సారీరికా వేదనా దుక్ఖా తిబ్బా ఖరా కటుకా అసాతా అమనాపా సతో సమ్పజానో అధివాసేతి అవిహఞ్ఞమానో’’తి.

అథ ఖో అపరా దేవతా భగవతో సన్తికే ఇమం ఉదానం ఉదానేసి – ‘‘ధోరయ్హో వత, భో, సమణో గోతమో; ధోరయ్హవతా చ సముప్పన్నా సారీరికా వేదనా దుక్ఖా తిబ్బా ఖరా కటుకా అసాతా అమనాపా సతో సమ్పజానో అధివాసేతి అవిహఞ్ఞమానో’’తి.

అథ ఖో అపరా దేవతా భగవతో సన్తికే ఇమం ఉదానం ఉదానేసి – ‘‘దన్తో వత, భో, సమణో గోతమో; దన్తవతా చ సముప్పన్నా సారీరికా వేదనా దుక్ఖా తిబ్బా ఖరా కటుకా అసాతా అమనాపా సతో సమ్పజానో అధివాసేతి అవిహఞ్ఞమానో’’తి.

అథ ఖో అపరా దేవతా భగవతో సన్తికే ఇమం ఉదానం ఉదానేసి – ‘‘పస్స సమాధిం సుభావితం చిత్తఞ్చ సువిముత్తం, న చాభినతం న చాపనతం న చ ససఙ్ఖారనిగ్గయ్హవారితగతం [ససఙ్ఖారనిగ్గయ్హవారితవతం (సీ. స్యా. కం. పీ.), ససఙ్ఖారనిగ్గయ్హవారివావతం (క.)]. యో ఏవరూపం పురిసనాగం పురిససీహం పురిసఆజానీయం పురిసనిసభం పురిసధోరయ్హం పురిసదన్తం అతిక్కమితబ్బం మఞ్ఞేయ్య కిమఞ్ఞత్ర అదస్సనా’’తి.

‘‘పఞ్చవేదా సతం సమం, తపస్సీ బ్రాహ్మణా చరం;

చిత్తఞ్చ నేసం న సమ్మా విముత్తం, హీనత్థరూపా న పారఙ్గమా తే.

‘‘తణ్హాధిపన్నా వతసీలబద్ధా, లూఖం తపం వస్ససతం చరన్తా;

చిత్తఞ్చ నేసం న సమ్మా విముత్తం, హీనత్థరూపా న పారఙ్గమా తే.

‘‘న మానకామస్స దమో ఇధత్థి, న మోనమత్థి అసమాహితస్స;

ఏకో అరఞ్ఞే విహరం పమత్తో, న మచ్చుధేయ్యస్స తరేయ్య పార’’న్తి.

‘‘మానం పహాయ సుసమాహితత్తో, సుచేతసో సబ్బధి విప్పముత్తో;

ఏకో అరఞ్ఞే విహరమప్పమత్తో, స మచ్చుధేయ్యస్స తరేయ్య పార’’న్తి.