౬. భోజనఙ్గపఞ్హో

౬. ‘‘భన్తే నాగసేన, ‘భోజనస్స తీణి అఙ్గాని గహేతబ్బానీ’తి యం వదేసి, కతమాని తాని తీణి అఙ్గాని గహేతబ్బానీ’’తి? ‘‘యథా, మహారాజ, భోజనం సబ్బసత్తానం ఉపత్థమ్భో, ఏవమేవ ఖో, మహారాజ, యోగినా యోగావచరేన సబ్బసత్తానం మగ్గుపత్థమ్భేన భవితబ్బం. ఇదం, మహారాజ, భోజనస్స పఠమం అఙ్గం గహేతబ్బం.

‘‘పున చపరం, మహారాజ, భోజనం సబ్బసత్తానం బలం వడ్ఢేతి, ఏవమేవ ఖో, మహారాజ, యోగినా యోగావచరేన పుఞ్ఞవడ్ఢియా వడ్ఢితబ్బం. ఇదం, మహారాజ, భోజనస్స దుతియం అఙ్గం గహేతబ్బం.

‘‘పున చపరం, మహారాజ, భోజనం సబ్బసత్తానం అభిపత్థితం, ఏవమేవ ఖో, మహారాజ, యోగినా యోగావచరేన సబ్బలోకాభిపత్థితేన భవితబ్బం. ఇదం, మహారాజ, భోజనస్స తతియం అఙ్గం గహేతబ్బం. భాసితమ్పేతం, మహారాజ, థేరేన మహామోగ్గల్లానేన –

‘‘‘సంయమేన నియమేన, సీలేన పటిపత్తియా;

పత్థితేన భవితబ్బం, సబ్బలోకస్స యోగినా’’’తి.

భోజనఙ్గపఞ్హో ఛట్ఠో.