౫. అగదఙ్గపఞ్హో

౫. ‘‘భన్తే నాగసేన, ‘అగదస్స ద్వే అఙ్గాని గహేతబ్బానీ’తి యం వదేసి, కతమాని తాని ద్వే అఙ్గాని గహేతబ్బానీ’’తి. ‘‘యథా, మహారాజ, అగదే కిమీ న సణ్ఠహన్తి, ఏవమేవ ఖో, మహారాజ, యోగినా యోగావచరేన మానసే కిలేసా న సణ్ఠపేతబ్బా. ఇదం, మహారాజ, అగదస్స పఠమం అఙ్గం గహేతబ్బం.

‘‘పున చపరం, మహారాజ, అగదో దట్ఠఫుట్ఠదిట్ఠఅసితపీతఖాయితసాయితం సబ్బం విసం పటిహనతి, ఏవమేవ ఖో, మహారాజ, యోగినా యోగావచరేన రాగదోసమోహమానదిట్ఠివిసం సబ్బం పటిహనితబ్బం. ఇదం, మహారాజ, అగదస్స దుతియం అఙ్గం గహేతబ్బం. భాసితమ్పేతం, మహారాజ, భగవతా దేవాతిదేవేన –

‘‘‘సఙ్ఖారానం సభావత్థం, దట్ఠుకామేన యోగినా;

అగదేనేవ హోతబ్బం, కిలేసవిసనాసనే’’’తి.

అగదఙ్గపఞ్హో పఞ్చమో.