౬. ఆకాసఙ్గపఞ్హో

౬. ‘‘భన్తే నాగసేన, ‘ఆకాసస్స పఞ్చ అఙ్గాని గహేతబ్బానీ’తి యం వదేసి, కతమాని తాని పఞ్చ అఙ్గాని గహేతబ్బానీ’’తి? ‘‘యథా, మహారాజ, ఆకాసో సబ్బసో అగయ్హో, ఏవమేవ ఖో, మహారాజ, యోగినా యోగావచరేన సబ్బసో కిలేసేహి అగయ్హేన భవితబ్బం. ఇదం, మహారాజ, ఆకాసస్స పఠమం అఙ్గం గహేతబ్బం.

‘‘పున చపరం, మహారాజ, ఆకాసో ఇసితాపసభూతదిజగణానుసఞ్చరితో, ఏవమేవ ఖో, మహారాజ, యోగినా యోగావచరేన ‘అనిచ్చం దుక్ఖం అనత్తా’తి సఙ్ఖారేసు మానసం సఞ్చారయితబ్బం. ఇదం, మహారాజ, ఆకాసస్స దుతియం అఙ్గం గహేతబ్బం.

‘‘పున చపరం, మహారాజ, ఆకాసో సన్తాసనీయో, ఏవమేవ ఖో, మహారాజ, యోగినా యోగావచరేన సబ్బభవపటిసన్ధీసు మానసం ఉబ్బేజయితబ్బం, అస్సాదో న కాతబ్బో. ఇదం, మహారాజ, ఆకాసస్స తతియం అఙ్గం గహేతబ్బం.

‘‘పున చపరం, మహారాజ, ఆకాసో అనన్తో అప్పమాణో అపరిమేయ్యో, ఏవమేవ ఖో, మహారాజ, యోగినా యోగావచరేన అనన్తసీలేన అపరిమితఞాణేన భవితబ్బం. ఇదం, మహారాజ, ఆకాసస్స చతుత్థం అఙ్గం గహేతబ్బం.

‘‘పున చపరం, మహారాజ, ఆకాసో అలగ్గో అసత్తో అప్పతిట్ఠితో అపలిబుద్ధో, ఏవమేవ ఖో, మహారాజ, యోగినా యోగావచరేన కులే గణే లాభే ఆవాసే పలిబోధే పచ్చయే సబ్బకిలేసేసు చ సబ్బత్థ అలగ్గేన భవితబ్బం, అనాసత్తేన అప్పతిట్ఠితేన అపలిబుద్ధేన భవితబ్బం. ఇదం, మహారాజ, ఆకాసస్స పఞ్చమం అఙ్గం గహేతబ్బం. భాసితమ్పేతం, మహారాజ, భగవతా దేవాతిదేవేన సకం పుత్తం రాహులం ఓవదన్తేన – ‘సేయ్యథాపి, రాహుల [మ. ని. ౨.౧౧౯], ఆకాసో న కత్థచి పతిట్ఠితో, ఏవమేవ ఖో త్వం, రాహుల, ఆకాససమం భావనం భావేహి, ఆకాససమం హి తే, రాహుల, భావనం భావయతో ఉప్పన్నా మనాపామనాపా ఫస్సా చిత్తం పరియాదాయ ఠస్సన్తీ’’’తి.

ఆకాసఙ్గపఞ్హో ఛట్ఠో.