౯. ఉత్తరకురుకాదిగమనపఞ్హో

౯. రాజా ఆహ ‘‘భన్తే నాగసేన, అత్థి కోచి, యో ఇమినా సరీరేన ఉత్తరకురుం వా గచ్ఛేయ్య, బ్రహ్మలోకం వా, అఞ్ఞం వా పన దీప’’న్తి? ‘‘అత్థి, మహారాజ, యో ఇమినా చాతుమ్మహాభూతికేన కాయేన ఉత్తరకురుం వా గచ్ఛేయ్య, బ్రహ్మలోకం వా, అఞ్ఞం వా పన దీప’’న్తి.

‘‘కథం, భన్తే నాగసేన, ఇమినా చాతుమ్మహాభూతికేన కాయేన ఉత్తరకురుం వా గచ్ఛేయ్య, బ్రహ్మలోకం వా, అఞ్ఞం వా పన దీప’’న్తి? ‘‘అభిజానాసి ను, త్వం మహారాజ, ఇమిస్సా పథవియా విదత్థిం వా రతనం వా లఙ్ఘితా’’తి? ‘‘ఆమ, భన్తే, అభిజానామి ‘అహం, భన్తే నాగసేన, అట్ఠపి రతనియో లఙ్ఘేమీ’’’తి. ‘‘కథం, త్వం మహారాజ, అట్ఠపి రతనియో లఙ్ఘేసీ’’తి? ‘‘అహఞ్హి, భన్తే, చిత్తం ఉప్పాదేమి ‘ఏత్థ నిపతిస్సామీ’తి సహ చిత్తుప్పాదేన కాయో మే లహుకో హోతీ’’తి. ‘‘ఏవమేవ ఖో, మహారాజ, ఇద్ధిమా భిక్ఖు చేతోవసిప్పత్తో కాయం చిత్తే సమారోపేత్వా చిత్తవసేన వేహాసం గచ్ఛతీ’’తి.

‘‘కల్లోసి, భన్తే నాగసేనా’’తి.

ఉత్తరకురుకాదిగమనపఞ్హో నవమో.