౯. సంసారపఞ్హో

౯. రాజా ఆహ ‘‘భన్తే నాగసేన, యం పనేతం బ్రూసి ‘సంసారో’తి, కతమో సో సంసారో’’తి? ‘‘ఇధ, మహారాజ, జాతో ఇధేవ మరతి, ఇధ మతో అఞ్ఞత్ర ఉప్పజ్జతి, తహిం జాతో తహిం యేవ మరతి, తహిం మతో అఞ్ఞత్ర ఉప్పజ్జతి, ఏవం ఖో, మహారాజ, సంసారో హోతీ’’తి. ‘‘ఓపమ్మం కరోహీ’’తి. ‘‘యథా, మహారాజ, కోచిదేవ పురిసో పక్కం అమ్బం ఖాదిత్వా అట్ఠిం రోపేయ్య, తతో మహన్తో అమ్బరుక్ఖో నిబ్బత్తిత్వా ఫలాని దదేయ్య, అథ సో పురిసో తతోపి పక్కం అమ్బం ఖాదిత్వా అట్ఠిం రోపేయ్య, తతోపి మహన్తో అమ్బరుక్ఖో నిబ్బత్తిత్వా ఫలాని దదేయ్య, ఏవమేతేసం రుక్ఖానం కోటి న పఞ్ఞాయతి, ఏవమేవ ఖో, మహారాజ, ఇధ జాతో ఇధేవ మరతి, ఇధ మతో అఞ్ఞత్ర ఉప్పజ్జతి, తహిం జాతో తహిం యేవ మరతి, తహిం మతో అఞ్ఞత్ర ఉప్పజ్జతి, ఏవం ఖో, మహారాజ, సంసారో హోతీ’’తి.

‘‘కల్లోసి, భన్తే నాగసేనా’’తి.

సంసారపఞ్హో నవమో.