౧౧. అభిజానన్తసతిపఞ్హో

౧౧. రాజా ఆహ ‘‘భన్తే నాగసేన, సబ్బా సతి అభిజానన్తీ ఉప్పజ్జతి, ఉదాహు కటుమికావ సతీ’’తి? ‘‘అభిజానన్తీపి, మహారాజ, కటుమికాపి సతీ’’తి. ‘‘ఏవఞ్హి ఖో, భన్తే నాగసేన, సబ్బా సతి అభిజానన్తీ, నత్థి కటుమికా సతీ’’తి? ‘‘యది నత్థి, మహారాజ, కటుమికా సతి, నత్థి కిఞ్చి సిప్పికానం కమ్మాయతనేహి వా సిప్పాయతనేహి వా విజ్జాట్ఠానేహి వా కరణీయం, నిరత్థకా ఆచరియా, యస్మా చ ఖో, మహారాజ, అత్థి కటుమికా సతి, తస్మా అత్థి కమ్మాయతనేహి వా సిప్పాయతనేహి వా విజ్జాట్ఠానేహి వా కరణీయం, అత్థో చ ఆచరియేహీ’’తి.

‘‘కల్లోసి, భన్తే నాగసేనా’’తి.

అభిజానన్తసతిపఞ్హో ఏకాదసమో.

సతివగ్గో ఛట్ఠో.

ఇమస్మిం వగ్గే ఏకాదస పఞ్హా.