౨. బుద్ధస్స అనుత్తరభావపఞ్హో

౨. రాజా ఆహ ‘‘భన్తే నాగసేన, బుద్ధో అనుత్తరో’’తి? ‘‘ఆమ, మహారాజ, భగవా అనుత్తరో’’తి. ‘‘కథం, భన్తే నాగసేన, అదిట్ఠపుబ్బం జానాసి ‘బుద్ధో అనుత్తరో’’’తి? ‘‘తం కిం మఞ్ఞసి, మహారాజ, యేహి అదిట్ఠపుబ్బో మహాసముద్దో, జానేయ్యుం తే, మహారాజ, మహన్తో ఖో మహాసముద్దో గమ్భీరో అప్పమేయ్యో దుప్పరియోగాహో, యత్థిమా పఞ్చ మహానదియో సతతం సమితం అప్పేన్తి, సేయ్యథిదం, గఙ్గా యమునా అచిరవతీ సరభూ మహీ, నేవ తస్స ఊనత్తం వా పూరత్తం వా పఞ్ఞాయతీ’’తి? ‘‘ఆమ, భన్తే, జానేయ్యు’’న్తి. ‘‘ఏవమేవ ఖో, మహారాజ, సావకే మహన్తే పరినిబ్బుతే పస్సిత్వా జానామి ‘భగవా అనుత్తరో’’’తి.

‘‘కల్లోసి, భన్తే నాగసేనా’’తి.

బుద్ధస్స అనుత్తరభావపఞ్హో దుతియో.