౨. నాగసేనపఞ్హో

౨. థేరో ఆహ ‘‘లోణం, మహారాజ, చక్ఖువిఞ్ఞేయ్య’’న్తి. ‘‘ఆమ, భన్తే, చక్ఖువిఞ్ఞేయ్య’’న్తి. ‘‘సుట్ఠు ఖో, మహారాజ, జానాహీ’’తి. ‘‘కిం పన, భన్తే, జివ్హావిఞ్ఞేయ్య’’న్తి? ‘‘ఆమ, మహారాజ, జివ్హావిఞ్ఞేయ్య’’న్తి. ‘‘కిం పన, భన్తే, సబ్బం లోణం జివ్హాయ విజానాతీ’’తి? ‘‘ఆమ, మహారాజ, సబ్బం లోణం జివ్హాయ విజానాతి’’.

‘‘యది, భన్తే, సబ్బం లోణం జివ్హాయ విజానాతి, కిస్స పన తం సకటేహి బలీబద్దా [బలిబద్దా (సీ. పీ.)] ఆహరన్తి, నను లోణమేవ ఆహరితబ్బ’’న్తి? ‘‘న సక్కా, మహారాజ, లోణమేవ ఆహరితుం ఏకతోభావగతా ఏతే ధమ్మా గోచరనానత్తగతా లోణం గరుభావో చాతి. సక్కా పన, మహారాజ, లోణం తులాయ తులయితు’’న్తి? ‘‘ఆమ, భన్తే, సక్కా’’తి. ‘‘న సక్కా, మహారాజ, లోణం తులాయ తులయితుం, గరుభావో తులాయ తులియతీ’’తి.

‘‘కల్లోసి, భన్తే నాగసేనా’’తి.

నాగసేనపఞ్హో దుతియో.