౧౦. నిబ్బానసుఖజాననపఞ్హో

౧౦. రాజా ఆహ ‘‘భన్తే నాగసేన, యో న లభతి నిబ్బానం, జానాతి సో ‘సుఖం నిబ్బాన’’’న్తి? ‘‘ఆమ, మహారాజ, యో న లభతి నిబ్బానం, జానాతి సో ‘సుఖం నిబ్బాన’’’న్తి. ‘‘కథం, భన్తే నాగసేన, అలభన్తో జానాతి ‘సుఖం నిబ్బాన’’’న్తి? ‘‘తం కిం మఞ్ఞసి, మహారాజ, యేసం నచ్ఛిన్నా హత్థపాదా, జానేయ్యుం తే, మహారాజ, ‘దుక్ఖం హత్థపాదచ్ఛేదన’’’న్తి? ‘‘ఆమ, భన్తే, జానేయ్యు’’న్తి. ‘‘కథం జానేయ్యు’’న్తి? ‘‘అఞ్ఞేసం, భన్తే, ఛిన్నహత్థపాదానం పరిదేవితసద్దం సుత్వా జానన్తి ‘దుక్ఖం హత్థపాదచ్ఛేదన’’’న్తి. ‘‘ఏవమేవ ఖో, మహారాజ, యేసం దిట్ఠం నిబ్బానం, తేసం సద్దం సుత్వా జానాతి ‘సుఖం నిబ్బాన’’’న్తి.

‘‘కల్లోసి, భన్తే నాగసేనా’’తి.

నిబ్బానసుఖజాననపఞ్హో దసమో.

నిబ్బానవగ్గో చతుత్థో.

ఇమస్మిం వగ్గే దస పఞ్హా.