౯. వేదనాలక్ఖణపఞ్హో

౯. ‘‘భన్తే నాగసేన, కింలక్ఖణా వేదనా’’తి? ‘‘వేదయితలక్ఖణా, మహారాజ, వేదనా అనుభవనలక్ఖణా చా’’తి.

‘‘ఓపమ్మం కరోహీ’’తి. ‘‘యథా, మహారాజ, కోచిదేవ పురిసో రఞ్ఞో అధికారం కరేయ్య, తస్స రాజా తుట్ఠో అధికారం దదేయ్య, సో తేన అధికారేన పఞ్చహి కామగుణేహి సమప్పితో సమఙ్గిభూతో పరిచరేయ్య, తస్స ఏవమస్స ‘మయా ఖో పుబ్బే రఞ్ఞో అధికారో కతో, తస్స మే రాజా తుట్ఠో అధికారం అదాసి, స్వాహం తతోనిదానం ఇమం ఏవరూపం వేదనం వేదయామీ’తి.

‘‘యథా వా పన, మహారాజ, కోచిదేవ పురిసో కుసలం కమ్మం కత్వా కాయస్స భేదా పరం మరణా సుగతిం సగ్గం లోకం ఉపపజ్జేయ్య, సో చ తత్థ దిబ్బేహి పఞ్చహి కామగుణేహి సమప్పితో సమఙ్గిభూతో పరిచరేయ్య, తస్స ఏవమస్స ‘స్వాహం ఖో పుబ్బే కుసలం కమ్మం అకాసిం, సోహం తతోనిదానం ఇమం ఏవరూపం వేదనం వేదయామీ’తి, ఏవం ఖో, మహారాజ, వేదయితలక్ఖణా వేదనా అనుభవనలక్ఖణా చా’’తి.

‘‘కల్లోసి, భన్తే నాగసేనా’’తి.

వేదనాలక్ఖణపఞ్హో నవమో.