౯. అన్తరామలసుత్తం

౮౮. వుత్తఞ్హేతం భగవతా, వుత్తమరహతాతి మే సుతం –

‘‘తయోమే, భిక్ఖవే, అన్తరామలా అన్తరాఅమిత్తా అన్తరాసపత్తా అన్తరావధకా అన్తరాపచ్చత్థికా. కతమే తయో? లోభో, భిక్ఖవే, అన్తరామలో అన్తరాఅమిత్తో అన్తరాసపత్తో అన్తరావధకో అన్తరాపచ్చత్థికో. దోసో, భిక్ఖవే, అన్తరామలో అన్తరాఅమిత్తో అన్తరాసపత్తో అన్తరావధకో అన్తరాపచ్చత్థికో. మోహో, భిక్ఖవే, అన్తరామలో అన్తరాఅమిత్తో అన్తరాసపత్తో అన్తరావధకో అన్తరాపచ్చత్థికో. ఇమే ఖో, భిక్ఖవే, తయో అన్తరామలా అన్తరాఅమిత్తా అన్తరాసపత్తా అన్తరావధకా అన్తరాపచ్చత్థికా’’తి. ఏతమత్థం భగవా అవోచ. తత్థేతం ఇతి వుచ్చతి –

‘‘అనత్థజననో లోభో, లోభో చిత్తప్పకోపనో;

భయమన్తరతో జాతం, తం జనో నావబుజ్ఝతి.

‘‘లుద్ధో అత్థం న జానాతి, లుద్ధో ధమ్మం న పస్సతి;

అన్ధతమం [అన్ధం తమం (సీ.)] తదా హోతి, యం లోభో సహతే నరం.

‘‘యో చ లోభం పహన్త్వాన, లోభనేయ్యే న లుబ్భతి;

లోభో పహీయతే తమ్హా, ఉదబిన్దూవ పోక్ఖరా.

‘‘అనత్థజననో దోసో, దోసో చిత్తప్పకోపనో;

భయమన్తరతో జాతం, తం జనో నావబుజ్ఝతి.

‘‘దుట్ఠో అత్థం న జానాతి, దుట్ఠో ధమ్మం న పస్సతి;

అన్ధతమం తదా హోతి, యం దోసో సహతే నరం.

‘‘యో చ దోసం పహన్త్వాన, దోసనేయ్యే న దుస్సతి;

దోసో పహీయతే తమ్హా, తాలపక్కంవ బన్ధనా.

‘‘అనత్థజననో మోహో, మోహో చిత్తప్పకోపనో;

భయమన్తరతో జాతం, తం జనో నావబుజ్ఝతి.

‘‘మూళ్హో అత్థం న జానాతి, మూళ్హో ధమ్మం న పస్సతి;

అన్ధతమం తదా హోతి, యం మోహో సహతే నరం.

‘‘యో చ మోహం పహన్త్వాన, మోహనేయ్యే న ముయ్హతి;

మోహం విహన్తి సో సబ్బం, ఆదిచ్చోవుదయం తమ’’న్తి.

అయమ్పి అత్థో వుత్తో భగవతా, ఇతి మే సుతన్తి. నవమం.