౯. పఠమరాగసుత్తం

౬౮. వుత్తఞ్హేతం భగవతా, వుత్తమరహతాతి మే సుతం –

‘‘యస్స కస్సచి, భిక్ఖవే, రాగో అప్పహీనో, దోసో అప్పహీనో, మోహో అప్పహీనో – అయం వుచ్చతి, భిక్ఖవే, ‘బద్ధో [బన్దో (బహూసు)] మారస్స పటిముక్కస్స మారపాసో యథాకామకరణీయో [యథా కామకరణీయో చ (సీ. స్యా. పీ. క.)] పాపిమతో’. యస్స కస్సచి, భిక్ఖవే, రాగో పహీనో, దోసో పహీనో, మోహో పహీనో – అయం వుచ్చతి, భిక్ఖవే, ‘అబద్ధో మారస్స ఓముక్కస్స మారపాసో న యథా కామకరణీయో [న యథాకామకరణీయో చ (స్యా.)] పాపిమతో’’’తి. ఏతమత్థం భగవా అవోచ. తత్థేతం ఇతి వుచ్చతి –

‘‘యస్స రాగో చ దోసో చ, అవిజ్జా చ విరాజితా;

తం భావితత్తఞ్ఞతరం, బ్రహ్మభూతం తథాగతం;

బుద్ధం వేరభయాతీతం, ఆహు సబ్బప్పహాయిన’’న్తి.

అయమ్పి అత్థో వుత్తో భగవతా, ఇతి మే సుతన్తి. నవమం.