౧౦. దుతియరాగసుత్తం

౬౯. వుత్తఞ్హేతం భగవతా, వుత్తమరహతాతి మే సుతం –

‘‘యస్స కస్సచి, భిక్ఖవే, భిక్ఖుస్స వా భిక్ఖునియా వా రాగో అప్పహీనో, దోసో అప్పహీనో, మోహో అప్పహీనో – అయం వుచ్చతి, భిక్ఖవే, న ‘అతరి [అతిణ్ణో (క. సీ. క.)] సముద్దం సఊమిం సవీచిం సావట్టం సగహం సరక్ఖసం’. యస్స కస్సచి, భిక్ఖవే, భిక్ఖుస్స వా భిక్ఖునియా వా రాగో పహీనో, దోసో పహీనో, మోహో పహీనో – అయం వుచ్చతి, భిక్ఖవే, ‘అతరి సముద్దం సఊమిం సవీచిం సావట్టం సగహం సరక్ఖసం, తిణ్ణో పారఙ్గతో [పారగతో (సీ. అట్ఠ. స్యా.)] థలే తిట్ఠతి బ్రాహ్మణో’’’తి. ఏతమత్థం భగవా అవోచ. తత్థేతం ఇతి వుచ్చతి –

‘‘యస్స రాగో చ దోసో చ, అవిజ్జా చ విరాజితా;

సోమం సముద్దం సగహం సరక్ఖసం, సఊమిభయం దుత్తరం అచ్చతారి.

‘‘సఙ్గాతిగో మచ్చుజహో నిరూపధి, పహాసి దుక్ఖం అపునబ్భవాయ;

అత్థఙ్గతో సో న పమాణమేతి, అమోహయి మచ్చురాజన్తి బ్రూమీ’’తి.

అయమ్పి అత్థో వుత్తో భగవతా, ఇతి మే సుతన్తి. దసమం.

దుతియో వగ్గో నిట్ఠితో.

తస్సుద్దానం –

పుఞ్ఞం చక్ఖు అథ ఇన్ద్రియాని [అత్థిన్ద్రియా (స్యా.)], అద్ధా చ చరితం దువే సోచి [సుచి (స్యా.)];

మునో [మునే (స్యా.)] అథ రాగదువే, పున వగ్గమాహు దుతియముత్తమన్తి.