౮. పటిసల్లానసుత్తం

౪౫. వుత్తఞ్హేతం భగవతా, వుత్తమరహతాతి మే సుతం –

‘‘పటిసల్లానారామా [పటిసల్లానారామా (క.)], భిక్ఖవే, విహరథ పటిసల్లానరతా, అజ్ఝత్తం చేతోసమథమనుయుత్తా, అనిరాకతజ్ఝానా, విపస్సనాయ సమన్నాగతా, బ్రూహేతా సుఞ్ఞాగారానం. పటిసల్లానారామానం, భిక్ఖవే, విహరతం పటిసల్లానరతానం అజ్ఝత్తం చేతోసమథమనుయుత్తానం అనిరాకతమజ్ఝానానం విపస్సనాయ సమన్నాగతానం బ్రూహేతానం సుఞ్ఞాగారానం ద్విన్నం ఫలానం అఞ్ఞతరం ఫలం పాటికఙ్ఖం – దిట్ఠేవ ధమ్మే అఞ్ఞా, సతి వా ఉపాదిసేసే అనాగామితా’’తి. ఏతమత్థం భగవా అవోచ. తత్థేతం ఇతి వుచ్చతి –

‘‘యే సన్తచిత్తా నిపకా, సతిమన్తో చ [సతిమన్తోవ (సీ. క.)] ఝాయినో;

సమ్మా ధమ్మం విపస్సన్తి, కామేసు అనపేక్ఖినో.

‘‘అప్పమాదరతా సన్తా, పమాదే భయదస్సినో;

అభబ్బా పరిహానాయ, నిబ్బానస్సేవ సన్తికే’’తి.

అయమ్పి అత్థో వుత్తో భగవతా, ఇతి మే సుతన్తి. అట్ఠమం.