౯. సిక్ఖానిసంససుత్తం

౪౬. వుత్తఞ్హేతం భగవతా, వుత్తమరహతాతి మే సుతం –

‘‘సిక్ఖానిసంసా, భిక్ఖవే, విహరథ పఞ్ఞుత్తరా విముత్తిసారా సతాధిపతేయ్యా. సిక్ఖానిసంసానం, భిక్ఖవే, విహరతం పఞ్ఞుత్తరానం విముత్తిసారానం సతాధిపతేయ్యానం ద్విన్నం ఫలానం అఞ్ఞతరం ఫలం పాటికఙ్ఖం – దిట్ఠేవ ధమ్మే అఞ్ఞా, సతి వా ఉపాదిసేసే అనాగామితా’’తి. ఏతమత్థం భగవా అవోచ. తత్థేతం ఇతి వుచ్చతి –

‘‘పరిపుణ్ణసిక్ఖం [పరిపుణ్ణసేఖం (సీ.), పరిపుణ్ణసేక్ఖం (స్యా.)] అపహానధమ్మం, పఞ్ఞుత్తరం జాతిఖయన్తదస్సిం;

తం వే మునిం అన్తిమదేహధారిం, మారఞ్జహం బ్రూమి జరాయ పారగుం.

‘‘తస్మా సదా ఝానరతా సమాహితా, ఆతాపినో జాతిఖయన్తదస్సినో;

మారం ససేనం అభిభుయ్య భిక్ఖవో, భవథ జాతిమరణస్స పారగా’’తి.

అయమ్పి అత్థో వుత్తో భగవతా, ఇతి మే సుతన్తి. నవమం.