౨. దుతియవగ్గో

౧. వితక్కసుత్తం

౩౮. వుత్తఞ్హేతం భగవతా, వుత్తమరహతాతి మే సుతం –

‘‘తథాగతం, భిక్ఖవే, అరహన్తం సమ్మాసమ్బుద్ధం ద్వే వితక్కా బహులం సముదాచరన్తి – ఖేమో చ వితక్కో, పవివేకో చ [వివేకో చ (స్యా.)]. అబ్యాపజ్ఝారామో [అబ్యాపజ్జారామో (క.), అబ్యాబజ్ఝారామో (?)], భిక్ఖవే, తథాగతో అబ్యాపజ్ఝరతో. తమేనం, భిక్ఖవే, తథాగతం అబ్యాపజ్ఝారామం అబ్యాపజ్ఝరతం ఏసేవ వితక్కో బహులం సముదాచరతి – ‘ఇమాయాహం ఇరియాయ న కిఞ్చి బ్యాబాధేమి తసం వా థావరం వా’తి.

‘‘పవివేకారామో, భిక్ఖవే, తథాగతో పవివేకరతో. తమేనం, భిక్ఖవే, తథాగతం పవివేకారామం పవివేకరతం ఏసేవ వితక్కో బహులం సముదాచరతి – ‘యం అకుసలం తం పహీన’న్తి.

‘‘తస్మాతిహ, భిక్ఖవే, తుమ్హేపి అబ్యాపజ్ఝారామా విహరథ అబ్యాపజ్ఝరతా. తేసం వో, భిక్ఖవే, తుమ్హాకం అబ్యాపజ్ఝారామానం విహరతం అబ్యాపజ్ఝరతానం ఏసేవ వితక్కో బహులం సముదాచరిస్సతి – ‘ఇమాయ మయం ఇరియాయ న కిఞ్చి బ్యాబాధేమ తసం వా థావరం వా’తి.

‘‘పవివేకారామా, భిక్ఖవే, విహరథ పవివేకరతా. తేసం వో, భిక్ఖవే, తుమ్హాకం పవివేకారామానం విహరతం పవివేకరతానం ఏసేవ వితక్కో బహులం సముదాచరిస్సతి – ‘కిం అకుసలం, కిం అప్పహీనం, కిం పజహామా’’’తి. ఏతమత్థం భగవా అవోచ. తత్థేతం ఇతి వుచ్చతి –

‘‘తథాగతం బుద్ధమసయ్హసాహినం, దువే వితక్కా సముదాచరన్తి నం;

ఖేమో వితక్కో పఠమో ఉదీరితో, తతో వివేకో దుతియో పకాసితో.

‘‘తమోనుదం పారగతం మహేసిం, తం పత్తిపత్తం వసిమం అనాసవం;

విసన్తరం [వేసన్తరం (సీ. క.), విస్సన్తరం (పీ.)] తణ్హక్ఖయే విముత్తం, తం వే మునిం అన్తిమదేహధారిం;

మారఞ్జహం [మారజహం (స్యా.), మానజహం (సీ. క.), మానం జహం (పీ.)] బ్రూమి జరాయ పారగుం.

‘‘సేలే యథా పబ్బతముద్ధనిట్ఠితో, యథాపి పస్సే జనతం సమన్తతో;

తథూపమం ధమ్మమయం సుమేధో, పాసాదమారుయ్హ సమన్తచక్ఖు;

సోకావతిణ్ణం జనతమపేతసోకో, అవేక్ఖతి జాతిజరాభిభూత’’న్తి.

అయమ్పి అత్థో వుత్తో భగవతా, ఇతి మే సుతన్తి. పఠమం.

౨. దేసనాసుత్తం

౩౯. వుత్తఞ్హేతం భగవతా, వుత్తమరహతాతి మే సుతం –

‘‘తథాగతస్స, భిక్ఖవే, అరహతో సమ్మాసమ్బుద్ధస్స ద్వే ధమ్మదేసనా పరియాయేన భవన్తి. కతమా ద్వే? ‘పాపం పాపకతో పస్సథా’తి – అయం పఠమా ధమ్మదేసనా; ‘పాపం పాపకతో దిస్వా తత్థ నిబ్బిన్దథ విరజ్జథ విముచ్చథా’తి – అయం దుతియా ధమ్మదేసనా. తథాగతస్స, భిక్ఖవే, అరహతో సమ్మాసమ్బుద్ధస్స ఇమా ద్వే ధమ్మదేసనా పరియాయేన భవన్తీ’’తి. ఏతమత్థం భగవా అవోచ. తత్థేతం ఇతి వుచ్చతి –

‘‘తథాగతస్స బుద్ధస్స, సబ్బభూతానుకమ్పినో;

పరియాయవచనం పస్స, ద్వే చ ధమ్మా పకాసితా.

‘‘పాపకం పస్సథ చేతం [చేకం (సీ. పీ.), ఛేకా (స్యా.)], తత్థ చాపి విరజ్జథ;

తతో విరత్తచిత్తాసే, దుక్ఖస్సన్తం కరిస్సథా’’తి.

అయమ్పి అత్థో వుత్తో భగవతా, ఇతి మే సుతన్తి. దుతియం.

౩. విజ్జాసుత్తం

౪౦. వుత్తఞ్హేతం భగవతా, వుత్తమరహతాతి మే సుతం –

‘‘అవిజ్జా, భిక్ఖవే, పుబ్బఙ్గమా అకుసలానం ధమ్మానం సమాపత్తియా అన్వదేవ అహిరికం అనోత్తప్పం; విజ్జా చ ఖో, భిక్ఖవే, పుబ్బఙ్గమా కుసలానం ధమ్మానం సమాపత్తియా అన్వదేవ హిరోత్తప్ప’’న్తి. ఏతమత్థం భగవా అవోచ. తత్థేతం ఇతి వుచ్చతి –

‘‘యా కాచిమా దుగ్గతియో, అస్మిం లోకే పరమ్హి చ;

అవిజ్జామూలికా సబ్బా, ఇచ్ఛాలోభసముస్సయా.

‘‘యతో చ హోతి పాపిచ్ఛో, అహిరీకో అనాదరో;

తతో పాపం పసవతి, అపాయం తేన గచ్ఛతి.

‘‘తస్మా ఛన్దఞ్చ లోభఞ్చ, అవిజ్జఞ్చ విరాజయం;

విజ్జం ఉప్పాదయం భిక్ఖు, సబ్బా దుగ్గతియో జహే’’తి.

అయమ్పి అత్థో వుత్తో భగవతా, ఇతి మే సుతన్తి. తతియం.

౪. పఞ్ఞాపరిహీనసుత్తం

౪౧. వుత్తఞ్హేతం భగవతా, వుత్తమరహతాతి మే సుతం –

‘‘తే, భిక్ఖవే, సత్తా సుపరిహీనా యే అరియాయ పఞ్ఞాయ పరిహీనా. తే దిట్ఠేవ ధమ్మే దుక్ఖం విహరన్తి సవిఘాతం సఉపాయాసం సపరిళాహం; కాయస్స భేదా పరం మరణా దుగ్గతి పాటికఙ్ఖా. తే [తే చ ఖో (?)], భిక్ఖవే, సత్తా అపరిహీనా యే అరియాయ పఞ్ఞాయ అపరిహీనా. తే దిట్ఠేవ ధమ్మే సుఖం విహరన్తి అవిఘాతం అనుపాయాసం అపరిళాహం; కాయస్స భేదా పరం మరణా సుగతి పాటికఙ్ఖా’’తి. ఏతమత్థం భగవా అవోచ. తత్థేతం ఇతి వుచ్చతి –

‘‘పఞ్ఞాయ పరిహానేన, పస్స లోకం సదేవకం;

నివిట్ఠం నామరూపస్మిం, ఇదం సచ్చన్తి మఞ్ఞతి.

‘‘పఞ్ఞా హి సేట్ఠా లోకస్మిం, యాయం నిబ్బేధగామినీ;

యాయ సమ్మా పజానాతి, జాతిభవపరిక్ఖయం.

‘‘తేసం దేవా మనుస్సా చ, సమ్బుద్ధానం సతీమతం;

పిహయన్తి హాసపఞ్ఞానం [హాసుపఞ్ఞానం (సీ. అట్ఠ.)], సరీరన్తిమధారిన’’న్తి.

అయమ్పి అత్థో వుత్తో భగవతా, ఇతి మే సుతన్తి. చతుత్థం.

౫. సుక్కధమ్మసుత్తం

౪౨. వుత్తఞ్హేతం భగవతా, వుత్తమరహతాతి మే సుతం –

‘‘ద్వేమే, భిక్ఖవే, సుక్కా ధమ్మా లోకం పాలేన్తి. కతమే ద్వే? హిరీ [హిరి (సీ. స్యా. కం. పీ.)] చ, ఓత్తప్పఞ్చ. ఇమే చే, భిక్ఖవే, ద్వే సుక్కా ధమ్మా లోకం న పాలేయ్యుం, నయిధ పఞ్ఞాయేథ మాతాతి వా మాతుచ్ఛాతి వా మాతులానీతి వా ఆచరియభరియాతి వా గరూనం దారాతి వా. సమ్భేదం లోకో అగమిస్స యథా అజేళకా కుక్కుటసూకరా సోణసిఙ్గాలా [సోణసిగాలా (సీ. స్యా. కం. పీ.)]. యస్మా చ ఖో, భిక్ఖవే, ఇమే ద్వే సుక్కా ధమ్మా లోకం పాలేన్తి తస్మా పఞ్ఞాయతి మాతాతి వా మాతుచ్ఛాతి వా మాతులానీతి వా ఆచరియభరియాతి వా గరూనం దారాతి వా’’తి. ఏతమత్థం భగవా అవోచ. తత్థేతం ఇతి వుచ్చతి –

‘‘యేసం చే హిరిఓత్తప్పం, సబ్బదా చ న విజ్జతి;

వోక్కన్తా సుక్కమూలా తే, జాతిమరణగామినో.

‘‘యేసఞ్చ హిరిఓత్తప్పం, సదా సమ్మా ఉపట్ఠితా;

విరూళ్హబ్రహ్మచరియా తే, సన్తో ఖీణపునబ్భవా’’తి.

అయమ్పి అత్థో వుత్తో భగవతా, ఇతి మే సుతన్తి. పఞ్చమం.

౬. అజాతసుత్తం

౪౩. వుత్తఞ్హేతం భగవతా, వుత్తమరహతాతి మే సుతం –

‘‘అత్థి, భిక్ఖవే, అజాతం అభూతం అకతం అసఙ్ఖతం. నో చేతం, భిక్ఖవే, అభవిస్స అజాతం అభూతం అకతం అసఙ్ఖతం, నయిధ జాతస్స భూతస్స కతస్స సఙ్ఖతస్స నిస్సరణం పఞ్ఞాయేథ. యస్మా చ ఖో, భిక్ఖవే, అత్థి అజాతం అభూతం అకతం అసఙ్ఖతం, తస్మా జాతస్స భూతస్స కతస్స సఙ్ఖతస్స నిస్సరణం పఞ్ఞాయతీ’’తి. ఏతమత్థం భగవా అవోచ. తత్థేతం ఇతి వుచ్చతి –

‘‘జాతం భూతం సముప్పన్నం, కతం సఙ్ఖతమద్ధువం;

జరామరణసఙ్ఘాటం, రోగనీళం [రోగనిడ్ఢం (సీ.)] పభఙ్గురం [పభఙ్గునం (క. సీ. క.), పభఙ్గుణం (స్యా.)].

‘‘ఆహారనేత్తిప్పభవం, నాలం తదభినన్దితుం;

తస్స నిస్సరణం సన్తం, అతక్కావచరం ధువం.

‘‘అజాతం అసముప్పన్నం, అసోకం విరజం పదం;

నిరోధో దుక్ఖధమ్మానం, సఙ్ఖారూపసమో సుఖో’’తి.

అయమ్పి అత్థో వుత్తో భగవతా, ఇతి మే సుతన్తి. ఛట్ఠం.

౭. నిబ్బానధాతుసుత్తం

౪౪. వుత్తఞ్హేతం భగవతా, వుత్తమరహతాతి మే సుతం –

‘‘ద్వేమా, భిక్ఖవే, నిబ్బానధాతుయో. కతమే ద్వే? సఉపాదిసేసా చ నిబ్బానధాతు, అనుపాదిసేసా చ నిబ్బానధాతు.

‘‘కతమా చ, భిక్ఖవే, సఉపాదిసేసా నిబ్బానధాతు? ఇధ, భిక్ఖవే, భిక్ఖు అరహం హోతి ఖీణాసవో వుసితవా కతకరణీయో ఓహితభారో అనుప్పత్తసదత్థో పరిక్ఖీణభవసంయోజనో సమ్మదఞ్ఞా విముత్తో. తస్స తిట్ఠన్తేవ పఞ్చిన్ద్రియాని యేసం అవిఘాతత్తా [అవిగతత్తా (సీ. అట్ఠ.)] మనాపామనాపం పచ్చనుభోతి, సుఖదుక్ఖం పటిసంవేదేతి. తస్స యో రాగక్ఖయో, దోసక్ఖయో, మోహక్ఖయో – అయం వుచ్చతి, భిక్ఖవే, సఉపాదిసేసా నిబ్బానధాతు.

‘‘కతమా చ, భిక్ఖవే, అనుపాదిసేసా నిబ్బానధాతు? ఇధ, భిక్ఖవే, భిక్ఖు అరహం హోతి ఖీణాసవో వుసితవా కతకరణీయో ఓహితభారో అనుప్పత్తసదత్థో పరిక్ఖీణభవసంయోజనో సమ్మదఞ్ఞా విముత్తో. తస్స ఇధేవ, భిక్ఖవే, సబ్బవేదయితాని అనభినన్దితాని సీతి భవిస్సన్తి [సీతీభవిస్సన్తి (?)]. అయం వుచ్చతి, భిక్ఖవే, అనుపాదిసేసా నిబ్బానధాతు. ఇమా ఖో, భిక్ఖవే, ద్వే నిబ్బానధాతుయో’’తి. ఏతమత్థం భగవా అవోచ. తత్థేతం ఇతి వుచ్చతి –

‘‘దువే ఇమా చక్ఖుమతా పకాసితా, నిబ్బానధాతూ అనిస్సితేన తాదినా;

ఏకా హి ధాతు ఇధ దిట్ఠధమ్మికా, సఉపాదిసేసా భవనేత్తిసఙ్ఖయా;

అనుపాదిసేసా పన సమ్పరాయికా, యమ్హి నిరుజ్ఝన్తి భవాని సబ్బసో.

‘‘యే ఏతదఞ్ఞాయ పదం అసఙ్ఖతం, విముత్తచిత్తా భవనేత్తిసఙ్ఖయా;

తే ధమ్మసారాధిగమా ఖయే రతా, పహంసు తే సబ్బభవాని తాదినో’’తి.

అయమ్పి అత్థో వుత్తో భగవతా, ఇతి మే సుతన్తి. సత్తమం.

౮. పటిసల్లానసుత్తం

౪౫. వుత్తఞ్హేతం భగవతా, వుత్తమరహతాతి మే సుతం –

‘‘పటిసల్లానారామా [పటిసల్లానారామా (క.)], భిక్ఖవే, విహరథ పటిసల్లానరతా, అజ్ఝత్తం చేతోసమథమనుయుత్తా, అనిరాకతజ్ఝానా, విపస్సనాయ సమన్నాగతా, బ్రూహేతా సుఞ్ఞాగారానం. పటిసల్లానారామానం, భిక్ఖవే, విహరతం పటిసల్లానరతానం అజ్ఝత్తం చేతోసమథమనుయుత్తానం అనిరాకతమజ్ఝానానం విపస్సనాయ సమన్నాగతానం బ్రూహేతానం సుఞ్ఞాగారానం ద్విన్నం ఫలానం అఞ్ఞతరం ఫలం పాటికఙ్ఖం – దిట్ఠేవ ధమ్మే అఞ్ఞా, సతి వా ఉపాదిసేసే అనాగామితా’’తి. ఏతమత్థం భగవా అవోచ. తత్థేతం ఇతి వుచ్చతి –

‘‘యే సన్తచిత్తా నిపకా, సతిమన్తో చ [సతిమన్తోవ (సీ. క.)] ఝాయినో;

సమ్మా ధమ్మం విపస్సన్తి, కామేసు అనపేక్ఖినో.

‘‘అప్పమాదరతా సన్తా, పమాదే భయదస్సినో;

అభబ్బా పరిహానాయ, నిబ్బానస్సేవ సన్తికే’’తి.

అయమ్పి అత్థో వుత్తో భగవతా, ఇతి మే సుతన్తి. అట్ఠమం.

౯. సిక్ఖానిసంససుత్తం

౪౬. వుత్తఞ్హేతం భగవతా, వుత్తమరహతాతి మే సుతం –

‘‘సిక్ఖానిసంసా, భిక్ఖవే, విహరథ పఞ్ఞుత్తరా విముత్తిసారా సతాధిపతేయ్యా. సిక్ఖానిసంసానం, భిక్ఖవే, విహరతం పఞ్ఞుత్తరానం విముత్తిసారానం సతాధిపతేయ్యానం ద్విన్నం ఫలానం అఞ్ఞతరం ఫలం పాటికఙ్ఖం – దిట్ఠేవ ధమ్మే అఞ్ఞా, సతి వా ఉపాదిసేసే అనాగామితా’’తి. ఏతమత్థం భగవా అవోచ. తత్థేతం ఇతి వుచ్చతి –

‘‘పరిపుణ్ణసిక్ఖం [పరిపుణ్ణసేఖం (సీ.), పరిపుణ్ణసేక్ఖం (స్యా.)] అపహానధమ్మం, పఞ్ఞుత్తరం జాతిఖయన్తదస్సిం;

తం వే మునిం అన్తిమదేహధారిం, మారఞ్జహం బ్రూమి జరాయ పారగుం.

‘‘తస్మా సదా ఝానరతా సమాహితా, ఆతాపినో జాతిఖయన్తదస్సినో;

మారం ససేనం అభిభుయ్య భిక్ఖవో, భవథ జాతిమరణస్స పారగా’’తి.

అయమ్పి అత్థో వుత్తో భగవతా, ఇతి మే సుతన్తి. నవమం.

౧౦. జాగరియసుత్తం

౪౭. వుత్తఞ్హేతం భగవతా, వుత్తమరహతాతి మే సుతం –

‘‘జాగరో చస్స, భిక్ఖవే, భిక్ఖు విహరేయ్య సతో సమ్పజానో సమాహితో పముదితో విప్పసన్నో చ తత్థ కాలవిపస్సీ చ కుసలేసు ధమ్మేసు. జాగరస్స, భిక్ఖవే, భిక్ఖునో విహరతో సతస్స సమ్పజానస్స సమాహితస్స పముదితస్స విప్పసన్నస్స తత్థ కాలవిపస్సినో కుసలేసు ధమ్మేసు ద్విన్నం ఫలానం అఞ్ఞతరం ఫలం పాటికఙ్ఖం – దిట్ఠేవ ధమ్మే అఞ్ఞా, సతి వా ఉపాదిసేసే అనాగామితా’’తి. ఏతమత్థం భగవా అవోచ. తత్థేతం ఇతి వుచ్చతి –

‘‘జాగరన్తా సుణాథేతం, యే సుత్తా తే పబుజ్ఝథ;

సుత్తా జాగరితం సేయ్యో, నత్థి జాగరతో భయం.

‘‘యో జాగరో చ సతిమా సమ్పజానో, సమాహితో ముదితో విప్పసన్నో చ;

కాలేన సో సమ్మా ధమ్మం పరివీమంసమానో, ఏకోదిభూతో విహనే తమం సో.

‘‘తస్మా హవే జాగరియం భజేథ, ఆతాపీ భిక్ఖు నిపకో ఝానలాభీ;

సంయోజనం జాతిజరాయ ఛేత్వా, ఇధేవ సమ్బోధిమనుత్తరం ఫుసే’’తి.

అయమ్పి అత్థో వుత్తో భగవతా, ఇతి మే సుతన్తి. దసమం.

౧౧. ఆపాయికసుత్తం

౪౮. వుత్తఞ్హేతం భగవతా, వుత్తమరహతాతి మే సుతం –

‘‘ద్వేమే, భిక్ఖవే, ఆపాయికా నేరయికా ఇదమప్పహాయ. కతమే ద్వే? యో చ అబ్రహ్మచారీ బ్రహ్మచారిపటిఞ్ఞో, యో చ పరిపుణ్ణం పరిసుద్ధం బ్రహ్మచరియం చరన్తం అమూలకేన అబ్రహ్మచరియేన అనుద్ధంసేతి. ఇమే ఖో, భిక్ఖవే, ద్వే ఆపాయికా నేరయికా ఇదమప్పహాయా’’తి. ఏతమత్థం భగవా అవోచ. తత్థేతం ఇతి వుచ్చతి –

‘‘అభూతవాదీ నిరయం ఉపేతి, యో వాపి కత్వా న కరోమి చాహ;

ఉభోపి తే పేచ్చ సమా భవన్తి, నిహీనకమ్మా మనుజా పరత్థ.

‘‘కాసావకణ్ఠా బహవో, పాపధమ్మా అసఞ్ఞతా;

పాపా పాపేహి కమ్మేహి, నిరయం తే ఉపపజ్జరే.

‘‘సేయ్యో అయోగుళో భుత్తో, తత్తో అగ్గిసిఖూపమో;

యఞ్చే భుఞ్జేయ్య దుస్సీలో, రట్ఠపిణ్డమసఞ్ఞతో’’తి.

అయమ్పి అత్థో వుత్తో భగవతా, ఇతి మే సుతన్తి. ఏకాదసమం.

౧౨. దిట్ఠిగతసుత్తం

౪౯. వుత్తఞ్హేతం భగవతా, వుత్తమరహతాతి మే సుతం –

‘‘ద్వీహి, భిక్ఖవే, దిట్ఠిగతేహి పరియుట్ఠితా దేవమనుస్సా ఓలీయన్తి ఏకే, అతిధావన్తి ఏకే; చక్ఖుమన్తో చ పస్సన్తి.

‘‘కథఞ్చ, భిక్ఖవే, ఓలీయన్తి ఏకే? భవారామా, భిక్ఖవే, దేవమనుస్సా భవరతా భవసమ్ముదితా తేసం భవనిరోధాయ ధమ్మే దేసియమానే చిత్తం న పక్ఖన్దతి న పసీదతి న సన్తిట్ఠతి నాధిముచ్చతి. ఏవం ఖో, భిక్ఖవే, ఓలీయన్తి ఏకే.

‘‘కథఞ్చ, భిక్ఖవే, అతిధావన్తి ఏకే? భవేనేవ ఖో పనేకే అట్టీయమానా హరాయమానా జిగుచ్ఛమానా విభవం అభినన్దన్తి – యతో కిర, భో, అయం అత్తా [సత్తో (సీ. క.)] కాయస్స భేదా పరం మరణా ఉచ్ఛిజ్జతి వినస్సతి న హోతి పరం మరణా; ఏతం సన్తం ఏతం పణీతం ఏతం యాథావన్తి. ఏవం ఖో, భిక్ఖవే, అతిధావన్తి ఏకే.

‘‘కథఞ్చ, భిక్ఖవే, చక్ఖుమన్తో పస్సన్తి? ఇధ భిక్ఖు భూతం భూతతో పస్సతి; భూతం భూతతో దిస్వా భూతస్స నిబ్బిదాయ విరాగాయ నిరోధాయ పటిపన్నో హోతి. ఏవం ఖో, భిక్ఖవే, చక్ఖుమన్తో పస్సన్తీ’’తి. ఏతమత్థం భగవా అవోచ. తత్థేతం ఇతి వుచ్చతి –

‘‘యే [యో (స్యా. క.)] భూతం భూతతో దిస్వా, భూతస్స చ అతిక్కమం;

యథాభూతే విముచ్చన్తి, భవతణ్హా పరిక్ఖయా.

‘‘స వే [సచే (క. సీ. స్యా. పీ.)] భూతపరిఞ్ఞో, సో వీతతణ్హో భవాభవే;

భూతస్స విభవా భిక్ఖు, నాగచ్ఛతి పునబ్భవ’’న్తి.

అయమ్పి అత్థో వుత్తో భగవతా, ఇతి మే సుతన్తి. ద్వాదసమం.

దుతియో వగ్గో నిట్ఠితో.

తస్సుద్దానం –

ద్వే ఇన్ద్రియా ద్వే తపనీయా, సీలేన అపరే దువే;

అనోత్తాపీ కుహనా ద్వే చ, సంవేజనీయేన తే దస.

వితక్కా దేసనా విజ్జా, పఞ్ఞా ధమ్మేన పఞ్చమం;

అజాతం ధాతుసల్లానం, సిక్ఖా జాగరియేన చ;

అపాయదిట్ఠియా చేవ [యేవ (సీ. స్యా.)], బావీసతి పకాసితాతి.

దుకనిపాతో నిట్ఠితో.