౧౦. సోమనస్ససుత్తం

౩౭. వుత్తఞ్హేతం భగవతా, వుత్తమరహతాతి మే సుతం –

‘‘ద్వీహి, భిక్ఖవే, ధమ్మేహి సమన్నాగతో భిక్ఖు దిట్ఠేవ ధమ్మే సుఖసోమనస్సబహులో విహరతి, యోని చస్స [యోనిసో (సీ. స్యా. పీ.), యోనిస్స (క.)] ఆరద్ధా హోతి ఆసవానం ఖయాయ. కతమేహి ద్వీహి? సంవేజనీయేసు ఠానేసు సంవేజనేన, సంవిగ్గస్స చ యోనిసో పధానేన. ఇమేహి ఖో, భిక్ఖవే, ద్వీహి ధమ్మేహి సమన్నాగతో భిక్ఖు దిట్ఠేవ ధమ్మే సుఖసోమనస్సబహులో విహరతి, యోని చస్స ఆరద్ధా హోతి ఆసవానం ఖయాయా’’తి. ఏతమత్థం భగవా అవోచ. తత్థేతం ఇతి వుచ్చతి –

‘‘సంవేజనీయట్ఠానేసు [సంవేజనీయేసు ఠానేసు (స్యా. పీ.)], సంవిజ్జేథేవ పణ్డితో;

ఆతాపీ నిపకో భిక్ఖు, పఞ్ఞాయ సమవేక్ఖియ.

‘‘ఏవం విహారీ ఆతాపీ, సన్తవుత్తి అనుద్ధతో;

చేతోసమథమనుయుత్తో, ఖయం దుక్ఖస్స పాపుణే’’తి.

అయమ్పి అత్థో వుత్తో భగవతా, ఇతి మే సుతన్తి. దసమం.

పఠమో వగ్గో నిట్ఠితో.

తస్సుద్దానం –

ద్వే చ భిక్ఖూ తపనీయా, తపనీయా పరత్థేహి;

ఆతాపీ [ద్వే పాదా (క.), ద్వే ఆతాపీ (సీ.)] నకుహనా ద్వే [న కుహనా చ (సబ్బత్థ)], సోమనస్సేన తే దసాతి.