౬-౧౧. ఛేదనసుత్తాదివణ్ణనా

౧౧౬౬-౭౧. ఛేదనాదీసు ఛేదనన్తి హత్థచ్ఛేదనాది. వధోతి మరణం. బన్ధోతి రజ్జుబన్ధనాదీహి బన్ధనం. విపరామోసోతి హిమవిపరామోసో, గుమ్బవిపరామోసోతి దువిధో. యం హిమపాతసమయే హిమేన పటిచ్ఛన్నా హుత్వా మగ్గపటిపన్నం జనం ముసన్తి, అయం హిమవిపరామోసో. యం గుమ్బాదిపటిచ్ఛన్నా ముసన్తి, అయం గుమ్బవిపరామోసో.

ఆలోపో వుచ్చతి గామనిగమాదీనం విలోపకరణం. సహసాకారోతి సాహసకిరియా, గేహం పవిసిత్వా, మనుస్సానం ఉరే సత్థం ఠపేత్వా, ఇచ్ఛితభణ్డగ్గహణం. ఏవమేతస్మా ఛేదనవధబన్ధనవిపరామోసఆలోపసహసాకారా పటివిరతా. సేసం సబ్బత్థ ఉత్తానత్థమేవాతి.

ఆమకధఞ్ఞపేయ్యాలవణ్ణనా నిట్ఠితా.

ఇతి సారత్థప్పకాసినియా సంయుత్తనికాయ-అట్ఠకథాయ

మహావగ్గవణ్ణనా నిట్ఠితా.