నిగమనకథా

ఏత్తావతా హి –

‘‘బహుకారస్స యతీనం విపస్సనాచారనిపుణబుద్ధీనం,

సంయుత్తవరనికాయస్స అత్థసంవణ్ణనం కాతుం.

‘‘సద్ధమ్మస్స చిరట్ఠితిమాసిసమానేన యా మయా;

నిపుణా అట్ఠకథా ఆరద్ధా సారత్థపకాసినీ నామ.

‘‘సా హి మహాఅట్ఠకథాయ సారమాదాయ నిట్ఠితా ఏసా;

అట్ఠసత్తతిమత్తాయ పాళియా భాణవారేహి.

‘‘ఏకూనసట్ఠిమత్తో విసుద్ధిమగ్గోపి భాణవారేహి;

అత్థప్పకాసనత్థాయ ఆగమానం కతో యస్మా.

‘‘తస్మా తేన సహాయం అట్ఠకథా భాణవారగణనాయ;

థోకేన అపరిపూరం సత్తతింససతం హోతి.

‘‘సత్తతింసాధికసత-పరిమాణం భాణవారతో ఏవం;

సమయం పకాసయన్తిం మహావిహారాధివాసీనం.

‘‘మూలట్ఠకథాయ సారమాదాయ మయా ఇమం కరోన్తేన;

యం పుఞ్ఞముపచితం తేన హోతు సబ్బో సుఖీ లోకో.

‘‘ఏతిస్సా కరణత్థం థేరేన భదన్తజోతిపాలేన;

సుచిసీలేన సుభాసితస్స పకాసయన్తఞాణేన.

‘‘సాసనవిభూతికామేన యాచమానేన మం సుభగుణేన;

యం సమధిగతం పుఞ్ఞం తేనాపి జనో సుఖీ భవతూ’’తి.

పరమవిసుద్ధసద్ధాబుద్ధివీరియప్పటిమణ్డితేన సీలాచారజ్జవమద్దవాదిగుణసముదయసముదితేన సకసమయసమయన్తరగహనజ్ఝోగాహణసమత్థేన పఞ్ఞావేయ్యత్తియసమన్నాగతేన తిపిటకపరియత్తిప్పభేదే సాట్ఠకథే సత్థుసాసనే అప్పటిహతఞాణప్పభావేన మహావేయ్యాకరణేన కరణసమ్పత్తిజనితసుఖవినిగ్గతమధురోదారవచనలావణ్ణయుత్తేన యుత్తముత్తవాదినా వాదీవరేన మహాకవినా పభిన్నపటిసమ్భిదాపరివారే ఛళభిఞ్ఞాదిప్పభేదగుణప్పటిమణ్డితే ఉత్తరిమనుస్సధమ్మే సుప్పతిట్ఠితబుద్ధీనం థేరవంసప్పదీపానం థేరానం మహావిహారవాసీనం వంసాలఙ్కారభూతేన విపులవిసుద్ధబుద్ధినా బుద్ధఘోసోతి గరూహి గహితనామధేయ్యేన థేరేన కతా అయం సారత్థప్పకాసినీ నామ సంయుత్తనికాయట్ఠకథా.

‘‘తావ తిట్ఠతు లోకస్మిం, లోకనిత్థరణేసినం;

దస్సేన్తీ కులపుత్తానం, నయం సీలవిసుద్ధియా.

‘‘యావ బుద్ధోతి నామమ్పి, సుద్ధచిత్తస్స తాదినో;

లోకమ్హి లోకజేట్ఠస్స, పవత్తతి మహేసినో’’తి.

సారత్థప్పకాసినీ నామ

సంయుత్తనికాయ-అట్ఠకథా సబ్బాకారేన నిట్ఠితా.