౬. సుచరితసుత్తవణ్ణనా

౬౫. ఛట్ఠే సుట్ఠు చరితాని, సున్దరాని వా చరితాని సుచరితాని. కాయేన సుచరితం, కాయతో వా పవత్తం సుచరితం కాయసుచరితం. సేసేసుపి ఏసేవ నయో. ఇధాపి పన పఞ్ఞత్తివసేన, కమ్మపథవసేన చాతి దువిధా కథా. తత్థ కాయద్వారే పఞ్ఞత్తసిక్ఖాపదస్స అవీతిక్కమో కాయసుచరితం, వచీద్వారే పఞ్ఞత్తసిక్ఖాపదస్స అవీతిక్కమో వచీసుచరితం, ఉభయత్థ పఞ్ఞత్తస్స అవీతిక్కమో మనోసుచరితన్తి అయం పఞ్ఞత్తికథా. పాణాతిపాతాదీహి పన విరమన్తస్స ఉప్పన్నా తిస్సో చేతనాపి విరతియోపి కాయసుచరితం, ముసావాదాదీహి విరమన్తస్స చతస్సో చేతనాపి విరతియోపి వచీసుచరితం, అనభిజ్ఝా, అబ్యాపాదో, సమ్మాదిట్ఠీతి తయో చేతనాసమ్పయుత్తధమ్మా మనోసుచరితన్తి అయం కమ్మపథకథా. సేసం వుత్తనయమేవ.

ఛట్ఠసుత్తవణ్ణనా నిట్ఠితా.