౫. దుచ్చరితసుత్తవణ్ణనా

౬౪. పఞ్చమే దుట్ఠు చరితాని, దుట్ఠాని వా చరితాని దుచ్చరితాని. కాయేన దుచ్చరితం, కాయతో వా పవత్తం దుచ్చరితం కాయదుచ్చరితం. సేసేసుపి ఏసేవ నయో. ఇమాని చ దుచ్చరితాని పఞ్ఞత్తియా వా కథేతబ్బాని కమ్మపథేహి వా. తత్థ పఞ్ఞత్తియా తావ కాయద్వారే పఞ్ఞత్తసిక్ఖాపదస్స వీతిక్కమో కాయదుచ్చరితం, వచీద్వారే పఞ్ఞత్తసిక్ఖాపదస్స వీతిక్కమో వచీదుచ్చరితం, ఉభయత్థ పఞ్ఞత్తస్స వీతిక్కమో మనోదుచ్చరితన్తి అయం పఞ్ఞత్తికథా. పాణాతిపాతాదయో పన తిస్సో చేతనా కాయద్వారేపి, వచీద్వారేపి, ఉప్పన్నా కాయదుచ్చరితం, తథా చతస్సో ముసావాదాదిచేతనా వచీదుచ్చరితం, అభిజ్ఝా, బ్యాపాదో, మిచ్ఛాదిట్ఠీతి తయో చేతనాసమ్పయుత్తధమ్మా మనోదుచ్చరితన్తి అయం కమ్మపథకథా.

గాథాయం కమ్మపథప్పత్తోయేవ పాపధమ్మో కాయదుచ్చరితాదిభావేన వుత్తోతి తదఞ్ఞం పాపధమ్మం సఙ్గణ్హితుం ‘‘యఞ్చఞ్ఞం దోససఞ్హిత’’న్తి వుత్తం. తత్థ దోససఞ్హితన్తి రాగాదికిలేససంహితం. సేసం సువిఞ్ఞేయ్యమేవ.

పఞ్చమసుత్తవణ్ణనా నిట్ఠితా.