౭. రాహులసుత్తవణ్ణనా

౧౭౭. సత్తమే అజ్ఝత్తికాతి కేసాదీసు వీసతియా కోట్ఠాసేసు థద్ధాకారలక్ఖణా పథవీధాతు. బాహిరాతి బహిద్ధా అనిన్ద్రియబద్ధేసు పాసాణపబ్బతాదీసు థద్ధాకారలక్ఖణా పథవీధాతు. ఇమినావ నయేన సేసాపి ధాతుయో వేదితబ్బా. నేతం మమ, నేసోహమస్మి, న మేసో అత్తాతి ఇదం తయం తణ్హామానదిట్ఠిగ్గాహపటిక్ఖేపవసేన వుత్తం. సమ్మప్పఞ్ఞాయ దట్ఠబ్బన్తి హేతునా కారణేన మగ్గపఞ్ఞాయ పస్సితబ్బం. దిస్వాతి సహవిపస్సనాయ మగ్గపఞ్ఞాయ పస్సిత్వా. అచ్ఛేచ్ఛి తణ్హన్తి మగ్గవజ్ఝతణ్హం సమూలకం ఛిన్ది. వివత్తయి సంయోజనన్తి దసవిధమ్పి సంయోజనం వివత్తయి ఉబ్బత్తేత్వా పజహి. సమ్మా మానాభిసమయాతి హేతునా కారణేన నవవిధస్స మానస్స పహానాభిసమయా. అన్తమకాసి దుక్ఖస్సాతి వట్టదుక్ఖం పరిచ్ఛిన్నం పరివటుమం అకాసి, కత్వా ఠితోతి అత్థో. ఇతి సత్థారా సంయుత్తమహానికాయే రాహులోవాదే (సం. ని. ౩.౯౧ ఆదయో) విపస్సనా కథితా, చూళరాహులోవాదేపి (మ. ని. ౩.౪౧౬ ఆదయో) విపస్సనా కథితా, అమ్బలట్ఠికరాహులోవాదే (మ. ని. ౨.౧౦౭ ఆదయో) దహరస్సేవ సతో ముసావాదా వేరమణీ కథితా, మహారాహులోవాదే (మ. ని. ౨.౧౧౩ ఆదయో) విపస్సనా కథితా. ఇమస్మిం అఙ్గుత్తరమహానికాయే అయం చతుకోటికసుఞ్ఞతా నామ కథితాతి.