౫. ఉపవాణసుత్తవణ్ణనా

౧౭౫-౧౭౬. పఞ్చమే విజ్జాయన్తకరో హోతీతి విజ్జాయ వట్టదుక్ఖస్స అన్తకరో హోతి, సకలం వట్టదుక్ఖం పరిచ్ఛిన్నం పరివటుమం కత్వా తిట్ఠతీతి. సేసపదేసుపి ఏసేవ నయో. సఉపాదానోతి సగహణోవ హుత్వా. అన్తకరో అభవిస్సాతి వట్టదుక్ఖస్స అన్తం కత్వా ఠితో అభవిస్స. చరణసమ్పన్నోతి పన్నరసధమ్మభేదేన చరణేన సమన్నాగతో. యథాభూతం జానం పస్సం అన్తకరో హోతీతి యథాసభావం మగ్గపఞ్ఞాయ జానిత్వా పస్సిత్వా వట్టదుక్ఖస్స అన్తం కత్వా ఠితో నామ హోతీతి అరహత్తనికూటేన పఞ్హం నిట్ఠపేసి. ఛట్ఠం హేట్ఠా ఏకకనిపాతవణ్ణనాయం వుత్తనయేనేవ వేదితబ్బం.