౭. అచిన్తేయ్యసుత్తవణ్ణనా

౭౭. సత్తమే అచిన్తేయ్యానీతి చిన్తేతుం అయుత్తాని. న చిన్తేతబ్బానీతి అచిన్తేయ్యత్తాయేవ న చిన్తేతబ్బాని. యాని చిన్తేన్తోతి యాని కారణాని చిన్తేన్తో. ఉమ్మాదస్సాతి ఉమ్మత్తకభావస్స. విఘాతస్సాతి దుక్ఖస్స. బుద్ధవిసయోతి బుద్ధానం విసయో, సబ్బఞ్ఞుతఞ్ఞాణాదీనం బుద్ధగుణానం పవత్తి చ ఆనుభావో చ. ఝానవిసయోతి అభిఞ్ఞాఝానవిసయో. కమ్మవిపాకోతి దిట్ఠధమ్మవేదనీయాదీనం కమ్మానం విపాకో. లోకచిన్తాతి ‘‘కేన ను ఖో చన్దిమసూరియా కతా, కేన మహాపథవీ, కేన మహాసముద్దో, కేన సత్తా ఉప్పాదితా, కేన పబ్బతా, కేన అమ్బతాలనాళికేరాదయో’’తి ఏవరూపా లోకచిన్తా.