౧౧. నిమిత్తసుత్తవణ్ణనా

౧౦౩. ఏకాదసమేపి అధిచిత్తం సమథవిపస్సనాచిత్తమేవ. తీణి నిమిత్తానీతి తీణి కారణాని. కాలేన కాలన్తి కాలే కాలే, యుత్తకాలేతి అత్థో. కాలేన కాలం సమాధినిమిత్తం మనసికాతబ్బన్తిఆదీసు తం తం కాలం సల్లక్ఖేత్వా ఏకగ్గతాయ యుత్తకాలే ఏకగ్గతా మనసికాతబ్బా. ఏకగ్గతా హి ఇధ సమాధినిమిత్తన్తి వుత్తా. తత్ర వచనత్థో – సమాధియేవ నిమిత్తం సమాధినిమిత్తం. సేసపదద్వయేపి ఏసేవ నయో. పగ్గహోతి పన వీరియస్స నామం, ఉపేక్ఖాతి మజ్ఝత్తభావస్స. తస్మా వీరియస్స యుత్తకాలే వీరియం మనసికాతబ్బం, మజ్ఝత్తభావస్స యుత్తకాలే మజ్ఝత్తభావే ఠాతబ్బన్తి. ఠానం తం చిత్తం కోసజ్జాయ సంవత్తేయ్యాతి కారణం విజ్జతి యేన తం చిత్తం కోసజ్జభావే తిట్ఠేయ్య. ఇతరేసుపి ఏసేవ నయో. ఉపేక్ఖానిమిత్తంయేవ మనసి కరేయ్యాతి ఏత్థ చ ఞాణజవం ఉపేక్ఖేయ్యాతి అయమత్థో. ఆసవానం ఖయాయాతి అరహత్తఫలత్థాయ.

ఉక్కం బన్ధేయ్యాతి అఙ్గారకపల్లం సజ్జేయ్య. ఆలిమ్పేయ్యాతి తత్థ అఙ్గారే పక్ఖిపిత్వా అగ్గిం దత్వా నాళికాయ ధమన్తో అగ్గిం గాహాపేయ్య. ఉక్కాముఖే పక్ఖిపేయ్యాతి అఙ్గారే వియూహిత్వా అఙ్గారమత్థకే వా ఠపేయ్య, మూసాయ వా పక్ఖిపేయ్య. అజ్ఝుపేక్ఖతీతి పక్కాపక్కభావం ఉపధారేతి.

సమ్మా సమాధియతి ఆసవానం ఖయాయాతి అరహత్తఫలత్థాయ సమ్మా ఠపీయతి. ఏత్తావతా హి విపస్సనం వడ్ఢేత్వా అరహత్తప్పత్తో భిక్ఖు దస్సితో. ఇదాని తస్స ఖీణాసవస్స అభిఞ్ఞాయ పటిపదం దస్సేన్తో యస్స యస్స చాతిఆదిమాహ. తం హేట్ఠా వుత్తనయేనేవ వేదితబ్బం.

లోణకపల్లవగ్గో పఞ్చమో.