౧౦. పంసుధోవకసుత్తవణ్ణనా

౧౦౨. దసమే ధోవతీతి విక్ఖాలేతి. సన్ధోవతీతి సుట్ఠు ధోవతి, పునప్పునం ధోవతి. నిద్ధోవతీతి నిగ్గణ్హిత్వా ధోవతి. అనిద్ధన్తకసావన్తి అనీహతదోసం అనపనీతకసావం. పభఙ్గూతి పభిజ్జనసభావం, అధికరణీయం ఠపేత్వా ముట్ఠికాయ పహటమత్తం భిజ్జతి. పట్టికాయాతి సువణ్ణపట్టకాయ. గీవేయ్యకేతి గీవాలఙ్కారే.

అధిచిత్తన్తి సమథవిపస్సనాచిత్తం. అనుయుత్తస్సాతి భావేన్తస్స. సచేతసోతి చిత్తసమ్పన్నో. దబ్బజాతికోతి పణ్డితజాతికో. కామవితక్కాదీసు కామే ఆరబ్భ ఉప్పన్నో వితక్కో కామవితక్కో. బ్యాపాదవిహింససమ్పయుత్తా వితక్కా బ్యాపాదవిహింసవితక్కా నామ. ఞాతివితక్కాదీసు ‘‘అమ్హాకం ఞాతకా బహూ పుఞ్ఞవన్తా’’తిఆదినా నయేన ఞాతకే ఆరబ్భ ఉప్పన్నో వితక్కో ఞాతివితక్కో. ‘‘అసుకో జనపదో ఖేమో సుభిక్ఖో’’తిఆదినా నయేన జనపదమారబ్భ ఉప్పన్నో వితక్కో జనపదవితక్కో. ‘‘అహో వత మం పరే న అవజానేయ్యు’’న్తి ఏవం ఉప్పన్నో వితక్కో అనవఞ్ఞత్తిపటిసంయుత్తో వితక్కో నామ. ధమ్మవితక్కావసిస్సన్తీతి ధమ్మవితక్కా నామ దసవిపస్సనుపక్కిలేసవితక్కా. సో హోతి సమాధి న చేవ సన్తోతి సో అవసిట్ఠధమ్మవితక్కో విపస్సనాసమాధి అవూపసన్తకిలేసత్తా సన్తో న హోతి. న పణీతోతి న అతప్పకో. నప్పటిప్పస్సద్ధిలద్ధోతి న కిలేసపటిప్పస్సద్ధియా లద్ధో. న ఏకోదిభావాధిగతోతి న ఏకగ్గభావప్పత్తో. ససఙ్ఖారనిగ్గయ్హవారితగతోతి ససఙ్ఖారేన సప్పయోగేన కిలేసే నిగ్గణ్హిత్వా వారేత్వా వారితో, న కిలేసానం ఛిన్నన్తే ఉప్పన్నో, కిలేసే పన వారేత్వా ఉప్పన్నో.

హోతి సో, భిక్ఖవే, సమయోతి ఏత్థ సమయో నామ ఉతుసప్పాయం ఆహారసప్పాయం సేనాసనసప్పాయం పుగ్గలసప్పాయం ధమ్మస్సవనసప్పాయన్తి ఇమేసం పఞ్చన్నం సప్పాయానం పటిలాభకాలో. యం తం చిత్తన్తి యస్మిం సమయే తం విపస్సనాచిత్తం. అజ్ఝత్తంయేవ సన్తిట్ఠతీతి అత్తనియేవ తిట్ఠతి. నియకజ్ఝత్తఞ్హి ఇధ అజ్ఝత్తం నామ. గోచరజ్ఝత్తమ్పి వట్టతి. పుథుత్తారమ్మణం పహాయ ఏకస్మిం నిబ్బానగోచరేయేవ తిట్ఠతీతి వుత్తం హోతి. సన్నిసీదతీతి సుట్ఠు నిసీదతి. ఏకోది హోతీతి ఏకగ్గం హోతి. సమాధియతీతి సమ్మా ఆధియతి. సన్తోతిఆదీసు పచ్చనీకకిలేసవూపసమేన సన్తో. అతప్పకట్ఠేన పణీతో. కిలేసపటిప్పస్సద్ధియా లద్ధత్తా పటిప్పస్సద్ధలద్ధో. ఏకగ్గభావం గతత్తా ఏకోదిభావాధిగతో. కిలేసానం ఛిన్నన్తే ఉప్పన్నత్తా న సప్పయోగేన కిలేసే నిగ్గణ్హిత్వా వారేత్వా వారితోతి న ససఙ్ఖారనిగ్గయ్హవారితగతో. ఏత్తావతా అయం భిక్ఖు వివట్టేత్వా అరహత్తం పత్తో నామ హోతి.

ఇదాని ఖీణాసవస్స సతో అభిఞ్ఞాపటిపదం దస్సేన్తో యస్స యస్స చాతిఆదిమాహ. తత్థ అభిఞ్ఞా సచ్ఛికరణీయస్సాతి అభిజానిత్వా పచ్చక్ఖం కాతబ్బస్స. సతి సతిఆయతనేతి పుబ్బహేతుసఙ్ఖాతే చేవ ఇదాని చ పటిలద్ధబ్బే అభిఞ్ఞాపాదకజ్ఝానాదిభేదే చ సతి సతికారణే. విత్థారతో పన అయం అభిఞ్ఞాకథా విసుద్ధిమగ్గే (విసుద్ధి. ౨.౩౬౫ ఆదయో) వుత్తనయేనేవ వేదితబ్బా. ఆసవానం ఖయాతిఆది చేత్థ ఫలసమాపత్తివసేన వుత్తన్తి వేదితబ్బం.