౪౪. వన

ఠానినమాసిలిస్స గచ్ఛతి పవత్తతీతి ఆగమో నామ, కో-యమేత్థ ఠానీతి ఆహ-‘సరస్సాతి, సుత్తే అనువత్తస్స చ అవిజ్జమానత్తా ‘సరస్సా’తి కుతో లబ్భతీతి చోదేతి ‘నను చే’త్యాదినా. ఆగమసుతియా వనాదీనం ఠానిసుతియా అభావేపి సామత్థియా బ్యఞ్జనస్స వా ఆగమో సియా సరస్స వా, యది బ్యఞ్జనస్స వా సియా (న) ‘‘పదాదీనం క్వచీ’’తి (౫-౯౨) సుత్తిత మాచరియేన, తస్మా తదేవ ఞాపేతి ‘సరో యేవేత్థ ఠానీ భవితుమరహతీ’తి. వుచ్చతేచ్చాదినా పరిహారమాహ, నిపుబ్బా పదిస్మా అనప్పచ్చయే ‘‘పదాదీనం క్వచీ’’తి యుకఅన్తావయవో ‘‘తవగ్గవరనా’’దినా (౧-౪౮) యే దస్స జో ‘‘వగ్గల సేహితే’’తి (౧-౪౯) (యస్స జో) నిపజ్జనం, మానన్తత్యాదీసూతి అధికారాతి ‘‘క్యో భావకమ్మేస్వపరోక్ఖేసు మానన్తత్యాదీసూ’’తి (౫-౧౭) ఇతో మానన్తత్యాదీసుతి అధికారా, పచ్చయన్తరేతి మానన్తత్యాదీతో అఞ్ఞస్మిం పచ్చయే, కచ్చాయనేన ‘అతిప్పగోఖోతావా’తి సాధనత్థం ‘‘క్వచి ఓ బ్యఞ్జనే’’తి ఓకారాగమో గకారాగమో చ సుత్తన్తరేన విహితో, తం పకారన్తరేన సాధేతుం వుత్తియం-‘అతిప్పగో ఖో తావా’తి యం వుత్తం తం దస్సేతుం ‘అతిప్పా’తిఆది వుత్తం.