౧౦. పుబ్బణ్హసుత్తం

౧౫౬. ‘‘యే, భిక్ఖవే, సత్తా పుబ్బణ్హసమయం కాయేన సుచరితం చరన్తి, వాచాయ సుచరితం చరన్తి, మనసా సుచరితం చరన్తి, సుపుబ్బణ్హో, భిక్ఖవే, తేసం సత్తానం.

‘‘యే, భిక్ఖవే, సత్తా మజ్ఝన్హికసమయం కాయేన సుచరితం చరన్తి, వాచాయ సుచరితం చరన్తి, మనసా సుచరితం చరన్తి, సుమజ్ఝన్హికో, భిక్ఖవే, తేసం సత్తానం.

‘‘యే, భిక్ఖవే, సత్తా సాయన్హసమయం కాయేన సుచరితం చరన్తి, వాచాయ సుచరితం చరన్తి, మనసా సుచరితం చరన్తి, సుసాయన్హో, భిక్ఖవే, తేసం సత్తాన’’న్తి.

‘‘సునక్ఖత్తం సుమఙ్గలం, సుప్పభాతం సుహుట్ఠితం [సువుట్ఠితం (సీ. పీ.)];

సుఖణో సుముహుత్తో చ, సుయిట్ఠం బ్రహ్మచారిసు.

‘‘పదక్ఖిణం కాయకమ్మం, వాచాకమ్మం పదక్ఖిణం;

పదక్ఖిణం మనోకమ్మం, పణీధి తే పదక్ఖిణే [పణిధియో పదక్ఖిణా (సీ. పీ.), పణిధి తే పదక్ఖిణా (స్యా. కం.)];

పదక్ఖిణాని కత్వాన, లభన్తత్థే [లభతత్థే (సీ. పీ.)] పదక్ఖిణే.

‘‘తే అత్థలద్ధా సుఖితా, విరుళ్హా బుద్ధసాసనే;

అరోగా సుఖితా హోథ, సహ సబ్బేహి ఞాతిభీ’’తి. దసమం;

మఙ్గలవగ్గో పఞ్చమో.