(౧౫) ౫. మఙ్గలవగ్గో

౧. అకుసలసుత్తం

౧౪౭. ‘‘తీహి, భిక్ఖవే, ధమ్మేహి సమన్నాగతో యథాభతం నిక్ఖిత్తో ఏవం నిరయే. కతమేహి తీహి? అకుసలేన కాయకమ్మేన, అకుసలేన వచీకమ్మేన, అకుసలేన మనోకమ్మేన – ఇమేహి ఖో, భిక్ఖవే, తీహి ధమ్మేహి సమన్నాగతో యథాభతం నిక్ఖిత్తో ఏవం నిరయే.

‘‘తీహి, భిక్ఖవే, ధమ్మేహి సమన్నాగతో యథాభతం నిక్ఖిత్తో ఏవం సగ్గే. కతమేహి తీహి? కుసలేన కాయకమ్మేన, కుసలేన వచీకమ్మేన, కుసలేన మనోకమ్మేన – ఇమేహి ఖో, భిక్ఖవే, తీహి ధమ్మేహి సమన్నాగతో యథాభతం నిక్ఖిత్తో ఏవం సగ్గే’’తి. పఠమం.

౨. సావజ్జసుత్తం

౧౪౮. ‘‘తీహి, భిక్ఖవే, ధమ్మేహి సమన్నాగతో యథాభతం నిక్ఖిత్తో ఏవం నిరయే. కతమేహి తీహి? సావజ్జేన కాయకమ్మేన, సావజ్జేన వచీకమ్మేన, సావజ్జేన మనోకమ్మేన – ఇమేహి ఖో, భిక్ఖవే, తీహి ధమ్మేహి సమన్నాగతో యథాభతం నిక్ఖిత్తో ఏవం నిరయే.

‘‘తీహి, భిక్ఖవే, ధమ్మేహి సమన్నాగతో యథాభతం నిక్ఖిత్తో ఏవం సగ్గే. కతమేహి తీహి? అనవజ్జేన కాయకమ్మేన, అనవజ్జేన వచీకమ్మేన, అనవజ్జేన మనోకమ్మేన – ఇమేహి ఖో…పే… ఏవం సగ్గే’’తి. దుతియం.

౩. విసమసుత్తం

౧౪౯. ‘‘తీహి, భిక్ఖవే…పే… విసమేన కాయకమ్మేన, విసమేన వచీకమ్మేన, విసమేన మనోకమ్మేన – ఇమేహి ఖో…పే… ఏవం నిరయే.

‘‘తీహి, భిక్ఖవే, ధమ్మేహి…పే… సమేన కాయకమ్మేన, సమేన వచీకమ్మేన, సమేన మనోకమ్మేన – ఇమేహి ఖో…పే… ఏవం సగ్గే’’తి. తతియం.

౪. అసుచిసుత్తం

౧౫౦. ‘‘తీహి, భిక్ఖవే…పే… అసుచినా కాయకమ్మేన, అసుచినా వచీకమ్మేన, అసుచినా మనోకమ్మేన – ఇమేహి ఖో…పే… ఏవం నిరయే.

‘‘తీహి, భిక్ఖవే…పే… సుచినా కాయకమ్మేన, సుచినా వచీకమ్మేన, సుచినా మనోకమ్మేన – ఇమేహి ఖో, భిక్ఖవే, తీహి ధమ్మేహి సమన్నాగతో యథాభతం నిక్ఖిత్తో ఏవం సగ్గే’’తి. చతుత్థం.

౫. పఠమఖతసుత్తం

౧౫౧. ‘‘తీహి, భిక్ఖవే, ధమ్మేహి సమన్నాగతో బాలో అబ్యత్తో అసప్పురిసో ఖతం ఉపహతం అత్తానం పరిహరతి, సావజ్జో చ హోతి సానువజ్జో చ విఞ్ఞూనం, బహుఞ్చ అపుఞ్ఞం పసవతి. కతమేహి తీహి? అకుసలేన కాయకమ్మేన, అకుసలేన వచీకమ్మేన, అకుసలేన మనోకమ్మేన – ఇమేహి ఖో, భిక్ఖవే, తీహి ధమ్మేహి సమన్నాగతో బాలో అబ్యత్తో అసప్పురిసో ఖతం ఉపహతం అత్తానం పరిహరతి, సావజ్జో చ హోతి సానువజ్జో చ విఞ్ఞూనం, బహుఞ్చ అపుఞ్ఞం పసవతి.

‘‘తీహి, భిక్ఖవే, ధమ్మేహి సమన్నాగతో పణ్డితో వియత్తో సప్పురిసో అక్ఖతం అనుపహతం అత్తానం పరిహరతి, అనవజ్జో చ హోతి అననువజ్జో చ విఞ్ఞూనం, బహుఞ్చ పుఞ్ఞం పసవతి. కతమేహి తీహి? కుసలేన కాయకమ్మేన, కుసలేన వచీకమ్మేన, కుసలేన మనోకమ్మేన…పే…. పఞ్చమం.

౬. దుతియఖతసుత్తం

౧౫౨. ‘‘తీహి, భిక్ఖవే…పే… సావజ్జేన కాయకమ్మేన, సావజ్జేన వచీకమ్మేన, సావజ్జేన మనోకమ్మేన…పే….

‘‘తీహి, భిక్ఖవే…పే… అనవజ్జేన కాయకమ్మేన, అనవజ్జేన వచీకమ్మేన, అనవజ్జేన మనోకమ్మేన…పే…. ఛట్ఠం.

౭. తతియఖతసుత్తం

౧౫౩. ‘‘తీహి, భిక్ఖవే…పే… విసమేన కాయకమ్మేన, విసమేన వచీకమ్మేన, విసమేన మనోకమ్మేన…పే….

‘‘తీహి, భిక్ఖవే…పే… సమేన కాయకమ్మేన, సమేన వచీకమ్మేన, సమేన మనోకమ్మేన…పే…. సత్తమం.

౮. చతుత్థఖతసుత్తం

౧౫౪. ‘‘తీహి, భిక్ఖవే…పే… అసుచినా కాయకమ్మేన, అసుచినా వచీకమ్మేన, అసుచినా మనోకమ్మేన…పే….

‘‘తీహి, భిక్ఖవే…పే… సుచినా కాయకమ్మేన, సుచినా వచీకమ్మేన, సుచినా మనోకమ్మేన – ఇమేహి ఖో, భిక్ఖవే, తీహి ధమ్మేహి సమన్నాగతో పణ్డితో వియత్తో సప్పురిసో అక్ఖతం అనుపహతం అత్తానం పరిహరతి, అనవజ్జో చ హోతి అననువజ్జో చ విఞ్ఞూనం, బహుఞ్చ పుఞ్ఞం పసవతీ’’తి. అట్ఠమం.

౯. వన్దనాసుత్తం

౧౫౫. ‘‘తిస్సో ఇమా, భిక్ఖవే, వన్దనా. కతమా తిస్సో? కాయేన, వాచాయ, మనసా – ఇమా ఖో, భిక్ఖవే, తిస్సో వన్దనా’’తి. నవమం.

౧౦. పుబ్బణ్హసుత్తం

౧౫౬. ‘‘యే, భిక్ఖవే, సత్తా పుబ్బణ్హసమయం కాయేన సుచరితం చరన్తి, వాచాయ సుచరితం చరన్తి, మనసా సుచరితం చరన్తి, సుపుబ్బణ్హో, భిక్ఖవే, తేసం సత్తానం.

‘‘యే, భిక్ఖవే, సత్తా మజ్ఝన్హికసమయం కాయేన సుచరితం చరన్తి, వాచాయ సుచరితం చరన్తి, మనసా సుచరితం చరన్తి, సుమజ్ఝన్హికో, భిక్ఖవే, తేసం సత్తానం.

‘‘యే, భిక్ఖవే, సత్తా సాయన్హసమయం కాయేన సుచరితం చరన్తి, వాచాయ సుచరితం చరన్తి, మనసా సుచరితం చరన్తి, సుసాయన్హో, భిక్ఖవే, తేసం సత్తాన’’న్తి.

‘‘సునక్ఖత్తం సుమఙ్గలం, సుప్పభాతం సుహుట్ఠితం [సువుట్ఠితం (సీ. పీ.)];

సుఖణో సుముహుత్తో చ, సుయిట్ఠం బ్రహ్మచారిసు.

‘‘పదక్ఖిణం కాయకమ్మం, వాచాకమ్మం పదక్ఖిణం;

పదక్ఖిణం మనోకమ్మం, పణీధి తే పదక్ఖిణే [పణిధియో పదక్ఖిణా (సీ. పీ.), పణిధి తే పదక్ఖిణా (స్యా. కం.)];

పదక్ఖిణాని కత్వాన, లభన్తత్థే [లభతత్థే (సీ. పీ.)] పదక్ఖిణే.

‘‘తే అత్థలద్ధా సుఖితా, విరుళ్హా బుద్ధసాసనే;

అరోగా సుఖితా హోథ, సహ సబ్బేహి ఞాతిభీ’’తి. దసమం;

మఙ్గలవగ్గో పఞ్చమో.