౧౦. మోనేయ్యసుత్తం

౧౨౩. ‘‘తీణిమాని, భిక్ఖవే, మోనేయ్యాని. కతమాని తీణి? కాయమోనేయ్యం, వచీమోనేయ్యం, మనోమోనేయ్యం. కతమఞ్చ, భిక్ఖవే, కాయమోనేయ్యం? ఇధ, భిక్ఖవే, భిక్ఖు పాణాతిపాతా పటివిరతో హోతి, అదిన్నాదానా పటివిరతో హోతి, అబ్రహ్మచరియా పటివిరతో హోతి. ఇదం వుచ్చతి, భిక్ఖవే, కాయమోనేయ్యం.

‘‘కతమఞ్చ, భిక్ఖవే, వచీమోనేయ్యం? ఇధ, భిక్ఖవే, భిక్ఖు ముసావాదా పటివిరతో హోతి, పిసుణాయ వాచాయ పటివిరతో హోతి, ఫరుసాయ వాచాయ పటివిరతో హోతి, సమ్ఫప్పలాపా పటివిరతో హోతి. ఇదం వుచ్చతి, భిక్ఖవే, వచీమోనేయ్యం.

‘‘కతమఞ్చ, భిక్ఖవే, మనోమోనేయ్యం? ఇధ, భిక్ఖవే, భిక్ఖు ఆసవానం ఖయా అనాసవం చేతోవిముత్తిం పఞ్ఞావిముత్తిం దిట్ఠేవ ధమ్మే సయం అభిఞ్ఞా సచ్ఛికత్వా ఉపసమ్పజ్జ విహరతి. ఇదం వుచ్చతి, భిక్ఖవే, మనోమోనేయ్యం. ఇమాని ఖో, భిక్ఖవే, తీణి మోనేయ్యానీ’’తి.

‘‘కాయమునిం వచీమునిం, చేతోమునిం అనాసవం;

మునిం మోనేయ్యసమ్పన్నం, ఆహు సబ్బప్పహాయిన’’న్తి. దసమం;

ఆపాయికవగ్గో ద్వాదసమో.