பட²மகா³தா²ஸங்க³ணிகம்

ஸத்தனக³ரேஸு பஞ்ஞத்தஸிக்கா²பத³வண்ணனா

335. அட்³டு⁴ட்³ட⁴ஸதானீதி பஞ்ஞாஸாதி⁴கானி தீணி ஸதானி. விக்³க³ஹபதே³ன மனுஸ்ஸவிக்³க³ஹம் வுத்தம்.

அதிரேகந்தி பட²மகதி²னம். காளகந்தி ஸுத்³த⁴காளகம். பூ⁴தந்தி பூ⁴தாரோசனம். பி⁴க்கு²னீஸு ச அக்கோஸோதி ‘‘யா பன பி⁴க்கு²னீ பி⁴க்கு²ம் அக்கோஸேய்யா’’தி (பாசி. 1029) வுத்தம் ஸிக்கா²பத³ம்.

த்³வேபி ச பே⁴தா³தி த்³வே ஸங்க⁴பே⁴த³ஸிக்கா²பதா³னி. அந்தரவாஸகநாமேன அஞ்ஞாதிகாய பி⁴க்கு²னியா ஹத்த²தோ சீவரபடிக்³க³ஹணம் வுத்தம். ஸுத்தந்தி ஸுத்தம் விஞ்ஞாபேத்வா வாயாபனம். விகாலேதி விகாலபோ⁴ஜனம். சாரித்தந்தி புரேப⁴த்தம் பச்சா²ப⁴த்தம் சாரித்தம். நஹானந்தி ஓரேனத்³த⁴மாஸனஹானம்.

சீவரம் த³த்வாதி ஸமக்³கே³ன ஸங்கே⁴ன சீவரம் த³த்வா கி²ய்யனம். கி³ரக்³க³ந்தி நச்சகீ³தம். சரியாதி அந்தோவஸ்ஸம் சாரிகசரணம். தத்தே²வாதி வஸ்ஸம்வுத்தா²ய சாரிகம் அபக்கமித்வா தத்தே²வ நிவாஸனம் படிச்ச பஞ்ஞத்தஸிக்கா²பத³ம். ச²ந்த³தா³னேனாதி பாரிவாஸிகேன ச²ந்த³தா³னேன.

பாராஜிகானி சத்தாரீதி பி⁴க்கு²னீனம் அஸாதா⁴ரணானி. ஸோளஸாதி ஆதி³தோ பஞ்ச ஸிக்கா²பதா³னி, குலதூ³ஸனஞ்சாதி ச², பி⁴க்கு²னீனம் அஸாதா⁴ரணானி த³ஸ நிஸ்ஸக்³கி³யானி.

சதுத்திம்ஸாதி பட²மகதி²னஸுத்³த⁴காளகசீவரபடிக்³க³ஹணரூபியசீவரவாயாபனகோஸேய்யமிஸ்ஸகஏளகலோமதோ⁴வாபனது³தியபத்தவஜ்ஜிதானி பி⁴க்கு²விப⁴ங்கே³ த்³வாவீஸதி, பி⁴க்கு²னீனம் அஸாதா⁴ரணானி த்³வாத³ஸ சாதி சதுத்திம்ஸ. ச²பஞ்ஞாஸஸதந்தி வேஸாலியாதீ³ஸு பஞ்ஞத்தானி த்³வத்திம்ஸஸிக்கா²பதா³னி ட²பேத்வா ஸேஸா ச²பஞ்ஞாஸஸதம்.

த³ஸ கா³ரய்ஹாதி வோஸாஸஅப்படிஸம் விதி³தஸிக்கா²பத³த்³வயஞ்ச ட²பேத்வா ஸேஸானி த³ஸ பாடிதே³ஸனீயானி. த்³வே ஸத்ததி ஸேகி²யானி ஸுருஸுருகாரகஸாமிஸேனஹத்தே²னபானீயதா²லகபடிக்³க³ஹணஸஸித்த²கபத்ததோ⁴வனானி தீணி ட²பேத்வா ஸேஸானி ஸேகி²யானி.

ஸேய்யாதி அனுபஸம்பன்னேன ஸஹஸேய்யஸிக்கா²பத³ம். க²ணனேதி பத²வீக²ணனம். க³ச்ச² தே³வதேதி பூ⁴தகா³மஸிக்கா²பத³ம் வுத்தம். ஸப்பாணகம் ஸிஞ்சந்தி ஸப்பாணோத³கஸிஞ்சனம். மஹாவிஹாரோதி மஹல்லகவிஹாரோ.

அஞ்ஞந்தி அஞ்ஞவாத³கம். த்³வாரந்தி யாவ த்³வாரகோஸா அக்³க³ளட்ட²பனம். ஸஹத⁴ம்மோதி ஸஹத⁴ம்மிகம் வுச்சமானோ. பயோபானந்தி ஸுருஸுருகாரகஸிக்கா²பத³ம்.

ஏளகலோமோதி ஏளகலோமதோ⁴வாபனம். பத்தோ சாதி து³தியபத்தோ. ஓவாதோ³தி பி⁴க்கு²னுபஸ்ஸயம் உபஸங்கமித்வா ஓவாதோ³. பே⁴ஸஜ்ஜந்தி சதுமாஸபச்சயபவாரணாஸிக்கா²பத³ம். ஆரஞ்ஞிகோதி சதுத்த²பாடிதே³ஸனீயம். ஓவாதோ³தி ஓவாதா³ய வா ஸம்வாஸாய வா அக³மனம்.

337. ‘‘யே ச யாவததியகா’’தி பஞ்ஹஸ்ஸ ‘‘இமே கோ² யாவததியகா’’தி விஸ்ஸஜ்ஜனம் வத்வா தத³னந்தரம் ‘‘ஸாதா⁴ரணம் அஸாதா⁴ரண’’ந்திஆதி³பஞ்ஹானம் விஸ்ஸஜ்ஜனே வத்தப்³பே³ யஸ்மா தம் அவத்வா ‘‘கதி சே²த³னகானீ’’திஆதி³கே அட்ட² பஞ்ஹே அந்தரா விஸ்ஸஜ்ஜேத்வா தேஸம் அனந்தரா ‘‘வீஸம் த்³வே ஸதானி பி⁴க்கூ²னம்…பே… ச²சத்தாரீஸா பி⁴க்கூ²னம், பி⁴க்கு²னீஹி அஸாதா⁴ரணா’’திஆதி³னா உக்கமேனேவ ஸாதா⁴ரணாதி³பஞ்ஹா விஸ்ஸஜ்ஜிதா, தஸ்மா தம் உக்கமவிஸ்ஸஜ்ஜனகாரணம் த³ஸ்ஸேதும் ‘‘யஸ்மா பன யே ச யாவததியகாதி அயம் பஞ்ஹோ’’திஆதி³மாஹ.

338. தோ⁴வனஞ்ச படிக்³க³ஹோதிஆதி³கா³தா² அட்ட²கதா²சரியானம் கா³தா²வ. ச²ப்³ப³ஸ்ஸானி நிஸீத³னந்தி த்³வே ஸிக்கா²பதா³னி. த்³வே லோமாதி தியோஜனாதிக்கமதோ⁴வாபனவஸேன த்³வே ஏளகலோமஸிக்கா²பதா³னி. வஸ்ஸிகா ஆரஞ்ஞகேன சாதி வஸ்ஸிகஸாடிகா பரியேஸனஅரஞ்ஞகேஸு ஸேனாஸனேஸு விஹரணஸிக்கா²பதே³ன ஸஹ.

பணீதந்தி பணீதபோ⁴ஜனவிஞ்ஞாபனம். ஊனந்தி ஊனவீஸதிவஸ்ஸூபஸம்பாத³னம். மாதுகா³மேன ஸத்³தி⁴ந்தி ஸம்விதா⁴ய க³மனம் வுத்தம். யா ஸிக்கா²தி யம் ஸிக்கா²பத³ம். நிஸீத³னே ச யா ஸிக்கா²தி பமாணாதிக்கந்தனிஸீத³னகாராபனே யம் ஸிக்கா²பத³ம். ததா² வஸ்ஸிகா யா ச ஸாடிகாதி ஏத்தா²பி.

பாளியம் ஸதம் ஸத்ததி ச²ச்சேவிமே ஹோந்தி உபி⁴ன்னம் அஸாதா⁴ரணாதி பி⁴க்கூ²னம் பி⁴க்கு²னீஹி அஸாதா⁴ரணா ச²சத்தாரீஸ, பி⁴க்கு²னீனம் பி⁴க்கூ²ஹி அஸாதா⁴ரணா திம்ஸாதி⁴கம் ஸதஞ்சாதி ஏவம் உபி⁴ன்னம் அஸாதா⁴ரணா ச ச²ஸத்ததிஅதி⁴கம் ஸதம் ஸிக்கா²பதா³னீதி அத்தோ². ஸதம் ஸத்ததி சத்தாரீதி உபி⁴ன்னம் ஸாதா⁴ரணஸிக்கா²னம் க³ணனா சதுஸத்ததிஅதி⁴கம் ஸதம் ஸிக்கா²பதா³னீதி அத்தோ².

விப⁴த்தியோதி ஆபத்திக்க²ந்தா⁴ சேவ உபோஸத²பவாரணாத³யோ ச அதி⁴ப்பேதா. தே ஹி பாராஜிகாதி³பே⁴தே³ன, பி⁴க்கு²உபோஸதா²தி³பே⁴தே³ன ச விப⁴ஜீயந்தி. தேனாஹ ‘‘விப⁴த்தியோ’’திஆதி³. தேஸந்தி அட்ட²ன்னம் பாராஜிகாதீ³னம். த்³வீஹீதிஆதி³ விவாதா³தி⁴கரணாதீ³னம் ஸமதே²ஹி வூபஸமத³ஸ்ஸனம்.

ஸத்தனக³ரேஸு பஞ்ஞத்தஸிக்கா²பத³வண்ணனா நிட்டி²தா.

பாராஜிகாதி³ஆபத்திவண்ணனா

339. இத³ந்தி ‘‘பாராஜிகந்தி யம் வுத்த’’ந்திஆதி³னா வுத்தம் வசனம் ஸந்தா⁴ய வத³தி. இத³ஞ்ஹி ஹேட்டா² ‘‘க³ருக லஹுக’’ந்திஆதி³னா உத்³த⁴டபஞ்ஹேஸு அனாக³தம்பி ‘‘ஸப்³பா³னிபேதானி வியாகரோஹி, ஹந்த³ வாக்யம் ஸுணோம தே’’தி ஏத்த² யதா²வுத்தானி அஞ்ஞானிபி ‘‘ஸப்³பா³னிபேதானி வியாகரோஹி, ஹந்த³ வாக்யம் ஸுணோமா’’தி ஏவம் க³ஹிதமேவாதி த³ஸ்ஸேந்தோ ‘‘இமினா பன ஆயாசனவசனேன ஸங்க³ஹிதஸ்ஸா’’திஆதி³ வுத்தம்.

அதிவஸ்ஸதீதி ஓவஸ்ஸதி, வஸ்ஸோத³கம் பவிஸதீதி அத்தோ². த⁴ம்மானந்தி யதா² சதுபச்சயே தா⁴ரயதீதி த⁴ம்மோ, தேஸம். தேனாஹ ‘‘ஸங்க²தத⁴ம்மான’’ந்தி. கா³தா²ஸங்க³ணிகந்தி கா³தா²ஸங்க³ஹோ, தே தே அத்தா² கா³தா²ஹி ஸங்க³ஹேத்வா க³ணீயந்தி கதீ²யந்தி ஏத்தா²தி ஹி கா³தா²ஸங்க³ணிகம்.

பாராஜிகாதி³ஆபத்திவண்ணனா நிட்டி²தா.

பட²மகா³தா²ஸங்க³ணிகவண்ணனானயோ நிட்டி²தோ.