அதி⁴கரணபே⁴த³ம்

உக்கோடனபே⁴தா³தி³கதா²வண்ணனா

341. ‘‘அலம் ஆவுஸோ’’தி அத்தபச்சத்தி²கே ஸஞ்ஞாபேத்வாதி பத்தசீவராதி³அத்தா²ய அலம் ப⁴ண்ட³னாதி³கரணந்தி விவாதா³தீ³ஸு தோ³ஸத³ஸ்ஸனமத்தேன ஸஞ்ஞாபேத்வா அஞ்ஞமஞ்ஞம் க²மாபேத்வா வூபஸமேந்தி, ந பன அஞ்ஞமஞ்ஞம் ஆபத்தானாபத்தித³ஸ்ஸனவஸேனாதி அதி⁴ப்பாயோ. தேனாஹ ‘‘பாளிமுத்தகவினிச்ச²யேனேவா’’தி.

விஸமானி காயகம்மாதீ³னி நிஸ்ஸிதோ பி⁴க்கு² விஸமனிஸ்ஸிதோ நாம, மிச்சா²தி³ட்டி²னிஸ்ஸிதோ க³ஹனனிஸ்ஸிதோ, ப³லவந்தே புரிஸே நிஸ்ஸிதோ ப³லவனிஸ்ஸிதோ நாமாதி த³ஸ்ஸேந்தோ ‘‘ஏகோ விஸமானீ’’திஆதி³மாஹ.

உக்கோடனபே⁴தா³தி³கதா²வண்ணனா நிட்டி²தா.

அதி⁴கரணனிதா³னாதி³வண்ணனா

342. ஆபத்திம் நிஸ்ஸாய உப்பஜ்ஜனகஆபத்திவஸேனாதி பரேஸம், அத்தனோ ச ஆபத்திம் படிச்சா²தே³ந்தானம் வஜ்ஜபடிச்சா²தீ³னம் பாராஜிகாதி³ஆபத்திமேவ ஸந்தா⁴ய வுத்தம், ந ஸப்³பா³பத்தியோ. கிச்சம் நிஸ்ஸாய உப்பஜ்ஜனககிச்சானந்தி உக்கே²பனீயாதி³கம்மம் நிஸ்ஸாய உப்பஜ்ஜனகானம் தத³னுவத்திகாய பி⁴க்கு²னியா யாவததியானுஸ்ஸாவனானம் கிச்சானம் வஸேன, ந ஸப்³பே³ஸம் கிச்சானம் வஸேனாதி.

344. பாளியம் ‘‘கதிஹி அதி⁴கரணேஹீ’’தி புச்சா²ய ‘‘ஏகேன அதி⁴கரணேன கிச்சாதி⁴கரணேனா’’தி வுத்தம். ‘‘கதிஸு டா²னேஸூ’’தி புச்சா²ய ‘‘தீஸு டா²னேஸு ஸங்க⁴மஜ்ஜே², க³ணமஜ்ஜே², புக்³க³லஸ்ஸ ஸந்திகே’’தி வுத்தம். ‘‘கதிஹி ஸமதே²ஹீ’’தி புச்சா²ய ‘‘தீஹி ஸமதே²ஹீ’’தி வுத்தம். தீஹிபி ஏதேஹி ஏகோ வூபஸமனப்பகாரோவ புச்சி²தோ, விஸ்ஸஜ்ஜிதோ சாதி வேதி³தப்³போ³.

348. விவாதா³தி⁴கரணம் ஹோதி அனுவாதா³தி⁴கரணந்திஆதீ³ஸு விவாதா³தி⁴கரணமேவ அனுவாதா³தி⁴கரணாதி³பி ஹோதீதி புச்சா²ய விவாதா³தி⁴கரணம் விவாதா³தி⁴கரணமேவ ஹோதி, அனுவாதா³த³யோ ந ஹோதீதி விஸ்ஸஜ்ஜனம்.

அதி⁴கரணனிதா³னாதி³வண்ணனா நிட்டி²தா.

ஸத்தஸமத²னானாத்தா²தி³வண்ணனா

354. அதி⁴கரணபுச்சா²விஸ்ஸஜ்ஜனே பாளியம் விபச்சயதாய வோஹாரோதி விரூபவிபாகாய அஞ்ஞமஞ்ஞம் து³க்கு²ப்பாத³னாய காயவசீவோஹாரோ. மேத⁴க³ந்தி வுத்³தி⁴ப்பத்தோ கலஹோ.

அனுஸம்பவங்கதாதி விபத்திசோத³னாய அனு அனு ஸம்யுஜ்ஜனவஸேன நின்னதா.

அப்³பு⁴ஸ்ஸஹனதாதி அதிவிய ஸஞ்ஜாதுஸ்ஸாஹதா. அனுப³லப்பதா³னந்தி சோத³கானம்பி உபத்த²ம்ப⁴கரணம். கம்மஸங்க³ஹாபா⁴வேனாதி ஸங்க⁴ஸம்முக²தாதி³மத்தஸ்ஸ ஸம்முகா²வினயஸ்ஸ ஸங்கா⁴தீ³ஹி கத்தப்³ப³கிச்சேஸு ஸங்க³ஹாபா⁴வா.

ஸத்தஸமத²னானாத்தா²தி³வண்ணனா நிட்டி²தா.

அதி⁴கரணபே⁴த³வண்ணனானயோ நிட்டி²தோ.

து³தியகா³தா²ஸங்க³ணிகம்

சோத³னாதி³புச்சா²விஸ்ஸஜ்ஜனாவண்ணனா

359. து³தியகா³தா²ஸங்க³ணிகாய ‘‘சோத³னா கிமத்தா²யா’’திஆதி³கா புச்சா² உபாலித்தே²ரேன கதா. ‘‘சோத³னா ஸாரணத்தா²யா’’திஆதி³விஸ்ஸஜ்ஜனம் ப⁴க³வதா வுத்தம். உபாலித்தே²ரோ ஸயமேவ புச்சி²த்வா விஸ்ஸஜ்ஜனம் அகாஸீதிபி வத³ந்தி.

மந்தக்³க³ஹணந்தி தேஸம் விசாரணாக³ஹணம், ஸுத்தந்திகத்தே²ரானம், வினயத⁴ரத்தே²ரானஞ்ச அதி⁴ப்பாயக³ஹணந்தி அத்தோ². பாடேக்கம் வினிச்ச²யஸன்னிட்டா²பனத்த²ந்தி தேஸம் பச்சேகம் அதி⁴ப்பாயம் ஞத்வா தேஹி ஸமுட்டா²பிதனயம்பி க³ஹேத்வா வினிச்ச²யபரியோஸாபனத்த²ந்தி அதி⁴ப்பாயோ.

‘‘மா கோ² துரிதோ அப⁴ணீ’’திஆதி³னா அபி⁴முகே² டி²தம் கஞ்சி அனுவிஜ்ஜகம் ஓவத³ந்தேன விய தே²ரேன அனுவிஜ்ஜகவத்தம் கதி²தம்.

அனுயுஞ்ஜனவத்தந்தி அனுயுஜ்ஜனக்கமம், தம் பன யஸ்மா ஸப்³ப³ஸிக்கா²பத³வீதிக்கமவிஸயேபி தம்தம்ஸிக்கா²பதா³னுலோமேன கத்தப்³ப³ம், தஸ்மா ‘‘ஸிக்கா²பதா³னுலோமிக’’ந்தி வுத்தம். அத்தனோ க³திம் நாஸேதீதி அத்தனோ ஸுக³திக³மனம் வினாஸேதி.

அனுஸந்தி⁴த-ஸத்³தோ³ பா⁴வஸாத⁴னோதி ஆஹ ‘‘அனுஸந்தி⁴தந்தி கதா²னுஸந்தீ⁴’’தி. வத்தானுஸந்தி⁴தேனாதி ஏத்தா²பி ஏஸேவ நயோ. வத்தானுஸந்தி⁴தேனாதி ஆசாரானுஸந்தி⁴னா, ஆசாரேன ஸத்³தி⁴ம் ஸமேந்தியா படிஞ்ஞாயாதி அத்தோ². தேனாஹ ‘‘யா அஸ்ஸ வத்தேனா’’திஆதி³.

பாளியம் ஸஞ்சிச்ச ஆபத்திந்திஆதி³ அலஜ்ஜிலஜ்ஜிலக்க²ணம் பி⁴க்கு²பி⁴க்கு²னீனம் வஸேன வுத்தம் தேஸஞ்ஞேவ ஸப்³ப³ப்பகாரதோ ஸிக்கா²பதா³தி⁴காரத்தா. ஸாமணேராதீ³னம்பி ஸாதா⁴ரணவஸேன பன ஸஞ்சிச்ச யதா²ஸகம் ஸிக்கா²பத³வீதிக்கமனாதி³கம் அலஜ்ஜிலஜ்ஜிலக்க²ணம் வேதி³தப்³ப³ம்.

கதா²னுஸந்தி⁴வசனந்தி சுதி³தகஅனுவிஜ்ஜகானம் கதா²ய அனுஸந்தி⁴யுத்தம் வசனம் ந ஜானாதி, தேஹி ஏகஸ்மிம் காரணே வுத்தே ஸயம் தம் அஸல்லக்கே²த்வா அத்தனோ அபி⁴ருசிதமேவ அஸம்ப³ந்தி⁴தத்த²ந்தி அத்தோ². வினிச்ச²யானுஸந்தி⁴வசனஞ்சாதி அனுவிஜ்ஜகேன கதஸ்ஸ ஆபத்தானாபத்திவினிச்ச²யஸ்ஸ அனுகு³ணம், ஸம்ப³ந்த⁴வசனஞ்ச.

சோத³னாதி³புச்சா²விஸ்ஸஜ்ஜனாவண்ணனா நிட்டி²தா.