விமதிவினோத³னீ-டீகா (து³தியோ பா⁴கோ³)

5. பாசித்தியகண்ட³ம்

1. முஸாவாத³வக்³கோ³

1. முஸாவாத³ஸிக்கா²பத³வண்ணனா

1. முஸாவாத³வக்³க³ஸ்ஸ பட²மஸிக்கா²பதே³ கு²த்³த³கானந்தி ஏத்த² ‘‘கு²த்³த³க-ஸத்³தோ³ ப³ஹு-ஸத்³த³பரியாயோ’’தி வத³ந்தி. தத்தா²தி தேஸு வக்³கே³ஸு, கு²த்³த³கேஸு வா. ‘‘ஜானிதப்³ப³தோ’’தி ஹேதுனோ விபக்கே²பி நிப்³பா³னே வத்தனதோ அனேகந்திகத்தே பரேஹி வுத்தே ‘‘ந மயா அயம் ஹேது வுத்தோ’’தி தம் காரணம் படிச்சா²தே³தும் புன ‘‘ஜாதித⁴ம்மதோதி மயா வுத்த’’ந்திஆதீ³னி வத³தி. ‘‘ஸம்பஜான’’ந்தி வத்தப்³பே³ அனுனாஸிகலோபேன நித்³தே³ஸோதி ஆஹ ‘‘ஜானந்தோ’’தி.

2. ஸம்பஜானமுஸாவாதே³தி அத்தனா வுச்சமானஸ்ஸ அத்த²ஸ்ஸ விதத²பா⁴வம் புப்³பே³பி ஜானித்வா, வசனக்க²ணே ச ஜானந்தஸ்ஸ முஸாவாத³ப⁴ணனே. தேனாஹ ‘‘ஜானித்வா’’திஆதி³. முஸாவாதே³தி ச நிமித்தத்தே² பு⁴ம்மம், தஸ்மா முஸாப⁴ணனனிமித்தம் பாசித்தியந்தி ஏவமேத்த², இதோ பரேஸுபி ஈதி³ஸேஸு அத்தோ² வேதி³தப்³போ³.

3. வத³ந்தி ஏதாயாதி வாசாதி ஆஹ ‘‘மிச்சா²’’திஆதி³. ‘‘த⁴னுனா விஜ்ஜ²தீ’’திஆதீ³ஸு விய ‘‘சக்கு²னா தி³ட்ட²’’ந்தி பாகடவஸேன வுத்தந்தி ஆஹ ‘‘ஓளாரிகேனா’’தி.

11. க³தோ ப⁴விஸ்ஸதீதி ஏத்தா²பி ஸன்னிட்டா²னதோ வுத்தத்தா முஸாவாதோ³ ஜாதோ. ஆபத்திந்தி பாசித்தியாபத்திம், ந து³ப்³பா⁴ஸிதம். ஜாதிஆதீ³ஹி த³ஸஹி அக்கோஸவத்தூ²ஹி பரம் த³வா வத³ந்தஸ்ஸ ஹி தம் ஹோதி. சாரேஸுந்தி உபனேஸும். வத்து²விபரீததா, விஸம்வாத³னபுரேக்கா²ரதா, யமத்த²ம் வத்து²காமோ, தஸ்ஸ புக்³க³லஸ்ஸ விஞ்ஞாபனபயோகோ³ சாதி இமானேத்த² தீணி அங்கா³னி. வத்து²விபரீததாய ஹி அஸதி விஸம்வாத³னபுரேக்கா²ரதாய விஞ்ஞாபிதேபி முஸாவாதோ³ ந ஹோதி, து³க்கடமத்தமேவ ஹோதி. தஸ்மா ஸாபி அங்க³மேவாதி க³ஹேதப்³ப³ம். உத்தரிமனுஸ்ஸத⁴ம்மாரோசனத்த²ம் முஸா ப⁴ணந்தஸ்ஸ பாராஜிகம், பரியாயேன து²ல்லச்சயம், அமூலகேன பாராஜிகேன அனுத்³த⁴ம்ஸனத்த²ம் ஸங்கா⁴தி³ஸேஸோ, ஸங்கா⁴தி³ஸேஸேனானுத்³த⁴ம்ஸனஓமஸவாதா³தீ³ஸு பாசித்தியம், அனுபஸம்பன்னேஸு து³க்கடம், உக்கட்ட²ஹீனஜாதிஆதீ³ஹி த³வா அக்கோஸந்தஸ்ஸ து³ப்³பா⁴ஸிதம், கேவலம் முஸா ப⁴ணந்தஸ்ஸ இத⁴ பாசித்தியம் வுத்தம்.

முஸாவாத³ஸிக்கா²பத³வண்ணனா நிட்டி²தா.

2. ஓமஸவாத³ஸிக்கா²பத³வண்ணனா

13. து³தியே புப்³பே³ பதிட்டி²தாரப்பதே³ஸம் புன அரே பத்தேதி பட²மம் பூ⁴மியம் பதிட்டி²தனேமிப்பதே³ஸே பரிவத்தேத்வா புன பூ⁴மியம் பதிட்டி²தேதி அத்தோ².

15. புப்³பே³தி அட்டு²ப்பத்தியம். புப்ப²ச²ட்³ட³கா நாம க³ப்³ப⁴மலாதி³ஹாரகா. தச்ச²ககம்மந்தி பாஸாணகோட்டனாதி³வட்³ட⁴கீகம்மம். ஹத்த²முத்³தா³க³ணனாதி அங்கு³லிஸங்கோசனேனேவ க³ணனா. அச்சி²த்³த³கக³ணனா நாம ஏகட்டா²னத³ஸட்டா²னாதீ³ஸு ஸாரியோ ட²பேத்வா அனுக்கமேன க³ணனா. ஆதி³-ஸத்³தே³ன ஸங்கலனபடஉப்பாத³னவோக்லனபா⁴க³ஹாராதி³வஸேன பவத்தா பிண்ட³க³ணனா க³ஹிதா. யஸ்ஸ ஸா பகு³ணா, ஸோ ருக்க²ம்பி தி³ஸ்வா ‘‘ஏத்தகானி ஏத்த² பண்ணானீ’’தி ஜானாதி. யப⁴-மேது²னேதி வசனதோ ஆஹ ‘‘ய-கார-ப⁴-காரே’’திஆதி³.

16. ந புரிமேனாதி முஸாவாத³ஸிக்கா²பதே³ன. ஸோபி ஆபத்தியாதி உபஸக்³கா³தி³விஸிட்டே²ஹிபி வத³ந்தோ பாசித்தியாபத்தியாவ காரேதப்³போ³.

26. து³ப்³பா⁴ஸிதந்தி ஸாமஞ்ஞதோ வுத்தத்தா பாளியம் அனாக³தேஹிபி பரம்முகா² வத³ந்தஸ்ஸபி து³ப்³பா⁴ஸிதமேவாதி ஆசரியா வத³ந்தி ததோ லாமகாபத்தியா அபா⁴வா, அனாபத்தியாபேத்த² ப⁴விதும் அயுத்தத்தா. ஸப்³ப³ஸத்தாதி ஏத்த² வசனத்த²விதூ³ஹி திரச்சா²னாத³யோபி க³ஹிதா.

35. அனுஸாஸனீபுரேக்கா²ரதாய வா பாபக³ரஹிதாய வா வத³ந்தானம் சித்தஸ்ஸ லஹுபரிவத்திபா⁴வதோ அந்தரந்தரா கோபே உப்பன்னேபி அனாபத்தி. காயவிகாரமத்தேனபி ஓமஸனஸம்ப⁴வதோ ‘‘திஸமுட்டா²னம், காயகம்ம’’ந்தி ச வுத்தம். பரிவாரே பன ‘‘சதுத்தே²ன ஆபத்திஸமுட்டா²னேன…பே… து³ப்³பா⁴ஸிதம் ஆபஜ்ஜேய்யாதி. ந ஹீதி வத்தப்³ப³’’ந்திஆதி³னா (பரி. 276) இதரானி ஸமுட்டா²னானி படிக்கி²பித்வா பஞ்சமஸ்ஸேவ வுத்தத்தா ஆஹ ‘‘து³ப்³பா⁴ஸிதாபத்தி பனேத்த² வாசாசித்ததோ ஸமுட்டா²தீ’’தி. த³வகம்யதாய ஹி காயவாசாசித்தேஹி ஓமஸந்தஸ்ஸபி வாசாசித்தமேவ ஆபத்தியா அங்க³ம் ஹோதி, ந பன காயோ விஜ்ஜமானோபி த⁴ம்மதே³ஸனாபத்தி விய கேவலம் காயவிகாரேனேவ. ஓமஸந்தஸ்ஸ பன கிஞ்சாபி இத⁴ து³ப்³பா⁴ஸிதாபத்தியா அனாபத்தி, அத² கோ² காயகீளாபடிக்கே²பஸிக்கா²பதே³ன து³க்கடமேவாதி த³ட்ட²ப்³ப³ம். உபஸம்பன்னம் ஜாதிஆதீ³ஹி அனஞ்ஞாபதே³ஸேன அக்கோஸனம், தஸ்ஸ ஜானனம், அத்த²புரேக்கா²ரதாதீ³னம் அபா⁴வோதி இமானேத்த² தீணி அங்கா³னி.

ஓமஸவாத³ஸிக்கா²பத³வண்ணனா நிட்டி²தா.

3. பேஸுஞ்ஞஸிக்கா²பத³வண்ணனா

36. ததியே ப⁴ண்ட³னம் ஜாதம் ஏதேஸந்தி ப⁴ண்ட³னஜாதா. பிஸதீதி பிஸுணா, வாசா, ஸமக்³கே³ பி⁴ன்னே கரோதீதி அத்தோ². தாய வாசாய ஸமன்னாக³தோ பிஸுணோ, தஸ்ஸ கம்மம் பேஸுஞ்ஞந்தி ஏவமேத்த² அத்தோ² வேதி³தப்³போ³.

இதா⁴பி ஜாதிஆதீ³ஹி த³ஸஹி வத்தூ²ஹி பேஸுஞ்ஞம் உபஸம்ஹரந்தஸ்ஸேவ பாசித்தியம், இதரேஹி அக்கோஸவத்தூ²ஹி து³க்கடம். அனக்கோஸவத்தூ²ஹி பன உபஸம்ஹரந்தஸ்ஸ து³க்கடமேவாதி வத³ந்தி. ஜாதிஆதீ³ஹி அனஞ்ஞாபதே³ஸேன அக்கோஸந்தஸ்ஸ பி⁴க்கு²னோ ஸுத்வா பி⁴க்கு²ஸ்ஸ உபஸம்ஹரணம், பியகம்யதாபே⁴தா³தி⁴ப்பாயேஸு அஞ்ஞதரதா, தஸ்ஸ விஜானனாதி இமானேத்த² தீணி அங்கா³னி.

பேஸுஞ்ஞஸிக்கா²பத³வண்ணனா நிட்டி²தா.

4. பத³ஸோத⁴ம்மஸிக்கா²பத³வண்ணனா

45. சதுத்தே² புரிமப்³யஞ்ஜனேன ஸதி³ஸந்தி ‘‘ரூபம் அனிச்ச’’ந்தி ஏத்த² அனிச்ச-ஸத்³தே³ன ஸதி³ஸம் ‘‘வேத³னா அனிச்சா’’தி ஏத்த² அனிச்ச-ஸத்³த³ம் வத³தி. அக்க²ரஸமூஹோதி அவிப⁴த்திகோ வுத்தோ. பத³ந்தி விப⁴த்திஅந்தம் வுத்தம்.

ஏகம் பத³ந்தி கா³தா²பத³மேவ ஸந்தா⁴ய வத³தி. பத³க³ணனாயாதி கா³தா²பத³க³ணனாய. அபாபுணித்வாதி ஸத்³தி⁴ம் அகதே²த்வா. ஏதேன கா³தா²ய பச்சி²மபாதே³ வுச்சமானே ஸாமணேரோ பட²மபாதா³தி³ம் வத³தி, ஆபத்தியேவ, தஸ்மிம் நிஸ்ஸத்³தே³ ஏவ இதரேன வத்தப்³ப³ந்தி த³ஸ்ஸேதி.

அட்ட²கதா²னிஸ்ஸிதோதி ஸங்கீ³தித்தயாருள்ஹம் போராணட்ட²கத²ம் ஸந்தா⁴ய வத³தி. இதா³னிபி ‘‘யதா²பி தீ³பிகோ நாம, நிலீயித்வா க³ண்ஹதே மிகே³’’தி (மி. ப. 6.1.5; விஸுத்³தி⁴. 1.217; தீ³. நி. அட்ட². 2.374; ம. நி. அட்ட². 1.107; பாரா. அட்ட². 2.165; படி. ம. அட்ட². 2.1.163) ஏவமாதி³கம் அட்ட²கதா²வசனம் அத்தே²வ, பு³த்³த⁴கோ⁴ஸாசரியாதீ³ஹி போராணட்ட²கதா²னயேன வுத்தம்பி இத⁴ ஸங்க³ஹேதப்³ப³ந்தி வத³ந்தி. பாளினிஸ்ஸிதோதி உதா³னவக்³க³ஸங்க³ஹாதி³கோ. விவட்டூபனிஸ்ஸிதந்தி நிப்³பா³னனிஸ்ஸிதம். தே²ரஸ்ஸாதி நாக³ஸேனத்தே²ரஸ்ஸ. மக்³க³கதா²தீ³னி பகரணானி.

46. பாளியம் அக்க²ராயாதிஆதி³ லிங்க³விபல்லாஸேன வுத்தம், அக்க²ரேனாதிஆதி³னா அத்தோ² க³ஹேதப்³போ³.

48. உபசாரம் முஞ்சித்வாதி பரிஸாய த்³வாத³ஸஹத்த²ம் முஞ்சித்வா ஏகதோ டி²தஸ்ஸ வா நிஸின்னஸ்ஸ வா அனுபஸம்பன்னஸ்ஸ அகதே²த்வா அஞ்ஞே உத்³தி³ஸ்ஸ ப⁴ணந்தஸ்ஸாபி அனாபத்தி. ஸசே பன தூ³ரே நிஸின்னம்பி உத்³தி³ஸ்ஸ ப⁴ணதி, ஆபத்தி ஏவ. ஓபாதேதீதி ஸத்³தி⁴ம் கதே²தி. அனுபஸம்பன்னதா, வுத்தலக்க²ணத⁴ம்மம் பத³ஸோ வாசனதா, ஏகதோ ப⁴ணனஞ்சாதி இமானேத்த² தீணி அங்கா³னி.

பத³ஸோத⁴ம்மஸிக்கா²பத³வண்ணனா நிட்டி²தா.

5. ஸஹஸேய்யஸிக்கா²பத³வண்ணனா

50-51. பஞ்சமே தத்ரித³ம் நித³ஸ்ஸனந்தி ஸேஸோ. தி³ரத்ததிரத்தந்தி ஏத்த² தி³ரத்தக்³க³ஹணம் வசனாலங்காரத்த²ம், நிரந்தரம் திஸ்ஸோவ ரத்தியோ வஸித்வா சதுத்த²தி³வஸாதீ³ஸு ஸயந்தஸ்ஸேவ ஆபத்தி, ந ஏகந்தரிகாதி³வஸேன ஸயந்தஸ்ஸாதி த³ஸ்ஸனத்த²ம்பீதி த³ட்ட²ப்³ப³ம். தி³ரத்தவிஸிட்ட²ஞ்ஹி திரத்தம் வுச்சமானம், தேன அனந்தரிகமேவ திரத்தம் தீ³பேதீதி. பஞ்சஹி ச²த³னேஹீதி இட்ட²கஸிலாஸுதா⁴திணபண்ணேஹி. வாசுக்³க³தவஸேனாதி பகு³ணவஸேன. தி³யட்³ட⁴ஹத்து²ப்³பே³தோ⁴ வட்³ட⁴கீஹத்தே²ன க³ஹேதப்³போ³. ஏகூபசாரோ ஏகேன மக்³கே³ன பவிஸித்வா அப்³போ⁴காஸம் அனுக்கமித்வா ஸப்³ப³த்த² அனுபரிக³மனயோக்³கோ³, ஏதம் ப³ஹுத்³வாரம்பி ஏகூபசாரோவ. தத்த² பன குட்டாதீ³ஹி ருந்தி⁴த்வா விஸும் த்³வாரம் யோஜேந்தி, நானூபசாரோ ஹோதி. ஸசே பன ருந்த⁴தி ஏவ, விஸும் த்³வாரம் ந யோஜேந்தி, ‘‘ஏதம்பி ஏகூபசாரமேவ மத்திகாதீ³ஹி பிஹிதத்³வாரோ விய க³ப்³போ⁴’’தி க³ஹேதப்³ப³ம். அஞ்ஞதா² க³ப்³பே⁴ பவிஸித்வா பமுகா²தீ³ஸு நிபன்னானுபஸம்பன்னேஹி ஸஹஸேய்யாபரிமுத்தியா க³ப்³ப⁴த்³வாரம் மத்திகாதீ³ஹி பித³ஹாபேத்வா உட்டி²தே அருணே விவராபேந்தஸ்ஸபி அனாபத்தி ப⁴வேய்யாதி.

தேஸம் பயோகே³ பயோகே³ பி⁴க்கு²ஸ்ஸ ஆபத்தீதி ஏத்த² கேசி ‘‘அனுட்ட²ஹனேன அகிரியஸமுட்டா²னா ஆபத்தி வுத்தா தஸ்மிம் க²ணே ஸயந்தஸ்ஸ கிரியாபா⁴வா. இத³ஞ்ஹி ஸிக்கா²பத³ம் ஸியா கிரியாய ஸமுட்டா²தி, ஸியா அகிரியாய ஸமுட்டா²தி. கிரியாஸமுட்டா²னதா சஸ்ஸ தப்³ப³ஹுலவஸேன வுத்தாதி வத³தி. யதா² சேதம், ஏவம் தி³வாஸயனம்பி. அனுட்ட²ஹனேன, ஹி த்³வாராஸம்வரணேன சேதம் அகிரியஸமஉட்டா²னம்பி ஹோதீ’’தி வத³ந்தி. இத³ஞ்ச யுத்தம் விய தி³ஸ்ஸதி, வீமம்ஸித்வா க³ஹேதப்³ப³ம்.

‘‘உபரிமதலேன ஸத்³தி⁴ம் அஸம்ப³த்³த⁴பி⁴த்திகஸ்ஸா’’தி இத³ம் ஸம்ப³த்³த⁴பி⁴த்திகே வத்தப்³ப³மேவ நத்தீ²தி த³ஸ்ஸனத்த²ம் வுத்தம். உபரிமதலே ஸயிதஸ்ஸ ஸங்கா ஏவ நத்தீ²தி ‘‘ஹேட்டா²பாஸாதே³’’திஆதி³ வுத்தம். நானூபசாரேதி ப³ஹி நிஸ்ஸேணியா ஆரோஹணீயே.

ஸபா⁴ஸங்கே²பேனாதி ஸபா⁴காரேன. ‘‘அட்³ட⁴குட்டகே’’தி இமினா ஸண்டா²னம் த³ஸ்ஸேதி. யத்த² தீஸு த்³வீஸு வா பஸ்ஸேஸு பி⁴த்தியோ ப³த்³தா⁴, ச²த³னம் வா அஸம்பத்தா அட்³ட⁴பி⁴த்தி, இத³ம் அட்³ட⁴குட்டகம் நாம. வாளஸங்கா⁴டோ நாம பரிக்கே²பஸ்ஸ அந்தோ த²ம்பா⁴தீ³னம் உபரி வாளரூபேஹி கதஸங்கா⁴டோ. பரிக்கே²பஸ்ஸ ப³ஹிக³தேதி ஏத்த² யஸ்மிம் பஸ்ஸே பரிக்கே²போ நத்தி², தத்த² ஸசே பூ⁴மிதோ வத்து² உச்சம் ஹோதி, உப⁴தோ உச்சவத்து²தோ ஹேட்டா² பூ⁴மியம் நிப்³ப³கோஸப்³ப⁴ந்தரேபி அனாபத்தி ஏவ தத்த² ஸேனாஸனவோஹாராபா⁴வதோ. அத² வத்து² நீசம் பூ⁴மிஸமமேவ ஸேனாஸனஸ்ஸ ஹேட்டி²மதலே திட்ட²தி, தத்த² பரிக்கே²பரஹிததி³ஸாய நிப்³ப³கோஸப்³ப⁴ந்தரே ஸப்³ப³த்த² ஆபத்தி ஹோதி, பரிச்சே²தா³பா⁴வதோ பரிக்கே²பஸ்ஸ ப³ஹி ஏவ அனாபத்தீதி த³ட்ட²ப்³ப³ம். பரிமண்ட³லம் வாதிஆதி³ மஜ்ஜே² உத³கபதனத்தா²ய ஆகாஸங்க³ணவந்தம் ஸேனாஸனம் ஸந்தா⁴ய வுத்தம். தத்த² அபரிச்சி²ன்னக³ப்³பூ⁴பசாரேதி ஏகேகக³ப்³ப⁴ஸ்ஸ த்³வீஸு பஸ்ஸேஸு பமுகே²ன க³மனம் பரிச்சி²ந்தி³த்வா தி³யட்³ட⁴ஹத்து²ப்³பே³த⁴தோ அனூனம் குட்டம் கத்வா ஆகாஸங்க³ணேன பவேஸம் கரோந்தி, ஏவம் அகதோதி அத்தோ². க³ப்³ப⁴பரிக்கே²போதி சதுரஸ்ஸபாஸாதா³தீ³ஸு ஸமந்தா டி²தக³ப்³ப⁴பி⁴த்தியோ ஸந்தா⁴ய வுத்தம்.

பாடேக்கஸன்னிவேஸாதி ஏகேகதி³ஸாய க³ப்³ப⁴பாளியோ இதரதி³ஸாஸு க³ப்³ப⁴பாளீனம் அபா⁴வேன, பா⁴வேபி வா அஞ்ஞமஞ்ஞபி⁴த்திச்ச²த³னேஹி அஸம்ப³ந்த⁴தாய பாடேக்கஸன்னிவேஸா நாம வுச்சதி. தம்…பே… ஸந்தா⁴ய வுத்தந்தி தத்த² பாசித்தியேன அனாபத்தீதி வுத்தம், ந து³க்கடேன. தாதி³ஸாய ஹி க³ப்³ப⁴பாளியா பமுக²ம் தீஸு தி³ஸாஸு பி⁴த்தீனம் அபா⁴வேன ஏகதி³ஸாய க³ப்³ப⁴பி⁴த்திமத்தேன ஸப்³ப³ச்ச²ன்னம் சூளபரிச்ச²ன்னம் நாம ஹோதி. தஸ்மா து³க்கடமேவ. யதி³ பன தஸ்ஸ பமுக²ஸ்ஸ இதரதி³ஸாஸுபி ஏகிஸ்ஸம், ஸப்³பா³ஸு வா பி⁴த்திம் கரோந்தி, ததா³ ஸப்³ப³ச்ச²ன்னஉபட்³ட⁴பரிச்ச²ன்னாதி³பா⁴வதோ பாசித்தியமேவ ஹோதீதி த³ட்ட²ப்³ப³ம். பூ⁴மியம் வினா ஜக³தியா பமுக²ம் ஸந்தா⁴யாதி ஏத்த² உச்சவத்து²ம் அகத்வா பூ⁴மியம் கதகே³ஹஸ்ஸ பமுக²ம் ஸந்தா⁴ய அபரிக்கி²த்தே பாசித்தியேன அனாபத்தீதி இத³ம் கதி²தம். உச்சவத்து²கம் சே பமுக²ம் ஹோதி, தேன வத்து²னா பரிக்கி²த்தஸங்க்²யமேவ பமுக²ம் க³ச்ச²தீதி அதி⁴ப்பாயோ. தத்தா²தி அந்த⁴கட்ட²கதா²யம். ஜக³தியா பமாணம் வத்வாதி பகதிபூ⁴மியா நிபன்னோ யதா² ஜக³தியா உபரி ஸயிதம் ந பஸ்ஸதி, ஏவம் உச்சாதிஉச்சவத்து²ஸ்ஸ உப்³பே³த⁴ப்பமாணம் வத்வா. ஏகதி³ஸாய உஜுகமேவ தீ³க⁴ம் கத்வா ஸன்னிவேஸிதோ பாஸாதோ³ ஏகஸாலஸன்னிவேஸோ. த்³வீஸு, தீஸு வா சதூஸுபி வா தி³ஸாஸு ஸிங்கா⁴டகஸண்டா²னாதி³வஸேன கதா த்³விஸாலாதி³ஸன்னிவேஸா வேதி³தப்³பா³. ஸாலப்பபே⁴த³தீ³பனமேவ சேத்த² புரிமதோ விஸேஸோதி. பரிக்கே²போ வித்³த⁴ஸ்தோதி பமுக²ஸ்ஸ பரிக்கே²பம் ஸந்தா⁴ய வத³தி.

53. உபட்³ட⁴ச்ச²ன்னஉபட்³ட⁴பரிச்ச²ன்னம் ஸேனாஸனம் து³க்கடஸ்ஸ ஆதி³ம் வத்வா பாளியம் த³ஸ்ஸிதத்தா ததோ அதி⁴கம் ஸப்³ப³ச்ச²ன்னஉபட்³ட⁴பரிச்ச²ன்னாதி³கம்பி ஸப்³ப³ம் பாளியம் அவுத்தம்பி பாசித்தியஸ்ஸேவ வத்து²பா⁴வேன த³ஸ்ஸிதம் ஸிக்கா²பத³ஸ்ஸ பண்ணத்திவஜ்ஜத்தா, க³ருகே டா²தப்³ப³தோ சாதி வேதி³தப்³ப³ம். ஸத்த பாசித்தியானீதி பாளியம் வுத்தபாசித்தியத்³வயம் ஸாமஞ்ஞதோ ஏகத்தேன க³ஹேத்வா வுத்தம்.

54. பாளியம் ‘‘ததியாய ரத்தியா புராருணா நிக்க²மித்வா புன வஸதீ’’தி இத³ம் உக்கட்ட²வஸேன வுத்தம், அனிக்க²மித்வா பன புராருணா உட்ட²ஹித்வா அந்தோச²த³னே நிஸின்னஸ்ஸாபி புனதி³வஸே ஸஹஸேய்யேன அனாபத்தி ஏவ. ஸேனம்ப³மண்ட³பவண்ணம் ஹோதீதி ஸீஹளதீ³பே கிர உச்சவத்து²கோ ஸப்³ப³ச்ச²ன்னோ ஸப்³ப³அபரிச்ச²ன்னோ ஏவம்னாமகோ ஸன்னிபாதமண்ட³போ அத்தி², தம் ஸந்தா⁴யேதம் வுத்தம். ஏத்த² சதுத்த²பா⁴கோ³ சூளகம், த்³வே பா⁴கா³ உபட்³ட⁴ம், தீஸு பா⁴கே³ஸு த்³வே பா⁴கா³ யேபு⁴ய்யந்தி இமினா நயேன சூளகச்ச²ன்னபரிச்ச²ன்னதாதீ³னி வேதி³தப்³பா³னி. பாசித்தியவத்து²கஸேனாஸனம், தத்த² அனுபஸம்பன்னேன ஸஹ நிபஜ்ஜனம், சதுத்த²தி³வஸே ஸூரியத்த²ங்க³மனந்தி இமானேத்த² தீணி அங்கா³னி.

ஸஹஸேய்யஸிக்கா²பத³வண்ணனா நிட்டி²தா.

6. து³தியஸஹஸேய்யஸிக்கா²பத³வண்ணனா

55. ச²ட்டே² மாதுகா³மேன ஸத்³தி⁴ம் சதுத்த²தி³வஸே ஸயந்தஸ்ஸாபி இமினா ஸிக்கா²பதே³ன ஏகாவ ஆபத்தி. கேசி பன புரிமஸிக்கா²பதே³னாபீதி த்³வே ஆபத்தியோ வத³ந்தி, தம் ந யுத்தம் ‘‘அனுபஸம்பன்னேனா’’தி அனித்தி²லிங்கே³ன வுத்தத்தா நபும்ஸகேன பன சதுத்த²தி³வஸே ஸயந்தஸ்ஸ ஸது³க்கடபாசித்தியம் வத்தும் யுத்தம். கிஞ்சாபேத்த² பாளியம் பண்ட³கவஸேனேவ து³க்கடம் வுத்தம், தத³னுலோமிகா பன புரிஸஉப⁴தோப்³யஞ்ஜனகேன ஸஹ ஸயந்தஸ்ஸ இமினா து³க்கடம், புரிமேன சதுத்த²தி³வஸே ஸது³க்கடபாசித்தியம். இத்தி²உப⁴தோப்³யஞ்ஜனகோ இத்தி²க³திகோவாதி அயம் அம்ஹாகம் க²ந்தி. மதித்தி²யா அனாபத்தீதி வத³ந்தி. பாசித்தியவத்து²கஸேனாஸனம், தத்த² மாதுகா³மேன ஸத்³தி⁴ம் நிபஜ்ஜனம், ஸூரியத்த²ங்க³மனந்தி இமானேத்த² தீணி அங்கா³னி.

து³தியஸஹஸேய்யஸிக்கா²பத³வண்ணனா நிட்டி²தா.

7. த⁴ம்மதே³ஸனாஸிக்கா²பத³வண்ணனா

60. ஸத்தமே ந யக்கே²னாதிஆதீ³னம் ‘‘அஞ்ஞத்ர விஞ்ஞுனா’’தி இமினா ஸம்ப³ந்தோ⁴. அஞ்ஞத்ர விஞ்ஞுனா புரிஸவிக்³க³ஹேன, ந யக்கா²தி³னாபீதி ஏவமத்தோ² க³ஹேதப்³போ³தி அதி⁴ப்பாயோ. தாதி³ஸேனபி ஹி ஸஹ டி²தாய தே³ஸேதும் ந வட்டதி. தம்தம்தே³ஸபா⁴ஸாய அத்த²ம் யதா²ருசி வட்டதி ஏவ.

இரியாபதா²பரிவத்தனம், புரிஸம் வா த்³வாத³ஸஹத்தூ²பசாரே அபக்கோஸாபனம் ஏத்த² அகிரியா. வுத்தலக்க²ணஸ்ஸ த⁴ம்மஸ்ஸ ச²ன்னம் வாசானம் உபரி தே³ஸனா, வுத்தலக்க²ணோ மாதுகா³மோ, இரியாபத²பஅவத்தனாபா⁴வோ, விஞ்ஞூபுரிஸாபா⁴வோ, அபஞ்ஹவிஸ்ஸஜ்ஜனாதி இமானேத்த² பஞ்ச அங்கா³னி.

த⁴ம்மதே³ஸனாஸிக்கா²பத³வண்ணனா நிட்டி²தா.

8. பூ⁴தாரோசனஸிக்கா²பத³வண்ணனா

77. அட்ட²மே அந்தராதி பரினிப்³பா³னகாலதோ புப்³பே³பி. அதிகட்³டி⁴யமானேனாதி ‘‘வத³த², ப⁴ந்தே, கிம் தும்ஹேஹி அதி⁴க³த’’ந்தி ஏவம் நிப்பீளியமானேன அதிப³த்³தி⁴யமானேன. ததா²ரூபே பச்சயே ஸதி வத்தப்³ப³மேவ. ஸுதபரியத்திஸீலகு³ணந்தி ஏத்த² அத்த²குஸலதா ஸுதகு³ணோ, பாளிபாட²குஸலதா பரியத்திகு³ணோதி த³ட்ட²ப்³ப³ம். ‘‘சித்தக்கே²பஸ்ஸ வா அபா⁴வா’’தி இமினா கி²த்தசித்தவேத³னாட்டதாபி அரியானம் நத்தீ²தி த³ஸ்ஸேதி.

புப்³பே³ அவுத்தேஹீதி சதுத்த²பாராஜிகே அவுத்தேஹி. இத³ஞ்ச ஸிக்கா²பத³ம் பண்ணத்திஅஜஆனனவஸேன ஏகந்ததோ அசித்தகஸமுட்டா²னமேவ ஹோதி அரியானம் பண்ணத்திவீதிக்கமாபா⁴வா. ஜா²னலாபீ⁴னஞ்ச ஸத்து² ஆணாவீதிக்கமபடிக⁴சித்தஸ்ஸ ஜா²னபரிஹானதோ பூ⁴தாரோசனம் ந ஸம்ப⁴வதி. உத்தரிமனுஸ்ஸத⁴ம்மஸ்ஸ பூ⁴ததா, அனுபஸம்பன்னஸ்ஸ ஆரோசனம், தங்க²ணவிஜானனா, அனஞ்ஞாபதே³ஸோதி இமானேத்த² சத்தாரி அங்கா³னி.

பூ⁴தாரோசனஸிக்கா²பத³வண்ணனா நிட்டி²தா.

9. து³ட்டு²ல்லாரோசனஸிக்கா²பத³வண்ணனா

78. நவமே தத்த² ப⁴வேய்யாதி தத்த² கஸ்ஸசி மதி ஏவம் ப⁴வேய்ய. அட்ட²கதா²வசனமேவ உபபத்திதோ த³ள்ஹம் கத்வா பதிட்ட²பேந்தோ ‘‘இமினாபி சேத’’ந்திஆதி³மாஹ.

82. ஆதி³தோ பஞ்ச ஸிக்கா²பதா³னீதி பாணாதிபாதாதீ³னி பஞ்ச. ஸேஸானீதி விகாலபோ⁴ஜனாதீ³னி. ஸுக்கவிஸ்ஸட்டி²ஆதி³ அஜ்ஜா²சாரோவ. அந்திமவத்து²ம் அனஜ்ஜா²பன்னஸ்ஸ பி⁴க்கு²னோ ஸவத்து²கோ ஸங்கா⁴தி³ஸேஸோ, அனுபஸம்பன்னஸ்ஸ ஆரோசனம், பி⁴க்கு²ஸம்முதியா அபா⁴வோதி இமானேத்த² தீணி அங்கா³னி.

து³ட்டு²ல்லாரோசனஸிக்கா²பத³வண்ணனா நிட்டி²தா.

10. பத²வீக²ணனஸிக்கா²பத³வண்ணனா

86. த³ஸமே அப்பபம்ஸுமத்திகாய பத²வியா அனாபத்திவத்து²பா⁴வேன வுத்தத்தா உபட்³ட⁴பம்ஸுமத்திகாயபி பாசித்தியமேவாதி க³ஹேதப்³ப³ம். ந ஹேதம் து³க்கடவத்தூ²தி ஸக்கா வத்தும் ஜாதாஜாதவினிமுத்தாய ததியபத²வியா அபா⁴வதோ.

வட்டதீதி இமஸ்மிம் டா²னே போக்க²ரணிம் க²ணாதி ஓகாஸஸ்ஸ அனியமிதத்தா வட்டதி. இமம் வல்லிம் க²ணாதி பத²வீக²ணனம் ஸந்தா⁴ய வுத்தத்தா இமினாவ ஸிக்கா²பதே³ன ஆபத்தி, ந பூ⁴தகா³மஸிக்கா²பதே³ன. உப⁴யம்பி ஸந்தா⁴ய வுத்தே பன த்³வேபி பாசித்தியா ஹோந்தி. உத³கபப்படகோதி உத³கே அந்தோபூ⁴மியம் பவிட்டே² தஸ்ஸ உபரிபா⁴க³ம் சா²தே³த்வா தனுகபம்ஸு வா மத்திகா வா படலம் ஹுத்வா பதமானா திட்ட²தி, தஸ்மிம் உத³கே ஸுக்கே²பி தம் படலம் வாதேன சலமானா திட்ட²தி, தம் உத³கபப்படகோ நாம.

அகதபப்³பா⁴ரேதி அவளஞ்ஜனட்டா²னத³ஸ்ஸனத்த²ம் வுத்தம். தாதி³ஸே ஏவ ஹி வம்மிகஸ்ஸ ஸம்ப⁴வோதி. மூஸிகுக்கரம் நாம மூஸிகாஹி க²னித்வா ப³ஹி கதபம்ஸுராஸி. அச்ச²த³னந்திஆதி³வுத்தத்தா உஜுகம் ஆகாஸதோ பதிதவஸ்ஸோத³கேன ஓவட்ட²மேவ ஜாதபத²வீ ஹோதி, ந ச²த³னாதீ³ஸு பதித்வா ததோ பவத்தஉத³கேன திந்தந்தி வேதி³தப்³ப³ம். மண்ட³பத்த²ம்ப⁴ந்தி ஸாகா²மண்ட³பத்த²ம்ப⁴ம். உச்சாலேத்வாதி உக்கி²பித்வா. ததோதி புராணஸேனாஸனதோ.

88. மஹாமத்திகந்தி பி⁴த்திலேபனம். ஜாதபத²விதா, ததா²ஸஞ்ஞிதா, க²ணனக²ணாபனானம் அஞ்ஞதரந்தி இமானேத்த² தீணி அங்கா³னி.

பத²வீக²ணனஸிக்கா²பத³வண்ணனா நிட்டி²தா.

நிட்டி²தோ முஸாவாத³வக்³கோ³ பட²மோ.

2. பூ⁴தகா³மவக்³கோ³

1. பூ⁴தகா³மஸிக்கா²பத³வண்ணனா

89. து³தியவக்³க³ஸ்ஸ பட²மே நிக்³க³ஹேதும் அஸக்கோந்தோதி ஸாக²ட்ட²கவிமானே ஸாகா²ய சி²ஜ்ஜமானாய சி²ஜ்ஜந்தே தத்த² அசே²த³னத்தா²ய தே³வதாய உபனீதம் புத்தம் தி³ஸ்வாபி குடா²ரினிக்கே²பவேக³ம் நிவத்தேதும் அஸக்கோந்தோதி அத்தோ². ருக்க²த⁴ம்மேதி ருக்க²ஸ்ஸ பவத்தியம். ருக்கா²னம் விய சே²த³னாதீ³ஸு அகுப்பனஞ்ஹி ருக்க²த⁴ம்மோ நாம.

உப்பதிதந்தி உப்பன்னம். ப⁴ந்தந்தி தா⁴வந்தம். வாரயேதி நிக்³க³ண்ஹேய்ய. இதரோதி உப்பன்னம் கோத⁴ம் அனிக்³க³ண்ஹந்தோ ராஜஉபராஜாதீ³னம் ரஸ்மிமத்தக்³கா³ஹகஜனோ விய ந உத்தமஸாரதீ²தி அத்தோ². விஸடம் ஸப்பவிஸந்தி ஸரீரே தா³டா²வணானுஸாரேன வித்தி²ண்ணம் ப்³யாபேத்வா டி²தம் கண்ஹஸப்பவிஸம் விய. ஜஹாதி ஓரபாரந்தி பஞ்சோரம்பா⁴கி³யஸஞ்ஞோஜனானி ததியமக்³கே³ன ஜஹாதி. ‘‘ஓரபார’’ந்தி ஹி ஓரிமதீரம் வுச்சதி. அத² வா ஸோதி ததியமக்³கே³ன கோத⁴ம் வினேத்வா டி²தோ பி⁴க்கு² அரஹத்தமக்³கே³ன ஓரபாரம் ஜஹாதீதி அத்தோ². தத்த² ஓரம் நாம ஸகத்தபா⁴வோ, அஜ்ஜ²த்திகானி வா ஆயதனானி. பாரம் நாம பரஅத்தபா⁴வோ, பா³ஹிரானி வா ஆயதனானி. தது³ப⁴யே பன ச²ந்த³ராக³ம் ஜஹந்தோ ‘‘ஜஹாதி ஓரிமபார’’ந்தி வுச்சதி.

90. ப⁴வந்தீதி வட்³ட⁴ந்தி. அஹுவுந்தீதி ப³பூ⁴வு. தேனாஹ ‘‘ஜாதா வட்³டி⁴தா’’தி. பூ⁴தானம் கா³மோதி மஹாபூ⁴தானம் ஹரிததிணாதி³பா⁴வேன ஸமக்³கா³னம் ஸமூஹோ. தப்³பி³னிமுத்தஸ்ஸ கா³மஸ்ஸ அபா⁴வம் த³ஸ்ஸேதும் ‘‘பூ⁴தா ஏவ வா கா³மோ’’தி வுத்தம். பாதப்³ய-ஸத்³த³ஸ்ஸ பா பானேதி தா⁴த்வத்த²ம் ஸந்தா⁴யாஹ ‘‘பரிபு⁴ஞ்ஜிதப்³ப³தா’’தி. ஸா ச பாதப்³யதா சே²த³னாதி³ ஏவ ஹோதீதி ஆஹ ‘‘தஸ்ஸா…பே… பூ⁴தகா³மஸ்ஸ ஜாதா சே²த³னாதி³பச்சயா’’தி.

91. ஜாத-ஸத்³தோ³ ஏத்த² விஜாதபரியாயோதி ‘‘புத்தம் விஜாதா இத்தீ²’’திஆதீ³ஸு விய பஸூதவசனோதி ஆஹ ‘‘பஸூதானீ’’தி, நிப்³ப³த்தபண்ணமூலானீதி அத்தோ².

தானி த³ஸ்ஸேந்தோதி தானி பீ³ஜானி த³ஸ்ஸேந்தோ. காரியத³ஸ்ஸனமுகே²னேவ காரணஞ்ச க³ஹிதந்தி ஆஹ ‘‘பீ³ஜதோ நிப்³ப³த்தேன பீ³ஜம் த³ஸ்ஸித’’ந்தி.

92. ‘‘பீ³ஜதோ ஸம்பூ⁴தோ பூ⁴தகா³மோ பீ³ஜ’’ந்தி இமினா உத்தரபத³லோபேன ‘‘பது³மக³ச்ச²தோ நிப்³ப³த்தம் புப்ப²ம் பது³ம’’ந்திஆதீ³ஸு வியாயம் வோஹாரோதி த³ஸ்ஸேதி. யம் பீ³ஜம் பூ⁴தகா³மோ நாம ஹோதீதி நிப்³ப³த்தபண்ணமூலம் ஸந்தா⁴ய வத³தி. யதா²ருதந்தி யதா²பாட²ம்.

‘‘ஸஞ்சிச்சா’’தி வுத்தத்தா ஸரீரே லக்³க³பா⁴வம் ஞத்வாபி உட்ட²ஹதி, ‘‘தம் உத்³த⁴ரிஸ்ஸாமீ’’திஸஞ்ஞாய அபா⁴வதோ வட்டதி. அனந்தக-க்³க³ஹணேன ஸாஸபமத்திகா க³ஹிதா, நாமஞ்ஹேதம் தஸ்ஸா ஸேவாலஜாதியா. மூலபண்ணானம் அபா⁴வேன ‘‘அஸம்புண்ணபூ⁴தகா³மோ நாமா’’தி வுத்தம். ஸோ பீ³ஜகா³மேன ஸங்க³ஹிதோதி. அவட்³ட⁴மானேபி பூ⁴தகா³மமூலகத்தா வுத்தம் ‘‘அமூலகபூ⁴தகா³மே ஸங்க³ஹம் க³ச்ச²தீ’’தி. நாளிகேரஸ்ஸ ஆவேணிகம் கத்வா வத³தி.

ஸேலேய்யகம் நாம ஸிலாய ஸம்பூ⁴தா ஏகா க³ந்த⁴ஜாதி. புப்பி²தகாலதோ பட்டா²யாதி விகஸிதகாலதோ பபு⁴தி. ச²த்தகம் க³ண்ஹந்தோதி விகஸிதம் க³ண்ஹந்தோ. மகுளம் பன ருக்க²த்தசம் அகோபேந்தேனபி க³ஹேதும் ந வட்டதி, பு²ல்லம் வட்டதி. ஹத்த²குக்குச்சேனாதி ஹத்த²சாபல்லேன.

‘‘பானீயம் ந வாஸேதப்³ப³’’ந்தி இத³ம் அத்தனோ பிவனபானீயம் ஸந்தா⁴ய வுத்தம், அஞ்ஞேஸம் பன வட்டதி அனுக்³க³ஹிதத்தா. தேனாஹ ‘‘அத்தனா கா²தி³துகாமேனா’’தி. யேஸம் ருக்கா²னம் ஸாகா² ருஹதீதி மூலம் அனோதாரேத்வா பண்ணமத்தனிக்³க³மனமத்தேனபி வட்³ட⁴தி. தத்த² கப்பியம்பி அகரோந்தோ சி²ன்னனாளிகேரவேளுத³ண்டா³த³யோ கோபேதும் வட்டதி.

‘‘சங்கமிதட்டா²னம் த³ஸ்ஸேஸ்ஸாமீ’’தி வுத்தத்தா கேவலம் சங்கமனாதி⁴ப்பாயேன வா மக்³க³க³மனாதி⁴ப்பாயேன வா அக்கமந்தஸ்ஸ, திணானம் உபரி நிஸீத³னாதி⁴ப்பாயேன நிஸீத³ந்தஸ்ஸ ச தோ³ஸோ நத்தி².

ஸமணகப்பேஹீதி ஸமணானம் கப்பியவோஹாரேஹி, அபீ³ஜனிப்³ப³ட்டபீ³ஜானிபி கப்பியபா⁴வதோ ‘‘ஸமணகப்பானீ’’தி வுத்தானி. அபீ³ஜம் நாம தருணஅம்ப³ப²லாதீ³னி. நிப்³ப³ட்டேதப்³ப³ம் வியோஜேதப்³ப³ம் பீ³ஜம் யஸ்மிம், தம் பனஸாதி³ நிப்³ப³ட்டபீ³ஜம் நாம. கப்பியந்தி வத்வாவாதி புப்³ப³காலகிரியாவஸேன வுத்தேபி வசனக்க²ணேவ அக்³கி³ஸத்தா²தி³னா பீ³ஜகா³மே வணம் காதப்³ப³ந்தி வசனதோ பன புப்³பே³ காதும் ந வட்டதி, தஞ்ச த்³விதா⁴ அகத்வா சே²த³னபே⁴த³னமேவ த³ஸ்ஸேதப்³ப³ம். கரோந்தேன ச பி⁴க்கு²னா ‘‘கப்பியம் கரோஹீ’’தி யாய காயசி பா⁴ஸாய வுத்தேயேவ காதப்³ப³ம். பீ³ஜகா³மபரிமோசனத்த²ம் புன கப்பியம் காரேதப்³ப³ந்தி காராபனஸ்ஸ பட²மமேவ அதி⁴கதத்தா. ‘‘கடாஹேபி காதும் வட்டதீ’’தி வுத்தத்தா கடாஹதோ நீஹதாய மிஞ்ஜாய வா பீ³ஜே வா யத்த² கத்த²சி விஜ்ஜி²தும் வட்டதி ஏவ. பூ⁴தகா³மோ, பூ⁴தகா³மஸஞ்ஞிதா, விகோபனம் வா விகோபாபனம் வாதி இமானேத்த² தீணி அங்கா³னி.

பூ⁴தகா³மஸிக்கா²பத³வண்ணனா நிட்டி²தா.

2. அஞ்ஞவாத³கஸிக்கா²பத³வண்ணனா

94. து³தியே அஞ்ஞம் வசனந்தி யம் தோ³ஸவிபா⁴வனத்த²ம் பரேஹி வுத்தவசனம் தம் தஸ்ஸ அனனுச்ச²விகேன அஞ்ஞேன வசனேன படிசரதி.

98. யதே³தம் அஞ்ஞேனஞ்ஞம் படிசரணவஸேன பவத்தவசனம், ததே³வ புச்சி²தமத்த²ம் ட²பேத்வா அஞ்ஞம் வத³தி பகாஸேதீதி அஞ்ஞவாத³கந்தி ஆஹ ‘‘அஞ்ஞேனஞ்ஞம் படிசரணஸ்ஸேதம் நாம’’ந்தி. துண்ஹீபூ⁴தஸ்ஸேதம் நாமந்தி துண்ஹீபா⁴வஸ்ஸேதம் நாமம், அயமேவ வா பாடோ². அஞ்ஞவாத³கம் ஆரோபேதுந்தி அஞ்ஞவாதே³ ஆரோபேதும். விஹேஸகந்தி விஹேஸகத்தம்.

99. பாளியம் ந உக்³கா⁴டேதுகாமோதி படிச்சா²தே³துகாமோ.

100. அனாரோபிதே அஞ்ஞவாத³கேதி வுத்தது³க்கடம் பாளியம் ஆக³தஅஞ்ஞேனஞ்ஞபடிசரணவஸேன யுஜ்ஜதி, அட்ட²கதா²யம் ஆக³தனயேன பன முஸாவாதே³ன அஞ்ஞேனஞ்ஞம் படிசரந்தஸ்ஸ பாசித்தியேன ஸத்³தி⁴ம் து³க்கடம், ஆரோபிதே இமினாவ பாசித்தியம். கேசி பன ‘‘முஸாவாத³பாசித்தியேன ஸத்³தி⁴ம் பாசித்தியத்³வய’’ந்தி வத³ந்தி, வீமம்ஸிதப்³ப³ம். ஆதி³கம்மிகஸ்ஸபி முஸாவாதே³ இமினாவ அனாபத்தீதி த³ட்ட²ப்³ப³ம். த⁴ம்மகம்மேன ஆரோபிததா, ஆபத்தியா வா வத்து²னா வா அனுயுஞ்ஜியமானதா, சா²தே³துகாமதாய அஞ்ஞேனஞ்ஞம் படிசரணம், துண்ஹீபா⁴வோ சாதி இமானேத்த² தீணி அங்கா³னி.

அஞ்ஞவாத³கஸிக்கா²பத³வண்ணனா நிட்டி²தா.

3. உஜ்ஜா²பனகஸிக்கா²பத³வண்ணனா

103. ததியே சிந்தாயனத்த²ஸ்ஸ ஜே²-தா⁴துஸ்ஸ அனேகத்த²தாய ஓலோகனத்த²ஸம்ப⁴வதோ வுத்தம் ‘‘ஓலோகாபேந்தீ’’தி. ச²ந்தா³யாதி லிங்க³விபல்லாஸோதி ஆஹ ‘‘ச²ந்தே³னா’’தி.

105. பி⁴க்கு²ம் லாமகதோ சிந்தாபனத்த²ம் அஞ்ஞேஸம் தம் அவண்ணகத²னம் உஜ்ஜா²பனம் நாம. அஞ்ஞேஸம் பன அவத்வா அஞ்ஞமஞ்ஞம் ஸமுல்லபனவஸேன பி⁴க்கு²னோ தோ³ஸப்பகாஸனம் கி²ய்யனம் நாமாதி அயமேதேஸம் பே⁴தோ³.

106. அஞ்ஞம் அனுபஸம்பன்னம் உஜ்ஜா²பேதீதி அஞ்ஞேன அனுபஸம்பன்னேன உஜ்ஜா²பேதி. தஸ்ஸ வா தம் ஸந்திகேதி தஸ்ஸ அனுபஸம்பன்னஸ்ஸ ஸந்திகே தம் ஸங்கே⁴ன ஸம்மதம் உபஸம்பன்னம் கி²ய்யதி. இதா⁴பி முஸாவாதே³ன உஜ்ஜா²பனாதீ³னம் ஸம்ப⁴வதோ து³க்கடட்டா²னானி ச ஆதி³கம்மிகஸ்ஸ அனாபத்தி ச இமினா ஏவ ஸிக்கா²பதே³ன வுத்தாதி வேதி³தப்³ப³ம் ஸப்³ப³த்த² முஸாவாத³பாசித்தியஸ்ஸ அனிவத்திதோ. த⁴ம்மகம்மேன ஸம்மததா, உபஸம்பன்னதா, அக³திக³மனாபா⁴வோ, தஸ்ஸ அவண்ணகாமதா, யஸ்ஸ ஸந்திகே வத³தி. தஸ்ஸ உபஸம்பன்னதா, உஜ்ஜா²பனம் வா கி²ய்யனம் வாதி இமானேத்த² ச² அங்கா³னி.

உஜ்ஜா²பனகஸிக்கா²பத³வண்ணனா நிட்டி²தா.

4. பட²மஸேனாஸனஸிக்கா²பத³வண்ணனா

110. சதுத்தே² அபஞ்ஞாதேதி அப்பஸித்³தே⁴. இமம் பன அட்ட² மாஸே மண்ட³பாதீ³ஸு ட²பனஸங்கா²தம் அத்த²விஸேஸம் க³ஹேத்வா ப⁴க³வதா பட²மமேவ ஸிக்கா²பத³ம் பஞ்ஞத்தந்தி அதி⁴ப்பாயம் ‘‘அனுஜானாமி, பி⁴க்க²வே, அட்ட²மாஸே’’திஆதி³வசனேன அனுபஞ்ஞத்திஸதி³ஸேன பகாஸேத்வா விஸும் அனுபஞ்ஞத்தி ந வுத்தா. பரிவாரே பனேதம் அனுஜானனவசனம் அனுபஞ்ஞத்திட்டா²னந்தி ‘‘ஏகா அனுபஞ்ஞத்தீ’’தி (பரி. 65-67) வுத்தம்.

நவவாயிமோதி அது⁴னா ஸுத்தேன வீதகச்சே²ன பலிவேடி²தமஞ்சோ. ஓனத்³தோ⁴தி கப்பியசம்மேன ஓனத்³தோ⁴. தே ஹி வஸ்ஸேன ஸீக⁴ம் ந நஸ்ஸந்தி. ‘‘உக்கட்ட²அப்³போ⁴காஸிகோ’’தி இத³ம் தஸ்ஸ ஸுக²படிபத்தித³ஸ்ஸனமத்தம், உக்கட்ட²ஸ்ஸாபி பன சீவரகுடி வட்டதேவ. காயானுக³திகத்தாதி பி⁴க்கு²னோ தத்தே²வ நிஸீத³னபா⁴வம் தீ³பேதி, தேன ச வஸ்ஸப⁴யேன ஸயம் அஞ்ஞத்த² க³ச்ச²ந்தஸ்ஸ ஆபத்தீதி த³ஸ்ஸேதி. அப்³போ⁴காஸிகானம் தேமனத்தா²ய நியமேத்வா தா³யகேஹி தி³ன்னம்பி அத்தானம் ரக்க²ந்தேன ரக்கி²தப்³ப³மேவ.

‘‘வலாஹகானம் அனுட்டி²தபா⁴வம் ஸல்லக்கே²த்வா’’தி இமினா கி³ம்ஹானேபி மேகே⁴ உட்டி²தே அப்³போ⁴காஸே நிக்கி²பிதும் ந வட்டதீதி தீ³பேதி. தத்ர தத்ராதி சேதியங்க³ணாதி³கே தஸ்மிம் தஸ்மிம் அப்³போ⁴காஸே நியமேத்வா நிக்கி²த்தா. மஜ்ஜ²தோ பட்டா²ய பாத³ட்டா²னாபி⁴முகா²தி யத்த² ஸமந்ததோ ஸம்மஜ்ஜித்வா அங்க³ணமஜ்ஜே² ஸப்³ப³தா³ கசவரஸ்ஸ ஸங்கட்³ட⁴னேன மஜ்ஜே² வாலிகா ஸஞ்சிதா ஹோதி. தத்த² கத்தப்³ப³விதி⁴த³ஸ்ஸனத்த²ம் வுத்தம். உச்சவத்து²பாத³ட்டா²னாபி⁴முக²ம் வா வாலிகா ஹரிதப்³பா³. யத்த² வா பன கோணேஸு வாலிகா ஸஞ்சிதா, தத்த² ததோ பட்டா²ய அபரதி³ஸாபி⁴முகா² ஹரிதப்³பா³தி கேசி அத்த²ம் வத³ந்தி. கேசி பன ‘‘ஸம்மட்ட²ட்டா²னஸ்ஸ பத³வளஞ்ஜேன அவிகோபனத்தா²ய ஸயம் அஸம்மட்ட²ட்டா²னே ட²த்வா அத்தனோ பாதா³பி⁴முக²ம் வாலிகா ஹரிதப்³பா³தி வுத்த’’ந்தி வத³ந்தி, தத்த² ‘‘மஜ்ஜ²தோ பட்டா²யா’’தி வசனஸ்ஸ பயோஜனம் ந தி³ஸ்ஸதி.

111. வங்கபாத³தாமத்தேன குளீரபாத³கஸ்ஸ ஸேஸேஹி விஸேஸோ, ந அடனீஸு பாத³ப்பவேஸனவிஸேஸேனாதி த³ஸ்ஸேதும் ‘‘யோ வா பன கோசீ’’திஆதி³ வுத்தம். தஸ்ஸாதி உபஸம்பன்னஸ்ஸேவ.

நிஸீதி³த்வா…பே… பாசித்தியந்தி ஏத்த² மேகு⁴ட்டா²னாபா⁴வம் ஞத்வா ‘‘பச்சா² ஆக³ந்த்வா உத்³த⁴ரிஸ்ஸாமீ’’தி ஆபோ⁴கே³ன க³ச்ச²ந்தஸ்ஸ அனாபத்தி, தேன புனாக³ந்தப்³ப³மேவ. கப்பம் லபி⁴த்வாதி ‘‘க³ச்ச², மா இத⁴ திட்டா²’’தி வுத்தவசனம் லபி⁴த்வா.

ஆவாஸிகானம்யேவ பலிபோ³தோ⁴தி ஆக³ந்துகேஸு கிஞ்சி அவத்வா நிஸீதி³த்வா ‘‘ஆவாஸிகா ஏவ உத்³த⁴ரிஸ்ஸந்தீ’’தி க³தேஸுபி ஆவாஸிகானமேவ பலிபோ³தோ⁴. மஹாபச்சரிவாதே³ பன ‘‘இத³ம் அம்ஹாக’’ந்தி அவத்வாபி நிஸின்னானமேவாதி அதி⁴ப்பாயோ. ‘‘ஸந்த²ரித்வா வா ஸந்த²ராபேத்வா வா’’தி வுத்தத்தா அனாணத்தியா பஞ்ஞாபிதத்தாபி து³க்கடே காரணம் வுத்தம். உஸ்ஸாரகோதி ஸரபா⁴ணகோ. ஸோ ஹி உத்³த⁴ம் உத்³த⁴ம் பாளிபாட²ம் ஸாரேதி பவத்தேதீதி உஸ்ஸாரகோதி வுச்சதி.

112. வண்ணானுரக்க²ணத்த²ம் கதாதி படக²ண்டா³தீ³ஹி ஸிப்³பி³த்வா கதா. பூ⁴மியம் அத்த²ரிதப்³பா³தி சிமிலிகாய ஸதி தஸ்ஸா உபரி, அஸதி ஸுத்³த⁴பூ⁴மியம் அத்த²ரிதப்³பா³. ‘‘ஸீஹசம்மாதீ³னம் பரிஹரணேயேவ படிக்கே²போ’’தி இமினா மஞ்சபீடா²தீ³ஸு அத்த²ரித்வா புன ஸம்ஹரித்வா ட²பனாதி³வஸேன அத்தனோ அத்தா²ய பரிஹரணமேவ ந வட்டதி, பூ⁴மத்த²ரணாதி³வஸேன பரிபோ⁴கோ³ பன அத்தனோ பரிஹரணம் ந ஹோதீதி த³ஸ்ஸேதி. க²ந்த⁴கே ஹி ‘‘அந்தோபி மஞ்சே பஞ்ஞத்தானி ஹோந்தி, ப³ஹிபி மஞ்சே பஞ்ஞத்தானி ஹோந்தீ’’தி ஏவம் அத்தனோ அத்தனோ அத்தா²ய மஞ்சாதீ³ஸு பஞ்ஞபேத்வா பரிஹரணவத்து²ஸ்மிம் –

‘‘ந, பி⁴க்க²வே, மஹாசம்மானி தா⁴ரேதப்³பா³னி ஸீஹசம்மம் ப்³யக்³க⁴சம்மம் தீ³பிசம்மம். யோ தா⁴ரேய்ய, ஆபத்தி து³க்கடஸ்ஸா’’தி (மஹாவ. 255) –

படிக்கே²போ கதோ. தஸ்மா வுத்தனயேனேவேத்த² அதி⁴ப்பாயோ த³ட்ட²ப்³போ³. தா³ருமயபீட²ந்தி ப²லகமயபீட²மேவ. பாத³கத²லிகந்தி அதோ⁴தபாத³ம் யஸ்மிம் க⁴ம்ஸந்தா தோ⁴வந்தி, தம் தா³ருப²லகாதி³.

113. ‘‘ஆக³ந்த்வா உத்³த⁴ரிஸ்ஸாமீதி க³ச்ச²தீ’’தி வுத்தத்தா அஞ்ஞேனபி காரணேன அனோதாபேந்தஸ்ஸபி ஆக³மனே ஸாபேக்க²ஸ்ஸ அனாபத்தி. தேனேவ மாதிகாட்ட²கதா²யம் ‘‘மஞ்சாதீ³னம் ஸங்கி⁴கதா, வுத்தலக்க²ணே தே³ஸே ஸந்த²ரணம் வா ஸந்த²ராபனம் வா, அபலிபு³த்³த⁴தா, ஆபதா³ய அபா⁴வோ, நிரபேக்க²தா, லேட்³டு³பாதாதிக்கமோ’’தி (கங்கா². அட்ட². பட²மஸேனாஸனஸிக்கா²பத³வண்ணனா) ஏவமேத்த² நிரபேக்க²தாய ஸத்³தி⁴ம் ச² அங்கா³னி வுத்தானி.

பட²மஸேனாஸனஸிக்கா²பத³வண்ணனா நிட்டி²தா.

5. து³தியஸேனாஸனஸிக்கா²பத³வண்ணனா

116. பஞ்சமே பாவாரோ கோஜவோதி பச்சத்த²ரணத்தா²யேவ ட²பிதா உக்³க³தலோமா அத்த²ரணவிஸேஸா. ஏத்தகமேவ வுத்தந்தி அட்ட²கதா²ஸு வுத்தம். ஸேனாஸனதோதி ஸப்³ப³பச்சி²மஸேனாஸனதோ.

117. குருந்த³ட்ட²கதா²யம் வுத்தமேவத்த²ம் ஸவிஸேஸம் கத்வா த³ஸ்ஸேதும் ‘‘கிஞ்சாபி வுத்தோ’’திஆதி³ ஆரத்³த⁴ம். வத்தப்³ப³ம் நத்தீ²தி ருக்க²மூலஸ்ஸ பாகடத்தா வுத்தம். பலுஜ்ஜதீதி வினஸ்ஸதி.

118. யேன மஞ்சம் வா பீட²ம் வா வீனந்தி, தம் மஞ்சபீட²கவானம். ஸிலுச்சயலேணந்தி பப்³ப³தகு³ஹா. ‘‘ஆபுச்ச²னம் பன வத்த’’ந்தி இமினா ஆபத்தி நத்தீ²தி த³ஸ்ஸேதி. வுத்தலக்க²ணஸேய்யா, தஸ்ஸா ஸங்கி⁴கதா, வுத்தலக்க²ணே விஹாரே ஸந்த²ரணம் வா ஸந்த²ராபனம் வா, அபலிபு³த்³த⁴தா, ஆபதா³ய அபா⁴வோ, அனபேக்க²ஸ்ஸ தி³ஸாபக்கமனம், உபசாரஸீமாதிக்கமோதி இமானேத்த² ஸத்த அங்கா³னி.

து³தியஸேனாஸனஸிக்கா²பத³வண்ணனா நிட்டி²தா.

6. அனுபக²ஜ்ஜஸிக்கா²பத³வண்ணனா

119. ச²ட்டே² அனுபவிஸித்வாதி ஸமீபம் பவிஸித்வா.

122. உபசாரம் ட²பேத்வாதி தி³யட்³ட⁴ஹத்தூ²பசாரம் ட²பேத்வா. ஸங்கி⁴கவிஹாரதா, அனுட்டா²பனீயபா⁴வஜானனம், ஸம்பா³தே⁴துகாமதா, உபசாரே நிஸீத³னம் வா நிபஜ்ஜனம் வாதி இமானேத்த² சத்தாரி அங்கா³னி.

அனுபக²ஜ்ஜஸிக்கா²பத³வண்ணனா நிட்டி²தா.

7. நிக்கட்³ட⁴னஸிக்கா²பத³வண்ணனா

126. ஸத்தமே கோட்ட²கானீதி த்³வாரகோட்ட²கானி.

128. ‘‘ஸகலஸங்கா⁴ராமதோ நிக்கட்³டி⁴தும் ந வட்டதீ’’தி இத³ம் அனனுரூபதோ வுத்தம். பாபக³ரஹிதாய ஹி அகுபிதசித்தேன நிக்கட்³டா⁴பேந்தஸ்ஸ இமினா ஸிக்கா²பதே³ன ஆபத்தி நத்தி² ‘‘குபிதோ அனத்தமனோ’’தி வுத்தத்தா. அஞ்ஞாபேக்கா² ஆபத்தி ந தி³ஸ்ஸதி. பாளியம் ‘‘அலஜ்ஜிம் நிக்கட்³ட⁴தீ’’திஆதீ³ஸு சித்தஸ்ஸ லஹுபரிவத்திதாய அந்தரந்தரா கோபே உப்பன்னேபி அனாபத்தி அலஜ்ஜிதாதி³பச்சயேனேவ நிக்கட்³ட⁴னஸ்ஸ ஆரத்³த⁴த்தா. ஸங்கி⁴கவிஹாரோ, உபஸம்பன்னஸ்ஸ ப⁴ண்ட³னகாரகபா⁴வாதி³வினிமுத்ததா, கோபேன நிக்கட்³ட⁴னம் வா நிக்கட்³டா⁴பனம் வாதி இமானேத்த² தீணி அங்கா³னி.

நிக்கட்³ட⁴னஸிக்கா²பத³வண்ணனா நிட்டி²தா.

8. வேஹாஸகுடிஸிக்கா²பத³வண்ணனா

129. அட்ட²மம் உத்தானமேவ. ஸங்கி⁴கோ விஹாரோ, அஸீஸக⁴ட்டவேஹாஸகுடி, ஹேட்டா²பரிபோ⁴க³தா, அபடாணிதி³ன்னே ஆஹச்சபாத³கே நிஸீத³னம் வா நிபஜ்ஜனம் வாதி இமானேத்த² சத்தாரி அங்கா³னி.

வேஹாஸகுடிஸிக்கா²பத³வண்ணனா நிட்டி²தா.

9. மஹல்லகவிஹாரஸிக்கா²பத³வண்ணனா

135. நவமே ‘‘மஹல்லகோ நாம விஹாரோ ஸஸ்ஸாமிகோ’’தி வுத்தத்தா ஸஞ்ஞாசிகாய குடியா அனாபத்தீதி வத³ந்தி. யஸ்ஸாதி விஹாரஸ்ஸ. ஸா அபரிபூரூபசாராபி ஹோதீதி விவரியமானம் கவாடம் யம் பி⁴த்திம் ஆஹனதி, ஸா ஸாமந்தா கவாடவித்தா²ரப்பமாணா உபசாரரஹிதாபி ஹோதீதி அத்தோ². ஆலோகம் வாதபானம் ஸந்தே⁴தி க⁴டயதீதி ஆலோகஸந்தீ⁴தி கவாடம் வுச்சதி. த்³வாரவாதபானூபசாரதோ அஞ்ஞத்த² புனப்புனம் லிம்பனாதி³ம் கரோந்தஸ்ஸ பிண்ட³க³ணனாய பாசித்தியம்.

கேசி பன ‘‘பாளியம் பாசித்தியஸ்ஸ அவுத்தத்தா து³க்கட’’ந்தி வத³ந்தி. அதி⁴ட்டா²தப்³ப³ந்தி ஸம்விதா⁴தப்³ப³ம். ஹரிதே டி²தோ அதி⁴ட்டா²தி. ஆபத்தி து³க்கடஸ்ஸாதி ஹரிதயுத்தே கே²த்தே ட²த்வா சா²தே³ந்தஸ்ஸ து³க்கடந்தி அத்தோ². கேசி பன ‘‘தாதி³ஸே கே²த்தே விஹாரம் கரோந்தஸ்ஸ து³க்கட’’ந்தி வத³ந்தி, தம் பாளியா ந ஸமேதி.

136. உஜுகமேவ சா²த³னந்தி சா²த³னமுக²வட்டிதோ பட்டா²ய யாவ பிட்டி²வம்ஸகூடாகா³ரகண்ணிகாதி³, தாவ இட்ட²காதீ³ஹி உஜுகம் சா²த³னம். இமினா பன யேன ஸப்³ப³ஸ்மிம் விஹாரே ஏகவாரம் சா²தி³தே தம் சா²த³னம் ஏகமக்³க³ந்தி க³ஹேத்வா பாளியம் ‘‘த்³வே மக்³கே³’’திஆதி³ வுத்தம். பரியாயேன சா²த³னம்பி இமினாவ நயேன யோஜேதப்³ப³ந்தி வத³ந்தி, தம் ‘‘புனப்புனம் சா²தா³பேஸீ’’தி இமாய பாளியா ச ‘‘ஸப்³ப³ம்பி சேதம் ச²த³னம் ச²த³னூபரி வேதி³தப்³ப³’’ந்தி இமினா அட்ட²கதா²வசனேன ச ஸமேதி.

பாளியம் ‘‘மக்³கே³ன சா²தே³ந்தஸ்ஸ பரியாயேன சா²தே³ந்தஸ்ஸா’’தி இத³ஞ்ச இட்ட²காதீ³ஹி, திணபண்ணேஹி ச சா²த³னப்பகாரபே⁴த³த³ஸ்ஸனத்த²ம் வுத்தம். கேசி பன ‘‘பந்தியா சா²தி³தஸ்ஸ ச²த³னஸ்ஸ உபரி ச²த³னமுக²வட்டிதோ பட்டா²ய உத்³த⁴ம் உஜுகமேவ ஏகவாரம் சா²த³னம் ஏகமக்³க³ந்தி க³ஹேத்வா ‘த்³வே மக்³கே³’திஆதி³ வுத்தம், ந பன ஸகலவிஹாரசா²த³னம். ஏஸ நயோ பரியாயேன சா²த³னேபீ’’தி வத³ந்தி, தம் பாளிஅட்ட²கதா²ஹி ந ஸமேதி.

ததியாய மக்³க³ந்தி ஏத்த² ததியாயாதி உபயோக³த்தே² ஸம்பதா³னவசனம், ததியம் மக்³க³ந்தி அத்தோ². அயமேவ வா பாடோ². திணபண்ணேஹி லப்³ப⁴தீதி திணபண்ணேஹி சா²தே³த்வா உபரி உல்லித்தாவலித்தகரணம் ஸந்தா⁴ய வுத்தம். கேவலம் திணகுடியா ஹி அனாபத்தி வுத்தா. திண்ணம் மக்³கா³னந்தி மக்³க³வஸேன சா²தி³தானம் திண்ணம் ச²த³னானம். திண்ணம் பரியாயானந்தி ஏத்தா²பி ஏஸேவ நயோ. மஹல்லகவிஹாரதா, அத்தனோ வாஸாகா³ரதா, உத்தரி அதி⁴ட்டா²னந்தி இமானேத்த² தீணி அங்கா³னி.

மஹல்லகவிஹாரஸிக்கா²பத³வண்ணனா நிட்டி²தா.

10. ஸப்பாணகஸிக்கா²பத³வண்ணனா

140. த³ஸமே மாதிகாயம் ஸப்பாணகஉத³கம் திணேன வா மத்திகாய வா ஸிஞ்சேய்ய, ச²ட்³டே³ய்யாதி அத்தோ². அத² வா உத³கம் க³ஹேத்வா ப³ஹி ஸிஞ்சேய்ய, தஸ்மிஞ்ச உத³கே திணம் வா மத்திகம் வா ஆஹரித்வா பக்கி²பேய்யாதி அஜ்ஜா²ஹரித்வா அத்தோ² வேதி³தப்³போ³. தேனாஹ ‘‘ஸகடபா⁴ரமத்தஞ்சேபீ’’திஆதி³. இத³ந்தி திணமத்திகபக்கி²பனவிதா⁴னம். வுத்தந்தி மாதிகாயம் ‘‘திணம் வா மத்திகம் வா’’தி ஏவம் வுத்தம், அட்ட²கதா²ஸு வா வுத்தம்.

இத³ஞ்ச ஸிக்கா²பத³ம் பா³ஹிரபரிபோ⁴க³ம் ஸந்தா⁴ய வத்து²வஸேன வுத்தம் அப்³ப⁴ந்தரபரிபோ⁴க³ஸ்ஸ விஸும் வக்க²மானத்தா. தது³ப⁴யம்பி ‘‘ஸப்பாணக’’ந்தி கத்வா வத⁴கசித்தம் வினாவ ஸிஞ்சனே பஞ்ஞத்தத்தா ‘‘பண்ணத்திவஜ்ஜ’’ந்தி வுத்தம். வத⁴கசித்தே பன ஸதி ஸிக்கா²பத³ந்தரேனேவ பாசித்தியம், ந இமினாதி த³ட்ட²ப்³ப³ம். உத³கஸ்ஸ ஸப்பாணகதா, ‘‘ஸிஞ்சனேன பாணகா மரிஸ்ஸந்தீ’’தி ஜானனம், தாதி³ஸமேவ ச உத³கம் வினா வத⁴கசேதனாய கேனசிதே³வ கரணீயேன திணாதீ³னம் ஸிஞ்சனந்தி இமானேத்த² சத்தாரி அங்கா³னி.

ஸப்பாணகஸிக்கா²பத³வண்ணனா நிட்டி²தா.

நிட்டி²தோ ஸேனாஸனவக்³கோ³ து³தியோ.

‘‘பூ⁴தகா³மவக்³கோ³’’திபி ஏதஸ்ஸேவ நாமம்.

3. ஓவாத³வக்³கோ³

1. ஓவாத³ஸிக்கா²பத³வண்ணனா

144. ததியவக்³க³ஸ்ஸ பட²மே திரச்சா²னபூ⁴தந்தி திரோகரணபூ⁴தம், பா³ஹிரபூ⁴தந்தி அத்தோ². ஸமித்³தோ⁴தி பரிபுண்ணோ. ஸஹிதத்தோ² அத்த²யுத்தோ. அத்த²க³ம்பீ⁴ரதாதி³னா க³ம்பீ⁴ரோ.

145-147. பரதோதி உத்தரி. கரோந்தோவாதி பரிபா³ஹிரே கரோந்தோ. விப⁴ங்கே³தி ஜா²னவிப⁴ங்கே³. சரணந்தி நிப்³பா³னக³மனாய பாத³ம்.

யத³ஸ்ஸாதி யம் அஸ்ஸ. தா⁴ரேதீதி அவினஸ்ஸமானம் தா⁴ரேதி. பரிகத²னத்த²ந்தி பகிண்ணககதா²வஸேன பரிச்சி²ன்னத⁴ம்மகத²னத்த²ம். திஸ்ஸோ அனுமோத³னாதி ஸங்க⁴ப⁴த்தாதீ³ஸு தா³னானிஸம்ஸப்படிஸம்யுத்தா நிதி⁴குண்ட³ஸுத்தாதி³ (கு². பா. 8.1 ஆத³யோ) -அனுமோத³னா, கே³ஹப்பவேஸமங்க³லாதீ³ஸு மங்க³லஸுத்தாதி³ (கு². பா. 5.1 ஆத³யோ; ஸு. நி. மங்க³லஸுத்த) -அனுமோத³னா, மதகப⁴த்தாதி³அமங்க³லேஸு திரோகுட்டாதி³ (கு². பா. 7.1 ஆத³யோ; பே. வ. 14 ஆத³யோ) -அனுமோத³னாதி இமா திஸ்ஸோ அனுமோத³னா. கம்மாகம்மவினிச்ச²யோதி பரிவாராவஸானே கம்மவக்³கே³ (பரி. 482 ஆத³யோ) வுத்தவினிச்ச²யோ. ஸமாதி⁴வஸேனாதி ஸமத²புப்³ப³கவஸேன. விபஸ்ஸனாவஸேன வாதி தி³ட்டி²விஸுத்³தி⁴ஆதி³காய ஸுக்க²விபஸ்ஸனாய வஸேன. அத்தனோ ஸீலரக்க²ணத்த²ம் அபரானபேக்க²தாய யேன காமம் க³ந்தும் சதஸ்ஸோ தி³ஸா அரஹதி, அஸ்ஸ வா ஸந்தி, தாஸு வா ஸாதூ⁴தி சாதுத்³தி³ஸோ.

அபி⁴வினயேதி பாதிமோக்க²ஸம்வரஸங்கா²தே ஸம்வரவினயே, தப்பகாஸகே வா வினயபிடகே. வினேதுந்தி ஸிக்கா²பேதும் பகாஸேதும். பகு³ணா வாசுக்³க³தாதி பாட²தோ ச அத்த²தோ ச பகு³ணா முகே² ஸன்னிதா⁴பனவஸேன வாசுக்³க³தா காதப்³பா³. அத்த²மத்தவஸேனபேத்த² யோஜனம் கரோந்தி. அபி⁴த⁴ம்மேதி லக்க²ணரஸாதி³வஸேன பரிச்சி²ன்னே நாமரூபத⁴ம்மே. புப்³பே³ கிர மஹாதே²ரா பரியத்திஅனந்தரதா⁴னாய ஏகேகஸ்ஸ க³ணஸ்ஸ தீ³க⁴னிகாயாதி³ஏகேகத⁴ம்மகோட்டா²ஸம் நிய்யாதேந்தா ‘‘தும்ஹே ஏதம் பாளிதோ ச அட்ட²கதா²தோ ச பரிஹரத², ஸக்கோந்தா உத்தரிபி உக்³க³ண்ஹதா²’’தி ஏவம் ஸகலத⁴ம்மம் க³ந்த²வஸேன நிய்யாதேந்தி, தத்த² தே ச பி⁴க்கூ² க³ந்த²னாமேன தீ³க⁴பா⁴ணகா மஜ்ஜி²மபா⁴ணகாதி வோஹரீயந்தி, தே ச அத்தனோ பா⁴ரபூ⁴தம் கோட்டா²ஸம் பரிச்சஜித்வா அஞ்ஞம் உக்³க³ஹேதும் ந லப⁴ந்தி. தம் ஸந்தா⁴யாஹ ‘‘ஸசே மஜ்ஜி²மபா⁴ணகோ ஹோதீ’’திஆதி³.

தத்த² ஹேட்டி²மா வா தயோ வக்³கா³தி மஹாவக்³க³தோ ஹேட்டி²மா ஸகா³த²கவக்³கோ³ (ஸம். நி. 1.1 ஆத³யோ), நிதா³னவக்³கோ³ (ஸம். நி. 2.1 ஆத³யோ), க²ந்த⁴வக்³கோ³தி (ஸம். நி. 3.1 ஆதி³யோ) இமே தயோ வக்³கா³. திகனிபாததோ பட்டா²ய ஹேட்டா²தி ஏககனிபாதது³கனிபாதே ஸந்தா⁴ய வுத்தம். த⁴ம்மபத³ம்பி ஸஹ வத்து²னா ஜாதகபா⁴ணகேன அத்தனோ ஜாதகேன ஸத்³தி⁴ம் உக்³க³ஹேதப்³ப³ம். ததோ ஓரம் ந வட்டதீதி மஹாபச்சரிவாத³ஸ்ஸ அதி⁴ப்பாயோ. ததோ ததோதி தீ³க⁴னிகாயாதி³தோ. உச்சினித்வா உக்³க³ஹிதம் ஸத்³த⁴ம்மஸ்ஸ டி²தியா, பி⁴க்கு²னோபி புப்³பா³பரானுஸந்தி⁴ஆதி³குஸலதாய ச ந ஹோதீதி ‘‘தம் ந வட்டதீ’’தி படிக்கி²த்தம். அபி⁴த⁴ம்மே கிஞ்சி உக்³க³ஹேதப்³ப³ந்தி ந வுத்தந்தி ஏத்த² யஸ்மா வினயே குஸலத்திகாதி³விபா⁴கோ³, ஸுத்தந்தேஸு ஸமத²விபஸ்ஸனாமக்³கோ³ ச அபி⁴த⁴ம்மபாட²ம் வினா ந விஞ்ஞாயதி, அந்த⁴காரே பவிட்ட²காலோ விய ஹோதி, தஸ்மா ஸுத்தவினயானம் க³ஹணவஸேன அபி⁴த⁴ம்மக்³க³ஹணம் வுத்தமேவாதி விஸும் ந வுத்தந்தி வேதி³தப்³ப³ம். யதா² ‘‘போ⁴ஜனம் பு⁴ஞ்ஜிதப்³ப³’’ந்தி வுத்தே ‘‘ப்³யஞ்ஜனம் கா²தி³தப்³ப³’’ந்தி அவுத்தம்பி வுத்தமேவ ஹோதி தத³வினாபா⁴வதோ, ஏவம்ஸம்பத³மித³ம் த³ட்ட²ப்³ப³ம்.

பரிமண்ட³லபத³ப்³யஞ்ஜனாயாதி பரிமண்ட³லானி பரிபுண்ணானி பதே³ஸு ஸிதி²லத⁴னிதாதி³ப்³யஞ்ஜனானி யஸ்ஸம், தாய. புரஸ்ஸ ஏஸாதி போரீ, நக³ரவாஸீனம் கதா²தி அத்தோ². அனேலக³ளாயாதி ஏத்த² ஏலாதி கே²ளம் தக்³க³ளனவிரஹிதாய. கல்யாணவாக்கரணோதி ஏத்த² வாசா ஏவ வாக்கரணம், உதா³ஹரணகோ⁴ஸோ. கல்யாணம் மது⁴ரம் வாக்கரணமஸ்ஸாதி கல்யாணவாக்கரணோ. உபஸம்பன்னாய மேது²னேனேவ அப⁴ப்³போ³ ஹோதி, ந ஸிக்க²மானாஸாமணேரீஸூதி ஆஹ ‘‘பி⁴க்கு²னியா காயஸம்ஸக்³க³ம் வா’’திஆதி³.

148. க³ருகேஹீதி க³ருகப⁴ண்டே³ஹி. ஏகதோஉபஸம்பன்னாயாதி உபயோக³த்தே² பு⁴ம்மவசனம். பி⁴க்கூ²னம் ஸந்திகே உபஸம்பன்னா நாம பரிவத்தலிங்கா³ வா பஞ்சஸதஸாகியானியோ வா. ஏதா பன ஏகதோஉபஸம்பன்னா ஓவத³ந்தஸ்ஸ பாசித்தியமேவ.

149. ந நிமந்திதா ஹுத்வா க³ந்துகாமாதி நிமந்திதா ஹுத்வா போ⁴ஜனபரியோஸானே க³ந்துகாமா ந ஹோந்தி, தத்தே²வ வஸிதுகாமா ஹோந்தீதி அத்தோ². யதோதி பி⁴க்கு²னுபஸ்ஸயதோ. யாசித்வாதி ‘‘தும்ஹேஹி ஆனீதஓவாதே³னேவ மயம்பி வஸிஸ்ஸாமா’’தி யாசித்வா. தத்தா²தி தஸ்மிம் பி⁴க்கு²னுபஸ்ஸயே. அபி⁴க்கு²காவாஸே வஸ்ஸம் வஸந்தியா பாசித்தியம், அபக³ச்ச²ந்தியா து³க்கடம்.

இமாஸு கதராபத்தி பரிஹரிதப்³பா³தி சோத³னம் பரிஹரந்தோ ஆஹ ‘‘ஸா ரக்கி²தப்³பா³’’தி. ஸா வஸ்ஸானுக³மனமூலிகா ஆபத்தி ரக்கி²தப்³பா³, இதராய அனாபத்திகாரணம் அத்தீ²தி அதி⁴ப்பாயோ. தேனாஹ ‘‘ஆபதா³ஸு ஹீ’’திஆதி³.

ஓவாத³த்தா²யாதி ஓவாதே³ யாசனத்தா²ய. த்³வே திஸ்ஸோதி த்³வீஹி தீஹி, கரணத்தே² சேதம் பச்சத்தவசனம். பாஸாதி³கேனாதி பஸாத³ஜனகேன காயகம்மாதி³னா. ஸம்பாதே³தூதி திவித⁴ம் ஸிக்க²ம் ஸம்பாதே³து. அஸம்மததா, பி⁴க்கு²னியா பரிபுண்ணூபஸம்பன்னதா, ஓவாத³வஸேன அட்ட²க³ருத⁴ம்மதா³னந்தி இமானேத்த² தீணி அங்கா³னி.

ஓவாத³ஸிக்கா²பத³வண்ணனா நிட்டி²தா.

2. அத்த²ங்க³தஸிக்கா²பத³வண்ணனா

153. து³தியே கோகனத³ந்தி பது³மவிஸேஸம், தம் கிர ப³ஹுபத்தம் வண்ணஸம்பன்னம். அயஞ்ஹேத்த² அத்தோ² – யதா² கோகனத³ஸங்கா²தம் பது³மம், ஏவம் பு²ல்லமுக²பது³மம் அவீதகு³ணக³ந்த⁴ம் நிம்மலே அந்தலிக்கே² ஆதி³ச்சம் விய ச அத்தனோ தேஜஸா தபந்தம் ததோ ஏவ விரோசமானம் அங்கே³ஹி நிச்ச²ரணகஜுதியா அங்கீ³ரஸம் ஸம்மாஸம்பு³த்³த⁴ம் பஸ்ஸாதி. ரஜோஹரணந்தி ஸரீரே ரஜம் புஞ்ச²தீதி ரஜோஹரணந்தி புஞ்ச²னசோளஸ்ஸ நாமம். ஓபா⁴ஸவிஸ்ஸஜ்ஜனபுப்³ப³கா பா⁴ஸிதகா³தா² ஓபா⁴ஸகா³தா² நாம. விஸுத்³தி⁴மக்³கா³தீ³ஸு (விஸுத்³தி⁴. 2.386) பன ‘‘ராகோ³ ரஜோ ந ச பன ரேணு வுச்சதீ’’திஆதி³ ஓபா⁴ஸகா³தா² வுத்தா, ந பனேஸா ‘‘அதி⁴சேதஸோ’’தி கா³தா². அயஞ்ச சூளபந்த²கத்தே²ரஸ்ஸ உதா³னகா³தா²தி உதா³னபாளியம் நத்தி², ஏகுதா³னியத்தே²ரஸ்ஸ (தே²ரகா³. 1.67 ஏகுதா³னியத்தே²ரகா³தா²வண்ணனா) நாயம் உதா³னகா³தா²தி தத்த² வுத்தம். இத⁴ பன பாளியா ஏவ வுத்தத்தா தே²ரஸ்ஸாபி உதா³னகா³தா²தி க³ஹேதப்³ப³ம். இத⁴ ச அக³ருத⁴ம்மேனாபி ஓவத³தோ பாசித்தியமேவ. அத்த²ங்க³தஸூரியதா, பரிபுண்ணூபஸம்பன்னதா, ஓவத³னந்தி இமானேத்த² தீணி அங்கா³னி.

அத்த²ங்க³தஸிக்கா²பத³வண்ணனா நிட்டி²தா.

3. பி⁴க்கு²னுபஸ்ஸயஸிக்கா²பத³வண்ணனா

162. ததியம் உத்தானமேவ. உபஸ்ஸயூபக³மனம், பரிபுண்ணூபஸம்பன்னதா, ஸமயாபா⁴வோ, க³ருத⁴ம்மேஹி ஓவத³னந்தி இமானேத்த² சத்தாரி அங்கா³னி.

பி⁴க்கு²னுபஸ்ஸயஸிக்கா²பத³வண்ணனா நிட்டி²தா.

4. ஆமிஸஸிக்கா²பத³வண்ணனா

164. சதுத்தே² ஆமிஸனிரபேக்க²ம்பி ஆமிஸஹேது ஓவத³தீதிஸஞ்ஞாய ப⁴ணந்தஸ்ஸபி அனாபத்தி ஸசித்தகத்தா ஸிக்கா²பத³ஸ்ஸ. ஸேஸமேத்த² உத்தானமேவ. உபஸம்பன்னதா, த⁴ம்மேன லத்³த⁴ஸம்முதிதா, அனாமிஸந்தரதா, அவண்ணகாமதாய ஏவம் ப⁴ணனந்தி இமானேத்த² சத்தாரி அங்கா³னி.

ஆமிஸஸிக்கா²பத³வண்ணனா நிட்டி²தா.

169. பஞ்சமம் சீவரதா³னஸிக்கா²பத³ம் உத்தானமேவ.

6. சீவரஸிப்³ப³னஸிக்கா²பத³வண்ணனா

176. ச²ட்டே² கதி²னவத்தந்தி கதி²னமாஸே சீவரம் கரோந்தானம் ஸப்³ரஹ்மசாரீனம் ஸஹாயபா⁴வூபக³மனம் ஸந்தா⁴ய வுத்தம். வஞ்சேத்வாதி ‘‘தவ ஞாதிகாயா’’தி அவத்வா ‘‘ஏகிஸ்ஸா பி⁴க்கு²னியா’’தி ஏத்தகமேவ வத்வா ‘‘ஏகிஸ்ஸா பி⁴க்கு²னியா’’தி ஸுத்வா தே அஞ்ஞாதிகஸஞ்ஞினோ அஹேஸுந்தி ஆஹ ‘‘அகப்பியே நியோஜிதத்தா’’தி. அஞ்ஞாதிகாய பி⁴க்கு²னியா ஸந்தகதா, நிவாஸனபாருபனூபக³தா, வுத்தனயேன ஸிப்³ப³னம் வா ஸிப்³பா³பனம் வாதி இமானேத்த² தீணி அங்கா³னி.

சீவரஸிப்³ப³னஸிக்கா²பத³வண்ணனா நிட்டி²தா.