து³தியகா³தா²ஸங்க³ணிகவண்ணனா

காயிகாதி³ஆபத்திவண்ணனா

474-5. நிதா³னுத்³தே³ஸம் வினா ஸேஸுத்³தே³ஸாபா⁴வா ‘‘ஸப்³ப³பாதிமோக்கு²த்³தே³ஸானஞ்ச ஸங்க³ஹோ ஹோதீ’’தி வுத்தம். வினயே க³ருகா வினயக³ருகா. இத³ம் பன த்³வீஸு கா³தா²ஸு கிஞ்சாபி ஆக³தம், அஞ்ஞேஹி பன மிஸ்ஸேத்வா வுத்தபா⁴வா நானாகரணம் பச்சேதப்³ப³ம். நவஸு டா²னேஸு கம்மம் ஹோதீதி கம்மஞத்தி ஹோதி. வாசாதி வசீஸம்ப⁴வா. அத்³தா⁴னஹீனோ ஊனவீஸதிவஸ்ஸோ. ‘‘அபிசேத்தா²தி குருந்தி³வாதோ³’’தி வுத்தம். வனப்பதிந்தி ஏவம் அதி³ன்னாதா³னே ஆக³தம் வனப்பதிம். விஸ்ஸட்டி²ச²ட்³ட³னேதி ஸுக்கவிஸ்ஸட்டி²யம். து³க்கடா கதாதி து³க்கடம் வுத்தம். ஆமகத⁴ஞ்ஞம் விஞ்ஞாபேத்வா பு⁴ஞ்ஜந்தியா புப்³ப³பயோகே³ து³க்கடம், அஜ்ஜோ²ஹாரே பாசித்தியம்.

பாசித்தியவண்ணனா

476. மஹாஸங்கி⁴கா ஸாமணேரேபி ஆபத்திம் தே³ஸாபேந்தி கிர, தேன வுத்தம் ‘‘ந தே³ஸாபேதப்³பா³’’தி, த³ண்ட³கம்மம் பன தேஸம் காதப்³ப³ம் ததா²ரூபே ஓளாரிகவீதிக்கமே.

அவந்த³னீயபுக்³க³லாதி³வண்ணனா

477. த³ஸஸதம் ஆபத்தியோதி ஸஹஸ்ஸம் ஆபத்தியோ. சம்பாயம் வினயவத்து²ஸ்மிந்தி சம்பேய்யக்க²ந்த⁴கே. அத⁴ம்மேன வக்³க³ந்திஆதீ³னி சத்தாரி கம்மானியேவ ப⁴க³வதா வுத்தானீதி அத்தோ². ந கேவலம் ஆபத்தியேவ, அத² கோ² ச² ஸமதா²…பே… ஸம்முகா²வினயேன ஸம்மந்தி, ஸமாயோக³ம் க³ச்ச²ந்தி ஸம்முகா²வினயேன ஸம்பயோக³ம் க³ச்ச²ந்தீதி அத்தோ². வினா ஸமதே²ஹி ஸம்மதி, ஸமத²பா⁴வம் க³ச்ச²தி. படிஸேத⁴த்தே² ஸதி வினா ஸமதே²ஹீதி ஸமதே²ஹி வினாதி அத்தோ².

ஸோளஸகம்மாதி³வண்ணனா

478. அஸுத்தகந்தி ஸுத்தவிரஹிதம், உஸுத்தம் தத்ர நத்தீ²தி அதி⁴ப்பாயோ.

து³தியகா³தா²ஸங்க³ணிகவண்ணனா நிட்டி²தா.