ஸேத³மோசனகா³தா²வண்ணனா

அவிப்பவாஸபஞ்ஹாவண்ணனா

479. தஹிந்தி தஸ்மிம் புக்³க³லே. அகப்பியஸம்போ⁴கோ³ நாம மேது²னத⁴ம்மாதி³. ‘‘வரஸேனாஸனரக்க²ணத்தா²ய விஸ்ஸஜ்ஜேத்வா பரிபு⁴ஞ்ஜிதும் வட்டதீ’’தி க³ருப⁴ண்ட³வினிச்ச²யே வுத்தோ. ஏகாத³ஸாவந்தி³யே பண்ட³காத³யோ ஏகாத³ஸ. உபேதி ஸபரிஸம். ந ஜீவதி நிம்மிதரூபத்தா. ‘‘உப்³ப⁴க்க²கேன வதா³மீ’’தி இமினா முகே² மேது²னத⁴ம்மாபா⁴வம் தீ³பேதி. அதோ⁴னாபி⁴விவஜ்ஜனேன வச்சமக்³க³ப்பஸ்ஸாவமக்³கே³ஸு. கா³மந்தரபரியாபன்னம் நதி³பாரம் ஓக்கந்தபி⁴க்கு²னிம் ஸந்தா⁴யாதி பி⁴க்கு²னியா கா³மாபரியாபன்னபரதீரே நதி³ஸமீபமேவ ஸந்தா⁴ய வுத்தா. தத்த² பரதீரே கா³மூபசாரோ ஏகலேட்³டு³பாதோ நதி³பரியந்தேன பரிச்சி²ன்னோ, தஸ்மா பரதீரே ரதனமத்தம்பி அரஞ்ஞம் ந அத்தி², தஞ்ச திணாதீ³ஹி படிச்ச²ன்னத்தா த³ஸ்ஸனூபசாரவிரஹிதம் கரோதி. தத்த² அத்தனோ கா³மே ஆபத்தி நத்தி². பரதீரே பன ஏகலேட்³டு³பாதஸங்கா²தே கா³மூபசாரேயேவ பத³ம் ட²பேதி. அந்தரே அபி⁴த⁴ம்மவஸேன அரஞ்ஞபூ⁴தம் ஸககா³மம் அதிக்கமதி நாம, தஸ்மா க³ணம்ஹா ஓஹீயனா ச ஹோதீதி ஞாதப்³ப³ம். ஏத்தாவதாபி ஸந்தோஸமகத்வா விசாரேத்வா க³ஹேதப்³ப³ம். பி⁴க்கூ²னம் ஸந்திகே உபஸம்பன்னா பஞ்சஸதா மஹாபஜாபதிப்பமுகா². மஹாபஜாபதிபி ஹி ஆனந்த³த்தே²ரேன தி³ன்னஓவாத³ஸ்ஸ படிக்³க³ஹிதத்தா பி⁴க்கூ²னம் ஸந்திகே உபஸம்பன்னா நாம.

பாராஜிகாதி³பஞ்ஹாவண்ணனா

480. ‘‘து³ஸ்ஸகுடிம் ஸந்தா⁴யா’’தி ஸஹ து³ஸ்ஸேன வீதிக்கமனஸ்ஸ ஸக்குணேய்யதாய வுத்தம். லிங்க³பரிவத்தே படிக்³க³ஹணஸ்ஸ விஜஹனதோ ஸாமம் க³ஹேத்வா பு⁴ஞ்ஜிதும் ந வட்டதி. காகஊஹத³னம் வாதி காகேன ஊஹத³னம் வா. ‘‘தயோ புரிஸேபி உபக³ந்த்வா’’தி பாட²ஸேஸோ.

பாசித்தியாதி³பஞ்ஹாவண்ணனா

481. மேது²னத⁴ம்மபச்சயா நாம காயஸம்ஸக்³கோ³. தம்ஹேது மேது²னத⁴ம்மஸ்ஸ புப்³ப³பா⁴க³பூ⁴தம் காயஸம்ஸக்³க³ம் வாயாமந்தியாதி அட்ட²வத்து²பூரணம் ஸந்தா⁴ய. பரிபோ⁴க³ப்பச்சயாதி பரிபோ⁴க³காரணா. தஸ்மாதி யஸ்மா பரிபோ⁴க³ப்பச்சயா ஆபஜ்ஜதி, தஸ்மா போ⁴ஜனபரியோஸானே ஹோதீதி அத்தோ². போராணபோத்த²கேஸு ‘‘தஸ்ஸா’’தி பாடோ². ‘‘காரணவசனம் ஸுந்த³ரம் போ⁴ஜனபரிச்சே²த³த³ஸ்ஸனதோ’’தி வத³ந்தி.

ஸேத³மோசனகா³தா²வண்ணனா நிட்டி²தா.