பி⁴க்கு²னீவிப⁴ங்க³வண்ணனா

1. பாராஜிககண்ட³வண்ணனா

க³ந்தா²ரம்ப⁴வண்ணனா

விப⁴ங்கே³ விய பி⁴க்கூ²னம், வித்தா²ரமபி⁴ஸங்க²தம்;

அகத்வா பி⁴க்கு²னீனம்பி, வக்கே² க³ண்டி²பத³க்கமம்.

யோ பி⁴க்கு²னீனம் விப⁴ங்கோ³ அஸ்ஸ, தஸ்ஸ ஸம்வண்ணனாக்கமோ பத்தோதி அத்தோ².

க³ந்தா²ரம்ப⁴வண்ணனா நிட்டி²தா.

1. பட²மபாராஜிகஸிக்கா²பத³வண்ணனா

656-7. தத்த² தத்த² டா²னுப்பத்திகபஞ்ஞா வீமம்ஸா. பத³படிபாடியா ஏவாதி மாதிகாபத³படிபாடியா ஏவ. ‘‘வுத்தந்தி ஸங்கீ³திகானம் உபஸங்கப்பனானம் விபா⁴ஜனம் வுத்த’’ந்தி லிகி²தம்.

658. ‘‘ஏஹிபி⁴க்கு²னீதி பி⁴க்கு²னீ, தீஹி ஸரணக³மனேஹி உபஸம்பன்னாதி பி⁴க்கு²னீ’’தி இத³ம் பன தே³ஸனாவிலாஸவஸேன வுத்தந்தி ஏகே. அஞ்ஞபு³த்³த⁴காலே அத்தீ²தி ஏகே, தம் ந யுத்தம் விய தி³ஸ்ஸதி அம்ஹாகம்பி பு³த்³த⁴காலே ஸம்ப⁴வப்பஸங்க³தோ, ஏஹிபி⁴க்கு²னியா படிஸேத⁴சா²யாதி³ஸ்ஸனதோ ச. யதா²ஹ த⁴ம்மபதே³ விஸாகா²வத்து²ஸ்மிம் (த⁴. ப. அட்ட². 1. விஸாகா²வத்து²) ‘‘தஸ்ஸ சீவரதா³னஸ்ஸ நிஸ்ஸந்தே³ன இமம் மஹாலதாபஸாத⁴னம் லபி⁴. இத்தீ²னஞ்ஹி சீவரதா³னம் மஹாலதாபஸாத⁴னப⁴ண்டே³ன மத்த²கம் பப்போதி, புரிஸானம் இத்³தி⁴மயபத்தசீவரேனா’’தி. தீஹி ஸரணக³மனேஹி உபஸம்பன்னாய பன பி⁴க்கு²னியா ஸம்ப⁴வோ அஞ்ஞபு³த்³த⁴காலே கதா³சி ஸியா, நத்தே²வ அம்ஹாகம் பு³த்³த⁴காலே. தே³ஸனாவிலாஸேன பன பி⁴க்கு²தே³ஸனாக்கமேனேவ பி⁴க்கு²னினித்³தே³ஸோ வுத்தோ, தேனேவ பி⁴க்கு²ஸங்க⁴வஸேன ஏகதோஉபஸம்பன்னா பி⁴க்கு²னியோ விஜ்ஜமானாபி தத்த² ந வுத்தா. தாஸம் அத்தி²தா இமாய பரிவாரகதா²ய வேதி³தப்³பா³ –

‘‘உபோ⁴ ஏகதோ உபஸம்பன்னா,

உபி⁴ன்னம் ஹத்த²தோ சீவரம் படிக்³க³ண்ஹேய்ய;

ஸியா ஆபத்தியோ நானா,

பஞ்ஹா மேஸா குஸலேஹி சிந்திதா’’தி. (பரி. 479);

அத² வா புது²ஜ்ஜனகாலே ஏஹிபி⁴க்கு²ஸரணக³மனேன உபஸம்பன்னோவ இத்தி²லிங்க³பாதுபா⁴வேன பி⁴க்கு²னிபா⁴வே டி²தா புரிஸூபஸம்பன்னம் உபாதா³ய ‘‘ஏஹிபி⁴க்கு²னீ’’தி, ‘‘தீஹி ஸரணக³மனேஹி உபஸம்பன்னா பி⁴க்கு²னீ’’தி ச ஸங்க்²யம் க³ச்ச²தி. நோ சே, தம் வசனம் விருஜ்ஜே²ய்யாதி ஏகே, விசாரேத்வா க³ஹேதப்³ப³ம். ‘‘விஞ்ஞூ படிப³லோ’’தி த்³வின்னம் அவஸ்ஸவபா⁴வஸ்ஸ இஜ்ஜ²னதோ வுத்தம். ஏத்த² யஸ்மா யம் கிஞ்சி ஆமிஸம் படிக்³க³ண்ஹந்தீனம் அக்³க³ஹத்தா² புரிஸானம் ஹத்தே²ஹி கதா³சி மிஸ்ஸீபா⁴வம் க³ச்ச²ந்தி, வந்த³ந்தானம் வா புரிஸானம் ஸிரானி அக்³க³பாதே³ஹி மிஸ்ஸிதானி கதா³சி ஹோந்தி, கேஸச்சே²த³னகாலே வா ஸிரம் புரிஸானம் ஹத்தே²ஹி மிஸ்ஸிதம் ஹோதி, சித்தம் நாமேதம் அதிரத்³த⁴க³வேஸி, து³ரக்கி²யம் வா, தஸ்மா ‘‘மா அதிலஹும் பாராஜிகாபத்தி பி⁴க்கு²னீனம் ஹோதூ’’தி பு³த்³தா⁴ ப⁴க³வந்தோ காருஞ்ஞேன பாராஜிகக்கே²த்தபரிச்சே²த³ம், து²ல்லச்சயக்கே²த்தபரிச்சே²த³ஞ்ச விஸும் விஸும் தே³ஸேஸுந்தி வேதி³தப்³ப³ம்.

659. தப்³ப³ஹுலனயேன ஸா வுத்தாதி ஏத்த² அயமனுக³ண்டி²பத³க்கமோ – யேபு⁴ய்யேன கிரியஸமுட்டா²னத்தா ‘‘கிரியஸமுட்டா²ன’’ந்தி வுத்தம். ‘‘காயஸம்ஸக்³க³ம் ஸமாபஜ்ஜேய்யா’’தி அவத்வா பன ‘‘ஸாதி³யேய்யா’’தி வுத்தத்தா அகிரியதோபி ஸமுட்டா²தீதி வேதி³தப்³ப³ம். யதா² சேத்த², ஏவம் ஹேட்டா² ‘‘மனுஸ்ஸித்தி²யா தயோ மக்³கே³ மேது²னம் த⁴ம்மம் படிஸேவந்தஸ்ஸ ஆபத்தி பாராஜிகஸ்ஸா’’திஆதி³னா நயேன கிரியஸமுட்டா²னதம் வத்வா தத³னந்தரம் ‘‘பி⁴க்கு²பச்சத்தி²கா…பே… ஸோ சே பவேஸனம் ஸாதி³யதி, ஆபத்தி பாராஜிகஸ்ஸா’’திஆதி³னா (பாரா. 56) நயேன அகிரியஸமுட்டா²னதாயபி வுத்தத்தா பட²மபாராஜிகஸ்ஸாபி தப்³ப³ஹுலனயேனேவ கிரியஸமுட்டா²னதா வேதி³தப்³பா³. ந ஹி பவேஸனஸாதி³யனாதி³ம்ஹி கிரியஸமுட்டா²னதா தி³ஸ்ஸதி. அங்க³ஜாதசலனஞ்சேத்த² ந ஸாரதோ த³ட்ட²ப்³ப³ம் ‘‘ஸோ சே பவேஸனம் ந ஸாதி³யதி, பவிட்ட²ம் ந ஸாதி³யதி, டி²தம் ந ஸாதி³யதி, உத்³த⁴ரணம் ஸாதி³யதி, ஆபத்தி பாராஜிகஸ்ஸா’’தி (பாரா. 58) ஏத்த² டி²த ந ஸாதி³யனே பகதியாபி பரிபுண்ணசலனத்தா. ஸாதி³யனபச்சயா ஹி ஸேவனசலனஞ்சேத்த² ந தி³ஸ்ஸதேவாதி தப்³ப³ஹுலனயேனேவ கிரியஸமுட்டா²னதா க³ஹேதப்³பா³. தத்த² தத்த² அட்ட²கதா²ஸு கஸ்மா தப்³ப³ஹுலனயோ அவுத்தோதி சே? ‘‘யோ பன பி⁴க்கு² மேது²னம் த⁴ம்மம் படிஸேவேய்யா’’தி (பாரா. 39, 42) மாதிகாயம் கிரியஸமுட்டா²னஸ்ஸ ஸரூபேன வுத்தத்தா தத³னுரூபவஸேன விப⁴ங்க³னயமனோலோகேத்வா ‘‘கிரியஸமுட்டா²ன’’மிச்சேவ வுத்தம். யதா² சேதேஸு தப்³ப³ஹுலனயேன கிரியஸமுட்டா²னதா வுத்தா, ததா² ஸுராதீ³னம் அகுஸலேனேவ பாதப்³ப³தா, ந இதரதா² ‘‘யம் அகுஸலேனேவ ஆபஜ்ஜதி, அயம் லோகவஜ்ஜா, ஸேஸா பண்ணத்திவஜ்ஜா’’தி (கங்கா². அட்ட². பட²மபாராஜிகவண்ணனா) வுத்தே லோகவஜ்ஜபண்ணத்திவஜ்ஜானம் நியமனலக்க²ணஸித்³தி⁴ ஹோதி, ததா² தம் அவத்வா ‘‘யஸ்ஸா ஸசித்தகபக்கே² சித்தம் அகுஸலமேவ ஹோதி, அயம் லோகவஜ்ஜா. ஸேஸா பண்ணத்திவஜ்ஜா’’தி வுத்தே லோகவஜ்ஜவசனம் நிரத்த²கம் ஸியா வத்து²அஜானனபக்கே²பி அகுஸலேனேவ பாதப்³ப³த்தா. யஸ்மா தத்த² ஸுராபானவீதிக்கமஸ்ஸ அகுஸலசித்துப்பாதோ³ நத்தி², தஸ்மா க²ந்த⁴கட்ட²கதா²யம் (மஹாவ. அட்ட². 108) ‘‘மஜ்ஜபானே பன பி⁴க்கு²னோ அஜானித்வாபி பீ³ஜதோ பட்டா²ய மஜ்ஜம் பிவந்தஸ்ஸ பாசித்தியம், ஸாமணேரோ ஜானித்வா பிவந்தோ ஸீலபே⁴த³ம் ஆபஜ்ஜதி, ந அஜானித்வா’’தி வுத்தம், ந வுத்தம் ‘‘வத்து²அஜானனபக்கே² பாணாதிபாதாதீ³னம் ஸித்³தி⁴கரஅகுஸலசித்துப்பாத³ஸதி³ஸே சித்துப்பாதே³ ஸதிபி ஸாமணேரோ ஸீலபே⁴த³ம் நாபஜ்ஜதீ’’தி. அபி⁴னிவேஸவசனம் பாணாதிபாதாதீ³ஹி ஸமானஜாதிகத்தா ஸாமணேரானம் ஸுராபானஸ்ஸ. ‘‘ஸுராத³யோ பனிமே’’தி வத்து²ம் ஜானித்வா பாதப்³ப³தாதி³வஸேன வீதிக்கமந்தஸ்ஸ அகுஸலஸ்ஸ அஸம்ப⁴வோ நத்தி². தேன வுத்தம் ‘‘யஸ்ஸ ஸசித்தகபக்கே²’’திஆதி³.

கிஞ்சேத்த² யுத்திவசனேன அரஹந்தானம் அப்பவிஸனதோ ஸசித்தகாசித்தகபக்கே²ஸு அகுஸலனியமோதி சே? ந, த⁴ம்மதாவஸேன ஸேக்கா²னம்பி அப்பவிஸனதோ. அசித்தகபக்கே² அகுஸலனியமாபா⁴வத³ஸ்ஸனத்த²ம் ஸுபந்தஸ்ஸ முகே² பக்கி²த்தஜலபி³ந்து³மிவ ஸுராபி³ந்து³ஆத³யோ உதா³ஹரிதப்³பா³தி. தப்³ப³ஹுலனயேன ஹி அத்தே² க³ஹிதே புப்³பே³னாபரம் அட்ட²கதா²ய ஸமேதி. ‘‘ஸத்³தி⁴ம் பாளியா அவிஸேஸத்தோ² பரதோ ஆவி ப⁴விஸ்ஸதீதி அபரே’’தி வுத்தம். இத³மேத்த² விசாரேதப்³ப³ம். யதி³ வத்து²ஜானனபக்கே² வினா அகுஸலேன மஜ்ஜபானம் ஸியா, கஸ்மா நாளிமஜ்ஜ²ம் நாதிக்கமதி அரியானம் பானகாதி³ஸஞ்ஞீனந்தி? ஸீலபே⁴த³வத்து²வீதிக்கமோ வினாபி சித்தேன அரியானம் த⁴ம்மதாவஸேனேவ ந ஸம்ப⁴வதீதி சே, ந, சக்கு²பாலத்தே²ரவத்து² (த⁴. ப. அட்ட². 1.1) ஆதி³விரோத⁴தோதி. அபிச பி⁴க்கு²னோபி ஸாமணேரஸ்ஸ விய ஸுராபானம் ஸசித்தகமேவ கஸ்மா ந ஜாதந்தி? அப்பதிரூபத்தாதி சே, ஸாமணேரானம்பி அப்பதிரூபமேவ. ஸஹத⁴ம்மிகா ஏவ ஹி தே. மஹாஸாவஜ்ஜத்தாதி சே? ஸாமணேரானம்பி தாதி³ஸமேவ. ஸாமணேரானம் ஸசித்தகமேவ பாராஜிகம், இதரம் த³ண்ட³கம்மவத்தூ²தி சே? பி⁴க்கூ²னம்பி மஜ்ஜபானே நத்தி². ஏத்த² திகபாசித்தியேன ந ப⁴விதப்³ப³ம். மஜ்ஜே அமஜ்ஜஸஞ்ஞிஸ்ஸ து³க்கடாபத்தி பஞ்ஞாபேதப்³பா³ ஸியா. பி⁴க்கு²ஸ்ஸ பாசித்தியவத்து² ஸாமணேரானம் பாராஜிகம் ஹோதி திரச்சா²னக³தஸாமணேரானம் வியாதி சே? அசித்தகம்பி மஜ்ஜபானாதீ³னம் ஸாமணேரானம் பாராஜிகம் பஞ்ஞாபேதப்³ப³ம் ஸியா. நாசித்தகம் பாராஜிகம் ஸம்ப⁴வதீதி சே? ந, பண்ணத்திவஜ்ஜம்பி பாராஜிகம் ஸம்ப⁴வதீதி. நிகாயந்தரபக்கே² அயமேவ தோ³ஸோ. அம்ஹாகஞ்ஹி லோகவஜ்ஜமேவ மஜ்ஜபானந்தி. கஸ்மா பனேத்த² ஸுராபானமேவ த⁴ம்மதாவஸேன அரியா ந கரோந்தீதி? ந கேவலம் ஸுராபானமேவ த⁴ம்மதாவஸேன அரியா ந கரோந்தி, பாணேஸுபி கோத⁴வஸேன பாணஸஞ்ஞிதாய ஸீஸச்சே²த³னாதீ³னி ந கரோந்தி, ஸதா³ரஸஞ்ஞாய பரதா³ரம் ந வீதிக்கமந்தி, அனத்த²ப⁴ஞ்ஜகஸஞ்ஞாய அத்த²ப⁴ஞ்ஜகமுஸா ந வத³ந்தி, ஸம்மாதி³ட்டி²ஸஞ்ஞாய மிச்சா²தி³ட்டி²ம் ந படிபஜ்ஜந்தீதி வேதி³தப்³பா³. ஆசரியாபி ஸுராபானே அகுஸலனியமாபா⁴வமேவ வத³ந்தி, தஸ்மா ஏவ மாதிகாட்ட²கதா²ய க³ண்டி²பதே³ லோகவஜ்ஜபண்ணத்திவஜ்ஜாதி⁴காரே ‘‘ஸசித்தகபக்கே²அகுஸலந்தி ஸுராபானாதி³ஸங்க³ஹத்த²ம், இதரதா² யஸ்ஸ அகுஸலமேவாதி வதே³ய்யா’’தி லிகி²தம். கிரியஸமுட்டா²னதா பனஸ்ஸ தப்³ப³ஹுலனயமேவ, ந பட²மபாராஜிகே. கத²ம்? காயஸம்ஸக்³க³ஸிக்கா²பத³ம் பட²மபாராஜிகஸமுட்டா²னம். ஏத்த² பி⁴க்கு²ஸ்ஸ ச பி⁴க்கு²னியா ச காயஸம்ஸக்³க³பா⁴வே ஸதி பி⁴க்கு²னீ காயங்க³மசோபயமானாபி சித்தேனேவ அதி⁴வாஸேந்தீ ஆபஜ்ஜதி, ந ஏவம் பி⁴க்கு². பி⁴க்கு² பன சோபயமானோவ ஆபஜ்ஜதி, ஏவமேவ பட²மபாராஜிகேபி சோபனே ஸதி ஏவ ஆபஜ்ஜதி, நாஸதி. பவேஸனம் ஸாதி³யதீதி ஏத்த² பவேஸனஸாதி³யனம் நாம ஸேவனசித்தஸ்ஸுப்பாத³னந்தி, ஏவம் ஸந்தேபி ‘‘வீமம்ஸித்வா க³ஹேதப்³ப³’’ந்தி வுத்தம்.

பட²மபாராஜிகஸிக்கா²பத³வண்ணனா நிட்டி²தா.

2. து³தியபாராஜிகஸிக்கா²பத³வண்ணனா

‘‘கிஸ்ஸ பன த்வம் அய்யே ஜானம் பாராஜிகம் த⁴ம்மம் அஜ்ஜா²பன்ன’’ந்தி வசனதோ, ‘‘அட்ட²ன்னம் பாராஜிகானம் அஞ்ஞதரம் பாராஜிகம் அஜ்ஜா²பன்ன’’ந்தி (பாசி. 666) வசனதோ, அந்தே ‘‘உத்³தி³ட்டா² கோ² அய்யாயோ அட்ட² பாராஜிகா த⁴ம்மா’’திஆதி³வசனதோ (பாசி. 677), பரிவாரே ‘‘ஸாதா⁴ரணபஞ்ஞத்தி உப⁴தோபஞ்ஞத்தீ’’தி (பரி. 201) வசனதோ ச பி⁴க்கு²னிவிப⁴ங்க³ம் பத்வா ப⁴க³வா ஸாதா⁴ரணானி ஸிக்கா²பதா³னி பி⁴க்கூ²னம் உப்பன்னவத்து²ஸ்மிம்யேவ ‘‘யா பன பி⁴க்கு²னீ ச²ந்த³ஸோ மேது²னம் த⁴ம்மம் படிஸேவேய்ய அந்தமஸோ திரச்சா²னக³தேனபி பாராஜிகா ஹோதி அஸம்வாஸா’’திஆதி³னா நயேன ஸவிஸேஸம்பி அவிஸேஸம்பி மாதிகம் நிக்கி²பித்வா அனுக்கமேன பத³பா⁴ஜனம், ஆபத்திபே⁴த³ம், திகச்சே²த³ம், அனாபத்திவாரஞ்ச அனவஸேஸம் வத்வா வித்தா²ரேஸி. ஸங்கீ³திகாரகேஹி பன அஸாதா⁴ரணபஞ்ஞத்தியோயேவ இத⁴ வித்தா²ரிதாதி வேதி³தப்³பா³.

666. தத்த² ‘‘அட்ட²ன்னம் பாராஜிகான’’ந்தி இத³ம் கேவலம் ஸங்கீ³திகாரகானம்யேவ நயதோ நிக்கி²த்தவசனம் இதோ புப்³பே³ ச²ட்ட²ஸத்தமட்ட²மானம் பாராஜிகானம் அபஞ்ஞத்தத்தா. ப⁴க³வதா பன இத³ம் பஞ்ஞாபிதமாதி³ஸிக்கா²பத³ம்பி உபாதா³ய ‘‘ச²ன்னம் பாராஜிகான’’ந்தி வுத்தம் ஸியா. இதோ உத்³த⁴ம் பஞ்ஞத்தானிபி உபாதா³ய ‘‘அட்ட²ன்னம் பாராஜிகான’’ந்தி வசனம் அபரபா⁴கே³ உப்பன்னந்தி ஏகச்சே ஆசரியா. அட்ட²கதா²யம் பன ‘‘இத³ஞ்ச பாராஜிகம் பச்சா² பஞ்ஞத்தம், தஸ்மா ‘அட்ட²ன்ன’ந்தி விப⁴ங்கே³ வுத்த’’ந்திஆதி³ வுத்தம், தஸ்மா அட்ட²கதா²சரியானம் மதேன ஸித்³த⁴மேதம் யதா²பஞ்ஞத்தானுக்கமவஸேனேவ ஸங்கீ³தானீதி. ‘‘அஞ்ஞாஸி’’ந்தி பாடோ². அஞ்ஞாஸீதி ந க³ஹேதப்³போ³. ‘‘து³ட்டு²ல்லஸிக்கா²பதே³ வுத்தனயேனேவா’’தி வசனதோ வஜ்ஜபடிச்சா²தி³கம் யா படிச்சா²தே³தி, ஸாபி வஜ்ஜபடிச்சா²தி³கஆயேவாதி ஸித்³த⁴ம். கிஞ்சாபி வஜ்ஜபடிச்சா²த³னம் பேமவஸேன ஹோதி, ததா²பி ஸிக்கா²பத³வீதிக்கமசித்தம் தோ³மனஸ்ஸிகமேவ ஹோதீதி கத்வா ‘‘து³க்க²வேத³ன’’ந்தி வுத்தம்.

து³தியபாராஜிகஸிக்கா²பத³வண்ணனா நிட்டி²தா.

3. ததியபாராஜிகஸிக்கா²பத³வண்ணனா

669. இமம் அதி⁴ப்பாயமத்தந்தி ‘‘சோதே³த்வா ஸாரேத்வா’’தி ஏதம். ஏத்தா²யம் விசாரணா – யோ பி⁴க்கு² உக்கி²த்தகபி⁴க்கு²னா ஸமானதி³ட்டி²கோ லத்³தி⁴னானாஸம்வாஸகோ ஹோதி, ஸோ அவந்த³னீயோ, கம்மாகம்மே உக்கி²த்தகோ விய ந க³ணபூரணோ, ஸஹஸேய்யம்பி ந லப⁴தி, ந ததா² பி⁴க்கு²னீ. ஸா ஹி யாவ ந ஸமனுப⁴ட்டா², தாவ க³ணபூரகா ச ஹோதி, ஸம்வாஸஞ்ச லப⁴தி. லத்³தி⁴னானாஸம்வாஸிகானுவத்திகாபி உக்கி²த்தானுவத்திகாவ ஹோதி. உக்கி²த்தோ சே காலங்கதோ, தத³னுவத்தகோ பி⁴க்கு² லத்³தி⁴னானாஸம்வாஸகோ ஹோதியேவ. ததா² விப்³ப⁴ந்தேபி தஸ்மிம் தித்தி²யபக்கந்தகேபி ஸிக்க²ம் பச்சக்கா²ய ஸாமணேரபூ⁴மியம் டி²தேபீதி ஏகே. தேஸம் மதேன உக்கி²த்தகே ததா²பூ⁴தேபி பி⁴க்கு²னீ தத³னுவத்திகா ஸமனுபா⁴ஸிதப்³பா³வாதி ஆபஜ்ஜதி. ஸமனுபா⁴ஸனகம்மம் ஸங்கா⁴யத்தம், ஸங்கே⁴ன ஸஞ்சிச்ச புரிமகாபத்திம் அபனேதும் ந யுத்தம் விய கா²யதி. உக்கே²பனீயகம்மஞ்ச ஆபத்திஅத³ஸ்ஸனமத்தே, அப்படிகம்மமத்தே, குதி³ட்டி²அப்படினிஸ்ஸஜ்ஜனமத்தே ச கரியதி, தஸ்ஸ அனுவத்தனமத்தேன ஸமனுபா⁴ஸித்வா ஸாஸனதோ சாவேதப்³பா³னீதி ந யுத்தந்தி சே? ந வத்தப்³ப³மேவ, இத³ம் அபாராஜிகவத்தூ²ஸுபி தப்பஸங்க³தோ, அனஞ்ஞவிஸயத்தா ச வினயஸ்ஸ.

ததியபாராஜிகஸிக்கா²பத³வண்ணனா நிட்டி²தா.

4. சதுத்த²பாராஜிகஸிக்கா²பத³வண்ணனா

675. ‘‘லோகஸ்ஸாத³ஸங்கா²தஸ்ஸ மித்தஸந்த²வஸ்ஸ வஸேன தம் த³ஸ்ஸேதும் காயஸம்ஸக்³க³ராகே³னாதி வுத்த’’ந்தி லிகி²தம். திஸ்ஸித்தி²யோதி தீஸு இத்தீ²ஸு, திஸ்ஸோ வா இத்தி²யோ. தம் ந ஸேவேதி தாஸு ந ஸேவதி. அனரியாதி உப⁴தோப்³யஞ்ஜனா. ப்³யஞ்ஜனஸ்மிந்தி அத்தனோ ப்³யஞ்ஜனே. ந ஸேவேதி ந ஸேவதி. ந சாசரேதி நாசரதி. வண்ணாவண்ணோதி த்³வீஹிபி ஸுக்கவிஸ்ஸட்டி². க³மனுப்பாத³னந்தி ஸஞ்சரித்தம்.

676. ‘‘நிவத்த²ம் வா பாருதம் வா’’தி ஏத்த² நிவத்த²ஸ்ஸ வா பாருதஸ்ஸ வா வத்த²ஸ்ஸ க³ஹணம் ஸாதி³யதீதி அத்தோ².

சதுத்த²பாராஜிகஸிக்கா²பத³வண்ணனா நிட்டி²தா.

பாராஜிககண்ட³வண்ணனா நிட்டி²தா.

2. ஸங்கா⁴தி³ஸேஸகண்ட³வண்ணனா

1. பட²மஸங்கா⁴தி³ஸேஸஸிக்கா²பத³வண்ணனா

681. ஆஹதகோதி ஆனீதோ, நியதகோதி அதி⁴ப்பாயோ. அகப்பியஅட்³டோ³ நாம ஸங்க⁴ஸ்ஸ வா ஆராமிகபுக்³க³லஸ்ஸ வா வத்து²ஸ்ஸ காரணா ஸங்க⁴ஸ்ஸ வாரிகபா⁴வேன ஸயமேவ வா அதி⁴கரணட்டா²னம் க³ந்த்வா ‘‘அம்ஹாகம் ஏஸோ தா³ஸோ, தா³ஸீ, வாபீ, கே²த்தம், ஆராமோ, ஆராமவத்து², கா³வோ, கா³வீ, மஹிம்ஸீ, அஜா, குக்குடா’’திஆதி³னா வோஹரதி, அகப்பியம். ‘‘அயம் அம்ஹாகம் ஆராமிகோ ஆராமிகா, அயம் வாபீ இத்த²ன்னாமேன ஸங்க⁴ஸ்ஸ ஹத்தே² தோ³ஹனத்தா²ய தி³ன்னா. இதோ கே²த்ததோ ஆராமதோ உப்பஜ்ஜனகசதுபச்சயா இதோ கா³விதோ மஹிம்ஸிதோ அஜாதோ உப்பஜ்ஜனககோ³ரஸா இத்த²ன்னாமேன ஸங்க⁴ஸ்ஸ தி³ன்னா’’தி புச்சி²தே வா அபுச்சி²தே வா வத்தும் வட்டதி. ‘‘கத’’ந்தி அவத்வா ‘‘கரோந்தீ’’தி வசனேன கிர அனேனகதம் ஆரப்³ப⁴ ஆசிக்கி²தா நாம ஹோதி. கீ³வாதி கேவலம் கீ³வா ஏவ ஹோதி, ந பாராஜிகம். காராபேத்வா தா³தப்³பா³தி ஏத்த² ஸசே ஆவுத⁴ப⁴ண்ட³ம் ஹோதி, தஸ்ஸ தா⁴ரா ந காரேதப்³பா³, அஞ்ஞேன பன ஆகாரேன ஸஞ்ஞாபேதப்³ப³ம். ‘‘திசித்தம் திவேத³ன’’ந்தி வுத்தத்தா ‘‘மானுஸ்ஸயவஸேன கோது⁴ஸ்ஸயவஸேனா’’தி தப்³ப³ஹுலனயேன வுத்தந்தி வேதி³தப்³ப³ம்.

பட²மஸங்கா⁴தி³ஸேஸஸிக்கா²பத³வண்ணனா நிட்டி²தா.

2. து³தியஸங்கா⁴தி³ஸேஸஸிக்கா²பத³வண்ணனா

683. ப⁴டிபுத்தகானம் குமாரப⁴டிகானம் க³ணா ப⁴டிபுத்தக³ணா. கப்பந்தி கப்பியம். கப்பக³திகந்தி கப்பியஸபா⁴வம். பக்கந்தாஸுபீதி அத்தனோ பரிஸம் ட²பேத்வா இதராஸு பக்கந்தாஸு. பண்ணத்திம் அஜானந்தா அரியாபி வுட்டா²பேந்தீதி கத்வா வா கம்மவாசாபரியோஸானே ஆபத்திக்க²ணே விபாகாப்³யாகதஸமங்கி³தாவஸேன வா ‘‘திசித்த’’ந்தி வுத்தந்தி வேதி³தப்³ப³ம். ‘‘பப்³பா³ஜனே ந து³க்கட’’ந்தி போராணக³ண்டி²பதே³ வுத்தம்.

து³தியஸங்கா⁴தி³ஸேஸஸிக்கா²பத³வண்ணனா நிட்டி²தா.

3. ததியஸங்கா⁴தி³ஸேஸஸிக்கா²பத³வண்ணனா

687. ப⁴த்³தா³காபிலானீ மஹாகஸ்ஸபஸ்ஸ புராணது³தியா கிர. ஞாதீனம் குலம் யஸ்மிம் கா³மகே, ததே³தம் கா³மகம் ஞாதிகுலம், குலஸன்னிஹிதம் கா³மகம் அக³மாஸீதி அத்தோ². ‘‘அஜம் கா³மம் நேதீ’’திஆதீ³ஸு விய வா த்³விகம்மிகம் கத்வா கா³மகம் அக³மாஸி ஞாதிகுலம் அக³மாஸீதிபி யுஜ்ஜதி.

692. ‘‘அபரிக்கி²த்தஸ்ஸ கா³மஸ்ஸ உபசாரம் அதிக்காமேந்தியா’’தி வசனேனபி ஏவம் வேதி³தப்³ப³ம் – விகாலகா³மப்பவேஸனே த்³வின்னம் லேட்³டு³பாதானம்யேவ வஸேன உபசாரோ பரிச்சி²ந்தி³தப்³போ³, இதரதா² யதா² ஏத்த² பரிக்கே²பாரஹட்டா²னம் பரிக்கே²பம் விய கத்வா ‘‘அதிக்காமேந்தியா’’தி வுத்தம், ஏவம் தத்தா²பி ‘‘அபரிக்கி²த்தஸ்ஸ கா³மஸ்ஸ உபசாரம் அதிக்கமந்தஸ்ஸா’’தி வதே³ய்ய. யஸ்மா பன தத்த² பரிக்கே²பாரஹட்டா²னதோ உத்தரி ஏகோ லேட்³டு³பாதோ உபசாரோதி அதி⁴ப்பேதோ, தஸ்மா தத³த்த²தீ³பனத்த²ம் ‘‘அபரிக்கி²த்தஸ்ஸ கா³மஸ்ஸ உபசாரம் ஓக்கமந்தஸ்ஸா’’தி வுத்தம். யம் பன அந்த⁴கட்ட²கதா²யம் ‘‘பரிக்கே²பாரஹட்டா²னம்யேவ ‘உபசார’ந்தி ஸல்லக்கே²த்வா பரிக்கே²பபரிக்கே²பாரஹட்டா²னானம் நின்னானாகாரணதீ³பனத்த²ம் ‘உபசாரம் ஓக்கமந்தஸ்ஸா’தி வுத்தம் பாளிவிஸேஸமஸல்லக்கே²த்வாவ அபரிக்கி²த்தஸ்ஸ கா³மஸ்ஸ உபசாரம் அதிக்கமந்தஸ்ஸ இத⁴ உபசாரோ பரிக்கே²போ யதா² ப⁴வேய்ய, தம் உபசாரம் பட²மம் பாத³ம் அதிக்கமந்தஸ்ஸ ஆபத்தி து³க்கடஸ்ஸ. து³தியம் பாத³ம் அதிக்கமந்தஸ்ஸ ஆபத்தி பாசித்தியஸ்ஸா’’தி வுத்தம், தம் ந க³ஹேதப்³ப³மேவ பாளியா விஸேஸஸப்³பா⁴வதோதி. ‘‘அபரிக்கி²த்தஸ்ஸ கா³மஸ்ஸ உபசாரம் ஓக்கமந்தியாதிபி ஏகச்சேஸு தி³ஸ்ஸதி, தம் ந க³ஹேதப்³ப³ந்தி அபரே’’தி வுத்தம். தத்த² ‘‘பாளிவிஸேஸமஸல்லக்கே²த்வா’’தி து³வுத்தம், கஸ்மா? விகாலகா³மப்பவேஸனஸிக்கா²பதே³பி கத்த²சி ‘‘உபசாரம் அதிக்கமந்தஸ்ஸா’’தி பாடோ² தி³ஸ்ஸதீதி, ஸோ அந்த⁴கட்ட²கதா²பாட²தோ க³ஹிதோதி ஆசரியோ. அபரிக்கி²த்தஸ்ஸ உபசாரோக்கமனமேவ பாடோ² யுஜ்ஜதி, ந அதிக்கமனம். கஸ்மா? ப³ஹூஸு டா²னேஸு பாளியா அட்ட²கதா²ஹி விருஜ்ஜ²னதோ, இமஸ்மிம் வாபி ஸிக்கா²பதே³ விருஜ்ஜ²தி. கத²ம்? க³ணம்ஹா ஓஹீயமானாய அரஞ்ஞே ஆபத்தி ஹோதி, ந கா³மே. அத² ச பன நித³ஸ்ஸனம்பி ‘‘ஸிக்கா²பதா³ பு³த்³த⁴வரேனா’’தி (பரி. 479) கா³தா² த³ஸ்ஸிதா, தஸ்மா உபசாரோக்கமனபரியாபன்னனதி³ம் அதிக்காமேந்தியா ஹோதி. கிஞ்ச பி⁴ய்யோ ‘‘க³ச்ச²ந்தஸ்ஸ சதஸ்ஸோ ஆபத்தியோ, டி²தஸ்ஸ சாபி தத்தகாதிஆதீ³னம் (பரி. 475) பரிவாரகா³தா²னம் அட்ட²கதா²ஹி உபசாரோக்கமனமேவ பாடோ²தி நிட்ட²ம் க³ந்தப்³ப³’’ந்தி ச வுத்தம், ஸுட்டு² ஸல்லக்கே²த்வா கதே²தப்³ப³ம்.

‘‘பத³ஸா க³மனமேவ ஹி இதா⁴தி⁴ப்பேதம், தேனேவ பட²மம் பாத³ம் அதிக்காமேந்தியாதிஆதி³மாஹா’’தி ஏத்த² விகாலகா³மப்பவேஸனஸிக்கா²பதா³தீ³ஸு தத³பா⁴வா யானேன வா இத்³தி⁴யா வா பவிஸதோ, அத்³தா⁴னம் க³ச்ச²தோ ச ஆபத்தீதி தீ³பேதி. தத்த² அஸாருப்பத்தா ஆபத்திமோக்கோ² நத்தீ²தி ஏகே, விசாரேத்வா க³ஹேதப்³ப³ம். பி⁴க்கு²னீவிஹாரபூ⁴மி ‘‘கா³மந்தர’’ந்தி ந வுச்சதி கா³மந்தரபரியாபன்னாயபி கப்பியபூ⁴மித்தா. ‘‘பரதோ ‘ஸசே பி⁴க்கு²னீஸு மஹாபோ³தி⁴யங்க³ணம் பவிஸந்தீஸு ஏகா ப³ஹி திட்ட²தி, தஸ்ஸா ஆபத்தீ’திஆதி³வசனதோ பி⁴க்கு²விஹாரோ ந கப்பியபூ⁴மீதி ஸித்³த⁴ம், தஸ்மா கஞ்சினக³ரே க²ந்த⁴த⁴ம்மவிஹாரோ விய, காவீரபட்டனே ஸாரீத⁴ம்மவிஹாரோ விய ச அஞ்ஞோபி ஸோ விஹாரோ, தஸ்மா ஸீமப³த்³த⁴ஸுக²த்த²ம் கா³மந்தரபா⁴வே நிரந்தரா அதி⁴ட்டா²னத்த²ம் பவிஸந்தியா, நிக்க²மந்தியாபி கா³மந்தராபத்தி ஹோதீதி அபரே’’தி வுத்தம். சதுகா³மஸாதா⁴ரணத்தாதி ஏத்த² ஏவம்விதே⁴ விஹாரே ஸீமம் ப³ந்த⁴ந்தேஹி சத்தாரோபி தே கா³மா ஸோதே⁴தப்³பா³தி வேதி³தப்³பா³. ஸம்வித³ஹித்வா பி⁴க்கு²னியா வா மாதுகா³மேன வா தே²ய்யஸத்தே²ன வா ஸத்³தி⁴ம் தம் விஹாரம் ஓக்கமந்தியா சதஸ்ஸோ ஆபத்தியோ ஏகதோவ ஹோந்தி. ‘‘கா³மந்தரே கா³மந்தரே ஆபத்தி பாசித்தியஸ்ஸா’’தி வுத்தாதி ஏகே.

து³தியபாது³த்³தா⁴ரே ஸங்கா⁴தி³ஸேஸோதி ஏத்த² ஸசே து³தியோ பாது³த்³தா⁴ரோ கப்பியபூ⁴மியம் ஹோதி, ந ஸங்கா⁴தி³ஸேஸோ, அகப்பியபூ⁴மியம் ஏவ ஸங்கா⁴தி³ஸேஸோ. ‘‘உப⁴யதீரேஸு விசரந்தி, வட்டதீதி த³ஸ்ஸனூபசாரஸ்ஸேத்த² ஸம்ப⁴வா’’தி லிகி²தம், தம் யுத்தம். ஸவனூபசாரோ ஹேத்த² நதீ³பாரே, கா³மந்தரே வா அப்பமாணந்தி. அந்த⁴கட்ட²கதா²யம் பன ‘‘பரதீரதோ நதி³ம் ஓதரித்வா த³ஸ்ஸனூபசாரதோ தா³ரூனி, பண்ணானிவா மக்³கி³த்வா ஆனேதி, அனாபத்தி. திசீவரானி பரதீரே ஓதாபேதி, அனாபத்தீ’’தி வுத்தம். ‘‘ஓரிமதீரமேவ ஆக³ச்ச²தி, ஆபத்தீ’’தி அதிக்கமிதுகாமதாய பவிட்ட²த்தா வுத்தம். ‘‘ந்ஹாயனாதி³கிச்சேன பவிட்டா²னம் கத்தே²வாலயஸம்ப⁴வா வட்டதீ’’தி வுத்தம். கா³மந்தரே பமாணந்தி அட்ட²கதா²யம் பரதீரதோ நதி³ம் ஓதரித்வா த³ஸ்ஸனூபசாரதோ தா³ரூனி பண்ணானி ஸககா³மதோ தோ²கம்பி தரணவாரேன ந வட்டதி கிர நிக்க²மித்வா பவிஸிதும்.

அகா³மகே அரஞ்ஞேதி அகா³மலக்க²ணே அரஞ்ஞேதி அத்தோ². இமினா ஆபத்திகே²த்தம் த³ஸ்ஸிதம். யஸ்மா இத³ம் ஆபத்திகே²த்தம், தஸ்மா யா பி⁴க்கு²னுபஸ்ஸயதோ கா³மஸ்ஸ இந்த³கீ²லம் அதிக்கமதி, ஸா அஸந்தே கா³மே க³ணம்ஹா ஓஹீயனாபத்திம் ஆபஜ்ஜதி. த³ஸ்ஸனஸவனூபசாராபா⁴வேபி பகே³வ கா³மே இந்த³கீ²லாதிக்கமனக்க²ணேயேவ ஆபஜ்ஜதி. ஸசே தத்த² ஏகா பி⁴க்கு²னீ அத்தி², தஸ்ஸா த³ஸ்ஸனஸவனூபசாராதிக்கமனக்க²ணே ஆபஜ்ஜதி, அரஞ்ஞமக்³க³க³மனகாலே ஏவாயம் விதீ⁴தி ந க³ஹேதப்³ப³ம். கா³மதோ பன நிக்க²மந்தீ இதோ பட்டா²ய ஆபஜ்ஜதீதி த³ஸ்ஸனத்த²ம் ‘‘அகா³மகம் அரஞ்ஞ’’ந்தி வுத்தம். வுத்தஞ்ஹேதம் ‘‘ஆராதி⁴கா ச ஹோந்தி ஸங்கா³ஹிகா லஜ்ஜினியோ, தா கோபேத்வா அஞ்ஞத்த² ந க³ந்தப்³ப³ம். க³ச்ச²தி சே, கா³மந்தரனதீ³பாரரத்திவிப்பவாஸக³ணம்ஹா ஓஹீயனாபத்தீஹி ந முச்சதீ’’திஆதி³. தத்த² ‘‘க³ணம்ஹா ஓஹீயனாபத்தி ஸகிம்யேவாபஜ்ஜதி. இதரா கா³மே கா³மே பாரே பாரே அருணே அருணே சாதி வேதி³தப்³ப³’’ந்தி வுத்தம். தத்த² ‘‘வுத்தஞ்ஹேத’’ந்திஆதீ³னி அஸாத⁴கானி யதா²ஸம்ப⁴வம் க³ஹேதப்³ப³த்தா. ‘‘மஹாபோ³தி⁴யங்க³ணந்திஆதி³ ஏவம் கா³மஸ்ஸ ஆஸன்னட்டா²னேபி இமம் ஆபத்திம் ஆபஜ்ஜதீதி த³ஸ்ஸனத்த²ம் வுத்த’’ந்தி லிகி²தம்.

ததியஸங்கா⁴தி³ஸேஸஸிக்கா²பத³வண்ணனா நிட்டி²தா.

4. சதுத்த²ஸங்கா⁴தி³ஸேஸஸிக்கா²பத³வண்ணனா

694. படிவத்தாதி படிவசனம் தே³ந்தி. கம்மதோ³ஸந்தி ‘‘அனஞ்ஞாய க³ணஸ்ஸ ச²ந்த³ந்தி ஏவமாதீ³’’தி லிகி²தம். கத்தப்³ப³ட்டா²னதோ³ஸந்தி போராணா. காரகக³ணஸ்ஸாதி காரகஸங்க⁴ஸ்ஸ. ‘‘பி⁴க்கு²னிஸங்க⁴ம் ஸன்னிபாதேத்வா’தி வுத்தத்தா காரகஸங்கோ⁴பி அயமேவாதி சே? பட²மமேவ காரகஸங்க⁴ம் ந ஆமந்தேத்வா ப³லக்காரேனாயம் து²ல்லனந்தா³ தம் பி⁴க்கு²னிம் ஓஸாரேஸீ’’தி போராணக³ண்டி²பதே³ வுத்தம், தஸ்மா காரகபி⁴க்கூ²னம் ஸம்முகா²பி தேஸம் அனுமதிம் பட²மம் அக்³க³ஹேத்வா தம் கம்மம் ந படிப்பஸ்ஸம்பே⁴தப்³ப³ந்தி ஸித்³த⁴ம் ஹோதி, படிப்பஸ்ஸத்³த⁴ம் ப³லக்காரேன ந காதப்³ப³மேவாதி அதி⁴ப்பாயோ. ‘‘பி⁴க்கு²னீபி தி³ட்டா²விகம்மம் காதும் லப⁴தீ’’தி ச தத்த² வுத்தம்.

698. அஸந்தே கம்மகாரகஸங்கே⁴ ஓஸாரேதி, அனாபத்தீதி ஏத்த² கித்தாவதா அஸந்தோ நாம ஹோதீதி? இத³ம் ஸப்³ப³த்த² ந விசாரிதம். காரகானம் காலகிரியாயாதி ஏகே. ஏகஸ்ஸபி அபா⁴வேனாதி ஏகே. ஏகஸ்மிம் ரஜ்ஜேதி ஏகே. ஏகரட்டே²தி ஏகே. ஏககா³மேதி ஏகே. ஏகஸ்மிம் ஆவாஸேதி ஏகே. யத்த² ஸக்கா அபலோகேதுந்தி ஏகே. அந்தோஅத்³த⁴யோஜனேதி ஏகே. தத்த² தஸ்மிம் ஆவாஸே அஸந்தே காரகஸங்கே⁴ ஓஸாரேதி, அனாபத்தீதி இத³ம் பஸம்ஸந்தி ஆசரியா. யத்த² ஸக்கா அபலோகேதுந்தி ஸாமீசி.

சதுத்த²ஸங்கா⁴தி³ஸேஸஸிக்கா²பத³வண்ணனா நிட்டி²தா.

5. பஞ்சமஸங்கா⁴தி³ஸேஸஸிக்கா²பத³வண்ணனா

701. ஏதம் ந வுத்தந்தி பி⁴க்கு²னியா அவஸ்ஸுதபா⁴வோ த³ட்ட²ப்³போ³தி ஏதம் நியமனம் ந வுத்தம். தம் அவசனம் பாளியா ஸமேதி. கதரபாளியாதி? ‘‘அனவஸ்ஸுதோதி ஜானந்தீ படிக்³க³ண்ஹாதீ’’தி இமாய. யதி³ ஹி புக்³க³லஸ்ஸ அவஸ்ஸுதபா⁴வோ ந பமாணம், கிம் இமாய பாளியா பயோஜனம், ‘‘அனாபத்தி உபோ⁴ அனவஸ்ஸுதா ஹோந்தி, அனவஸ்ஸுதா படிக்³க³ண்ஹாதீ’’தி ஏத்தகமேவ வத்தப்³ப³ம் ஸியா. அத்தனோ ஹி அனவஸ்ஸுதபா⁴வோயேவ பமாணந்தி. இமஸ்ஸ பன அனாபத்திவாரஸ்ஸ அயமத்தோ² – உபோ⁴ சே அனவஸ்ஸுதா, ஸப்³ப³தா²பி அனாபத்தி. அத² பி⁴க்கு²னீ அனவஸ்ஸுதா ஸமானா அவஸ்ஸுதம்பி ‘‘அனவஸ்ஸுதோ’’தி ஸஞ்ஞாய தஸ்ஸ ஹத்த²தோ படிக்³க³ண்ஹாதி, ஏவம்பி அனாபத்தீதி. அத² ஸா அனவஸ்ஸுதாபி அஞ்ஞம் அனவஸ்ஸுதம் வா அவஸ்ஸுதம் வா ‘‘அவஸ்ஸுதோ’’தி ஜானாதி, து³க்கடமேவ. வுத்தஞ்ஹேதம் அனந்தரஸிக்கா²பதே³ ‘‘கிஸ்ஸ த்வம் அய்யே ந படிக்³க³ண்ஹாஸீதி. அவஸ்ஸுதோ அய்யேதி…பே… நாஹம் அவஸ்ஸுதா’’தி.

பஞ்சமஸங்கா⁴தி³ஸேஸஸிக்கா²பத³வண்ணனா நிட்டி²தா.

6. ச²ட்ட²ஸங்கா⁴தி³ஸேஸஸிக்கா²பத³வண்ணனா

705. தேனாதி தஸ்மா. யஸ்மா உய்யோஜிகா ந தே³தி ந படிக்³க³ண்ஹாதி, தஸ்மா படிக்³க³ஹோ ந விஜ்ஜதீதி அத்தோ². இதரிஸ்ஸா பரிபோ⁴க³பச்சயா. ‘‘அகுஸலசித்த’’ந்தி பா³ஹுல்லேன வுத்தம். ‘‘வட்டதீதி ஸஞ்ஞாய வத³ந்தியாபி ஆபத்தீ’’தி வத³ந்தி.

ச²ட்ட²ஸங்கா⁴தி³ஸேஸஸிக்கா²பத³வண்ணனா நிட்டி²தா.

7. ஸத்தமஸங்கா⁴தி³ஸேஸஸிக்கா²பத³வண்ணனா

712-4. கம்மவாசதோ புப்³பே³ ஆபன்னாபத்தியோ ந படிப்பஸ்ஸம்ப⁴ந்தி. ஞத்தியா து³க்கடது²ல்லச்சயா படிப்பஸ்ஸம்ப⁴ந்தி ஸங்கா⁴தி³ஸேஸே பத்தேதி போராணா. தம் ‘‘அஜ்ஜா²பஜ்ஜந்தியா’’தி பாளியா ஸமேதி. ‘‘ஸுத்வா ந வத³ந்தீ’’தி ஏத்த² ஸசே ஜீவிதப்³ரஹ்மசரியந்தராயப⁴யா ந வத³ந்தி, அனாபத்தி. ‘‘அத⁴ம்மகம்மே அத⁴ம்மகம்மஸஞ்ஞா ஆபத்தி து³க்கடஸ்ஸா’’தி வுத்தத்தா ‘‘அனாபத்தி அஸமனுபா⁴ஸந்தியா’’தி ஸங்கா⁴தி³ஸேஸம் ஸந்தா⁴ய வுத்தம்.

ஸத்தமஸங்கா⁴தி³ஸேஸஸிக்கா²பத³வண்ணனா நிட்டி²தா.

8. அட்ட²மஸங்கா⁴தி³ஸேஸஸிக்கா²பத³வண்ணனா

715. பச்சாகதாதி பராஜிதா. குலதூ³ஸகஸிக்கா²பத³ஸ்ஸ, இமஸ்ஸ ச நிதா³னமத்தமேவ நானாகரணம். வுத்தஞ்ஹி தத்த² ‘‘தஸ்ஸ வசனஸ்ஸ படினிஸ்ஸக்³கா³ய ஏவ வசனீயோ, ந குலதூ³ஸனனிவாரணத்தா²யா’’தி. ஏவம் ஸந்தே உபோ⁴பேதா ஆபத்தியோ அஞ்ஞமஞ்ஞம் ஸபா⁴க³த்தா², தஸ்மா இத³ம் தஸ்ஸ அனுபஞ்ஞத்திஸதி³ஸம் ஆபஜ்ஜதி, ததோ இத³ம் நிரத்த²கமேவ ஆபஜ்ஜதீதி? ந ஏவம் த³ட்ட²ப்³ப³ம். வத்து²விஸேஸதோ, கம்மவாசாவிஸேஸதோ ச உபி⁴ன்னம் நானாகரணம்.

அட்ட²மஸங்கா⁴தி³ஸேஸஸிக்கா²பத³வண்ணனா நிட்டி²தா.

9. நவமஸங்கா⁴தி³ஸேஸஸிக்கா²பத³வண்ணனா

723. ‘‘காயிகவாசஸிகேன ஸம்ஸக்³கே³னா’’தி பாட²ஸேஸோ.

நவமஸங்கா⁴தி³ஸேஸஸிக்கா²பத³வண்ணனா நிட்டி²தா.

ஸங்கா⁴தி³ஸேஸகண்ட³வண்ணனா நிட்டி²தா.

3. நிஸ்ஸக்³கி³யகண்ட³வண்ணனா

1. பட²மனிஸ்ஸக்³கி³யபாசித்தியஸிக்கா²பத³வண்ணனா

733. பட²மனிஸ்ஸக்³கி³யபாசித்தியஸிக்கா²பத³ம் உத்தானமேவ.

2. து³தியனிஸ்ஸக்³கி³யபாசித்தியஸிக்கா²பத³வண்ணனா

740. வத்து²ஸம்பத்தத்தா வா ந தஸ்ஸா அனாபன்னகாமதாய வா அனாணத்திகதாய வா அகாலசீவரமத³ம்ஸு. யதா²தா³னே ஏவ உபனேதப்³ப³ம், ந பா⁴ஜேதப்³ப³ம் புக்³க³லிகத்தாதி அதி⁴ப்பாயோ. அத்த²தோ ஹி இதரம்பி யதா²தா³னே ஏவ உபனேதப்³ப³மேவ. க³ண்டி²பதே³ பன ‘‘அய்யாய த³ம்மீதி ஏவம் படிலத்³த⁴ந்தி நிஸ்ஸட்ட²படிலத்³த⁴ம். யதா²தா³னேதி தா³யகேஹி பரிச்சத்தவிதா⁴னேன. உபனேதப்³ப³ந்தி அகாலசீவரபா⁴வேன பா⁴ஜேதப்³ப³ந்தி அதி⁴ப்பாயோ. இத⁴ பா⁴ஜாபிதாய லத்³த⁴சீவரமேவ நிஸ்ஸக்³கி³யம் ஹோதி, தம் வினயகம்மம் கத்வாபி அத்தனா ந லப⁴தீ’’தி லிகி²தம். யதி³ நிஸ்ஸட்ட²படிலத்³த⁴ம் ஸந்தா⁴ய இத³ம் வுத்தம் ஸியா, ‘‘நிஸ்ஸஜ்ஜிதப்³ப³ம் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா த³தே³ய்ய, த³தே³ய்யும், அய்யாய த³ம்மீ’’தி வுத்தத்தா தீணிபேதானி பதா³னி வத்தப்³பா³னி ஸியும், தஸ்மா ந கேவலம் நிஸ்ஸட்ட²படிலத்³த⁴மேவ யதா²தா³னே உபனேதப்³ப³ம், அஞ்ஞாஹி பி⁴க்கு²னீஹி லத்³த⁴கோட்டா²ஸம்பி யதா²தா³னேயேவ உபனேதப்³ப³ம்.

741. ‘‘அகாலசீவரே காலசீவரஸஞ்ஞாய அனாபத்தீ’’தி பன பா⁴ஜனபச்சயா ஆபஜ்ஜிதப்³பா³பத்திம் நாபஜ்ஜதீதி ஏத்தகமேவ தீ³பேதி, ந படிலத்³த⁴ம், ந யதா²தா³னே தா³தப்³ப³ந்தி இமமத்த²ம் தீ³பேதி. லேஸேன பன க³ண்ஹாதி சே, ப⁴ண்ட³க்³கே⁴ன காரேதப்³பா³.

து³தியனிஸ்ஸக்³கி³யபாசித்தியஸிக்கா²பத³வண்ணனா நிட்டி²தா.

3. ததியனிஸ்ஸக்³கி³யபாசித்தியஸிக்கா²பத³வண்ணனா

744. ஸகஸஞ்ஞாய க³ஹிதத்தா பாசித்தியம், து³க்கடஞ்ச வுத்தம். இதரதா² ப⁴ண்ட³க்³கே⁴ன காரேதப்³ப³ம்.

ததியனிஸ்ஸக்³கி³யபாசித்தியஸிக்கா²பத³வண்ணனா நிட்டி²தா.

4. சதுத்த²னிஸ்ஸக்³கி³யபாசித்தியஸிக்கா²பத³வண்ணனா

752. லேஸேன க³ஹேதுகாமதா, அஞ்ஞஸ்ஸ விஞ்ஞுஸ்ஸ விஞ்ஞாபனம், படிலாபோ⁴தி தீணி அங்கா³னி, தஸ்மா பட²மம் விஞ்ஞத்தம் அலபி⁴த்வா அஞ்ஞம் ததோ ஊனதரம்பி லபே⁴ய்ய, நிஸ்ஸக்³கி³யமேவ அங்க³ஸம்பத்திதோ. ஏஸ நயோ அஞ்ஞத்தா²பி.

சதுத்த²னிஸ்ஸக்³கி³யபாசித்தியஸிக்கா²பத³வண்ணனா நிட்டி²தா.

5. பஞ்சமனிஸ்ஸக்³கி³யபாசித்தியஸிக்கா²பத³வண்ணனா

753. ‘‘தேலம் கோ³பேத்வா ஸப்பிம்பி மே அத்தனோ குலக⁴ரா’’தி கிர பாடோ².

பஞ்சமனிஸ்ஸக்³கி³யபாசித்தியஸிக்கா²பத³வண்ணனா நிட்டி²தா.

6. ச²ட்ட²னிஸ்ஸக்³கி³யபாசித்தியஸிக்கா²பத³வண்ணனா

758-762. பாவாரிகஸ்ஸாதி து³ஸ்ஸவாணிஜகஸ்ஸ. யாய சேதாபிதம், தஸ்ஸா நிஸ்ஸக்³கி³யம், நிஸ்ஸட்ட²படிலாபோ⁴ ச. ‘‘இதராஸம் பன ஜானித்வா வஸ்ஸக்³கே³ன பத்தகோட்டா²ஸம் ஸாதி³யந்தீனம்பி ந நிஸ்ஸக்³கி³யம், கேவலம் யதா²தா³னே ஏவ தாஹிபி உபனேதப்³ப³’’ந்தி வத³ந்தி. ‘‘நிஸ்ஸட்ட²ம் படிலபி⁴த்வாபி யதா²தா³னே உபனேதப்³ப³’ந்தி வுத்தத்தா ஸேஸாஹி க³ஹிதம் ஸுக்³க³ஹித’’ந்தி வத³ந்தி. ஏத்த² கி³லானாயபி ந மோக்கோ².

ச²ட்ட²னிஸ்ஸக்³கி³யபாசித்தியஸிக்கா²பத³வண்ணனா நிட்டி²தா.

7. ஸத்தமனிஸ்ஸக்³கி³யபாசித்தியஸிக்கா²பத³வண்ணனா

764. ஸத்தமே ‘‘ஸயம் யாசிதகேனா’’தி கிஞ்சாபி அவிஸேஸேன வுத்தம். ததா²பி அஞ்ஞத³த்தி²கேன அத்துத்³தே³ஸிகேன ஸஞ்ஞாசிகேனாதி அத்தோ² வேதி³தப்³போ³. அயமத்தோ² ‘‘பி⁴க்கு²னியோ தேன ச பரிக்கா²ரேன ஸயம்பி யாசித்வா பே⁴ஸஜ்ஜம் சேதாபேத்வா பரிபு⁴ஞ்ஜிம்ஸூ’’தி இமிஸ்ஸா பாளியா அத்தே²ன ஸம்ஸந்தி³த்வா வேதி³தப்³போ³. தஸ்ஸாயமத்தோ² – தேன பரிக்கா²ரேன பே⁴ஸஜ்ஜம் சேதாபேத்வா ச-ஸத்³தே³ன ஸஞ்ஞாசிகேன ச பே⁴ஸஜ்ஜம் சேதாபேத்வாதி இமமத்த²ம் தீ³பேந்தோ ‘‘ஸயம்பி யாசித்வா பே⁴ஸஜ்ஜம் சேதாபேத்வா’’தி ஆஹ. அஞ்ஞதா² ‘‘தேன பரிக்கா²ரேன பே⁴ஸஜ்ஜம் சேதாபேத்வா ஸயம்பி யாசித்வா பரிபு⁴ஞ்ஜிம்ஸூ’’தி இமினா அனுக்கமேன பாளி வத்தப்³பா³ ஸியா.

பத³பா⁴ஜனே பன ‘‘ஸம்யாசிகேனாதி ஸயம் யாசித்வா’’தி தஸ்ஸேவ பத³ஸ்ஸ அதி⁴ப்பாயமத்தம் வுத்தம். ஸா ஹி பத³பா⁴ஜனத⁴ம்மதா. ‘‘ஸங்கி⁴கம் லாப⁴ம் பரிணத’’ந்திஆதி³பதா³னம் பா⁴ஜனே பன ஸா பாகடா. அஞ்ஞதா² ஸம்யாசிகபதே³ன கோ அஞ்ஞோ அதிரேகத்தோ² ஸங்க³ஹிதோ ஸியா, ஸோ ந தி³ஸ்ஸதீதி ததே³வ பத³ம் நிப்பயோஜனம், இத³ஞ்ச ஸிக்கா²பத³ம் புரிமேன நின்னானாகரணம் ஸியா. அத்தனோ ஹி ஸந்தகம் யதா²காமம் கரணீயந்தி. ஏத்த² ச ஸங்க⁴ஸ்ஸ யாசனாய வஸேன ஏகதோ ஹுத்வா யாசனாய லத்³த⁴ம் ஸம்யாசிகந்தி வேதி³தப்³ப³ம். அஞ்ஞதா² இதோ பரேன ஸம்யாசிக-ஸத்³தே³ன இத³ம் நிப்³பி³ஸேஸம் ஆபஜ்ஜதீதி ‘‘புக்³க³லிகேன ஸம்யாசிகேனா’’தி இத³ஞ்ச ஸிக்கா²பத³ம் விஸும் ந வத்தப்³ப³ம் ஸியா இதே⁴வ தேன ஆபஜ்ஜிதப்³பா³பத்தியா ஸங்க³ஹிதத்தா, ந ச ஸங்க³ஹிதா ஆபத்தித்³வயபா⁴வதோ. மிஸ்ஸேத்வா சேதாபிதத்தா ஹி ஏகமேவ ஆபத்தீதி சே? ந, ஸம்யாசிகபத³ஸ்ஸ நிப்பயோஜனபா⁴வப்பஸங்க³தோ, ஏவம் ஸங்கி⁴கமஹாஜனிகபுக்³க³லிகானி மிஸ்ஸித்வா சேதாபனே ஏகாபத்திபா⁴வப்பஸங்க³தோ ச.

ஸத்தமனிஸ்ஸக்³கி³யபாசித்தியஸிக்கா²பத³வண்ணனா நிட்டி²தா.

8. அட்ட²மனிஸ்ஸக்³கி³யபாசித்தியஸிக்கா²பத³வண்ணனா

769. க³ணஸ்ஸாதி ஆபி⁴த⁴ம்மிகாதி³க³ணஸ்ஸ, ஊனசதுவக்³க³ஸ்ஸ ச.

அட்ட²மனிஸ்ஸக்³கி³யபாசித்தியஸிக்கா²பத³வண்ணனா நிட்டி²தா.

9. நவமனிஸ்ஸக்³கி³யபாசித்தியஸிக்கா²பத³வண்ணனா

774. ஸஞ்ஞாசிகேனாதி க³ணயாசனாய லத்³தே⁴னேவ, ந அஞ்ஞேன.

நவமனிஸ்ஸக்³கி³யபாசித்தியஸிக்கா²பத³வண்ணனா நிட்டி²தா.

10. த³ஸமனிஸ்ஸக்³கி³யபாசித்தியஸிக்கா²பத³வண்ணனா

779. த³ஸமே பன ‘‘யா பன பி⁴க்கு²னீ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன புக்³க³லிகேன அஞ்ஞம் சேதாபேய்ய, நிஸ்ஸக்³கி³யம் பாசித்திய’’ந்தி ஏவம்விதே⁴ன ப⁴விதப்³ப³ம், ‘‘புக்³க³லிகேன ஸம்யாசிகேனா’’தி இமினா ஏகாத³ஸமேன ப⁴விதப்³ப³ம் ஸியா யதா²க்கமேன ஸம்ப⁴வதோ. காமமேவ சேதம் அட்டு²ப்பத்தியா அபா⁴வதோ ந வுத்தம், அத்த²தோ பன க³ஹேதப்³ப³மேவ. ஏத்த² பன ஸங்க⁴க³ணபுக்³க³லானம் பவாரிதட்டா²னே, புக்³க³லஸ்ஸேவ ஞாதகட்டா²னே ச அனாபத்திசா²யா தி³ஸ்ஸதி, இத³ம் ஸப்³ப³ம் அம்ஹாகம் தக்கானுஸாரவஸேனேவ வுத்தந்தி கத்வா ந ஸாரதோ த³ட்ட²ப்³ப³ம். விசாரேத்வா யதா² நிச்சலகாரணம் தி³ஸ்வா யம் வா வினயக்கமகோவிதா³ அனுஜானந்தி, தம் ததே³வ க³ஹேதப்³ப³ம். போராணக³ண்டி²பதே³ பன ‘‘ஆபதா³ஸுபி அஞ்ஞம் க³ருப⁴ண்ட³மேவ சேதாபேதப்³ப³ம், இதரம் ந வட்டதி, பி⁴க்கு²ஸ்ஸ பன வட்டதீ’’தி வுத்தம்.

த³ஸமனிஸ்ஸக்³கி³யபாசித்தியஸிக்கா²பத³வண்ணனா நிட்டி²தா.

11. ஏகாத³ஸமனிஸ்ஸக்³கி³யபாசித்தியஸிக்கா²பத³வண்ணனா

784. ‘‘து³தியவக்³க³ஸ்ஸ பட²மே’’தி அவத்வா ‘‘ஏகாத³ஸமே’’தி இத⁴ வுத்தம். கஸ்மா? பி⁴க்கு²னிவிப⁴ங்கே³ திம்ஸககண்ட³ம் பத்வா வக்³க³க்கமஸ்ஸ அவுத்தத்தா. யஸ்மா பவாரிதட்டா²னே விஞ்ஞத்தி நாம ந படிஸேதே⁴தப்³பா³, தஸ்மா ப⁴க³வா அஞ்ஞாதிகஅப்பவாரிதட்டா²னே த⁴ம்மனிமந்தனவஸேன வதே³ய்ய ‘‘யேனத்தோ²’’தி வுத்தாய ‘‘சதுக்கம்ஸபரமம் விஞ்ஞாபேதப்³ப³’’ந்தி பரிச்சே²த³ம் த³ஸ்ஸேதீதி வேதி³தப்³ப³ம். அஞ்ஞதா² ‘‘நிதா³னேன ஸிக்கா²பத³ம் ந ஸமேதி, ஸிக்கா²பதே³ன ச அனாபத்திவாரோ’’தி ச ‘‘அகதவிஞ்ஞத்தியா சதுக்கம்ஸபரமம் விஞ்ஞாபேதப்³ப³’’ந்தி ச அனிட்ட²ம் ஆபஜ்ஜதி, தஸ்மா மாதிகாட்ட²கதா²யம் சேதாபேதப்³ப³ந்தி ட²பேத்வா ஸஹத⁴ம்மிகே ச ஞாதகபவாரிதே ச அஞ்ஞேன கிஸ்மிஞ்சிதே³வ கு³ணேன, பரிதுட்டே²ன ச வதே³ய்ய ‘‘யேனத்தோ²’’தி வுத்தஸ்ஸ ‘‘விஞ்ஞாபேதப்³ப³’’ந்தி வுத்தனயேன அத்தோ² த³ட்ட²ப்³போ³. போராணக³ண்டி²பதே³ பன ‘‘இத³ம் பரிச்சி²ன்னபவாரணம் ஸந்தா⁴ய வுத்தம். அனாபத்தி ஞாதகானம் பவாரிதானந்தி பன ஸப்³ப³ப்பகாரேன பவத்தம் நிச்சபவாரணம் ஸந்தா⁴ய வுத்தம். நிச்சபவாரணா நாம யதா³ யேனத்தோ², ததா³ தம் வதே³ய்யாதா²தி ஏவம் பவத்தா. ‘ஹந்த³ ஸீதபாவுரண’ந்தி தே³ந்தானம் பன அதிரேகசதுக்கம்ஸம்பி க³ஹேதும் வட்டதீ’’தி வுத்தம். அயமேவ நயோ த³ஸமேபீதி.

ஏகாத³ஸமனிஸ்ஸக்³கி³யபாசித்தியஸிக்கா²பத³வண்ணனா நிட்டி²தா.

பி⁴க்கு²னீவிப⁴ங்கே³ திம்ஸகவண்ணனா நிட்டி²தா.

நிஸ்ஸக்³கி³யகண்ட³வண்ணனா நிட்டி²தா.

4. பாசித்தியகண்ட³வண்ணனா

1. லஸுணவக்³கோ³

1. பட²மலஸுணஸிக்கா²பத³வண்ணனா

793-7. அஹம் லஸுணேனாதி ஏத்த² ‘‘பவாரேமீ’’தி பாட²ஸேஸோ. ப³த³ரஸாளவம் கிர ப³த³ரப²லானி ஸுக்கா²பேத்வா சுண்ணேத்வா கத்தப்³பா³ கா²த³னீயவிகதி.

பட²மலஸுணஸிக்கா²பத³வண்ணனா நிட்டி²தா.

2. து³தியஸிக்கா²பத³வண்ணனா

800. ஸம்ஹராபேய்யாதி ‘‘ஸம்ஹரதி வா ஸம்ஹராபேதி வா’’தி பத³பா⁴ஜனம் வேதி³தப்³ப³ம். கிஞ்சாபி ஏத்த² ஆபத்திபே⁴தோ³ ந த³ஸ்ஸிதோ, ததா²பி கு²ரஸண்டா³ஸகத்தரிஆதி³பரியேஸனக⁴ம்ஸனாதீ³ஸு புப்³ப³பயோகே³ஸு து³க்கடம் யுஜ்ஜதி, யதா² சேத்த², ஏவம் தலகா⁴தகாதி³ம்ஹி ச ஆபத்திபே⁴தோ³ பாளியம் ந வுத்தோ. யதா²ஸம்ப⁴வம் பன புப்³ப³பயோகே³ஸு து³க்கடம் ஸம்ப⁴வதி. ஏவம் பி⁴க்கு²ஸ்ஸ ஏத்த² ச லஸுணே ச து³க்கடம். இத³ம் கிரியாகிரியந்தி போராணா. தத்த² ‘‘கிரியாகிரிய’’ந்தி ந வுத்தம்.

து³தியஸிக்கா²பத³வண்ணனா நிட்டி²தா.

802-6. ததியசதுத்த²ஸிக்கா²பத³ம் உத்தானத்த²மேவ.

5. பஞ்சமஸிக்கா²பத³வண்ணனா

812. பஞ்சமே உத³கஸுத்³தி⁴பச்சயே ஸதிபி ப²ஸ்ஸஸாதி³யனே யதா²வுத்தபரிச்சே²தே³ அனாபத்தி. தத்த² த்³வின்னம் பப்³பா³னந்தி ‘‘த்³வின்னம் அங்கு³லானம் ஸஹபவேஸனே ஏகேகஅங்கு³லஸ்ஸ ஏகேகம் பப்³ப³ம் கத்வா த்³வே பப்³பா³, ஏகங்கு³லப்பவேஸனே த்³வின்னம் பப்³பா³னம் உபரி ந வட்டதீதி வேதி³தப்³ப³ம். மஹாபச்சரியம்பி அயமேவ நயோ த³ஸ்ஸிதோ’’தி லிகி²தம்.

பஞ்சமஸிக்கா²பத³வண்ணனா நிட்டி²தா.

815. ச²ட்ட²ஸிக்கா²பத³ம் உத்தானத்த²மேவ.

7. ஸத்தமஸிக்கா²பத³வண்ணனா

820-822. ‘‘நக³ரம் அதிஹரந்தீ’’தி பாடோ². ‘‘நக³ரத்³வாரே அதிஹரந்தீ’’தி கத்த²சி, தத்த² த்³வாரேனாதி அத்தோ². அயமேவ வா பாடோ². தம் புப்³பா³பரவிருத்³த⁴ந்தி ‘‘புனபி வுத்த’’ந்தி வுத்தம் வாத³ம் ஸந்தா⁴ய, ந ததோ புப்³பே³ தத்த² வுத்தம் வாத³ம். ஏத்த² ‘‘மாதரம்பி விஞ்ஞாபேத்வாதி வசனேன விருஜ்ஜ²தீ’’தி லிகி²தம், தம் து³ல்லிகி²தம், ந ஹி தேன விரோத⁴ம் ஸந்தா⁴ய இத³ம் வுத்தந்தி. கரணே சே பாசித்தியம், காராபனேபி பாசித்தியேனேவ ப⁴விதப்³ப³ம். அத² காராபனே து³க்கடம், கரணேபி து³க்கடேனேவ ப⁴விதப்³ப³ம். ந ஹி கரணே வா காராபனே வா விஸேஸோ அத்தி² ஆபஜ்ஜனே ஸதீதி அதி⁴ப்பாயோ.

823. ஸம்படிச்சி²தும் வட்டதீதி அப்படிக்கி²பித்வா ‘‘ஸாதூ⁴’’தி வத்தும் வட்டதீதி அதி⁴ப்பாயோ. ந ஹி படிக்³க³ஹேதும் வட்டதி. அனாமாஸத்தா ‘‘ஆமகத⁴ஞ்ஞம் பன ஞாதகபவாரிதட்டா²னேபி ந வட்டதீ’’தி வுத்தம். அனுக³ண்டி²பதே³ பன ‘‘கப்பியேன லத்³த⁴ம் த⁴ஞ்ஞம் ப⁴ஜ்ஜித்வா பு⁴ஞ்ஜந்தியா து³க்கடம். அபரண்ணேபி ஏஸேவ நயோ’’தி ச ‘‘அனாபத்தி ஆபா³த⁴பச்சயாதி வசனதோ ஸத்த த⁴ஞ்ஞானிபி அனாமாஸானீதி ஸித்³த⁴ம், தேனேவ ஹேட்டா² அட்ட²கதா²யம் து³க்கடவத்து²ம்ஹி ஸத்த த⁴ஞ்ஞானிபி க³ஹிதானி அனாமாஸானீ’’தி ச வுத்தானி. ஆமாஸானி கப்பியவத்தூ²னி ச யதி³ ப⁴வேய்யும், யதா² ஞாதகபவாரிதே ஸந்தா⁴ய ‘‘அபரண்ணம் விஞ்ஞாபேதீ’’தி அவிஸேஸேன வுத்தம், ஏவம் ‘‘அனாபத்தி ஞாதகானம் பவாரிதானம் அஞ்ஞஸ்ஸ அத்தா²ய விஞ்ஞாபேதி, உம்மத்திகாய ஆதி³கம்மிகாயா’’தி வத்தப்³ப³ம். யஸ்மா து³க்கடவத்து²த்தா ச அனாமாஸத்தா ச மாதரம்பி ஸத்தவித⁴ம் த⁴ஞ்ஞம் விஞ்ஞாபேதும் ந வட்டதி, தஸ்மா தத³த்த²தீ³பனத்த²ம் ஸத்தவித⁴ம் த⁴ஞ்ஞம் ஸந்தா⁴ய ‘‘அனாபத்தி ஆபா³த⁴பச்சயா’’தி வுத்தம், யதா² பி⁴க்கு²னியா ஆபா³த⁴பச்சயா வட்டதி, ததா² பி⁴க்கு²ஸ்ஸாபீதி ச. யதா² வா பன பி⁴க்கு²னியா ப⁴ஜ்ஜனாதீ³னி காராபேதும் ந வட்டதி, ஏவம் பி⁴க்கு²ஸ்ஸாபி. வுத்தம்பி சேதம் அந்த⁴கட்ட²கதா²யம் ‘‘அஞ்ஞதரோ பா³லபி⁴க்கு² கப்பியம் அஜானந்தோ ஏதத³வோச ‘ஆமகத⁴ஞ்ஞம் ஸம்படிச்சி²தும் பி⁴க்கூ²னம் ந வட்டதி. ஏதம் த⁴ஞ்ஞம் ப⁴ஜ்ஜித்வா கோட்டேத்வா பசித்வா யாகு³க²ஜ்ஜகம் ப⁴த்தஞ்ச தே³தா²’தி, ஆணாபகஸ்ஸேவ பி⁴க்கு²ஸ்ஸ ஆபத்தி, ஸப்³பே³ஸம் அனாபத்தீ’’தி. தஸ்மா ‘‘ஸங்க⁴வாரிகானம் த⁴ஞ்ஞம் கோட்டேதா²’’தி ஆராமிகானம் வத்துஞ்ச ந வட்டதி. ‘‘தி³வஸம் பரிப்³ப³யம் க³ண்ஹத², தண்டு³லே ஸம்பாதே³த², த்வம் ஏத்தகே க³ண்ஹ, த்வம் ஏத்தகே’’தி ஏவமாதீ³னி பன வத்தும் வட்டதீதி ச. யம் பன ‘‘அவிஞ்ஞத்தியா லப்³ப⁴மானம் பன நவகம்மத்தா²ய ஸம்படிச்சி²தும் வட்டதீ’’தி வுத்தம், தம்பி ஹேட்டா² ‘‘இமம் தளாகம் கே²த்தம் வத்து²ம் விஹாரஸ்ஸ தே³மா’தி வுத்தே ‘ஸம்படிச்சி²தும் வட்டதீ’’தி வுத்தம் நயம் ஸந்தா⁴ய வுத்தத்தா ஸுவுத்தமேவ. ‘‘நவகம்மத்தா²ய த⁴ஞ்ஞம் தே³மா’’தி வுத்தே ‘‘ஸாதூ⁴’’தி வத்தப்³ப³ம். யம் பன ஹேட்டா² ‘‘தத்த² நிஸ்ஸக்³கி³யவத்து²ம் அத்தனோ வா ஸங்க⁴க³ணபுக்³க³லசேதியானம் வா அத்தா²ய ஸம்படிச்சி²தும் ந வட்டதி…பே… து³க்கடவத்து²ம் ஸப்³பே³ஸம்பி அத்தா²ய ஸம்படிச்ச²தோ து³க்கடமேவா’’தி வுத்தம், தம்பி ஸுவுத்தமேவ. கஸ்மா? ‘‘சேதியஸ்ஸ அத்தா²ய த⁴ஞ்ஞம் தா³துகாமோம்ஹி, தும்ஹே ப⁴ந்தே தத³த்தா²ய ஸம்படிச்ச²தா²’’தி வுத்தே படிக்³க³ஹேதும் அகப்பியத்தா. ‘‘இத³ம் பன தாதி³ஸம் ந ஹோதீ’’தி ச வுத்தம். ஸப்³போ³பாயம் உபதிஸ்ஸத்தே²ரவாதோ³ கிர. த⁴ம்மஸிரித்தே²ரோ பனேவமாஹ ‘‘புப்³பே³பி நவகம்மத்தா²ய படிக்³க³ஹோ ந வாரிதோ, ஸங்க⁴ஸ்ஸத்தா²ய படிக்³க³ஹிதம்பி படிக்³கா³ஹகஸ்ஸேவ அகப்பிய’’ந்தி.

ஸத்தமஸிக்கா²பத³வண்ணனா நிட்டி²தா.

8. அட்ட²மஸிக்கா²பத³வண்ணனா

824. போராணா ‘‘நிப்³பி³ட்ட²ராஜப⁴டோ’’தி பட²ந்தி. தஸ்ஸத்தோ² வாரிதப⁴த்தவேதனோ ராஜப⁴டோதி. ‘‘தஞ்ஞேவ ப⁴டபத²ந்தி தம்யேவ ப⁴த்தவேதன’’ந்தி அத்த²ம் வத³ந்தி. உம்முகந்தி அலாதம்.

826. ஏத்த² ச²ட்³டி³தம் கிரியா. அனோலோகனம் அகிரியா.

அட்ட²மஸிக்கா²பத³வண்ணனா நிட்டி²தா.

9. நவமஸிக்கா²பத³வண்ணனா

832. ‘‘ஸாமிகே அபலோகேத்வா ச²ட்³டே³தீ’’தி கத்த²சி போத்த²கே நத்தி², கத்த²சி அத்தி², அத்தி²பா⁴வோவ ஸேய்யோ கிரியாகிரியத்தா ஸிக்கா²பத³ஸ்ஸ. இத⁴ கே²த்தபாலகா, ஆராமாதி³கோ³பகா ச ஸாமிகா ஏவ. ‘‘ஸங்க⁴ஸ்ஸ கே²த்தே, ஆராமே ச தத்த² கசவரம் ந ச²ட்³டே³தப்³ப³ந்தி கதிகா சே நத்தி², பி⁴க்கு²ஸ்ஸ ச²ட்³டே³தும் வட்டதி ஸங்க⁴பரியாபன்னத்தா, ந பி⁴க்கு²னீனம். தாஸம்பி பி⁴க்கு²னிஸங்க⁴ஸந்தகே வுத்தனயேன வட்டதி, ந தத்த² பி⁴க்கு²ஸ்ஸ, ஏவம் ஸந்தேபி ஸாருப்பவஸேனேவ காதப்³ப³’’ந்தி வுத்தம்.

நவமஸிக்கா²பத³வண்ணனா நிட்டி²தா.

10. த³ஸமஸிக்கா²பத³வண்ணனா

833. ஸாது⁴கீளிதகீ³தம் வாதி ஏத்த² பாசிண்ணகீ³தம்பி ஸோதும் ந வட்டதி. ‘‘கீ³துபஸஞ்ஹிதம் பன த⁴ம்மம் ஸோதும் வட்டதீதி தீ³க⁴னிகாயட்ட²கதா²யம் வுத்த’’ந்தி வுத்தம். போராணக³ண்டி²பதே³ பன ‘‘த⁴ம்மகீ³தம்பி ந வட்டதீ’’தி வத்வா ‘‘பு³த்³த⁴ஸ்ஸ கா³யாம வாதே³மாதி வுத்தே ஸம்படிச்சி²தும் ந வட்டதி, து³க்கடம் ஹோதீ’’தி வுத்தம், ‘‘பூஜம் கரோம, ஜாதகம் வா வத்து²ம் வா தே³ஸேமாதி வுத்தே ‘ஸாதூ⁴’தி ஸம்படிச்சி²தும் வட்டதீ’’தி ச வுத்தம்.

836. ஏகபயோகோ³ நாம ஏகதி³வஸாவலோகனம். தேஸம்யேவாதி யேஸம் நச்சம் பஸ்ஸதி. ‘‘பி⁴க்கு²னீ ஸயம்பி நச்சிதும் வா கா³யிதும் வா வாதி³தும் வா ந லப⁴தீ’’திஆதி³ இத⁴ ஸிக்கா²பதே³ நத்தி². கஸ்மா? ஏளகலோமஸமுட்டா²னத்தா. யதி³ ஏவம் கஸ்மா வுத்தந்தி சே? ஸுத்தானுலோமமஹாபதே³ஸதோ. யதி³ நச்சாதீ³னி பஸ்ஸிதும் வா ஸோதும் வா ந லப⁴தி, பகே³வ அத்தனா காதுந்தி நயதோ லப்³ப⁴மானத்தா வுத்தம். இதரதா² மஹாபதே³ஸா நிரத்த²கா ஸியும். ஏவமஞ்ஞத்தா²பி நயோ நேதப்³போ³. ‘‘ஸமுட்டா²னம்பி இத⁴ வுத்தமேவ அக்³க³ஹேத்வா ச²ஸமுட்டா²னவஸேன க³ஹேதப்³ப³’’ந்தி லிகி²தம். தம் ‘‘அஞ்ஞே நச்ச, கா³ய, வாதே³ஹீ’’தி வத்தும் ந லப்³ப⁴தீதிஆதி³வசீகம்மம் ஸந்தா⁴ய லிகி²தஞ்சே, தம் ஸுலிகி²தம் ஏளகலோமஸமுட்டா²னே வாசாய அபா⁴வதோ. ‘‘ஸயம்பி நச்சிது’’ந்திஆதி³காயகம்மஞ்சே ஸந்தா⁴ய லிகி²தம், து³ல்லிகி²தம். ஏளகலோமஸமுட்டா²னஞ்ஹி ஏகந்ததோ காயகம்மம் ஹோதி, தஸ்மா உத்³த⁴டம் அக்³க³ஹேத்வா ஆதி³ஸத்³தே³ன ஸங்க³ஹிதமேவ இத⁴ க³ஹேதப்³ப³ந்தி. ஏதம் ஏளகலோமஸமுட்டா²னத்தாதி ஏத்த² காரணவசனே ஸுத்தானுலோமமஹாபதே³ஸதோதி ஏத்த² பன உத்³த⁴டம் க³ஹேதப்³ப³ம், ஏவம் யதா²லாப⁴வஸேன தம் லிகி²தந்தி வேதி³தப்³ப³ம். ‘‘ஆஹச்சபா⁴ஸிதஸிக்கா²பத³வஸேன ஏளகலோமஸமுட்டா²ன’’ந்தி வுத்தந்தி உபதிஸ்ஸத்தே²ரோ. ‘‘ஏளகலோமஸமுட்டா²னஞ்சே இத³ம் ஸிக்கா²பத³ம், ஆணாபகோ முச்சேய்ய, ந ச முச்சதீ’’தி வுத்தம். தம் ‘‘கஸ்மா’’தி வுத்தே ‘‘ஸப்³ப³அட்ட²கதா²ஸு வுத்த’’ந்தி அட்ட²கதா²சரியோ ஆஹாதி த⁴ம்மஸிரித்தே²ரோ.

837. ஆராமே ட²த்வாதி ந கேவலம் ட²த்வா, ததோ க³ந்த்வா பன ஸப்³பி³ரியாபதே²ஹிபி லப⁴தி. ‘‘ஆராமே டி²தாதி பன ஆராமபரியாபன்னாதி அத்தோ², இதரதா² நிஸின்னாபி ந லபே⁴ய்யா’’தி லிகி²தம், தம் ஸுலிகி²தமேவ.

த³ஸமஸிக்கா²பத³வண்ணனா நிட்டி²தா.

லஸுணவக்³க³வண்ணனா நிட்டி²தா.

2. அந்த⁴காரவக்³க³வண்ணனா

1. பட²மஸிக்கா²பத³வண்ணனா

839. ‘‘தி³வாபி அந்த⁴காரம் அத்தி², தப்படிஸேத⁴னத்த²ம் ‘ரத்தந்த⁴காரே’தி வுத்த’’ந்தி வத³ந்தி போராணா. ஸந்திட்டே²ய்யாதி ஏத்த² டா²னாபதே³ஸேன சதுப்³பி³தோ⁴பி இரியாபதோ² ஸங்க³ஹிதோ, தஸ்மா புரிஸஸ்ஸ ஹத்த²பாஸே தேன ஸத்³தி⁴ம் சங்கமனாதி³ம் கரோந்தியா பாசித்தியமேவ. ‘‘ஸல்லபேய்ய வா’’தி கேவலம் நிதா³னவஸேன வுத்தம் விஸேஸாபா⁴வதோ. ‘‘ஸல்லபேய்யவாதி புரிஸஸ்ஸ ஹத்த²பாஸே டி²தா ஸல்லபதி, ஆபத்தி பாசித்தியஸ்ஸா’’தி ஹி வுத்தம், தம் ந யுத்தந்தி ஏகே. கஸ்மா? யஸ்மா தஸ்ஸ புரிஸஸ்ஸ ஹத்த²பாஸே டி²தேனேவ ஏகம் பாசித்தியம். ஸல்லபனேனபி அபரம்பி ஏகம் ஆபஜ்ஜதீதி நாபஜ்ஜதி, கத²ம் பஞ்ஞாயதீதி? அங்க³வஸேன. இமஸ்ஸ ஹி ரத்தந்த⁴காரதா, புரிஸஸ்ஸ ஹத்த²பாஸே டா²னம் வா ஸல்லபனம் வா, ஸஹாயாபா⁴வோ, ரஹோபேக்க²தாதி இமானி சத்தாரி அங்கா³னி வுத்தானி. தத்த² யதி³ டா²னபச்சயா ஏகா ஆபத்தி விஸும் ஸியா, தஸ்ஸா சத்தாரி அங்கா³னி ஸியும். யதி³ ஸல்லபனபச்சயா ஏகா, தஸ்ஸாபி பஞ்ச அங்கா³னி ஸியும். தஸ்மா மாதிகாட்ட²கதா²யம் ‘‘சத்தாரி வா பஞ்ச வா அங்கா³னீ’’தி வத்தப்³ப³ம் ஸியா, ந ச வுத்தம், தஸ்மா ஸல்லபனபச்சயா விஸும் நத்தீ²தி. அத்தி²யேவ, மாதிகாட்ட²கதா²வசனஞ்ச தத³த்த²மேவாதி ஏகே. கத²ம்? ஸஹுப்பத்திதோ த்³வின்னம் ஆபத்தீனம். கிம் வுத்தம் ஹோதி? ஸல்லபனே ஸதி டா²னபச்சயா ஆபஜ்ஜிதப்³ப³ம் சதுரங்கி³கம், ஸல்லபனபச்சயா ஆபஜ்ஜிதப்³ப³ம் சதுரங்கி³கந்தி த்³வே பாசித்தியானி ஸஹுப்பன்னானி ஏகதோ ஆபஜ்ஜந்தீதி. இத³ம் அயுத்தம் பாளிவிரோத⁴தோ. பாளியஞ்ஹி ‘‘ஸல்லபேய்ய வாதி புரிஸஸ்ஸ ஹத்த²பாஸே டி²தா ஸல்லபதி, ஆபத்தி பாசித்தியஸ்ஸா’’தி வுத்தம். யதி³ த்³வே ஸியும், ‘‘ஆபத்தி த்³வின்னம் பாசித்தியான’’ந்தி ந வத்தப்³ப³தா ஸியாதி. அயம் நயோ து³தியாதீ³ஸுபி யதா²யோக³ம் வேதி³தப்³போ³. ஏத்த² து³தியேனாபி ஸத்³தி⁴ம் யதி³ பி⁴க்கு²னியா ரஹோபேக்க²தா அத்தி², ஸோ சே புரிஸோ, ந து³தியோ, புரிஸக³ணனாய ஆபத்தியோ. அத² து³தியா பி⁴க்கு²னீ ஹோதி, தஸ்ஸா ச தேன புரிஸேன ஸத்³தி⁴ம் ரஹோபேக்க²தா அத்தி², ஸா ச பி⁴க்கு²னீ ந து³தியா ஹோதி. உபி⁴ன்னம்பி ஆபஜ்ஜதீதி ஏகே, விசாரேத்வா பன க³ஹேதப்³ப³ம். போராணக³ண்டி²பதே³ பன வுத்தம் ‘‘ஹத்த²பாஸே டா²னேன து³க்கட’’ந்தி, தம் பாளியா விருஜ்ஜ²தி. ‘‘புரிஸஸ்ஸ ஹத்த²பாஸே திட்ட²தி, ஆபத்தி பாசித்தியஸ்ஸா’’தி ஹி பாளி, கிம்ப³ஹுனா. சதுத்த²ஸிக்கா²பதே³ மாதிகாட்ட²கதா²யம் (கங்கா². அட்ட². து³தியிகஉய்யோஜனஸிக்கா²பத³வண்ணனா) ‘‘ஸந்திட்ட²னாதீ³ஸு தீணி பாசித்தியானீ’’திஆதி³வசனதோ வத்து²க³ணனாய ஆபத்தி வேதி³தப்³பா³. ‘‘அங்கா³னி சேத்த² சத்தாரி பஞ்ச வா’’தி வத்தப்³ப³ந்தி ஸன்னிட்டா²னம்.

பட²மஸிக்கா²பத³வண்ணனா நிட்டி²தா.

2-3-4. து³தியததியசதுத்த²ஸிக்கா²பத³வண்ணனா

842-6. து³தியததியசதுத்தா²னி உத்தானானி. ஸப்³ப³த்த² ‘‘ஸல்லபதீதி யம் கிஞ்சி திரச்சா²னகத²ம் கதே²தீ’’தி போராணக³ண்டி²பதே³ வுத்தம்.

852. சதுத்தே² பனாயம் விஸேஸோ – ‘‘ஏகேனேகா’’தி பட²மம் வுத்தத்தா து³தியிகம் வா பி⁴க்கு²னீனம் உய்யோஜேய்ய, பாசித்தியம் ந ஸம்ப⁴வதீதி சே? ஸம்ப⁴வதி. கஸ்மா? ஸந்திட்ட²னாதி³த்தயமத்தாபேக்க²த்தா, தஸ்ஸ வசனஸ்ஸாபி வா அஞ்ஞாயபி ரஹோபேக்க²னஸ்ஸாத³ஸம்ப⁴வே ஸதி உபி⁴ன்னம் ஏகத்த²ஸம்ப⁴வதோ ச ஸாதி⁴தமேதம். ‘‘ஹத்த²பாஸம் விஜஹித்வா ஸந்திட்ட²தி வா ஸல்லபதி வா’’தி ஏத்தகமேவ வுத்தம். கஸ்மா ‘‘நிகண்ணிகம் வா ஜப்பேதீ’’தி ந வுத்தம்? ஹத்த²பாஸாதிக்கமே அஸம்ப⁴வதோ. தஸ்ஸ ததியஸ்ஸ பத³ஸ்ஸ பச்சி²ன்னத்தா ஸம்ப⁴வந்தம்பி ‘‘து³தியிகம் வா உய்யோஜேதீ’’தி ந வுத்தம், தஸ்மா அத்த²தோ ஹத்த²பாஸம் விஜஹித்வா ஸந்திட்ட²தி வா ஸல்லபதி வா து³தியிகம் வா உய்யோஜேதி, ஆபத்தி து³க்கடஸ்ஸாதி வுத்தம் ஹோதி. ஏஸ நயோ யக்கே²ன வாதிஆதீ³ஸுபி. தத்த² ‘‘ஹத்த²பாஸே’’தி வா ‘‘ஹத்த²பாஸம் விஜஹித்வா’’தி வா ந வுத்தம் உப⁴யத்த² து³க்கடத்தா. அனாபத்திவாரேபி அஸம்ப⁴வதோ ‘‘நிகண்ணிகம் வா ஜப்பேதீ’’தி ந வுத்தந்தி சே? ஸம்ப⁴வதி ஸதி கரணீயே நிகண்ணிகம் வா ஜப்பேதீதி ஸம்ப⁴வதோ. அத² கஸ்மா ஏவம் ந வுத்தந்தி சே? அனவஜ்ஜகதா²யம் நிகண்ணிகஜப்பனே பயோஜனாபா⁴வா, த⁴ம்மகதா²யம்பி உதா³யிம் ஆரப்³ப⁴ படிஸித்³த⁴த்தா ச.

து³தியததியசதுத்த²ஸிக்கா²பத³வண்ணனா நிட்டி²தா.

5. பஞ்சமஸிக்கா²பத³வண்ணனா

856. ‘‘குலம் நாம சத்தாரி குலானீ’’தி வுத்தத்தா தித்தி²யாராமே கப்பதி தஸ்ஸ குலவோஹாராபா⁴வதோதி ஏகே. தித்தி²யானம் க²த்தியாதி³பரியாபன்னத்தா ந கப்பதீதி ஏகே. தஸ்ஸ கப்பியபூ⁴மித்தா ந யுத்தந்தி சே? ந, யதா²வுத்தக²த்தியாதீ³னம் ஸம்ப⁴வதோ. ததா²பி கோ³சரகுலம் இதா⁴தி⁴ப்பேதம். ‘‘உபசாரோ த்³வாத³ஸஹத்தோ²’’தி லிகி²தம்.

பஞ்சமஸிக்கா²பத³வண்ணனா நிட்டி²தா.

6. ச²ட்ட²ஸிக்கா²பத³வண்ணனா

860. ‘‘நிஸீத³ந்தியா ஏகா, நிபஜ்ஜந்தியா ஏகா’’தி அவத்வா ‘‘நிஸீதி³த்வா க³ச்ச²ந்தியா’’திஆதி³ ந வத்தப்³ப³ம். ந ஹி க³மனபச்சயா ஏஸா ஆபத்தீதி? ந, பரியோஸானாதி⁴ப்பாயவஸேன வுத்தத்தா. ‘‘நிஸீதி³த்வா நிபஜ்ஜந்தியா த்³வே’’தி வசனேனபி க³மனம் இத⁴ நாதி⁴ப்பேதந்தி த³ஸ்ஸிதம் ஹோதி, ததா² ‘‘நிபஜ்ஜித்வா நிஸீத³ந்தியா த்³வே’’திபி வத்தப்³ப³ம். யதி³ ஏவம் ‘‘தஸ்மிம் அபி⁴னிபஜ்ஜதி, ஆபத்தி த்³வின்னம் பாசித்தியான’’ந்தி கஸ்மா ந வுத்தந்தி சே? அனிஸீதி³த்வாபி நிபஜ்ஜனஸம்ப⁴வதோ. நிபஜ்ஜனத்தா²ய நிஸீதி³த்வா நிபஜ்ஜந்தியா நிபஜ்ஜனகபயோக³த்தா ஏகா ஆபத்தீதி கேசி.

ச²ட்ட²ஸிக்கா²பத³வண்ணனா நிட்டி²தா.

7. ஸத்தமஸிக்கா²பத³வண்ணனா

867. அனாபத்திவாரே ‘‘து⁴வபஞ்ஞத்தே’’தி ந வுத்தம் ‘‘ஸந்த²ரித்வா வா ஸந்த²ராபேத்வா வா’’தி வுத்தத்தா. இத⁴ ச²ட்டே² வுத்தனயேன பகதியா பஞ்ஞத்தே அபி⁴னிஸீத³தி வா அபி⁴னிபஜ்ஜதி வா, பாசித்தியமேவ. அஞ்ஞத்த² து⁴வபஞ்ஞத்தம். இத⁴ வுத்தனயேன ஸந்த²ரித்வா வா ஸந்த²ராபேத்வா வா அபி⁴னிஸீத³தி வா அபி⁴னிபஜ்ஜதி வா, பாசித்தியமேவ. உப⁴யத்தா²பி பஞ்சமே வுத்தனயேன அனாபுச்சா² பக்கமேய்ய, பாசித்தியமேவ, அனாபத்திவாரே மாதிகாயம் வுத்தகாலதோ அஞ்ஞகாலஸ்ஸ அபராமட்ட²த்தாதி நோ தக்கோதி ஆசரியோ. அபிச அத்தா²பத்திகாலே ஆபஜ்ஜதி, நோ விகாலேதிஆதி³த்திகே, அத்தா²பத்தி ரத்திம் ஆபஜ்ஜதி, நோ தி³வாதிஆதி³த்திகே ச அட்ட²கதா²யம் இத⁴ பஞ்சமச²ட்ட²ஸத்தமஸிக்கா²பதே³ஹி ஸங்க³ஹிதாபத்தீனம் அபராமட்ட²த்தா யதா²ஸம்ப⁴வம் திவித⁴காலே திவித⁴மேதம் யோஜேத்வா த³ஸ்ஸேதும் வட்டதி ஏவ மஹாபதே³ஸனயானுலோமதோ.

ஸத்தமஸிக்கா²பத³வண்ணனா நிட்டி²தா.

8. அட்ட²மஸிக்கா²பத³வண்ணனா

869. அட்ட²மே பி⁴க்கு²ஸ்ஸ து³க்கடம் ஸம்ப⁴வதி.