12. ஸத்தஸதிகக்க²ந்த⁴கவண்ணனா

த³ஸவத்து²கதா²வண்ணனா

446. நிக்கி²த்தமணிஸுவண்ணாதி ஸிக்கா²பதே³னேவ படிக்கி²த்தமணிஸுவண்ணா. தத்த² மணிக்³க³ஹணேன ஸப்³ப³ம் து³க்கடவத்து², ஸுவண்ணக்³க³ஹணேன ஸப்³ப³ம் பாசித்தியவத்து² க³ஹிதம் ஹோதி. பி⁴க்க²க்³கே³ன பி⁴க்கு²க³ணனாயாதி வுத்தம் ஹோதி.

447. மஹிகாதி ஹிமம். போஸாதி ஸத்தா. ஸரஜாதி ஸகிலேஸரஜா. மகா³தி மக³ஸதி³ஸா. தஸ்மிம் தஸ்மிம் விஸயே, ப⁴வே வா நேதீதி நேத்தி, தண்ஹாயேதம் அதி⁴வசனம், தாய ஸஹ வத்தந்தீதி ஸனேத்திகா.

450-2. அஹோக³ங்கோ³தி பப்³ப³தஸ்ஸ நாமம். அனுமானேஸ்ஸாமாதி பஞ்ஞாபேஸ்ஸாம. ஆஸுதாதி ஸஜ்ஜிதா, ‘‘அஸுத்தா’’தி வா பாடோ², அனாவிலா அபக்கா தருணா.

453. உஜ்ஜவிம்ஸு படிஸோதேன க³ச்சி²ம்ஸு.

455. அப்பேவ நாமாதி ஸாது⁴ நாம. மூலா தா³யகா பேஸலகா. ‘‘குல்லகவிஹாரேனாதி கு²த்³த³கவிஹாரேனா’’தி லிகி²தம். ரூபாவதாரத்தா குல்லகவிஹாரோ நாம. கத²ம் பனேதம் பஞ்ஞாயதி, யேன ஸன்னிதி⁴கதம் யாவஜீவிகம் யாவகாலிகேன தத³ஹுபடிக்³க³ஹிதேன ஸம்பி⁴ன்னரஸம் தத³ஹுபடிக்³க³ஹிதஸங்க²யம் ஆக³ந்த்வா ஸன்னிதி⁴கதாமிஸஸங்க்²யமேவ க³ச்ச²தீதி? வுச்சதே – ‘‘யாவகாலிகேன, பி⁴க்க²வே, யாவஜீவிகம் தத³ஹுபடிக்³க³ஹித’’ந்தி வசனதோ புரேபடிக்³க³ஹிதம் யாவஜீவிகம் தத³ஹுபடிக்³க³ஹிதேனாமிஸேன சே ஸம்பி⁴ன்னம், புரேபடிக்³க³ஹிதஸங்க்²யமேவ க³ச்ச²தீதி ஸித்³த⁴ம். அஞ்ஞதா² ‘‘ஸத்தாஹகாலிகேன, பி⁴க்க²வே, யாவஜீவிகம் படிக்³க³ஹிதம் ஸத்தாஹம் கப்பதீ’’தி (மஹாவ. 305) வுத்தட்டா²னே விய இதா⁴பி ‘‘யாவகாலிகேன, பி⁴க்க²வே, யாவஜீவிகம் படிக்³க³ஹிதம் காலே கப்பதீ’’தி வதே³ய்ய, தஞ்சாவுத்தம். தஸ்மா புரேபடிக்³க³ஹிதம் தம் ஆமிஸஸம்பி⁴ன்னம் ஆமிஸக³திகமேவாதி வேதி³தப்³ப³ம். க³ண்டி²பதே³ பன ‘‘ஸன்னிதி⁴காரகம் கா²த³னீயம் வா போ⁴ஜனீயம் வா’’தி (பாசி. 253) வுத்தம். ப்³யஞ்ஜனமத்தம் ந க³ஹேதப்³ப³ம்.

457. இதா⁴தி இமஸ்மிம் பாடே². ‘‘‘காலே கப்பதி, விகாலே ந கப்பதீ’தி (மஹாவ. 305) வுத்தவசனமத்தேன ‘விகாலே கப்பதீ’தி விகாலபோ⁴ஜனபாசித்தியம் ஆவஹம் ஹோதீதி அத்தோ², ‘ந கப்பதீ’தி ஸன்னிதி⁴போ⁴ஜனபாசித்தியம் ஆவஹம் ஹோதீதி அத்தோ², யதி³ ஸம்பி⁴ன்னரஸம் அஜ்ஜபடிக்³க³ஹிதம்பி யாவஜீவிகந்தி அத்தோ²’’தி லிகி²தம். ஸுத்தவிப⁴ங்கே³தி மாதிகாஸங்கா²தே ஸுத்தே ச தஸ்ஸ பத³பா⁴ஜனீயஸங்கா²தே விப⁴ங்கே³ சாதி அத்தோ². இத³ம் ஆக³தமேவ. கதரந்தி? ‘‘அதிக்காமயதோ சே²த³னக’’ந்தி இத³ம்.

திவித³த்தி²பமாணஞ்சே, அத³ஸம் தம் நிஸீத³னம்;

நிஸீத³னம் கத²ம் ஹோதி, ஸத³ஸம் தஞ்ஹி லக்க²ணம்.

திவித³த்தி²பமாணம் தம், த³ஸா தத்த² வித³த்தி² சே;

தம்னிஸீத³னனாமத்தா, தஸ்மிம் சே²த³னகம் ஸியா.

அனிஸீத³னனாமம்ஹி, கத²ம் சே²த³னகம் ப⁴வே;

இதி சே நேவ வத்தப்³ப³ம், நிஸீத³னவித³த்தி²தோ.

கப்பதே ஸத³ஸாமத்தம், நிஸீத³னமிதி காரணம்;

கத²ம் யுஜ்ஜதி நோ சேதம், நிஸீத³னஸ்ஸ நாமகம்.

நிஸீத³னந்தி வுத்தத்தா, பமாணஸமதிக்கமா;

தஸ்ஸானுமதிஹேதுத்தா, தத்த² சே²த³னகம் ப⁴வே.

ஜாதரூபகப்பே –

ஜாதரூபம் படிக்கி²த்தம், புக்³க³லஸ்ஸேவ பாளியம்;

ந ஸங்க⁴ஸ்ஸாதி ஸங்க⁴ஸ்ஸ, தஞ்சே கப்பதி ஸப்³ப³ஸோ.

விகாலபோ⁴ஜனஞ்சாபி, புக்³க³லஸ்ஸேவ வாரிதம்;

ந ஸங்க⁴ஸ்ஸாதி ஸங்க⁴ஸ்ஸ, கப்பதீதி கத²ம் ஸமம்.

ஸத்தஸதிகக்க²ந்த⁴கவண்ணனா நிட்டி²தா.

சூளவக்³க³வண்ணனா நிட்டி²தா.

நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ