11. பஞ்சஸதிகக்க²ந்த⁴கவண்ணனா

ஸங்கீ³தினிதா³னகதா²வண்ணனா

437. சி²ன்னபாதந்தி பா⁴வனபும்ஸகம், தேனாகாரேன பதந்தீதி அத்தோ². உபத்³து³தா ச மயம் ஹோமாதி அதீதத்தே² வத்தமானவசனம், அஹும்ஹாதி அத்தோ². அத² வா தஸ்மிம் ஸதி ஹோம. ‘‘பஞ்ச பி⁴க்கு²ஸதானீ’’தி க³ணனவஸேன வத்வா ‘‘வஸ்ஸம் வஸந்தா’’தி புக்³க³லனித்³தே³ஸோ கதோ.

கு²த்³தா³னுகு²த்³த³ககதா²வண்ணனா

443. ‘‘வஸ்ஸிகஸாடிகம் அக்கமித்வா’’தி வசனதோ ப⁴க³வதோ சதுத்த²சீவரம்பி அத்தீ²தி ஸித்³த⁴ம். தேனேவாஹ சீவரக்க²ந்த⁴கே ‘‘சதுத்த²ம் சீவரம் பாருபீ’’தி.

444. ‘‘அபிச யதே²வ மயா’’திஆதி³ ஸங்கீ³தியா அக்³க³ஹணாதி⁴ப்பாயவஸேன வுத்தம், கிந்து ஸுஸங்கீ³தா ஆவுஸோ தே²ரேஹி த⁴ம்மோ ச வினயோ ச. அபிசாஹம் நாம ததே²வாஹம் தா⁴ரேஸ்ஸாமீதி யதே²வ மயா ப⁴க³வதோ ஸம்முகா² ஸுதம் ஸம்முகா² படிக்³க³ஹிதம், ததே²வ தே²ரேஹி ப⁴க³வதா ஸயமேவ ஏதத³க்³க³ம் ஆரோபிதேஹி, தஸ்மா ஸுஸங்க³ஹிதா ஸங்கீ³தீதி வுத்தம் ஹோதி.

ப்³ரஹ்மத³ண்ட³கதா²வண்ணனா

445. ‘‘த்வம்யேவ ஆணாபேஹீ’’தி ஏத்தகமேவ வுத்தம், தே²ரா பன ப்³ரஹ்மத³ண்ட³ம் கத்வா வுத்தம்யேவ ‘‘ச²ன்னஸ்ஸா’’திஆதி³மாஹம்ஸூதி வேதி³தப்³ப³ம். ஏத்த² ச ஆனந்த³த்தே²ரோ விய அஞ்ஞோபி ஸங்கே⁴ன ஆணத்தோ பி⁴க்கு² ப்³ரஹ்மத³ண்ட³கதேன பி⁴க்கு²னா ஆலபிதும் லப⁴தி, ந அஞ்ஞோ. உஜ்ஜவனிகாயாதி படிஸோதகா³மினியா. ஆக³மா நு கோ² இத⁴ ஆக³மா நு க்²வித⁴. ஆக³மா கோ² இத⁴, தே ஓரோதா⁴ இத⁴ ஆக³மா கோ². ‘‘பி⁴ஸிச்ச²வீதி பி⁴ஸித்த²விகா’’தி லிகி²தம். ஸப்³பே³விமேதி ஸப்³ப³மேவ. குலவம் க³மேந்தீதி நிரத்த²கவினாஸம் க³மேந்தி. குச்சி²தோ லவோ குலவோ, அனயவினாஸோதி வுத்தம் ஹோதி. இமாய கோ² பன ‘‘த⁴ம்மவினயஸங்கீ³தியா’’தி வத்தப்³பே³ விஸேஸேன வினயஸ்ஸ ஸாஸனமூலபா⁴வத³ஸ்ஸனத்த²ம், தஸ்மிம் டி²தே ஸகலஸாஸனடி²திஸித்³தி⁴தீ³பனத்த²ஞ்ச ‘‘இத³ம் வோ கப்பதி, இத³ம் வோ ந கப்பதீ’’தி வத்து²ஸ்மிம் ஆரத்³த⁴த்தா, இமிஸ்ஸா ச பரியத்தியா வினயபிடகத்தா ‘‘வினயஸங்கீ³தியா’’தி இத⁴ வுத்தம்.

பஞ்சஸதிகக்க²ந்த⁴கவண்ணனா நிட்டி²தா.