10. பி⁴க்கு²னிக்க²ந்த⁴கவண்ணனா

மஹாபஜாபதிகோ³தமீவத்து²கதா²வண்ணனா

402-3. ஸூனேஹீதி ஸுதேஹி. ‘‘ஸேதட்டிகா நாம ரோக³ஜாதீ’’தி பாளி. ‘‘ஸேதட்டி²கா’’தி அட்ட²கதா². ‘‘படிஸம்பி⁴தா³பத்தகீ²ணாஸவக்³க³ஹணேன ஜா²னானிபி க³ஹிதானேவ ஹோந்தி. ந ஹி நிஜ்ஜா²னிகானம் ஸப்³ப³ப்பகாரா ஸம்பத்தி இஜ்ஜ²தீ’’தி லிகி²தம்.

பி⁴க்கு²னீஉபஸம்பதா³னுஜானனகதா²வண்ணனா

404. யத³க்³கே³ன யம் தி³வஸம் ஆதி³ம் கத்வா. ததே³வாதி தஸ்மிம் ஏவ தி³வஸே. ‘‘அனுஞத்தியா’’தி பாடோ². ‘‘அனுபஞ்ஞத்தியா’’தி ந ஸுந்த³ரம்.

405. ‘‘படிக்³க³ண்ஹாமி யாவஜீவம் அனதிக்கமனீயோ’’தி வத்வா இதா³னி கிம் காரணா வரம் யாசதீதி சே? பரூபவாத³விவஜ்ஜனத்த²ம். து³ப்³பு³த்³தி⁴னோ ஹி கேசி வதே³ய்யும் ‘‘மஹாபஜாபதியா பட²மம் ஸம்படிச்சி²தத்தா உப⁴தோஸங்க⁴ஸ்ஸ யதா²வுட்³ட⁴அபி⁴வாத³னம் ந ஜாதம். கோ³தமீ சே வரம் யாசேய்ய, ப⁴க³வா அனுஜானேய்யா’’தி.

408. விமானேத்வாதி அபரஜ்ஜி²த்வா.

410-3. கம்மப்பத்தாயோபீதி கம்மாரஹாபி. ஆபத்திகா³மினியோபீதி ஆபத்திம் ஆபன்னாயோபி. த்³வே திஸ்ஸோ பி⁴க்கு²னியோதி த்³வீஹி தீஹி பி⁴க்கு²னீஹி. ‘‘மனோஸிலிகாயா’’தி பாடோ².

420. ‘‘தேன ச பி⁴க்கு² நிமந்தேதப்³போ³’’தி ஸாமீசிவஸேன வுத்தம்.

422-3. ‘‘அனுஜானாமி…பே… தாவகாலிக’’ந்தி புக்³க³லிகம் ஸந்தா⁴ய வுத்தம், ந ஸங்கி⁴கந்தி ஆசரியோ. ‘‘அனுஜானாமி, பி⁴க்க²வே, உதுனியா கடிஸுத்தக’’ந்தி வசனதோ பி⁴க்கு²ஸ்ஸ வினிப³ந்த⁴ம் கடிஸுத்தகம் ந வட்டதி. பக்³க⁴ரந்தீ விஸவிணா. வேபுரிஸிகா மஸ்ஸுதா³டீ².

425. தயோ நிஸ்ஸயேதி ருக்க²மூலஞ்ஹி ஸா ந லப⁴தி.

426. ப⁴த்தக்³கே³ ஸசே தா³யகா பி⁴க்கு²னிஸங்க⁴ஸ்ஸ பு⁴த்தவதோ சதுபச்சயே தா³துகாமா ஹோந்தி, யதா²வுட்³ட⁴மேவ.

427. விகாலேதி யாவ விகாலே ஹோந்தி, தாவ பவாரேஸுந்தி அத்தோ². அஜ்ஜத்தனாதி அஜ்ஜதனா.

428. அனுவாத³ந்தி இஸ்ஸரியட்டா²னம். இத³ம் ஸப்³ப³ம் ‘‘அஜ்ஜதக்³கே³ ஓவடோ பி⁴க்கு²னீனம் பி⁴க்கூ²ஸு வசனபதோ²’’தி பஞ்ஞத்தஸ்ஸ க³ருத⁴ம்மஸ்ஸ வீதிக்கமஆபத்திபஞ்ஞாபனத்த²ம் வுத்தந்தி வேதி³தப்³ப³ம், அஞ்ஞதா² யேஸம் க³ருத⁴ம்மானம் படிக்³க³ஹணேன பி⁴க்கு²னீனம் உபஸம்பதா³ அனுஞ்ஞாதா, தேஸம் வீதிக்கமே அனுபஸம்பன்னாவ ஸியாதி ஆஸங்கா ப⁴வேய்ய.

429. இத்தி²யுத்தேனாதி இத்தீ²ஹி கா³வீஆதீ³ஹி து⁴ரட்டா²னே யுத்தேன. புரிஸந்தரேனாதி புரிஸேன அந்தரிகேன. ‘‘புரிஸது³தியேனா’’தி லிகி²தம், புரிஸஸாரதி²னாதி அதி⁴ப்பாயோ. ‘‘பா³ள்ஹதரம் அபா²ஸூ’’தி வசனதோ கி³லானாய வட்டதிச்சேவ ஸித்³த⁴ம், ப⁴க³வந்தம் ஆபுச்சி²த்வா அனுஞ்ஞாதட்டா²னே உபஸம்பஜ்ஜிஸ்ஸாமீதி அதி⁴ப்பாயோ.

430. ஸா கேனசிதே³வ அந்தராயேனாதி ஸப்³ப³ந்தராயஸங்க³ஹனவசனம், தஸ்மா தம் ந அந்தராயம் கித்தேத்வா, வுத்தந்தராயேன ‘‘ராஜந்தராயேனா’’தி ஸாதே⁴தப்³ப³ந்தி ஆசரியோ.

431-2. ‘‘நவகம்மந்தி கத்வா ‘ஏத்தகானி வஸ்ஸானி வஸதூ’தி அபலோகேத்வா ஸங்கி⁴கபூ⁴மிதா³ன’’ந்தி லிகி²தம். ‘‘ஸாகா³ர’’ந்தி வுத்தத்தா அகா³ரபடிஸம்யுத்தரஹோனிஸஜ்ஜஸிக்கா²தி³வஜ்ஜிதாதி கேசி, யுத்தமேதம். கஸ்மா? ‘‘ஸஹாகா³ரஸேய்யமத்தம் ட²பேத்வா’’தி அட்ட²கதா²யம் வுத்தத்தா. ‘‘அனுஜானாமி, பி⁴க்க²வே, போஸேது’’ந்தி வசனதோ போஸனயுத்தகம்மம் ஸப்³ப³ம் வட்டதி மாதுயா, ந அஞ்ஞேஸம். வஸிதும் சே ந ஸக்கோதி து³தியம் வினா, ஸம்மன்னித்வாவ தா³தப்³பா³ தாய இதி நோ மதி. கித்தகம் காலம்? வஸித்வா சே து³தியா க³ந்துமிச்ச²தி, அஞ்ஞம் ஸம்மன்னிதும் யுத்தாவ. ஸா விஜாதா லபே⁴தி ஆசரியோ.

434. ‘‘இத³ம் ஓதி³ஸ்ஸ அனுஞ்ஞாதம் வட்டதீதி ஏகதோ வா உப⁴தோ வா அவஸ்ஸவே ஸதிபி வட்டதீ’’தி லிகி²தம். ‘‘கேஸச்சே²தா³தி³கம் கம்மம் அனுஜானாமி ஸாதி³தும் ’’இச்சேவ வுத்தத்தா வுத்தம் ‘‘தத³ஞ்ஞே ஸாதி³து’’ந்தி. ‘‘கேஸச்சே²தா³தி³கம் கம்மம் அனுஜானாமி, பி⁴க்க²வே’’தி அவத்வா ஏத்தகம் யஸ்மா ‘‘ஸாதி³து’’ந்தி பா⁴ஸிதம், தஸ்மா ஸா விசிகிச்சா²ய உப⁴தோபி அவஸ்ஸவே அபி பாராஜிககே²த்தேன ஸா பாராஜிகம் பு²ஸதி. இதி அட்ட²கதா²ஸ்வேதம் ஸப்³பா³ஸுபி வினிச்சி²தம். ஓதி³ஸ்ஸகாபி⁴லாபோ ஹி அஞ்ஞதா² நிப்³பி³ஸேஸதோ தம் பமாணம். யதி³ ததா² பி⁴க்கு²ஸ்ஸ கப்பதி விசிகிச்சா².

காலமோதி³ஸ்ஸ நம் பத³ம், ந ஸத்தோதி³ஸ்ஸகஞ்ஹி தம்;

அத² பி⁴க்கு²னியா ஏவ, காலமோதி³ஸ்ஸ பா⁴ஸிதம்.

ஏவம் பாராஜிகாபத்தி, ஸிதி²லாவ கதா ஸியா;

ஸப்³ப³ஸோ பிஹிதம் த்³வாரம், ஸப்³ப³பாராஜிகஸ்மிந்தி.

நிரத்த²கபா⁴வதோ, உப்³ப⁴ஜாணுமண்ட³லே;

தஸ்மா ந ஸாதி³யந்தீதி, நிதா³னவசனக்கமம்.

நிஸ்ஸாய ஸத்து²னா வுத்தம், ஸாதி³துந்தி ந அஞ்ஞதா²;

அத்தனோ பண்ஹிஸம்ப²ஸ்ஸம், ஸாதி³தும் யேன வாரிதம்.

அபி பாராஜிகக்கே²த்தே, கத²ம் த்³வாரம் த³தே³ய்ய ஸோ;

ததா²பி பு³த்³த⁴புத்தானம், பு³த்³த⁴பா⁴ஸிதபா⁴ஸிதம்.

வசனஞ்ச ஸமானேந்தோ, நோ சேத்த² யுத்திகதா² தீ⁴ரா;

கேஸச்சே²தா³தி³கம்மஸ்ஸ, அவஸ்ஸம் கரணீயதோ.

சித்தஸ்ஸ சாதிலோலத்தா, க³ணஸ்ஸ ச அங்க³ஸம்பதா³-

பா⁴வா பி⁴க்கு²னீனம் மஹேஸினா, ரக்கி²துஞ்ச அஸங்கத்தா;

நனு மோதி³ஸ்ஸகம் கதந்தி.

பி⁴க்கு²னிக்க²ந்த⁴கவண்ணனா நிட்டி²தா.