1. ஸுக்கவிஸ்ஸட்டி²ஸிக்கா²பத³வண்ணனா

235. ‘‘ஓக்கமந்தான’’ந்தி பாடோ². ஏத்தா²ஹ – ‘‘யோ பன பி⁴க்கூ²’’தி காரகோ இத⁴ கஸ்மா ந நித்³தி³ட்டோ²தி? அபி⁴-நித்³தே³ஸேன இமஸ்ஸ ஸாபேக்கா²பா⁴வத³ஸ்ஸனத்த²ம். கத²ம்? கண்டு³வனாதி³அதி⁴ப்பாயசேதனாவஸேன சேதேந்தஸ்ஸ கண்டு³வனாதி³உபக்கமேன உபக்கமந்தஸ்ஸ, மேது²னராக³வஸேன ஊருஆதீ³ஸு து³க்கடவத்தூ²ஸு, வணாதீ³ஸு து²ல்லச்சயவத்தூ²ஸு ச உபக்கமந்தஸ்ஸ ஸுக்கவிஸ்ஸட்டி²யா ஸதிபி ந ஸங்கா⁴தி³ஸேஸோ. மோசனஸ்ஸாத³ஸங்கா²தாதி⁴ப்பாயாபேக்கா²வ ஸுக்கவிஸ்ஸட்டி² ஸதி உபக்கமே, ந அஞ்ஞதா² ‘‘அனாபத்தி ந மோசனாதி⁴ப்பாயஸ்ஸா’’தி வசனதோ. தஸ்மா தத³த்த²த³ஸ்ஸனத்த²ம் இத⁴ காரகோ ந நித்³தி³ட்டோ², அஞ்ஞதா² ‘‘யோ பன பி⁴க்கு² ஸஞ்சேதனிகம் ஸுக்கவிஸ்ஸட்டி²ம் ஆபஜ்ஜேய்யா’’தி காரகே நித்³தி³ட்டே² ‘‘சேதேதி ந உபக்கமதி முச்சதி, அனாபத்தீ’’தி வுத்தவசனவிரோதோ⁴. ‘‘ஸஞ்சேதனிகாய ஸுக்கவிஸ்ஸட்டி²யா அஞ்ஞத்ர ஸுபினந்தா’’தி பு⁴ம்மே நித்³தி³ட்டே²பி ஸோவ விரோதோ⁴ ஆபஜ்ஜதி, தஸ்மா தது³ப⁴யவசனக்கமம் அவத்வா ‘‘ஸஞ்சேதனிகா ஸுக்கவிஸ்ஸட்டி² அஞ்ஞத்ர ஸுபினந்தா’’தி வுத்தம். தத்த² நிமித்தத்தே² பு⁴ம்மவசனாபா⁴வதோ ஹேதுத்த²னியமோ ந கதோ ஹோதி. தஸ்மிம் அகதே ஸஞ்சேதனிகா ஸுக்கவிஸ்ஸட்டி² அஞ்ஞத்ர ஸுபினந்தா ஸங்கா⁴தி³ஸேஸாபத்தி, உபக்கமே அஸதி அனாபத்தீதி அயமத்தோ² தீ³பிதோதி வேதி³தப்³ப³ம்.

236-7. ஸஞ்சேதனிகாதி ஏத்த² பட²மவிக்³க³ஹேன உபஸக்³க³ஸ்ஸ ஸாத்த²கதா த³ஸ்ஸிதா, து³தியேன இகபச்சயஸ்ஸ. வாதபித்தஸேம்ஹருஹிராதி³ஆஸயபே⁴த³தோதி அத்தோ². தா⁴தூதி ஏத்த² ‘‘பத²வீதா⁴துஆத³யோ சதஸ்ஸோ, சக்கு²தா⁴துஆத³யோ வா அட்டா²ரஸா’’தி க³ண்டி²பதே³ லிகி²தம். வத்தி²ஸீஸந்தி வத்தி²புடஸ்ஸ ஸீஸம். ‘‘அங்க³ஜாதஸ்ஸ மூலம் அதி⁴ப்பேதம், ந அக்³க³ஸீஸ’’ந்தி வத³ந்தி. ததே²வாதி ‘‘நிமித்தே உபக்கமதோ’’திஆதி³ம் க³ண்ஹாதி. ததோ முச்சித்வாதி ‘‘ந ஸகலகாயதோ, தஸ்மா பன டா²னா சுதமத்தே ஹோதூ’’தி க³ண்டி²பதே³ லிகி²தம். ‘‘த³கஸோதம் ஓதிண்ணமத்தே’’தி இமினா ந ஸமேதீதி சே? ததோ த³கஸோதோரோஹணஞ்சேத்தா²திஆதி³ வுச்சதி. தஸ்ஸத்தோ² – நிமித்தே உபக்கமம் கத்வா ஸுக்கம் டா²னா சாவேத்வா புன விப்படிஸாரவஸேன த³கஸோதோரோஹணம் நிவாரேதும் அதி⁴வாஸேமீதி. ததோ ப³ஹி நிக்க²மந்தே அதி⁴வாஸேதும் ந ஸக்கா, ததா²பி அதி⁴வாஸனாதி⁴ப்பாயேன அதி⁴வாஸேத்வா அந்தரா த³கஸோததோ உத்³த⁴ம் நிவாரேதும் அஸக்குணேய்யதாய ‘‘அனிக்க²ந்தே வா’’தி வுத்தம். கஸ்மா? டா²னா சுதஞ்ஹி அவஸ்ஸம் த³கஸோதம் ஓதரதீதி அட்ட²கதா²தி⁴ப்பாயோ க³ண்டி²பதா³தி⁴ப்பாயேன ஸமேதி. ததோ முச்சித்வாதி ஸகட்டா²னதோ. ஸகஸரீரதோ ஹி ப³ஹி நிக்க²ந்தமேவ ஹோதி, ததோ ‘‘ப³ஹி நிக்க²ந்தே வா அனிக்க²ந்தே வா’’தி வசனம் விருஜ்ஜே²ய்ய. யஸ்மா பன தம்ஹா தம்ஹா ஸரீரபதே³ஸா சுதம் அவஸ்ஸம் த³கஸோதம் ஓதரதி, தஸ்மா வுத்தம் ‘‘த³கஸோதம் ஓதிண்ணமத்தே’’தி, இமினா ச ஆபத்தியா பாகடகாலம் த³ஸ்ஸேதி, கிம் வுத்தம் ஹோதி? மோசனஸ்ஸாதே³ன நிமித்தே உபக்கமதோ ஸுக்கம் ப³ஹுதரம்பி ஸரீரபதே³ஸா சுதம் தத்த² தத்த² லக்³கா³வஸேஸம் யத்தகம் ஏகா கு²த்³த³கமக்கி²கா பிவேய்ய, தத்தகே த³கஸோதம் ஓதிண்ணமத்தே ஸங்கா⁴தி³ஸேஸாபத்தி. வுத்தஞ்ஹி கங்கா²விதரணியம் (கங்கா². அட்ட². ஸுக்கவிஸ்ஸட்டி²ஸிக்கா²பத³வண்ணனா) ‘‘த³கஸோதம் அனோதிண்ணேபி ஸங்கா⁴தி³ஸேஸோ’’திஆதி³. தத்தகஸ்ஸ ப³ஹி நிக்க²மனம் அஸல்லக்கே²ந்தோ ‘‘சேதேதி உபக்கமதி ந முச்சதி, ஆபத்தி து²ல்லச்சயஸ்ஸா’’தி வசனதோ து²ல்லச்சயந்தி ஸஞ்ஞாய தே³ஸேந்தோபி ந முச்சதி, பஸ்ஸாவம்பி வண்ணதம் பஸ்ஸித்வா வத்தி²கோஸக³தஸ்ஸ பிச்சி²லதாய வா ஞத்வா ஸங்கா⁴தி³ஸேஸதோ வுட்டா²தப்³ப³ம். அயமேத்த² ததியத்தே²ரவாதே³ யுத்தி. ஸப்³பா³சரியா இமே ஏவ தயோ தே²ரா, தேஸம்பி த³கஸோதோரோஹணம் நிமித்தே உபக்கமனந்தி அயம் து³தியோ வினிச்ச²யோ ஸாதா⁴ரணதோ ஏத்த², ஏவம் உபதிஸ்ஸத்தே²ரோ வத³தி கிர.

டா²னா சுதஞ்ஹி அவஸ்ஸம் த³கஸோதம் ஓதரதீதி கத்வா ‘‘டா²னா சாவனமத்தேனேவேத்த² ஆபத்தி வேதி³தப்³பா³’’தி வுத்தம். த³கஸோதம் ஓதிண்ணே ஏவ ஆபத்தி. ஸுக்கஸ்ஸ ஹி ஸகலம் ஸரீரம் டா²னம், அனோதிண்ணே டா²னா சுதம் நாம ந ஹோதீதி வீமம்ஸிதப்³ப³ம். ஆபி⁴த⁴ம்மிகத்தா தே²ரஸ்ஸ ‘‘ஸுக்கவிஸ்ஸட்டி² நாம ராக³ஸமுட்டா²னா ஹோதீ’’தி (கதா². அட்ட². 307) கதா²வத்து²ட்ட²கதா²யம் வுத்தத்தா ஸம்ப⁴வோ சித்தஸமுட்டா²னோ, ‘‘தம் அஸுசிம் ஏகதே³ஸம் முகே²ன அக்³க³ஹேஸி, ஏகதே³ஸம் அங்க³ஜாதே பக்கி²பீ’’தி (பாரா. 503) வசனதோ உதுஸமுட்டா²னோ ச தி³ஸ்ஸதி, ஸோ ச கோ² அவீதராக³ஸ்ஸேவ ‘‘அட்டா²னமேதம், பி⁴க்க²வே, அனவகாஸோ யம் அரஹதோ அஸுசி முச்சேய்யா’’தி (மஹாவ. 353; கதா². 313) வசனதோ. பரூபாஹாரட்ட²கதா²யம் ‘‘அத்தி² தஸ்ஸ ஆஸயோதி தஸ்ஸ ஸுக்கஸ்ஸ உச்சாரபஸ்ஸாவானம் விய பதிட்டா²னோகாஸோ அத்தீ²’’தி (கதா². அட்ட². 309) சனதோ தஸ்ஸ ஆஸயோதி ஸித்³த⁴ம். பாகதிகசித்தஸமுட்டா²னரூபம் விய அஸம்ஸட்ட²த்தா, நிக்க²மனதோ ச ‘‘வத்தி²ஸீஸம், கடி, காயோ’’தி திதா⁴ ஸுக்கஸ்ஸ டா²னம் பகப்பேந்தி ஆசரியா. ஸப்பவிஸம் விய தம் த³ட்ட²ப்³ப³ம், ந ச விஸஸ்ஸ டா²னனியமோ, கோத⁴வஸேன பு²ஸந்தஸ்ஸ ஹோதி, ஏவமஸ்ஸ ந ச டா²னனியமோ, ராக³வஸேன உபக்கமந்தஸ்ஸ ஹோதீதி தக்கோ.

கோ²ப⁴கரணபச்சயோ நாம பே⁴ஸஜ்ஜஸேனாஸனாஹாராதி³பச்சயோ. ஸம்ஸக்³க³பே⁴த³தோபீதி ஏதேஸு த்³வீஹிபி தீஹிபி. பஹீனவிபல்லாஸத்தாதி ஏத்த² யம் கிஞ்சி ஸுபினந்தேன ஸேக்க²புது²ஜ்ஜனா பஸ்ஸந்தி, தம் ஸப்³ப³ம் விபல்லத்த²ம் அபூ⁴தமேவாதி ஆபஜ்ஜதி. ததோ ‘‘யம் பன புப்³ப³னிமித்ததோ பஸ்ஸதி. தம் ஏகந்தஸச்சமேவ ஹோதீ’’தி இத³ம் விருஜ்ஜ²தி, தஸ்மா ந விஸயம் ஸந்தா⁴ய வுத்தம். ஸோ ஹி ஸச்சோ வா ஹோதி, அலிகோ வாதி கத்வா தஞ்சே ஸந்தா⁴ய வுத்தம் ஸியா, ‘‘அஸேக்கா² பஹீனவிபல்லாஸத்தா ஸச்சமேவ பஸ்ஸந்தி, நாஸச்ச’’ந்தி வத்தப்³ப³ம் ஸியா. கிந்து த³ஸ்ஸனம் ஸந்தா⁴ய வுத்தம். தஞ்ஹி அபூ⁴தம், அபஸ்ஸந்தோபி ஹி பஸ்ஸந்தோ விய அஸுணந்தோபி ஸுணந்தோ விய அமுனந்தோபி முனந்தோ விய ஹோதி. ஸச்சம்பி விபஸ்ஸதீதி நோ தக்கோதி ஆசரியோ. தம் ரூபனிமித்தாதி³ஆரம்மணம் ந ஹோதி, ஆக³ந்துகபச்சுப்பன்னம் ரூபனிமித்தாதி³ஆரம்மணம் ஸந்தா⁴ய வுத்தம். கம்மனிமித்தக³தினிமித்தபூ⁴தானி ஹி ரூபனிமித்தாதீ³னி ப⁴வங்க³ஸ்ஸ ஆரம்மணானி ஹோந்தி ஏவ. தத்த² கம்மனிமித்தமதீதமேவ, க³தினிமித்தம் தோ²கம் காலம் பச்சுப்பன்னம் ஸியா.

ஈதி³ஸானீதி பச்சக்க²தோ அனுபூ⁴தபுப்³ப³பரிகப்பிதாக³ந்துகபச்சுப்பன்னரூபனிமித்தாதி³ஆரம்மணானி, ராகா³தி³ஸம்பயுத்தானி சாதி அத்தோ². மக்கடஸ்ஸ நித்³தா³ லஹுபரிவத்தா ஹோதி. ஸோ ஹி ருக்க²ஸாக²தோ பதனப⁴யா அபி⁴க்க²ணம் உம்மீலதி ச ஸுபதி ச. மனுஸ்ஸா கிஞ்சாபி புனப்புனம் உம்மீலந்தி ஸுப்³யத்ததரம் படிபு³த்³தா⁴ விய பஸ்ஸந்தி, அத² கோ² படிபு³த்³தா⁴னம் புனப்புனம் ப⁴வங்கோ³தரணம் விய ஸுபினகாலேபி தேஸம் ப⁴வங்கோ³தரணம் ஹோதி, யேன ‘‘ஸுபதீ’’தி வுச்சதி. ‘‘ப⁴வங்க³சித்தேன ஹி ஸுபதீ’’தி வசனதோ ப⁴வங்கோ³தரணம் கரஜகாயஸ்ஸ நிருஸ்ஸாஹஸந்தபா⁴வூபனிஸ்ஸயத்தா ‘‘நித்³தா³’’தி வுச்சதி. ஸா கரஜகாயஸ்ஸ து³ப்³ப³லபா⁴வேன ஸுபினத³ஸ்ஸனகாலே ப⁴வங்க³தோ உத்தரணே ஸதிபி நிருஸ்ஸாஹஸந்தபா⁴வப்பத்தியா ‘‘பவத்ததீ’’தி ச வுச்சதி, யதோ ஸத்தா ‘‘படிபு³த்³தா⁴’’தி ந வுச்சந்தி, கரஜகாயஸ்ஸ நிருஸ்ஸாஹஸந்தஸபா⁴வப்பத்திதோ ச தன்னிஸ்ஸிதம் ஹத³யவத்து² ந ஸுப்பஸன்னம் ஹோதி, ததோ தன்னிஸ்ஸிதாபி சித்தப்பவத்தி அஸுப்பஸன்னவட்டினிஸ்ஸிததீ³பப்பபா⁴ விய. தேனேவ அட்ட²கதா²யம் ‘‘ஸ்வாயம் து³ப்³ப³லவத்து²கத்தா சேதனாய படிஸந்தி⁴ம் ஆகட்³டி⁴தும் அஸமத்தோ²’’திஆதி³ வுத்தம்.

க³ண்டி²பதே³ பன ‘‘து³ப்³ப³லவத்து²கத்தாதி ஸுபினே உபட்டி²தம் நிமித்தம்பி து³ப்³ப³ல’’ந்தி லிகி²தம். தம் அனேகத்த²ம் ஸப்³ப³ம்பி நிமித்தம் ஹோதி, ந ச து³ப்³ப³லாரம்மணவத்து²கத்தா சேதனா, தாய சித்தப்பவத்தி து³ப்³ப³லா அதீதானாக³தாரம்மணாய, பஞ்ஞத்தாரம்மணாய வா அது³ப்³ப³லத்தா, அவத்து²காய து³ப்³ப³லபா⁴வோ ந யுஜ்ஜதி சேதனாய அவத்து²காய பா⁴வனாபபா⁴வாயாதிரேகப³லஸப்³பா⁴வதோ. பா⁴வனாப³லஸமப்பிதஞ்ஹி சித்தம் அரூபம்பி ஸமானம் அதிபா⁴ரியம்பி கரஜகாயம் க³ஹேத்வா ஏகசித்தக்க²ணேனேவ ப்³ரஹ்மலோகம் பாபேத்வா ட²பேதி. தப்படிபா⁴க³ம் அனப்பிதம்பி காமாவசரசித்தம் கரஜகாயம் ஆகாஸே லங்க⁴னஸமத்த²ம் கரோதி, பகே³வேதரம். கிம் பனேத்த² தம் அனுமானகாரணம், யேன சித்தஸ்ஸேவ ஆனுபா⁴வோதி பஞ்ஞாயேய்ய சித்தானுபா⁴வேன வா லத்³தா⁴ஸேவனாதி³கிரியாவிஸேஸனிப்³ப³த்தித³ஸ்ஸனதோ, தஸ்மா து³ப்³ப³லவத்து²கத்தாதி து³ப்³ப³லஹத³யவத்து²கத்தாதி ஆசரியஸ்ஸ தக்கோ. அத்தனோ மந்த³திக்கா²காரேன தன்னிஸ்ஸிதஸ்ஸ சித்தஸ்ஸ மந்த³திக்க²பா⁴வனிப்பா²த³னஸமத்த²ஞ்சே, ஹத³யவத்து² சக்கு²ஸோதாதி³வத்து² விய இந்த்³ரியம் ப⁴வேய்ய, ந சேதம் இந்த்³ரியம். யதோ த⁴ம்மஸங்க³ஹே உபாதா³யரூபபாளியம் உத்³தே³ஸாரஹம் ந ஜாதம். அனிந்த்³ரியத்தா ஹி தம் காயிந்த்³ரியஸ்ஸ அனந்தரம் ந உத்³தி³ட்ட²ம், வத்து²ரூபத்தா ச அவத்து²ரூபஸ்ஸ ஜீவிதிந்த்³ரியஸ்ஸ அனந்தரம்பி ந உத்³தி³ட்ட²ம், தஸ்மா யம் வுத்தம் ‘‘தஸ்ஸ அஸுப்பஸன்னத்தா தன்னிஸ்ஸிதா ச சித்தப்பவத்தி அஸுப்பஸன்னா ஹோதீ’’தி, தம் ந ஸித்³த⁴ந்தி சே? ஸித்³த⁴மேவ அனிந்த்³ரியானம்பி ஸப்பாயாஸப்பாயஉதுஆஹாராதீ³னம் பச்சயானம் ஸமாயோக³தோ, சித்தப்பவத்தியா விகாரத³ஸ்ஸனதோ, பச்சக்க²த்தா ச. யஸ்மா அப்படிபு³த்³தோ⁴பி படிபு³த்³த⁴ம் விய அத்தானம் மஞ்ஞதீதி. ஏத்தாவதா கரஜகாயஸ்ஸ நிருஸ்ஸாஹஸந்தபா⁴வாகாரவிஸேஸோ நித்³தா³ நாம. ஸா சித்தஸ்ஸ ப⁴வங்கோ³தரணாகாரவிஸேஸேன ஹோதி, தாய ஸமன்னாக³தோ ஸத்தோ ப⁴வங்க³தோ உத்திண்ணோ ஸுபினம் பஸ்ஸதி, ஸோ ‘‘கபிமித்³த⁴பரேதோ’’தி வுச்சதி, ஸோ ஸுத்தோ அப்படிபு³த்³தோ⁴ ஹோதீதி அயமத்தோ² ஸாதி⁴தோ ஹோதி.

யஸ்மா ப⁴வங்க³வாரனிரந்தரதாய அச்சந்தஸுத்தோ நாம ஹோதி, தஸ்மா ‘‘யதி³ தாவ ஸுத்தோ பஸ்ஸதி, அபி⁴த⁴ம்மவிரோதோ⁴ ஆபஜ்ஜதீ’’திஆதி³ வுத்தம். யஸ்மா பன நித்³தா³க்க²ணே ந படிபு³த்³தோ⁴ நாம ஹோதி, தஸ்மா ‘‘அத² படிபு³த்³தோ⁴ பஸ்ஸதி, வினயவிரோதோ⁴’’திஆதி³ வுத்தம், யஸ்மா ச அகீ²ணனித்³தோ³, அனோதிண்ணப⁴வங்கோ³ ச அத்தி², தஸ்மா ‘‘கபிமித்³த⁴பரேதோ பஸ்ஸதீ’’தி வுத்தம். அஞ்ஞதா² அயம் நேவ ஸுத்தோ ந படிபு³த்³தோ⁴, அத்தனா தம் நித்³த³ம் அனோக்கந்தோ ஆபஜ்ஜேய்ய. ஏத்தாவதா ச அபி⁴த⁴ம்மோ, வினயோ, நாக³ஸேனத்தே²ரவசனம் யுத்தி சாதி ஸப்³ப³ம் அஞ்ஞமஞ்ஞஸம்ஸந்தி³தம் ஹோதி. தத்த² கபிமித்³த⁴பரேதோதி ப⁴வங்க³தோ உத்திண்ணனித்³தா³பரேதோ. ஸா ஹி இத⁴ கபிமித்³த⁴ம் நாம. ‘‘தத்த² கதமம் மித்³த⁴ம்? யா காயஸ்ஸ அகல்யதா அகம்மஞ்ஞதா…பே… ஸுபனம், இத³ம் வுச்சதி மித்³த⁴’’ந்தி (த⁴. ஸ. 1163) ஏவமாக³தம். இத³ஞ்ஹி அரூபம், இமஸ்ஸ ப²லபூ⁴தோ கரஜகாயஸ்ஸ அகல்யதா’பசலாயிகாஸுபி நித்³தா³விஸேஸோ காரணோபசாரேன ‘‘கபிமித்³த⁴’’ந்தி பவுச்சதி. யஞ்சேவ ‘‘கபிமித்³த⁴பரேதோ கோ², மஹாராஜ, ஸுபினம் பஸ்ஸதீ’’தி (மி. ப. 5.3.5 தோ²கம் விஸதி³ஸம்) வுத்தந்தி.

யம் தம் ஆபத்திவுட்டா²னந்தி ஏத்த² யேன வினயகம்மேன ததோ வுட்டா²னம் ஹோதி, தம் இத⁴ ஆபத்திவுட்டா²னம் நாம. அவயவே ஸமூஹவோஹாரேன வாதி ஏத்த² ஸாக²ச்சே²த³கோ ருக்க²ச்சே²த³கோதி வுச்சதீதிஆதி³ நித³ஸ்ஸனம், வேத³னாக்க²ந்தா⁴தி³ ருள்ஹீஸத்³த³ஸ்ஸ நித³ஸ்ஸனம். ந ச மயாதி வீமம்ஸனபத³ஸ்ஸ தஸ்ஸ கிரியம் ஸந்தா⁴ய, மோசனே ச ஸன்னிட்டா²னம் ஸந்தா⁴ய முச்சனபகதியா சாதி வுத்தம்.

240. கே³ஹந்தி பஞ்சகாமகு³ணா. வனப⁴ங்கி³யந்தி பாப⁴திகம். ஸம்பயுத்தஸுக²வேத³னாமுகே²ன ராகோ³வ ‘‘அஸ்ஸாதோ³’’தி வுத்தோ. ஸுபந்தஸ்ஸ சாதி இத³ம் கபிமித்³த⁴பரேதோ விய ப⁴வங்க³ஸந்ததிம் அவிச்சி²ந்தி³த்வா ஸுபந்தம் ஸந்தா⁴ய வுத்தந்தி, வீமம்ஸிதப்³ப³ம். ஜக்³க³னத்தா²யாதி ஸோத⁴னத்தா²ய.

266. ‘‘தா³ருதீ⁴தலிகலேபசித்தானம் அங்க³ஜாதபடினிஜ்ஜா²னேபி து³க்கட’’ந்தி வத³ந்தி. ‘‘உப்பன்னே பரிளாஹே மோசனராக³ஜோ’’தி லிக²ந்தி. வாலிகாய வா ‘‘ஹத்தி²காமம் நஸ்ஸதீ’’தி ஏத்த² விய ‘‘ஆபத்தி த்வ’’ந்தி ஸப்³ப³த்த² பாடோ². ‘‘ஏஹி மே த்வம், ஆவுஸோ ஸாமணேர, அங்க³ஜாதம் க³ண்ஹாஹீ’’தி ஆக³தத்தா ‘‘வசீகம்ம’’ந்திபி வத்தும் யுத்தம் விய தி³ஸ்ஸதி. ஏவம் ஸந்தே அஞ்ஞம் ‘‘ஏவம் கரோஹீ’’தி ஆணத்தியாபி ஆபத்தி ஸியாதி ஸங்கரம் ஹோதி. தஸ்மா ந வுத்தந்தி க³ஹேதப்³ப³ந்தி கேசி.

267. ‘‘புப்பா²வலியம் ஸாஸவளிய’’ந்தி து³விதோ⁴ கிர.

ஸுக்கவிஸ்ஸட்டி²ஸிக்கா²பத³வண்ணனா நிட்டி²தா.