4. சதுத்த²பாராஜிகம்

வக்³கு³முதா³தீரியபி⁴க்கு²வத்து²வண்ணனா

193. சதுத்தே² வக்³கு³ ச ஸா மோத³யதி ச ஸத்தேதி வக்³கு³முதா³. ‘‘வக்³கு³மதா³’’திபி பாடோ², தஸ்ஸ வக்³கு³ ச ஸா பஸன்னஸுத்³த⁴தரங்க³ஸமித்³த⁴த்தா ஸுகு²மா சாதி அத்தோ² ஜீவிதவக்³கு³த்த²னிதா ஜீவிதத்த²ந்தி நீலுப்பலந்திஆதீ³ஸு விய. மத³ஸ்ஸாதி ச ப³ஹுக²ஜ்ஜபோ⁴ஜ்ஜபானாதி³ஸமித்³தா⁴ நதீ³ ச²ணதி³வஸேஸூதி நிருத்தி வேதி³தப்³பா³. வக்³கு³ பரிஸுத்³தா⁴தி லோகேன ஸம்மதாதி கிர அத்தோ². பா⁴ஸிதோ ப⁴விஸ்ஸதீதி பாட²ஸேஸோ.

194-5. வண்ணவா வண்ணவந்தோ வண்ணவந்தானீதிபி ஸிஜ்ஜ²தி கிர ப³ஹுவசனேன. யஸ்மா இந்த்³ரியானம் ஊனத்தம், பூரத்தம் வா நத்தி², தஸ்மா ‘‘அபி⁴னிவிட்டோ²காஸஸ்ஸ பரிபுண்ணத்தா’’தி வுத்தம். ச²ட்ட²ஸ்ஸ அபி⁴னிவிட்டோ²காஸோ ஹத³யவத்து². சதுஇரியாபத²சக்கே பாகதிந்த்³ரியே. அத்தனோ த³ஹதீதி அத்தனா த³ஹதி, அத்தனா படிவித்³த⁴ம் கத்வா பவேதே³தீதி அதி⁴ப்பாயோ. ஸந்தந்தி வத்தமானம். கோ³த்ரபு⁴னோதி கோ³த்தமத்தம் அனுப⁴வத்தா நாமமத்தகமேவாதி அத்தோ².

ஸவிப⁴ங்க³ஸிக்கா²பத³வண்ணனா

197. பத³பா⁴ஜனே ‘‘திஸ்ஸோ விஜ்ஜா’’தி வுத்தத்தா அரூபாவசரஜ்ஜா²னானி படிக்கி²த்தானீதி சே? ந, தத்தே²வ ‘‘யம் ஞாணம், தம் த³ஸ்ஸனம், யம் த³ஸ்ஸனம், தம் ஞாண’’ந்தி த³ஸ்ஸனபதே³ன விஸேஸேத்வா வுத்தத்தா, தஸ்மா ஏவ அட்ட²கதா²யம் ‘‘விஜ்ஜாஸீஸேன பத³பா⁴ஜனம் வுத்த’’ந்தி வுத்தம். து⁴ரம் கத்வாதி புரிமம் கத்வா.

பத³பா⁴ஜனீயவண்ணனா

199. அனாக³தே உப்பஜ்ஜனகராகா³தீ³னம் காரணத்தா ராகா³த³யோவ நிமித்தம் நாம. திஸ்ஸன்னஞ்ச விஜ்ஜானம் அஞ்ஞதரம் ஸந்தா⁴ய ‘‘விஜ்ஜானம் லாபீ⁴ம்ஹீ’’தி ப⁴ணதி, பாராஜிகம், ந வத்து²விஜ்ஜாதீ³னம் கிலேஸனஹானமேவ வுத்தம், தம்க²ணத்தா உத்தரிமனுஸ்ஸத⁴ம்மப்பவத்தி ந ஹோதீதி சே? ந, மக்³க³கிச்சதீ³பனதோ. தேனேவ ‘‘மக்³கே³ன வினா நத்தீ²’’திஆதி³ வுத்தம். சித்தந்தி சித்தஸ்ஸ விக³தனீவரணதாதி அத்தோ². ‘‘யாவஞ்ச விஜ்ஜா அனாக³தா, தாவ விபஸ்ஸனாஞாணஸ்ஸ லாபீ⁴ம்ஹீ’தி வத³ந்தோ யதி³ லோகுத்தரம் ஸந்தா⁴ய வத³தி, ஸோபி ச ததா² ஜானாதி, பாராஜிகமேவ லோகுத்தரஸ்ஸபி தம்னாமத்தா’’தி வத³ந்தி. ‘‘அவிஸேஸேனாபி வத³தோ பாராஜிகம் வுத்தந்தி லோகுத்தரம் ஸந்தா⁴ய வத³தோ ‘பாராஜிக’ந்தி வத்தும் யுஜ்ஜதி. யதா² கிம் ‘விஜ்ஜானம் லாபீ⁴ம்ஹீ’தி ப⁴ணந்தோபி பாராஜிகமேவா’தி வுத்தட்டா²னே வத்து²விஜ்ஜாதீ³னம் ஸம்ப⁴வேபி தாஸம் அனதி⁴ப்பேதத்தா பாராஜிகம் ஹோதி, ஏவமிதா⁴பி. ந ஸக்கா அஞ்ஞம் பமாணம் காதுந்தி அத்தனோ கு³ணமாரோசேதுகாமோ லோகியேன ஸம்மிஸ்ஸம் அத்த²படிஸம்பி⁴த³ம் வத³தோ பாராஜிகந்தி பமாணம் காதும் ந ஸக்கா, இதரதா² ஹோதீ’’தி அபரேஹி வுத்தம், ‘‘தம் புப்³பா³பரவிருத்³த⁴ம், தஸ்மா விஜ்ஜானித³ஸ்ஸனம் இத⁴ அனித³ஸ்ஸனம் ஸாஸனே வத்து²விஜ்ஜாதீ³னம் விஜ்ஜாவிதா⁴னாபா⁴வா. ப⁴க³வதா விப⁴த்தகே²த்தபதே³ வா தேஸம் பரியாயவசனானம் அனாமட்ட²த்தா ந ஸக்கா அஞ்ஞம் பமாணம் காது’’ந்தி லிகி²தம். ‘‘படிஸம்பி⁴தா³னம் லாபீ⁴ம்ஹீ’தி வுத்தே பரியாயேன வுத்தத்தா து²ல்லச்சயம் யுத்த’’ந்தி வத³ந்தி, விசாரேதப்³ப³ம். வீமம்ஸித்வா க³ஹேதப்³ப³ந்தி ‘‘யோ தே விஹாரே வஸதீ’’திஆதீ³ஹி ஸம்ஸந்த³னதோ பரியாயவசனத்தா து²ல்லச்சயம் வுத்தம். ‘‘நிரோத⁴ஸமாபத்திம் ஸமாபஜ்ஜாமீ’தி வா ‘லாபீ⁴ம்ஹாஹம் தஸ்ஸா’தி வா வத³தோபீ’’தி வுத்தவசனம்பி ‘‘ஸசே பனஸ்ஸேவம் ஹோதீ’’திஆதி³வசனம்பி அத்த²தோ ஏகமேவ, ஸோபி ஹி அத்தனோ விஸேஸம் ஆரோசேதுமேவ வத³தி. ‘‘யோ தே விஹாரே வஸதீ’திஆதீ³ஸு அஹம்-வசனாபா⁴வா பரியாயோ யுஜ்ஜதி, இத⁴ பன ‘லாபீ⁴ம்ஹாஹம் தஸ்ஸா’தி அத்தானம் நித்³தி³ஸதி, தஸ்மா பாராஜிகம் ஆபஜ்ஜிதும் யுத்தம் வியா’’தி வத³ந்தி. ‘‘மஹாபச்சரியாதி³வசனம் உத்தரிமனுஸ்ஸத⁴ம்மேஸு ஏகோபி ந ஹோதி, தஸ்மா பரியாயேன வுத்தத்தா ந ஹோதீ’’தி வத³ந்தி, ஸுட்டு² உபபரிக்கி²தப்³ப³ம். ப²லஸச்சி²கிரியா-பத³தோ பட்டா²ய ஏவ பாடோ² க³ஹேதப்³போ³, ப²லஸச்சி²கிரியாயபி ஏகேகம்பி ஏகேகப²லவஸேன பாராஜிகம் வேதி³தப்³ப³ம்.

ராக³ஸ்ஸ பஹானந்திஆதி³த்திகே கிலேஸப்பஹானமேவ வுத்தம், தம் பன யஸ்மா மக்³கே³ன வினா நத்தி². ததியமக்³கே³ன ஹி ராக³தோ³ஸானம் பஹானம், சதுத்தே²ன மோஹஸ்ஸ, தஸ்மா ‘‘ராகோ³ மே பஹீனோ’’திஆதீ³னி வத³தோபி பாராஜிகம். ராகா³ சித்தம் வினீவரணதாதிஆதி³த்திகே லோகுத்தரமேவ வுத்தம், தஸ்மா ‘‘ராகா³ மே சித்தம் வினீவரண’’ந்திஆதீ³னி வத³தோ பாராஜிகமேவாதி. அகுப்பத⁴ம்மத்தாதி கேசி உத்தரவிஹாரவாஸினோ. கஸ்மா ந ஹோதீதி சே? ‘‘இதி ஜானாமி, இதி பஸ்ஸாமீ’’தி வத்தமானவசனேனேவ மாதிகாயம் வுத்தத்தா. யதி³ ஏவம் பத³பா⁴ஜனே ‘‘ஸமாபஜ்ஜிம், ஸமாபன்னோ’’திஆதி³னா வுத்தத்தா ‘‘அதீதத்தபா⁴வே ஸோதாபன்னோம்ஹீ’’தி வத³தோபி ஹோதூதி சே? ந, அஞ்ஞதா² அத்த²ஸம்ப⁴வதோ. கத²ம்? அத்³தா⁴பச்சுப்பன்னவஸேன வத்தமானதா க³ஹேதப்³பா³தி ஞாபனத்த²ம் வுத்தம், ந அதீதத்தபா⁴வம். அதீதத்தபா⁴வோ ஹி பரியாயேன வுத்தத்தா ‘‘து²ல்லச்சய’’ந்தி வுத்தந்தி ஆசரியா.

200. ‘‘ஸசேபி ந ஹோதி, பாராஜிகமேவா’’தி அட்டா²னபரிகப்பவஸேன வுத்தம் கிர. ‘‘இதி வாசா திவங்கி³கா’’தி வக்க²தி. நத்தே²தந்தி புரிமே ஸதி பச்சி²மஸ்ஸாபா⁴வா ஸமாபஜ்ஜிம், ஸமாபன்னோதி இமேஸம் கிஞ்சாபி அத்த²தோ காலவிஸேஸோ நத்தி², வசனவிஸேஸோ பன அத்தி² ஏவ.

207. உக்கே²டிதோதி உத்தாஸிதோ. கி²ட உத்ராஸனே.

ஸுத்³தி⁴கவாரகதா²வண்ணனா நிட்டி²தா.

வத்துகாமவாரகதா²வண்ணனா

விஞ்ஞத்திபதே²தி விஜானனட்டா²னே, தேன ‘‘விஞ்ஞத்திபத²மதிக்கமித்வா டி²தோ பி⁴க்கு² தி³ப்³பா³ய ஸோததா⁴துயா ஸுத்வா ஜானாதி, ந பாராஜிகந்தி தீ³பேதீ’’தி வுத்தம். ஜா²னம் கிர ஸமாபஜ்ஜிந்தி ஏத்த² ஸோ சே ‘‘ஏஸ பி⁴க்கு² அத்தனோ கு³ணதீ³பனாதி⁴ப்பாயேன ஏவம் வத³தீ’’தி ஜானாதி, பாராஜிகமேவ. அஞ்ஞதா² ஜானாதீதி சே? பாராஜிகச்சா²யா ந தி³ஸ்ஸதீதி ஆசரியோ.

வத்துகாமவாரகதா²வண்ணனா நிட்டி²தா.

அனாபத்திபே⁴த³கதா²வண்ணனா

அனுல்லபனாதி⁴ப்பாயோதி யதி³ உல்லபனாதி⁴ப்பாயோ ப⁴வேய்ய, து³க்கடமேவாதி அபரே. ‘‘தம் பரதோ ‘நாவுஸோ, ஸக்கா புது²ஜ்ஜனேன அதி⁴வாஸேது’ந்தி வத்து²னா ஸம்ஸந்தி³த்வா க³ஹேதப்³ப³’’ந்தி வுத்தம்.

பத³பா⁴ஜனீயவண்ணனா நிட்டி²தா.

வினீதவத்து²வண்ணனா

225-6. து³க்கர ஆகா³ர ஆவடகாம அபி⁴ரதிவத்தூ²ஸு ‘‘யதி³ உல்லபனாதி⁴ப்பாயோ ப⁴வேய்ய, பாராஜிக’’ந்தி வத³ந்தி, காரணம் பன து³த்³த³ஸம், து²ல்லச்சயம் வுத்தம் விய, வீமம்ஸிதப்³ப³ம். யானேன வா இத்³தி⁴யா வா க³ச்ச²ந்தோபி பாராஜிகம் நாபஜ்ஜதீதி பத³ஸா க³மனவஸேனேவ கதிகாய கதாய யுஜ்ஜதி. ‘‘அபுப்³ப³ம்அசரிமம் க³ச்ச²ந்தோதி ஹத்த²பாஸம் அவிஜஹித்வா அஞ்ஞமஞ்ஞஸ்ஸ ஹத்த²ம் க³ண்ஹந்தோ விய க³ச்ச²ந்தோ’’தி வுத்தம். உட்டே²த² ஏத² க³ச்சா²மாதி ஏவம் ஸஹக³மனே புப்³பா³பரா க³ச்ச²ந்தோபி நாபஜ்ஜதீதி ஆசரியஸ்ஸ தக்கோ. வஸந்தஸ்ஸாதி ததா² வஸந்தோ சே உபாஸகேன தி³ஸ்ஸதி, பாராஜிகோ ஹோதி. ‘‘ரத்திம் வஸித்வா க³ச்ச²ந்தோ ந பாராஜிகோ’’தி வுத்தம். நானாவேரஜ்ஜகாதி நானாஜனபத³வாஸினோ. ஸங்க⁴லாபோ⁴தி யதா²வுட்³ட⁴ம் அத்தனோ பாபுணனகோட்டா²ஸோ.

228. இதா⁴தி ‘‘கோ நு கோ²’’திஆதி³னா வுத்தே பஞ்ஹாகம்மே. த⁴ம்மதா⁴து ஸப்³ப³ஞ்ஞுதஞ்ஞாணம்.

232. ந உப்படிபாடியாதி ந ஸீஹோக்கந்தவஸேன அனுஸ்ஸரி. தஸ்மா அந்தராப⁴வபூ⁴தா ஏகா ஏவ ஜாதீதி படிவிஜ்ஜ²தீதி அத்தோ².

நிக³மனவண்ணனா

233. சதுவீஸதீதி ஏத்த² மாதுகா⁴தகபிதுகா⁴தகஅரஹந்தகா⁴தகா ததியபாராஜிகம் ஆபன்னா. பி⁴க்கு²னிதூ³ஸகோ, லம்பி³ஆத³யோ ச சத்தாரோ பட²மபாராஜிகம் ஆபன்னா ஏவாதி கத்வா குதோ சதுவீஸதீதி சே? ந, அதி⁴ப்பாயாஜானனதோ. மாதுகா⁴தகாத³யோ ஹி சத்தாரோ இதா⁴னுபஸம்பன்னா ஏவ அதி⁴ப்பேதா, லம்பி³ஆத³யோ சத்தாரோ கிஞ்சாபி பட²மபாராஜிகேன ஸங்க³ஹிதா, யஸ்மா ஏகேன பரியாயேன மேது²னத⁴ம்மபடிஸேவினோ ந ஹோந்தி, தஸ்மா விஸும் வுத்தா. ‘‘ஏககம்மம் ஏகுத்³தே³ஸோ ஸமஸிக்க²தா’’தி ஏவம் வுத்தஸம்வாஸஸ்ஸ அப⁴ப்³ப³தாமத்தம் ஸந்தா⁴ய வுத்தம் ‘‘யதா² புரே ததா² பச்சா²’’தி. அஞ்ஞதா² நேஸம் ஸமஞ்ஞாயபடிஞ்ஞாயபி⁴க்கு²பா⁴வோபி நத்தீ²தி ஆபஜ்ஜதி.

சதுத்த²பாராஜிகவண்ணனா நிட்டி²தா.

பாராஜிககண்ட³வண்ணனா நிட்டி²தா.

2. ஸங்கா⁴தி³ஸேஸகண்டோ³

1. ஸுக்கவிஸ்ஸட்டி²ஸிக்கா²பத³வண்ணனா

235. ‘‘ஓக்கமந்தான’’ந்தி பாடோ². ஏத்தா²ஹ – ‘‘யோ பன பி⁴க்கூ²’’தி காரகோ இத⁴ கஸ்மா ந நித்³தி³ட்டோ²தி? அபி⁴-நித்³தே³ஸேன இமஸ்ஸ ஸாபேக்கா²பா⁴வத³ஸ்ஸனத்த²ம். கத²ம்? கண்டு³வனாதி³அதி⁴ப்பாயசேதனாவஸேன சேதேந்தஸ்ஸ கண்டு³வனாதி³உபக்கமேன உபக்கமந்தஸ்ஸ, மேது²னராக³வஸேன ஊருஆதீ³ஸு து³க்கடவத்தூ²ஸு, வணாதீ³ஸு து²ல்லச்சயவத்தூ²ஸு ச உபக்கமந்தஸ்ஸ ஸுக்கவிஸ்ஸட்டி²யா ஸதிபி ந ஸங்கா⁴தி³ஸேஸோ. மோசனஸ்ஸாத³ஸங்கா²தாதி⁴ப்பாயாபேக்கா²வ ஸுக்கவிஸ்ஸட்டி² ஸதி உபக்கமே, ந அஞ்ஞதா² ‘‘அனாபத்தி ந மோசனாதி⁴ப்பாயஸ்ஸா’’தி வசனதோ. தஸ்மா தத³த்த²த³ஸ்ஸனத்த²ம் இத⁴ காரகோ ந நித்³தி³ட்டோ², அஞ்ஞதா² ‘‘யோ பன பி⁴க்கு² ஸஞ்சேதனிகம் ஸுக்கவிஸ்ஸட்டி²ம் ஆபஜ்ஜேய்யா’’தி காரகே நித்³தி³ட்டே² ‘‘சேதேதி ந உபக்கமதி முச்சதி, அனாபத்தீ’’தி வுத்தவசனவிரோதோ⁴. ‘‘ஸஞ்சேதனிகாய ஸுக்கவிஸ்ஸட்டி²யா அஞ்ஞத்ர ஸுபினந்தா’’தி பு⁴ம்மே நித்³தி³ட்டே²பி ஸோவ விரோதோ⁴ ஆபஜ்ஜதி, தஸ்மா தது³ப⁴யவசனக்கமம் அவத்வா ‘‘ஸஞ்சேதனிகா ஸுக்கவிஸ்ஸட்டி² அஞ்ஞத்ர ஸுபினந்தா’’தி வுத்தம். தத்த² நிமித்தத்தே² பு⁴ம்மவசனாபா⁴வதோ ஹேதுத்த²னியமோ ந கதோ ஹோதி. தஸ்மிம் அகதே ஸஞ்சேதனிகா ஸுக்கவிஸ்ஸட்டி² அஞ்ஞத்ர ஸுபினந்தா ஸங்கா⁴தி³ஸேஸாபத்தி, உபக்கமே அஸதி அனாபத்தீதி அயமத்தோ² தீ³பிதோதி வேதி³தப்³ப³ம்.

236-7. ஸஞ்சேதனிகாதி ஏத்த² பட²மவிக்³க³ஹேன உபஸக்³க³ஸ்ஸ ஸாத்த²கதா த³ஸ்ஸிதா, து³தியேன இகபச்சயஸ்ஸ. வாதபித்தஸேம்ஹருஹிராதி³ஆஸயபே⁴த³தோதி அத்தோ². தா⁴தூதி ஏத்த² ‘‘பத²வீதா⁴துஆத³யோ சதஸ்ஸோ, சக்கு²தா⁴துஆத³யோ வா அட்டா²ரஸா’’தி க³ண்டி²பதே³ லிகி²தம். வத்தி²ஸீஸந்தி வத்தி²புடஸ்ஸ ஸீஸம். ‘‘அங்க³ஜாதஸ்ஸ மூலம் அதி⁴ப்பேதம், ந அக்³க³ஸீஸ’’ந்தி வத³ந்தி. ததே²வாதி ‘‘நிமித்தே உபக்கமதோ’’திஆதி³ம் க³ண்ஹாதி. ததோ முச்சித்வாதி ‘‘ந ஸகலகாயதோ, தஸ்மா பன டா²னா சுதமத்தே ஹோதூ’’தி க³ண்டி²பதே³ லிகி²தம். ‘‘த³கஸோதம் ஓதிண்ணமத்தே’’தி இமினா ந ஸமேதீதி சே? ததோ த³கஸோதோரோஹணஞ்சேத்தா²திஆதி³ வுச்சதி. தஸ்ஸத்தோ² – நிமித்தே உபக்கமம் கத்வா ஸுக்கம் டா²னா சாவேத்வா புன விப்படிஸாரவஸேன த³கஸோதோரோஹணம் நிவாரேதும் அதி⁴வாஸேமீதி. ததோ ப³ஹி நிக்க²மந்தே அதி⁴வாஸேதும் ந ஸக்கா, ததா²பி அதி⁴வாஸனாதி⁴ப்பாயேன அதி⁴வாஸேத்வா அந்தரா த³கஸோததோ உத்³த⁴ம் நிவாரேதும் அஸக்குணேய்யதாய ‘‘அனிக்க²ந்தே வா’’தி வுத்தம். கஸ்மா? டா²னா சுதஞ்ஹி அவஸ்ஸம் த³கஸோதம் ஓதரதீதி அட்ட²கதா²தி⁴ப்பாயோ க³ண்டி²பதா³தி⁴ப்பாயேன ஸமேதி. ததோ முச்சித்வாதி ஸகட்டா²னதோ. ஸகஸரீரதோ ஹி ப³ஹி நிக்க²ந்தமேவ ஹோதி, ததோ ‘‘ப³ஹி நிக்க²ந்தே வா அனிக்க²ந்தே வா’’தி வசனம் விருஜ்ஜே²ய்ய. யஸ்மா பன தம்ஹா தம்ஹா ஸரீரபதே³ஸா சுதம் அவஸ்ஸம் த³கஸோதம் ஓதரதி, தஸ்மா வுத்தம் ‘‘த³கஸோதம் ஓதிண்ணமத்தே’’தி, இமினா ச ஆபத்தியா பாகடகாலம் த³ஸ்ஸேதி, கிம் வுத்தம் ஹோதி? மோசனஸ்ஸாதே³ன நிமித்தே உபக்கமதோ ஸுக்கம் ப³ஹுதரம்பி ஸரீரபதே³ஸா சுதம் தத்த² தத்த² லக்³கா³வஸேஸம் யத்தகம் ஏகா கு²த்³த³கமக்கி²கா பிவேய்ய, தத்தகே த³கஸோதம் ஓதிண்ணமத்தே ஸங்கா⁴தி³ஸேஸாபத்தி. வுத்தஞ்ஹி கங்கா²விதரணியம் (கங்கா². அட்ட². ஸுக்கவிஸ்ஸட்டி²ஸிக்கா²பத³வண்ணனா) ‘‘த³கஸோதம் அனோதிண்ணேபி ஸங்கா⁴தி³ஸேஸோ’’திஆதி³. தத்தகஸ்ஸ ப³ஹி நிக்க²மனம் அஸல்லக்கே²ந்தோ ‘‘சேதேதி உபக்கமதி ந முச்சதி, ஆபத்தி து²ல்லச்சயஸ்ஸா’’தி வசனதோ து²ல்லச்சயந்தி ஸஞ்ஞாய தே³ஸேந்தோபி ந முச்சதி, பஸ்ஸாவம்பி வண்ணதம் பஸ்ஸித்வா வத்தி²கோஸக³தஸ்ஸ பிச்சி²லதாய வா ஞத்வா ஸங்கா⁴தி³ஸேஸதோ வுட்டா²தப்³ப³ம். அயமேத்த² ததியத்தே²ரவாதே³ யுத்தி. ஸப்³பா³சரியா இமே ஏவ தயோ தே²ரா, தேஸம்பி த³கஸோதோரோஹணம் நிமித்தே உபக்கமனந்தி அயம் து³தியோ வினிச்ச²யோ ஸாதா⁴ரணதோ ஏத்த², ஏவம் உபதிஸ்ஸத்தே²ரோ வத³தி கிர.

டா²னா சுதஞ்ஹி அவஸ்ஸம் த³கஸோதம் ஓதரதீதி கத்வா ‘‘டா²னா சாவனமத்தேனேவேத்த² ஆபத்தி வேதி³தப்³பா³’’தி வுத்தம். த³கஸோதம் ஓதிண்ணே ஏவ ஆபத்தி. ஸுக்கஸ்ஸ ஹி ஸகலம் ஸரீரம் டா²னம், அனோதிண்ணே டா²னா சுதம் நாம ந ஹோதீதி வீமம்ஸிதப்³ப³ம். ஆபி⁴த⁴ம்மிகத்தா தே²ரஸ்ஸ ‘‘ஸுக்கவிஸ்ஸட்டி² நாம ராக³ஸமுட்டா²னா ஹோதீ’’தி (கதா². அட்ட². 307) கதா²வத்து²ட்ட²கதா²யம் வுத்தத்தா ஸம்ப⁴வோ சித்தஸமுட்டா²னோ, ‘‘தம் அஸுசிம் ஏகதே³ஸம் முகே²ன அக்³க³ஹேஸி, ஏகதே³ஸம் அங்க³ஜாதே பக்கி²பீ’’தி (பாரா. 503) வசனதோ உதுஸமுட்டா²னோ ச தி³ஸ்ஸதி, ஸோ ச கோ² அவீதராக³ஸ்ஸேவ ‘‘அட்டா²னமேதம், பி⁴க்க²வே, அனவகாஸோ யம் அரஹதோ அஸுசி முச்சேய்யா’’தி (மஹாவ. 353; கதா². 313) வசனதோ. பரூபாஹாரட்ட²கதா²யம் ‘‘அத்தி² தஸ்ஸ ஆஸயோதி தஸ்ஸ ஸுக்கஸ்ஸ உச்சாரபஸ்ஸாவானம் விய பதிட்டா²னோகாஸோ அத்தீ²’’தி (கதா². அட்ட². 309) சனதோ தஸ்ஸ ஆஸயோதி ஸித்³த⁴ம். பாகதிகசித்தஸமுட்டா²னரூபம் விய அஸம்ஸட்ட²த்தா, நிக்க²மனதோ ச ‘‘வத்தி²ஸீஸம், கடி, காயோ’’தி திதா⁴ ஸுக்கஸ்ஸ டா²னம் பகப்பேந்தி ஆசரியா. ஸப்பவிஸம் விய தம் த³ட்ட²ப்³ப³ம், ந ச விஸஸ்ஸ டா²னனியமோ, கோத⁴வஸேன பு²ஸந்தஸ்ஸ ஹோதி, ஏவமஸ்ஸ ந ச டா²னனியமோ, ராக³வஸேன உபக்கமந்தஸ்ஸ ஹோதீதி தக்கோ.

கோ²ப⁴கரணபச்சயோ நாம பே⁴ஸஜ்ஜஸேனாஸனாஹாராதி³பச்சயோ. ஸம்ஸக்³க³பே⁴த³தோபீதி ஏதேஸு த்³வீஹிபி தீஹிபி. பஹீனவிபல்லாஸத்தாதி ஏத்த² யம் கிஞ்சி ஸுபினந்தேன ஸேக்க²புது²ஜ்ஜனா பஸ்ஸந்தி, தம் ஸப்³ப³ம் விபல்லத்த²ம் அபூ⁴தமேவாதி ஆபஜ்ஜதி. ததோ ‘‘யம் பன புப்³ப³னிமித்ததோ பஸ்ஸதி. தம் ஏகந்தஸச்சமேவ ஹோதீ’’தி இத³ம் விருஜ்ஜ²தி, தஸ்மா ந விஸயம் ஸந்தா⁴ய வுத்தம். ஸோ ஹி ஸச்சோ வா ஹோதி, அலிகோ வாதி கத்வா தஞ்சே ஸந்தா⁴ய வுத்தம் ஸியா, ‘‘அஸேக்கா² பஹீனவிபல்லாஸத்தா ஸச்சமேவ பஸ்ஸந்தி, நாஸச்ச’’ந்தி வத்தப்³ப³ம் ஸியா. கிந்து த³ஸ்ஸனம் ஸந்தா⁴ய வுத்தம். தஞ்ஹி அபூ⁴தம், அபஸ்ஸந்தோபி ஹி பஸ்ஸந்தோ விய அஸுணந்தோபி ஸுணந்தோ விய அமுனந்தோபி முனந்தோ விய ஹோதி. ஸச்சம்பி விபஸ்ஸதீதி நோ தக்கோதி ஆசரியோ. தம் ரூபனிமித்தாதி³ஆரம்மணம் ந ஹோதி, ஆக³ந்துகபச்சுப்பன்னம் ரூபனிமித்தாதி³ஆரம்மணம் ஸந்தா⁴ய வுத்தம். கம்மனிமித்தக³தினிமித்தபூ⁴தானி ஹி ரூபனிமித்தாதீ³னி ப⁴வங்க³ஸ்ஸ ஆரம்மணானி ஹோந்தி ஏவ. தத்த² கம்மனிமித்தமதீதமேவ, க³தினிமித்தம் தோ²கம் காலம் பச்சுப்பன்னம் ஸியா.

ஈதி³ஸானீதி பச்சக்க²தோ அனுபூ⁴தபுப்³ப³பரிகப்பிதாக³ந்துகபச்சுப்பன்னரூபனிமித்தாதி³ஆரம்மணானி, ராகா³தி³ஸம்பயுத்தானி சாதி அத்தோ². மக்கடஸ்ஸ நித்³தா³ லஹுபரிவத்தா ஹோதி. ஸோ ஹி ருக்க²ஸாக²தோ பதனப⁴யா அபி⁴க்க²ணம் உம்மீலதி ச ஸுபதி ச. மனுஸ்ஸா கிஞ்சாபி புனப்புனம் உம்மீலந்தி ஸுப்³யத்ததரம் படிபு³த்³தா⁴ விய பஸ்ஸந்தி, அத² கோ² படிபு³த்³தா⁴னம் புனப்புனம் ப⁴வங்கோ³தரணம் விய ஸுபினகாலேபி தேஸம் ப⁴வங்கோ³தரணம் ஹோதி, யேன ‘‘ஸுபதீ’’தி வுச்சதி. ‘‘ப⁴வங்க³சித்தேன ஹி ஸுபதீ’’தி வசனதோ ப⁴வங்கோ³தரணம் கரஜகாயஸ்ஸ நிருஸ்ஸாஹஸந்தபா⁴வூபனிஸ்ஸயத்தா ‘‘நித்³தா³’’தி வுச்சதி. ஸா கரஜகாயஸ்ஸ து³ப்³ப³லபா⁴வேன ஸுபினத³ஸ்ஸனகாலே ப⁴வங்க³தோ உத்தரணே ஸதிபி நிருஸ்ஸாஹஸந்தபா⁴வப்பத்தியா ‘‘பவத்ததீ’’தி ச வுச்சதி, யதோ ஸத்தா ‘‘படிபு³த்³தா⁴’’தி ந வுச்சந்தி, கரஜகாயஸ்ஸ நிருஸ்ஸாஹஸந்தஸபா⁴வப்பத்திதோ ச தன்னிஸ்ஸிதம் ஹத³யவத்து² ந ஸுப்பஸன்னம் ஹோதி, ததோ தன்னிஸ்ஸிதாபி சித்தப்பவத்தி அஸுப்பஸன்னவட்டினிஸ்ஸிததீ³பப்பபா⁴ விய. தேனேவ அட்ட²கதா²யம் ‘‘ஸ்வாயம் து³ப்³ப³லவத்து²கத்தா சேதனாய படிஸந்தி⁴ம் ஆகட்³டி⁴தும் அஸமத்தோ²’’திஆதி³ வுத்தம்.

க³ண்டி²பதே³ பன ‘‘து³ப்³ப³லவத்து²கத்தாதி ஸுபினே உபட்டி²தம் நிமித்தம்பி து³ப்³ப³ல’’ந்தி லிகி²தம். தம் அனேகத்த²ம் ஸப்³ப³ம்பி நிமித்தம் ஹோதி, ந ச து³ப்³ப³லாரம்மணவத்து²கத்தா சேதனா, தாய சித்தப்பவத்தி து³ப்³ப³லா அதீதானாக³தாரம்மணாய, பஞ்ஞத்தாரம்மணாய வா அது³ப்³ப³லத்தா, அவத்து²காய து³ப்³ப³லபா⁴வோ ந யுஜ்ஜதி சேதனாய அவத்து²காய பா⁴வனாபபா⁴வாயாதிரேகப³லஸப்³பா⁴வதோ. பா⁴வனாப³லஸமப்பிதஞ்ஹி சித்தம் அரூபம்பி ஸமானம் அதிபா⁴ரியம்பி கரஜகாயம் க³ஹேத்வா ஏகசித்தக்க²ணேனேவ ப்³ரஹ்மலோகம் பாபேத்வா ட²பேதி. தப்படிபா⁴க³ம் அனப்பிதம்பி காமாவசரசித்தம் கரஜகாயம் ஆகாஸே லங்க⁴னஸமத்த²ம் கரோதி, பகே³வேதரம். கிம் பனேத்த² தம் அனுமானகாரணம், யேன சித்தஸ்ஸேவ ஆனுபா⁴வோதி பஞ்ஞாயேய்ய சித்தானுபா⁴வேன வா லத்³தா⁴ஸேவனாதி³கிரியாவிஸேஸனிப்³ப³த்தித³ஸ்ஸனதோ, தஸ்மா து³ப்³ப³லவத்து²கத்தாதி து³ப்³ப³லஹத³யவத்து²கத்தாதி ஆசரியஸ்ஸ தக்கோ. அத்தனோ மந்த³திக்கா²காரேன தன்னிஸ்ஸிதஸ்ஸ சித்தஸ்ஸ மந்த³திக்க²பா⁴வனிப்பா²த³னஸமத்த²ஞ்சே, ஹத³யவத்து² சக்கு²ஸோதாதி³வத்து² விய இந்த்³ரியம் ப⁴வேய்ய, ந சேதம் இந்த்³ரியம். யதோ த⁴ம்மஸங்க³ஹே உபாதா³யரூபபாளியம் உத்³தே³ஸாரஹம் ந ஜாதம். அனிந்த்³ரியத்தா ஹி தம் காயிந்த்³ரியஸ்ஸ அனந்தரம் ந உத்³தி³ட்ட²ம், வத்து²ரூபத்தா ச அவத்து²ரூபஸ்ஸ ஜீவிதிந்த்³ரியஸ்ஸ அனந்தரம்பி ந உத்³தி³ட்ட²ம், தஸ்மா யம் வுத்தம் ‘‘தஸ்ஸ அஸுப்பஸன்னத்தா தன்னிஸ்ஸிதா ச சித்தப்பவத்தி அஸுப்பஸன்னா ஹோதீ’’தி, தம் ந ஸித்³த⁴ந்தி சே? ஸித்³த⁴மேவ அனிந்த்³ரியானம்பி ஸப்பாயாஸப்பாயஉதுஆஹாராதீ³னம் பச்சயானம் ஸமாயோக³தோ, சித்தப்பவத்தியா விகாரத³ஸ்ஸனதோ, பச்சக்க²த்தா ச. யஸ்மா அப்படிபு³த்³தோ⁴பி படிபு³த்³த⁴ம் விய அத்தானம் மஞ்ஞதீதி. ஏத்தாவதா கரஜகாயஸ்ஸ நிருஸ்ஸாஹஸந்தபா⁴வாகாரவிஸேஸோ நித்³தா³ நாம. ஸா சித்தஸ்ஸ ப⁴வங்கோ³தரணாகாரவிஸேஸேன ஹோதி, தாய ஸமன்னாக³தோ ஸத்தோ ப⁴வங்க³தோ உத்திண்ணோ ஸுபினம் பஸ்ஸதி, ஸோ ‘‘கபிமித்³த⁴பரேதோ’’தி வுச்சதி, ஸோ ஸுத்தோ அப்படிபு³த்³தோ⁴ ஹோதீதி அயமத்தோ² ஸாதி⁴தோ ஹோதி.

யஸ்மா ப⁴வங்க³வாரனிரந்தரதாய அச்சந்தஸுத்தோ நாம ஹோதி, தஸ்மா ‘‘யதி³ தாவ ஸுத்தோ பஸ்ஸதி, அபி⁴த⁴ம்மவிரோதோ⁴ ஆபஜ்ஜதீ’’திஆதி³ வுத்தம். யஸ்மா பன நித்³தா³க்க²ணே ந படிபு³த்³தோ⁴ நாம ஹோதி, தஸ்மா ‘‘அத² படிபு³த்³தோ⁴ பஸ்ஸதி, வினயவிரோதோ⁴’’திஆதி³ வுத்தம், யஸ்மா ச அகீ²ணனித்³தோ³, அனோதிண்ணப⁴வங்கோ³ ச அத்தி², தஸ்மா ‘‘கபிமித்³த⁴பரேதோ பஸ்ஸதீ’’தி வுத்தம். அஞ்ஞதா² அயம் நேவ ஸுத்தோ ந படிபு³த்³தோ⁴, அத்தனா தம் நித்³த³ம் அனோக்கந்தோ ஆபஜ்ஜேய்ய. ஏத்தாவதா ச அபி⁴த⁴ம்மோ, வினயோ, நாக³ஸேனத்தே²ரவசனம் யுத்தி சாதி ஸப்³ப³ம் அஞ்ஞமஞ்ஞஸம்ஸந்தி³தம் ஹோதி. தத்த² கபிமித்³த⁴பரேதோதி ப⁴வங்க³தோ உத்திண்ணனித்³தா³பரேதோ. ஸா ஹி இத⁴ கபிமித்³த⁴ம் நாம. ‘‘தத்த² கதமம் மித்³த⁴ம்? யா காயஸ்ஸ அகல்யதா அகம்மஞ்ஞதா…பே… ஸுபனம், இத³ம் வுச்சதி மித்³த⁴’’ந்தி (த⁴. ஸ. 1163) ஏவமாக³தம். இத³ஞ்ஹி அரூபம், இமஸ்ஸ ப²லபூ⁴தோ கரஜகாயஸ்ஸ அகல்யதா’பசலாயிகாஸுபி நித்³தா³விஸேஸோ காரணோபசாரேன ‘‘கபிமித்³த⁴’’ந்தி பவுச்சதி. யஞ்சேவ ‘‘கபிமித்³த⁴பரேதோ கோ², மஹாராஜ, ஸுபினம் பஸ்ஸதீ’’தி (மி. ப. 5.3.5 தோ²கம் விஸதி³ஸம்) வுத்தந்தி.

யம் தம் ஆபத்திவுட்டா²னந்தி ஏத்த² யேன வினயகம்மேன ததோ வுட்டா²னம் ஹோதி, தம் இத⁴ ஆபத்திவுட்டா²னம் நாம. அவயவே ஸமூஹவோஹாரேன வாதி ஏத்த² ஸாக²ச்சே²த³கோ ருக்க²ச்சே²த³கோதி வுச்சதீதிஆதி³ நித³ஸ்ஸனம், வேத³னாக்க²ந்தா⁴தி³ ருள்ஹீஸத்³த³ஸ்ஸ நித³ஸ்ஸனம். ந ச மயாதி வீமம்ஸனபத³ஸ்ஸ தஸ்ஸ கிரியம் ஸந்தா⁴ய, மோசனே ச ஸன்னிட்டா²னம் ஸந்தா⁴ய முச்சனபகதியா சாதி வுத்தம்.

240. கே³ஹந்தி பஞ்சகாமகு³ணா. வனப⁴ங்கி³யந்தி பாப⁴திகம். ஸம்பயுத்தஸுக²வேத³னாமுகே²ன ராகோ³வ ‘‘அஸ்ஸாதோ³’’தி வுத்தோ. ஸுபந்தஸ்ஸ சாதி இத³ம் கபிமித்³த⁴பரேதோ விய ப⁴வங்க³ஸந்ததிம் அவிச்சி²ந்தி³த்வா ஸுபந்தம் ஸந்தா⁴ய வுத்தந்தி, வீமம்ஸிதப்³ப³ம். ஜக்³க³னத்தா²யாதி ஸோத⁴னத்தா²ய.

266. ‘‘தா³ருதீ⁴தலிகலேபசித்தானம் அங்க³ஜாதபடினிஜ்ஜா²னேபி து³க்கட’’ந்தி வத³ந்தி. ‘‘உப்பன்னே பரிளாஹே மோசனராக³ஜோ’’தி லிக²ந்தி. வாலிகாய வா ‘‘ஹத்தி²காமம் நஸ்ஸதீ’’தி ஏத்த² விய ‘‘ஆபத்தி த்வ’’ந்தி ஸப்³ப³த்த² பாடோ². ‘‘ஏஹி மே த்வம், ஆவுஸோ ஸாமணேர, அங்க³ஜாதம் க³ண்ஹாஹீ’’தி ஆக³தத்தா ‘‘வசீகம்ம’’ந்திபி வத்தும் யுத்தம் விய தி³ஸ்ஸதி. ஏவம் ஸந்தே அஞ்ஞம் ‘‘ஏவம் கரோஹீ’’தி ஆணத்தியாபி ஆபத்தி ஸியாதி ஸங்கரம் ஹோதி. தஸ்மா ந வுத்தந்தி க³ஹேதப்³ப³ந்தி கேசி.

267. ‘‘புப்பா²வலியம் ஸாஸவளிய’’ந்தி து³விதோ⁴ கிர.

ஸுக்கவிஸ்ஸட்டி²ஸிக்கா²பத³வண்ணனா நிட்டி²தா.

2. காயஸம்ஸக்³க³ஸிக்கா²பத³வண்ணனா

270. ‘‘ஓதிண்ணோ’’தி இமினாஸ்ஸ ஸேவனாதி⁴ப்பாயதா த³ஸ்ஸிதா. ‘‘விபரிணதேன சித்தேன மாதுகா³மேன ஸத்³தி⁴’’ந்தி இமினாஸ்ஸ வாயாமோ த³ஸ்ஸிதோ. ‘‘ஸத்³தி⁴’’ந்தி ஹி பத³ம் ஸம்யோக³ம் தீ³பேதி, ஸோ ச பயோகோ³ ஸமாக³மோ அல்லீயனம். கேன சித்தேன? விபரிணதேன சித்தேன, ந பத்தபடிக்³க³ஹணாதி⁴ப்பாயாதி³னாதி அதி⁴ப்பாயோ. ‘‘காயஸம்ஸக்³க³ம் ஸமாபஜ்ஜேய்யா’’தி இமினாஸ்ஸ வாயமதோ ப²ஸ்ஸபடிவிஜானனா த³ஸ்ஸிதா ஹோதி. வாயமித்வா ப²ஸ்ஸம் படிவிஜானந்தோ ஹி ஸமாபஜ்ஜதி நாம. ஏவமஸ்ஸ திவங்க³ஸம்பத்தி த³ஸ்ஸிதா ஹோதி. அத² வா ஓதிண்ணோ. கேன? விபரிணதேன சித்தேன யக்கா²தி³னா ஸத்தோ விய. உபயோக³த்தே² வா ஏதம் கரணவசனம். ஓதிண்ணோ விபரிணதம் சித்தம் கூபாதி³ம் விய ஸத்தோ. அத² வா ‘‘ராக³தோ உத்திண்ணோ ப⁴விஸ்ஸாமீ’’தி பி⁴க்கு²பா⁴வம் உபக³தோ, ததோ உத்திண்ணாதி⁴ப்பாயதோ விபரிணதேன சித்தேன ஹேதுபூ⁴தேன தமேவ ராக³ம் ஓதிண்ணோ. மாதுகா³மேன அத்தனோ ஸமீபம் ஆக³தேன, அத்தனா உபக³தேன வா. ஏதேன மாதுகா³மஸ்ஸ ஸாரத்ததா வா ஹோது விரத்ததா வா, ஸா இத⁴ அப்பமாணா, ந பி⁴க்கு²னீனம் காயஸம்ஸக்³கே³ விய உபி⁴ன்னம் ஸாரத்ததாய பயோஜனம் அத்தி².

காயஸம்ஸக்³க³ந்தி உபி⁴ன்னம் காயானம் ஸம்பயோக³ம். பத³பா⁴ஜனே பன ‘‘ஸமாபஜ்ஜேய்யாதி அஜ்ஜா²சாரோ வுச்சதீ’’தி வுத்தம், தம் ஸமாபஜ்ஜனம் ஸந்தா⁴ய, ந காயஸம்ஸக்³க³ம். காயஸம்ஸக்³க³ஸ்ஸ ஸமாபஜ்ஜனா ஹி ‘‘அஜ்ஜா²சாரோ’’தி வுச்சதி. அட்ட²கதா²யம் பன ‘‘யோ ஸோ காயஸம்ஸக்³கோ³ நாம, ஸோ அத்த²தோ அஜ்ஜா²சாரோ ஹோதீ’’தி வுத்தம், தம் பரதோ பாளியம் ‘‘ஸேவனாதி⁴ப்பாயோ, ந ச காயேன வாயமதி, ப²ஸ்ஸம் படிவிஜானாதி, அனாபத்தீ’’தி (பாரா. 279) வுத்தலக்க²ணேன விருஜ்ஜ²தீதி. ப²ஸ்ஸபடிவிஜானனாய ஹி ஸம்ஸக்³கோ³ தீ³பிதோ. ஸோ சே அஜ்ஜா²சாரோ ஹோதி, கத²ம் அனாபத்தி ஹோதீதி. ஸுவுத்தமேதம், கிந்து ‘‘காயஸம்ஸக்³க³ம் ஸமாபஜ்ஜேய்யா’’தி பத³ம் உத்³த⁴ரித்வா ‘‘அஜ்ஜா²சாரோ வுச்சதீ’’தி உபி⁴ன்னம்பி பதா³னம் ஸாமஞ்ஞபா⁴ஜனீயத்தா, ஸமாபஜ்ஜிதப்³பா³பா⁴வே ஸமாபஜ்ஜனாபா⁴வேன ‘‘ஸோ அத்த²தோ அஜ்ஜா²சாரோ ஹோதீ’’தி வுத்தம் ஸியா.

‘‘ஹத்த²க்³கா³ஹம் வா’’தி ஏத்த² ஹத்தே²ன ஸப்³போ³பி உபாதி³ன்னகோ காயோ ஸங்க³ஹிதோ, ந பி⁴ன்னஸந்தானோ தப்படிப³த்³தோ⁴ ஹத்தா²லங்காராதி³. வேணிக்³க³ஹணேன அனுபாதி³ன்னகோ அபி⁴ன்னஸந்தானோ கேஸலோமனக²த³ந்தாதி³கோ கம்மபச்சயஉதுஸமுட்டா²னோ க³ஹிதோதி வேதி³தப்³ப³ம். தேனேவாஹ அட்ட²கதா²யம் ‘‘அனுபாதி³ன்னகேனபி கேனசி கேஸாதி³னா உபாதி³ன்னகம் வா அனுபாதி³ன்னகம் வா பு²ஸந்தோபி ஸங்கா⁴தி³ஸேஸம் ஆபஜ்ஜதியேவா’’தி (பாரா. அட்ட². 2.274). தேன அனுபாதி³ன்னகானம்பி கேஸலோமாதீ³னம் அங்க³பா⁴வோ வேதி³தப்³போ³. ஏவம் ஸந்தேபி ‘‘ப²ஸ்ஸம் படிஜானாதீதி திவங்க³ஸம்பத்தியா ஸங்கா⁴தி³ஸேஸோ. ப²ஸ்ஸஸ்ஸ அப்படிவிஜானனதோ து³வங்க³ஸம்பத்தியா து³க்கட’’ந்தி இமினா பாளிஅட்ட²கதா²னயேன விருஜ்ஜ²தீதி சே? ந, தத³த்த²ஜானனதோ. பு²ட்ட²பா⁴வஞ்ஹி படிவிஜானந்தோபி ப²ஸ்ஸம் படிவிஜானாதி நாம, அயமேகோ அத்தோ², தஸ்மா மாதுகா³மஸ்ஸ, அத்தனோ ச காயபரியாபன்னானம் கேஸாதீ³னம் அஞ்ஞமஞ்ஞம் பு²ட்ட²பா⁴வம் பு²ஸித்வா தம் ஸாதி³யனம் ப²ஸ்ஸம் படிவிஜானாதி நாம, ந காயவிஞ்ஞாணுப்பத்தியா ஏவ. அனேகந்திகஞ்ஹேத்த² காயவிஞ்ஞாணம். மாதுகா³மஸ்ஸ உபாதி³ன்னகேன காயேன, அனுபாதி³ன்னகேன வா காயேன பி⁴க்கு²னோ உபாதி³ன்னககாயே பு²ட்டே² பஸன்னகாயிந்த்³ரியோ சே ஹோதி, தஸ்ஸ காயவிஞ்ஞாணம் உப்பஜ்ஜதி, தேனேவ ப²ஸ்ஸம் படிவிஜானாதி நாம ஸோ ஹோதி. அனுபாதி³ன்னககாயோ, லோலுப்போ அப்பஸன்னகாயிந்த்³ரியோ வா ஹோதி, திமிரவாதேன உபஹதகாயோ வா தஸ்ஸ காயவிஞ்ஞாணம் நுப்பஜ்ஜதி. ந ச தேன ப²ஸ்ஸம் படிவிஜானாதி நாம, கேவலம் ஸேவனாதி⁴ப்பாயேன வாயமித்வா காயஸம்ஸக்³க³ம் ஸமாபஜ்ஜந்தோ ப²ஸ்ஸம் படிவிஜானாதி நாம மனோவிஞ்ஞாணேன, தேன வுத்தம் ‘‘காயஸம்ஸக்³க³ம் ஸமாபஜ்ஜேய்யாதி இமினாஸ்ஸ வாயமதோ ப²ஸ்ஸபடிவிஜானனா த³ஸ்ஸிதா’’தி. அபரோபி பி⁴க்கு² மாதுகா³மஸ்ஸ காயபடிப³த்³தே⁴ன வா நிஸ்ஸக்³கி³யேன வா பு²ட்டோ² காயவிஞ்ஞாணம் உப்பாதே³ந்தேன ப²ஸ்ஸம் படிவிஜானாதி நாம, தஸ்மா வுத்தம் ‘‘அனேகந்திகஞ்ஹேத்த² காயவிஞ்ஞாண’’ந்தி. அபரோ வத்த²ம் பாருபித்வா நித்³தா³யந்தம் மாதுகா³மம் காயஸம்ஸக்³க³ராகே³ன வத்த²ஸ்ஸ உபரிபா⁴கே³ ஸணிகம் பு²ஸந்தோ வத்த²ந்தரேன நிக்க²ந்தலோமஸம்ப²ஸ்ஸம் அப்படிவிஜானந்தோபி ஸேவனாதி⁴ப்பாயோ காயேன வாயமித்வா ப²ஸ்ஸம் படிவிஜானாதி நாம, ஸங்கா⁴தி³ஸேஸம் ஆபஜ்ஜதி. ‘‘நீலம் க⁴ட்டேஸ்ஸாமீதி காயம் க⁴ட்டேதி, ஸங்கா⁴தி³ஸேஸோ’’தி ஹி வுத்தம். அயம் து³தியோ அத்தோ². ஏவம் அனேகத்த²த்தா, ஏவம் து³விஞ்ஞேய்யாதி⁴ப்பாயதோ ச மாதிகாட்ட²கதா²யம் ப²ஸ்ஸபடிவிஜானனம் அங்க³ந்த்வேவ ந வுத்தம். தஸ்மிஞ்ஹி வுத்தே டா²னமேதம் விஜ்ஜதி, யம் பி⁴க்கு² ஸங்கா⁴தி³ஸேஸம் ஆபஜ்ஜித்வாபி நகே²ன லோமேன ஸம்ஸக்³கோ³ தி³ட்டோ², ந ச மே லோமக⁴ட்டனேன காயவிஞ்ஞாணம் உப்பன்னம், திமிரவாதத²த்³த⁴க³த்தோ சாஹம் ந ப²ஸ்ஸம் படிவிஜானாமீதி அனாபன்னஸஞ்ஞீ ஸியாதி ந வுத்தம், அபிச ‘‘ப²ஸ்ஸம் படிவிஜானாதி, ந ச ப²ஸ்ஸம் படிவிஜானாதீ’’தி ச ஏதேஸம் பதா³னம் அட்ட²கதா²யம் வுத்தனயம் த³ஸ்ஸேத்வா ஸோ பஞ்ஞாபேதப்³போ³. ஏத்தாவதா ந தத³த்த²ஜானனதோதி காரணம் வித்தா²ரிதம் ஹோதி.

பத³பா⁴ஜனீயவண்ணனா

271. ‘‘ரத்தம் சித்தம் இமஸ்மிம் அத்தே² அதி⁴ப்பேதம் விபரிணத’’ந்தி கிஞ்சாபி ஸாமஞ்ஞேன வுத்தம், வினீதவத்தூ²ஸு ‘‘மாதுயா மாதுபேமேன ஆமஸதி…பே… ஆபத்தி து³க்கடஸ்ஸா’’தி வுத்தத்தா காயஸம்ஸக்³க³ராகே³னேவ ரத்தந்தி வேதி³தப்³ப³ம். ததா² ‘‘மாதுகா³மோ நாம மனுஸ்ஸித்தீ²’’தி கிஞ்சாபி அவிஸேஸேன வுத்தம், அத² கோ² அவினட்டி²ந்த்³ரியாவ மனுஸ்ஸித்தீ² இதா⁴தி⁴ப்பேதா ‘‘மதித்தி²யா காயஸம்ஸக்³க³ம் ஸமாபஜ்ஜி…பே… ஆபத்தி து²ல்லச்சயஸ்ஸா’’தி வுத்தத்தா. ‘‘மனுஸ்ஸித்தீ²’’தி ஏத்தாவதா ஸித்³தே⁴ ‘‘ந யக்கீ² ந பேதீ ந திரச்சா²னக³தா’’தி வசனம் அவினட்டி²ந்த்³ரியாபி ந ஸப்³பா³ மனுஸ்ஸவிக்³க³ஹா இத்தீ² இத⁴ மனுஸ்ஸித்தீ² நாம. யக்கி²ஆத³யோ ஹி அத்தனோ ஜாதிஸித்³தே⁴ன இத்³தி⁴விஸேஸேன இஜ்ஜ²ந்தியோ மனுஸ்ஸவிக்³க³ஹாபி ஹோந்தீதி த³ஸ்ஸனத்த²ம் வுத்தம். தாஸு யக்கீ² து²ல்லச்சயவத்து² ஹோதி வினீதவத்தூ²ஸு யக்கி²யா காயஸம்ஸக்³கே³ன து²ல்லச்சயஸ்ஸ வுத்தத்தா. தத³னுலோமத்தா பேதித்தீ², தே³வித்தீ² ச து²ல்லச்சயவத்து². திரச்சா²னக³தித்தீ² து³க்கடவத்து². திரச்சா²னக³தமனுஸ்ஸவிக்³க³ஹித்தீ² ச து²ல்லச்சயவத்து²மேவாதி ஏகே. விப⁴ங்கே³ பன ‘‘மனுஸ்ஸித்தீ² ச ஹோதி மனுஸ்ஸித்தி²ஸஞ்ஞீ’’தி பாளியா அபா⁴வேன ‘‘இத்தீ² ச ஹோதி யக்கி²ஸஞ்ஞீ’’திஆதி³வசனே ஸதி யக்கி²ஆதீ³னம் அனித்தி²தாபஸங்க³தோ, ‘‘இத்தீ² ச ஹோதி இத்தி²ஸஞ்ஞீ’’திஆதி³ம்ஹி யக்கி²ஆதீ³னம் அந்தோகரணே ஸதி தாஸம் ஸங்கா⁴தி³ஸேஸவத்து²பா⁴வப்பஸங்க³தோ ச யக்கி²ஆத³யோ ந வுத்தாதி வேதி³தப்³பா³. ஏகே பன ‘‘வினீதவத்து²ம்ஹி ‘அஞ்ஞதரோ பி⁴க்கு² திரச்சா²னக³தித்தி²யா காய…பே… து³க்கடஸ்ஸா’தி ஏத்த² அமனுஸ்ஸவிக்³க³ஹா பாகதிகதிரச்சா²னக³தித்தீ² அதி⁴ப்பேதா, தஸ்மா து³க்கடம் வுத்தம். ‘இத்தீ² ச ஹோதி திரச்சா²னக³தஸஞ்ஞீதி திரச்சா²னக³தா ச ஹோதி இத்தி²ஸஞ்ஞீ’திஆதி³வாரேஸுபி பாகதிகதிரச்சா²னக³தோவ அதி⁴ப்பேதோ, ஸோ ச திரச்சா²னக³தபுரிஸோவ. தேனேவ து³ட்டு²ல்லவாசாஅத்தகஆமபாரிசரியஸிக்கா²பதே³ஸு மனுஸ்ஸபுரிஸபடிஸம்யுத்தவாரா விய திரச்சா²னபடிஸம்யுத்தவாராபி நாக³தா’’தி வத³ந்தி. ததா² பண்ட³கோதி இத⁴ மனுஸ்ஸபண்ட³கோவ, புரிஸோதி ச இத⁴ மனுஸ்ஸபுரிஸோவ ஆக³தோ, தஸ்மா அமனுஸ்ஸித்தீ² அமனுஸ்ஸபண்ட³கோ அமனுஸ்ஸபுரிஸோ திரச்சா²னக³தித்தீ² திரச்சா²னக³தபண்ட³கோ மனுஸ்ஸாமனுஸ்ஸதிரச்சா²னக³தஉப⁴தோப்³யஞ்ஜனகா சாதி அட்ட² ஜனா இத⁴ நாக³தா, தேஸம் வஸேன வத்து²ஸஞ்ஞாவிமதிபே⁴த³வஸேன ஆபத்திபே⁴தா³பே⁴த³வினிச்ச²யோ, அனாக³தவாரக³ணனா ச அஸம்முய்ஹந்தேன வேதி³தப்³பா³, ததா² தேஸம் து³கமிஸ்ஸகாதி³வாரா, ஆபத்திஅனாபத்திபே⁴த³வினிச்ச²யோ ச. ‘‘தத்த² அமனுஸ்ஸபண்ட³கஅமனுஸ்ஸபுரிஸதிரச்சா²னக³தித்தி²திரச்சா²னக³தபண்ட³காதி சத்தாரோ து³க்கடவத்து²கா, அமனுஸ்ஸித்தி²மனுஸ்ஸஉப⁴தோப்³யஞ்ஜனகா து²ல்லச்சயவத்து²கா, அமனுஸ்ஸஉப⁴தோப்³யஞ்ஜனகா திரச்சா²னக³தஉப⁴தோப்³யஞ்ஜனகா து³க்கடவத்து²கா, பாளியம் பன அமனுஸ்ஸித்தி²யா அனாக³தத்தா அமனுஸ்ஸபண்ட³கா, உப⁴தோப்³யஞ்ஜனகா புரிஸா ச நாக³தா. திரச்சா²னக³தித்தி²பண்ட³கஉப⁴தோப்³யஞ்ஜனகா திரச்சா²னக³தபுரிஸேன ஸமானக³திகத்தா நாக³தா, மனுஸ்ஸஉப⁴தோப்³யஞ்ஜனகோ மனுஸ்ஸபண்ட³கேன ஸமானக³திகத்தா அனாக³தோ’’தி வத³ந்தி. அட்ட²கதா²யம் (பாரா. அட்ட². 2.281) பன ‘‘நாக³மாணவிகாயபி ஸுபண்ணமாணவிகாயபி கின்னரியாபி கா³வியாபி து³க்கடமேவா’’தி வுத்தத்தா ததே³வ பமாணதோ க³ஹேதப்³ப³ம்.

தத்ராயம் விசாரணா – ‘‘ந, பி⁴க்க²வே, திரச்சா²னக³தஸ்ஸ நிஸின்னபரிஸாய பாதிமோக்க²ம் உத்³தி³ஸிதப்³ப³’’ந்தி (மஹாவ. 183) ஏத்த² ‘‘திரச்சா²னக³தோதி யஸ்ஸ உபஸம்பதா³ படிக்கி²த்தா’’தி (கங்கா². அட்ட². நிதா³னவண்ணனா) அட்ட²கதா²யம் வுத்தத்தா திரச்சா²னக³தமனுஸ்ஸவிக்³க³ஹோ பாகதிகதிரச்சா²னக³ததோ விஸிட்டோ², ததா² யக்க²பேததிரச்சா²னக³தமனுஸ்ஸவிக்³க³ஹானம் ‘‘திரச்சா²னக³தஸ்ஸ ச து³க்கு²ப்பத்தியம் அபிச து³க்கடமேவா’’தி ஏத்த² விஸேஸேத்வா வுத்தத்தா ச ‘‘பதனரூபம் பமாணம், ந மரணரூப’’ந்தி ஏத்த² ஆபத்திவிஸேஸவசனதோ ச ‘‘உப⁴தோ அவஸ்ஸுதே யக்க²ஸ்ஸ வா பேதஸ்ஸ வா பண்ட³கஸ்ஸ வா திரச்சா²னக³தமனுஸ்ஸவிக்³க³ஹஸ்ஸ வா அத⁴க்க²கம் உப்³ப⁴ஜாணுமண்ட³லம் காயேன காயம் ஆமஸதி, ஆபத்தி து²ல்லச்சயஸ்ஸா’’தி (பாசி. 661) ஸாமஞ்ஞேன வசனதோ ச ஸோ விஸிட்டோ²தி ஸித்³த⁴ம். விஸிட்ட²த்தா ச திரச்சா²னக³தமனுஸ்ஸவிக்³க³ஹித்தி²யா காயஸம்ஸக்³க³ம் ஸமாபஜ்ஜந்தஸ்ஸாதி விஸேஸோ ஹோதி, தஸ்மா தத்த² ஆபத்திவிஸேஸேன ப⁴விதப்³ப³ம். யதி³ காயஸம்ஸக்³க³ஸிக்கா²பதே³ திரச்சா²னக³தமனுஸ்ஸவிக்³க³ஹித்தீ²பி அதி⁴ப்பேதா, ரூபஸாமஞ்ஞேன ஸஞ்ஞாவிராக³த்தாஸம்ப⁴வதோ து³ட்டு²ல்லவாசாஅத்தகாமபாரிசரியஸிக்கா²பதே³ஸுபி ஸா வத்தப்³பா³ ப⁴வேய்ய, ஸா சானாக³தா. ஸரூபேன ஸம்கி²த்தவாரத்தா நாக³தாதி சே? இத்தீ² ச ஹோதி திரச்சா²னக³தோ ச உபி⁴ன்னம் இத்தி²ஸஞ்ஞீதி இத⁴ ஆக³தத்தா புரிஸலிங்க³னித்³தே³ஸோ ந யுஜ்ஜதி, தஸ்மா திரச்சா²னக³தபுரிஸோ ச இத⁴ ஆக³தோ, திரச்சா²னக³தமனுஸ்ஸவிக்³க³ஹித்தி²யா பாளியம் அனாக³தாயபி து³க்கடமேவ அட்ட²கதா²யம் வுத்தத்தாதி இமஸ்ஸ வசனஸ்ஸ காரணச்சா²யா பரியேஸிதப்³பா³தி அதி⁴ப்பாயோ. இத³ம் ந யுஜ்ஜதி. கஸ்மா? இத்தீ²னம், புரிஸானஞ்ச ஏகதோ வசனே புரிஸலிங்க³ஸப்³பா⁴வதோ. இத⁴ திரச்சா²னக³தபுரிஸபண்ட³கித்தி²யோ திஸ்ஸோபி ஏகதோ ஸம்பிண்டே³த்வா ‘‘திரச்சா²னக³தோ’’தி வுத்தம்.

தத்த² ச மனுஸ்ஸவிக்³க³ஹாமனுஸ்ஸவிக்³க³ஹேஸு இத்தி²பண்ட³கபுரிஸஸஞ்ஞிதா யதா²ஸம்ப⁴வம் வேதி³தப்³பா³. து³ட்டு²ல்லவாசாதி³ஸிக்கா²பத³த்³வயே வாரானம் ஸம்கி²த்தத்தா புரிஸதிரச்சா²னக³தாத³யோ நாக³தா. யதா²வுத்தேஸு ஆபத்தி, ததா² தத்தா²பி. அஞ்ஞதா² புரிஸம் ஓபா⁴ஸந்தஸ்ஸ ச அனாபத்தீதி பண்ட³கம் ஓபா⁴ஸந்தஸ்ஸ ச து²ல்லச்சயந்தி மாதிகாட்ட²கதா²யம் வுத்தம். தஸ்மா தே வாரா ஸம்கி²த்தாதி பஞ்ஞாயந்தீதி. விஸேஸோ ச பண்ட³கே, புரிஸே, திரச்சா²னக³தே ச இத்தி²ஸஞ்ஞிஸ்ஸ அத்தி², ததா²பி தத்த² து³க்கடம் வுத்தம், தஸ்மா அட்ட²கதா²யம் வுத்தமேவ பமாணந்தி த்³வின்னமேதேஸம் வாதா³னம் யத்த² யுத்தி வா காரணம் வா அதிரேகம் தி³ஸ்ஸதி, தம் விசாரேத்வா க³ஹேதப்³ப³ந்தி ஆரிசயோ. ஏவரூபேஸு டா²னேஸு ஸுட்டு² விசாரேத்வா கதே²தப்³ப³ம்.

தத்த² பாளியம் ஆக³தவாரக³ணனா தாவ ஏவம் ஸங்கே²பதோ வேதி³தப்³பா³ – இத்தி²மூலகா பஞ்ச வாரா பண்ட³கபுரிஸதிரச்சா²னக³தமூலகா ச பஞ்ச பஞ்சாதி வீஸதி வாரா ஏகமூலகா, ததா² து³மூலகா வீஸதி, மிஸ்ஸகமூலகா வீஸதீதி ஸட்டி² வாரா, தானி தீணி வீஸதிகானி ஹோந்தி. ஏகேகஸ்மிம் வீஸதிகே ஏகேகமூலவாரம் க³ஹேத்வா காயேன காயபடிப³த்³த⁴வாரா தயோ வுத்தா. ஸேஸா ஸத்தபஞ்ஞாஸ வாரா ஸம்கி²த்தா, ததா² காயபடிப³த்³தே⁴ன காயவாரா தயோ வுத்தா, ஸேஸா ஸம்கி²த்தா, ஏவம் காயபடிப³த்³தே⁴ன காயபடிப³த்³த⁴வாரேபி நிஸ்ஸக்³கி³யேன காயவாரேபி நிஸ்ஸக்³கி³யேன காயபடிப³த்³த⁴வாரேபி நிஸ்ஸக்³கி³யேன நிஸ்ஸக்³கி³யவாரேபி தயோ தயோ வாரா வுத்தா, ஸேஸா ஸம்கி²த்தா. ஏவம் ச²ன்னம் திகானம் வஸேன அட்டா²ரஸ வாரா ஆக³தாதி ஸரூபதோ வுத்தா, ஸேஸா த்³வேசத்தாலீஸாதி⁴கானி தீணி வாரஸதானி ஸம்கி²த்தானி. ததோ பரம் மாதுகா³மஸ்ஸ ஸாரத்தபக்கே² காயேன காயந்தி ஏகமேகம் வட்³டே⁴த்வா புப்³பே³ வுத்தா அட்டா²ரஸ வாரா ஆக³தாதி ஏகவீஸதி வாரா ஸரூபேன ஆக³தா, நவனவுதாதி⁴கானி தீணி வாரஸதானி ஸம்கி²த்தானி. ததோ பரம் ஆபத்தானாபத்திதீ³பகா சத்தாரோ ஸேவனாதி⁴ப்பாயமூலகா சத்தாரோ மோக்கா²தி⁴ப்பாயமூலகாதி த்³வே சதுக்கா ஆக³தா.

தத்தா²யம் விஸேஸோ – யதி³த³ம் மாதிகாய பராமஸனபத³ம், தேன யஸ்மா ஆமஸனாதீ³னி சு²பனபரியோஸானானி த்³வாத³ஸபி பதா³னி க³ஹிதானி, தஸ்மா பது³த்³தா⁴ரம் அகத்வா ‘‘ஆமஸனா பராமஸனம் சு²பன’’ந்தி ஆஹ. பராமஸனம் நாம ஆமஸனா. ‘‘சு²பன’’ந்தி ஹி வுத்தே பராமஸனம்பி விஸும் ஏகத்தம் ப⁴வேய்யாதி வேதி³தப்³ப³ம். இத்தீ² ச ஹோதி இத்தி²ஸஞ்ஞீ சாதி இமஸ்மிம் பட²மவாரே ஏவ த்³வாத³ஸபி ஆமஸனாதீ³னி யோஜேத்வா த³ஸ்ஸிதானி. ததோ பரம் ஆதி³ம்ஹி த்³வே பதா³னீதி சத்தாரி பதா³னி ஆக³தானி, இதரானி ஸம்கி²த்தானீதி வேதி³தப்³பா³னி. நிஸ்ஸக்³கி³யேன காயவாராதீ³ஸு பன ஸப்³பா³காரேன அலாப⁴தோ ஆமஸனமேவேகம் ஆக³தம், நேதரானி. ‘‘ஸஞ்சோபேதி ஹரதீ’’தி பாடோ², ஸஞ்சோபேதி ச. க³ண்டி²பதே³ஸு பன ‘‘புரிமனயேனேவாதி ரஜ்ஜுவத்தா²தீ³ஹி பரிக்கி²பனே’’தி ச பச்சா² ‘‘புரிமனயேனேவாதி ஸம்மஸனா ஹோதீ’’தி ச ‘‘வேணிக்³கா³ஹே ஆபத்தியா பஞ்ஞத்தத்தா லோமபு²ஸனேபி ஸங்கா⁴தி³ஸேஸோ’’தி ச ‘‘தம் பகாஸேதும் உபாதி³ன்னகேன ஹீதிஆதி³ வுத்த’’ந்தி ச லிகி²தம்.

யதா²னித்³தி³ட்ட²னித்³தே³ஸேதி இமஸ்மிம்யேவ யதா²னித்³தி³ட்டே² நித்³தே³ஸே. ‘‘ஸதி³ஸம் அக்³க³ஹேஸீ’’தி வுத்தே தாதி³ஸம் அக்³க³ஹேஸீதி க³ருகம் தத்த² காரயேதி அத்தோ², காயஸம்ஸக்³க³விப⁴ங்கே³ வாதி அத்தோ². இதரோபி காயபடிப³த்³த⁴சு²பனகோ. க³ஹணே சாதி க³ஹணம் வா. விராகி³தேதி விரத்³தே⁴. ஸாரத்தந்தி காயஸம்ஸக்³க³ராகே³ன ரத்தம், அத்தனா அதி⁴ப்பேதந்தி அத்தோ². ‘‘மாதுப⁴கி³னிஆதி³விரத்தம் க³ண்ஹிஸ்ஸாமீ’’தி விரத்தம் ஞாதிபேமவஸேன க³ண்ஹி, ஏத்த² து³க்கடம் யுத்தம். ‘‘காயஸம்ஸக்³க³ராக³ம் வா ஸாரத்தம் க³ண்ஹிஸ்ஸாமீ’’தி விரத்தம் மாதரம் க³ண்ஹி, அனதி⁴ப்பேதம் க³ண்ஹி. ஏத்த² மஹாஸுமத்தே²ரவாதே³ன து²ல்லச்சயம் ‘‘காயம் க³ண்ஹிஸ்ஸாமீ’’தி காயப்படிப³த்³த⁴ம் க³ண்ஹாதி, து²ல்லச்சயந்தி லத்³தி⁴கத்தா. ‘‘இத்தீ² ச ஹோதி இத்தி²ஸஞ்ஞீ ஸாரத்தோ ச, பி⁴க்கு² ச நம் இத்தி²யா காயேன காயம் ஆமஸதி, ஆபத்தி ஸங்கா⁴தி³ஸேஸஸ்ஸா’’தி (பாரா. 273) வசனதோ ஸங்கா⁴தி³ஸேஸோபி கா²யதி. ‘‘விரத்தம் க³ண்ஹிஸ்ஸாமீ’’தி ஸாரத்தம் க³ண்ஹாதி, ஏத்த²பி ஸங்கா⁴தி³ஸேஸோவ கா²யதி ‘‘நீலம் க⁴ட்டேஸ்ஸாமீ’தி காயம் க⁴ட்டேதி, ஸங்கா⁴தி³ஸேஸோ’’தி வசனதோ. ஏத்த² பன ‘‘ந புப்³ப³பா⁴கே³ காயஸம்ஸக்³க³ராக³த்தா’’தி அனுக³ண்டி²பதே³ காரணம் வுத்தம். கேசி பன ‘‘க³ருகாபத்திப⁴யேன ‘நீலமேவ க⁴ட்டேஸ்ஸாமீ’தி வாயாமந்தோ காயம் க⁴ட்டேதி, புப்³ப³பா⁴கே³ தஸ்ஸ ‘காயபடிப³த்³த⁴ம் க⁴ட்டேஸ்ஸாமீ’தி பவத்தத்தா து³க்கடேன ப⁴விதப்³ப³’’ந்தி வத³ந்தி. த⁴ம்மஸிரித்தே²ரோ ‘‘ஏவரூபே ஸங்கா⁴தி³ஸேஸோ’’தி வத³தி கிர. ‘‘இத்தி²உப⁴தோப்³யஞ்ஜனகஇத்தி²யா புரிஸஉப⁴தோப்³யஞ்ஜனகபுரிஸே வுத்தனயேன ஆபத்திபே⁴தோ³, இத்தி²லிங்க³ஸ்ஸ படிச்ச²ன்னகாலேபி இத்தி²வஸேனேவ ஆபத்தீ’’தி வத³ந்தி.

வினீதவத்து²வண்ணனா

281. திணண்டு³பகந்தி ஹிரிவேராதி³மூலானி க³ஹேத்வா கத்தப்³ப³ம். தாலபண்ணமுத்³தி³கந்தி தாலபண்ணமயம் அங்கு³லிமுத்³தி³கம், தேன தாலபண்ணமயம் கடம், கடிஸுத்தகம், கண்ணபிளந்த⁴னாதி³ ஸப்³ப³ம் ந வட்டதீதி ஸித்³த⁴ம். தம்ப³பண்ணிவாஸினோ இத்தி²ரூபம் லிகி²தம், கடிகபடஞ்ச ந சு²பந்தி கிர. ஆகரதோ முத்தமத்தோ. ரதனமிஸ்ஸோதி அலங்காரத்த²ம் கதோ கஞ்சனலதாதி³வினத்³தோ⁴. ஸுவண்ணேன ஸத்³தி⁴ம் யோஜேத்வா பசித்வாதி ஸுவண்ணரஸம் பக்கி²பித்வா பசித்வா. பீ³ஜதோ தா⁴துபாஸாணதோ பட்டா²ய. தே²ரோ ந கப்பதீதி ‘‘தும்ஹாகம் பேஸித’’ந்தி வுத்தத்தா. ‘‘சேதியஸ்ஸ பூஜம் கரோதா²’’தி வுத்தே வட்டதி கிர. பு³ப்³பு³ளகம் தாரகம். ஆரகூடலோஹம்பி ஜாதரூபக³திகமேவ.

வுத்தஞ்ஹேதம் அந்த⁴கட்ட²கதா²யம் –

‘‘ஆரகூடலோஹம் ஸுவண்ணஸதி³ஸமேவ, ஸுவண்ணம் அனுலோமேதி, அனாமாஸ’’ந்தி.

‘‘பே⁴ஸஜ்ஜத்தா²ய பன வட்டதீ’’தி வசனதோ மஹாஅட்ட²கதா²யம் வுத்தனயேகதே³ஸோபி அனுஞ்ஞாதோ ஹோதீதி தத்த² தத்த² அதி⁴ப்பாயம் ஞத்வா விபா⁴வேதப்³ப³ம்.

காயஸம்ஸக்³க³ஸிக்கா²பத³வண்ணனா நிட்டி²தா.

3. து³ட்டு²ல்லவாசாஸிக்கா²பத³வண்ணனா

283. ததியே தயோ ஸங்கா⁴தி³ஸேஸவாரா தயோ து²ல்லச்சயவாரா தயோ து³க்கடவாரா தயோ காயபடிப³த்³த⁴வாராதி த்³வாத³ஸ வாரா ஸரூபேன ஆக³தா. தத்த² தயோ ஸங்கா⁴தி³ஸேஸவாரா து³தியஸிக்கா²பதே³ வுத்தாதி திண்ணம் வீஸதிகானம் ஏகேகமூலா வாராதி வேதி³தப்³பா³, தஸ்மா இத⁴ விஸேஸாதி பண்ணாஸ வாரா ஸம்கி²த்தா ஹோந்தி, அஞ்ஞதா² இத்தீ² ச ஹோதி வேமதிகோ ஸாரத்தோ ச, பி⁴க்கு² ச நம் இத்தி²யா வச்சமக்³க³ம் பஸ்ஸாவமக்³க³ம் ஆதி³ஸ்ஸ வண்ணம்பி ப⁴ணதி…பே… ஆபத்தி து²ல்லச்சயஸ்ஸ. இத்தீ² ச ஹோதி பண்ட³கபுரிஸஸஞ்ஞீ திரச்சா²னக³தஸஞ்ஞீ ஸாரத்தோ ச, பி⁴க்கு² ச நம் இத்தி²யா வச்சமக்³க³ம் பஸ்ஸாவமக்³க³ம் ஆதி³ஸ்ஸ வண்ணம்பி ப⁴ணதி அக்கோஸதிபி, ஆபத்தி து²ல்லச்சயஸ்ஸ. பண்ட³கோ ச ஹோதி பண்ட³கஸஞ்ஞீ ஸாரத்தோ ச, பி⁴க்கு² ச நம் பண்ட³கஸ்ஸ வச்சமக்³க³ம் ஆதி³ஸ்ஸ வண்ணம்பி ப⁴ணதி, ஆபத்தி து²ல்லச்சயஸ்ஸாதி ஏவமாதீ³னம் ஆபத்திட்டா²னானம் அனாபத்திட்டா²னதா ஆபஜ்ஜேய்ய, ந சாபஜ்ஜதி, பண்ட³கே இத்தி²ஸஞ்ஞிஸ்ஸ து³க்கடந்தி தீ³பேதும் ‘‘இத்தீ² ச பண்ட³கோ ச உபி⁴ன்னம் இத்தி²ஸஞ்ஞீ ஆபத்தி ஸங்கா⁴தி³ஸேஸேன து³க்கடஸ்ஸா’’தி வுத்தத்தா ‘‘பண்ட³கே பண்ட³கஸஞ்ஞிஸ்ஸ து²ல்லச்சய’’ந்தி வுத்தமேவ ஹோதி, தஸ்மா ஸப்³ப³த்த² ஸம்கி²த்தவாரேஸு து²ல்லச்சயட்டா²னே து²ல்லச்சயம், து³க்கடட்டா²னே து³க்கடம்பி வுத்தமேவ ஹோதீதி வேதி³தப்³ப³ம். ததா² ‘‘இத்தீ² ச ஹோதி வேமதிகோ ஸாரத்தோ ச, பி⁴க்கு² ச நம் இத்தி²யா வச்சமக்³க³ம் பஸ்ஸாவமக்³க³ம் ட²பேத்வா அத⁴க்க²கம் உப்³ப⁴ஜாணுமண்ட³லம் ஆதி³ஸ்ஸ வண்ணம்பி ப⁴ணதி…பே… து²ல்லச்சயஸ்ஸா’’திஆதி³னா நயேன து²ல்லச்சயகே²த்தேபி யதா²ஸம்ப⁴வம் உத்³த⁴ரிதப்³பா³. ததா² ‘‘இத்தீ² ச ஹோதி வேமதிகோ ஸாரத்தோ ச, பி⁴க்கு² ச நம் இத்தி²யா காயபடிப³த்³த⁴ம் ஆதி³ஸ்ஸ வண்ணம்பி ப⁴ணதி…பே… து³க்கடஸ்ஸா’’திஆதி³னா நயேன காயபடிப³த்³த⁴வாராபி யதா²ஸம்ப⁴வம் உத்³த⁴ரிதப்³பா³. காயப்படிப³த்³த⁴வாரத்திகம் விய நிஸ்ஸக்³கி³யவாரத்திகம் லப்³ப⁴மானம்பி ஆபத்திவிஸேஸாபா⁴வதோ ந உத்³த⁴டம். காயப்படிப³த்³த⁴வாரத்திகே பன தி³ன்னனயத்தா தம்பி தத³னுலோமா வாரா ச உத்³த⁴ரிதப்³பா³. ஸப்³ப³த்த² ந-விஞ்ஞூ தருணதா³ரிகா, மஹல்லிகா உம்மத்திகாதி³கா ச அனதி⁴ப்பேதா, பகே³வ பாகதிகா திரச்சா²னக³தித்தீ²னம், ததா² பண்ட³காத³யோபீதி வேதி³தப்³பா³. ஸேஸம் து³தியே வுத்தனயேனேவ வேதி³தப்³ப³ம்.

பத³பா⁴ஜனீயவண்ணனா

285. வுத்தனயமேவாதி ‘‘காயஸம்ஸக்³கே³ இத்தி²லக்க²ணேனா’’தி லிகி²தம். ‘‘இத்தி²லக்க²ணேனா’’தி கிர மஹாஅட்ட²கதா²பாடோ². ஸீஸம் ந ஏதீதி அக்கோஸனம் ந ஹோதி, க⁴டிதே பன ஹோதி. தத்ராயம் விஸேஸோ – இமேஹி தீஹி க⁴டிதே ஏவ ஸங்கா⁴தி³ஸேஸோ வச்சமக்³க³பஸ்ஸாவமக்³கா³னம் நியதவசனத்தா, அச்சோளாரிகத்தா வா, ந அஞ்ஞேஹி அனிமித்தாஸீதிஆதீ³ஹி அட்ட²ஹி. தத்த² அலோஹிதாஸி, து⁴வலோஹிதாஸி, து⁴வசோளாஸி, பக்³க⁴ரணீஸி, இத்தி²பண்ட³காஸி, வேபுரிஸிகாஸீதி ஏதானி ச² மக்³கா³னம் அனியதவசனானி, அனிமித்தாஸி, நிமித்தமத்தாஸீதி த்³வே பதா³னி அனச்சோளாரிகானி ச, யதோ அட்ட²பதா³னி ‘‘ஸங்கா⁴தி³ஸேஸம் ந ஜனேந்தீ’’தி வுத்தானி, தஸ்மா தானி து²ல்லச்சயவத்தூ²னி. பரிப்³பா³ஜகவத்து²ம்ஹி விய அக்கோஸமத்தத்தா து³க்கடவத்தூ²னீதி ஏகே. இத்தி²பண்ட³காஸி, வேபுரிஸிகாஸீதி ஏதானேவ பதா³னி ஸகலஸரீரஸண்டா²னபே⁴த³தீ³பகானி ஸுத்³தா⁴னி ஸங்கா⁴தி³ஸேஸம் ந ஜனேந்தி ஸகலஸரீரஸாமஞ்ஞத்தா, இதரானி ஜனேந்தி அஸாமஞ்ஞத்தா. தானி ஹி பஸ்ஸாவமக்³க³மேவ தீ³பேந்தி ஸிக²ரணீ-பத³ம் விய. உப⁴தோப்³யஞ்ஜனாஸீதி வசனம் பன புரிஸனிமித்தேன அஸங்கா⁴தி³ஸேஸவத்து²னா மிஸ்ஸவசனம். புரிஸஉப⁴தோப்³யஞ்ஜனகஸ்ஸ ச இத்தி²னிமித்தம் படிச்ச²ன்னம், புரிஸனிமித்தம் பாகடம் ஹோதி. யதி³ தம்பி ஜனேதி, கத²ம் அனிமித்தாஸீதிஆதி³பதா³னி ந ஸங்கா⁴தி³ஸேஸம் ஜனேந்தீதி ஏகே, தம் ந யுத்தம். புரிஸஸ்ஸபி நிமித்தாதி⁴வசனதோ, ‘‘மேது²னுபஸம்ஹிதாஹி ஸங்கா⁴தி³ஸேஸோ’’தி மாதிகாய லக்க²ணஸ்ஸ வுத்தத்தா ச மேது²னுபஸம்ஹிதாஹிபி ஓபா⁴ஸனே படிவிஜானந்தியா ஸங்கா⁴தி³ஸேஸோ, அப்படிவிஜானந்தியா து²ல்லச்சயம், இதரேஹி ஓபா⁴ஸனே படிவிஜானந்தியா து²ல்லச்சயம், அப்படிவிஜானந்தியா து³க்கடந்தி ஏகே, ஸப்³ப³ம் ஸுட்டு² விசாரேத்வா க³ஹேதப்³ப³ம்.

287. ஹஸந்தோதி யம் உத்³தி³ஸ்ஸ ப⁴ணதி, ஸா சே படிவிஜானாதி, ஸங்கா⁴தி³ஸேஸோ.

வினீதவத்து²வண்ணனா

289. ‘‘படிவுத்தம் நாமா’’தி பாடோ². நோ-ஸத்³தோ³ அதி⁴கோ. ‘‘அக்க²ரலிக²னேனபி ஹோதீ’’தி வத³ந்தி, தம் ஆவஜ்ஜனஸமனந்தரவிதி⁴னா ஸமேதி சே, க³ஹேதப்³ப³ம்.

து³ட்டு²ல்லவாசாஸிக்கா²பத³வண்ணனா நிட்டி²தா.

4. அத்தகாமபாரிசரியஸிக்கா²பத³வண்ணனா

290. சதுத்தே² தயோ ஸங்கா⁴தி³ஸேஸவாரா ஆக³தா, ஸேஸா ஸத்தபஞ்ஞாஸ வாரா து²ல்லச்சயது³க்கடாபத்திகாய ஸம்கி²த்தாதி வேதி³தப்³பா³, ததோ அஞ்ஞதரோ அஸம்ப⁴வதோ இத⁴ ந உத்³த⁴டோ. ஸேஸயோஜனக்கமோ வுத்தனயேன வேதி³தப்³போ³. நக³ரபரிக்கா²ரேஹீதி பாகாரபரிகா²தீ³ஹி நக³ரபரிவாரேஹி. ஸேதபரிக்கா²ரோதி ஸேதாலங்காரோ, ஸீலாலங்காரோதி அத்தோ² (ஸம். நி. அட்ட². 3.5.4). சக்கவீரியோதி வீரியசக்கோ. வஸலம் து³க்³க³ந்த⁴ந்தி நிமித்தம் ஸந்தா⁴யாஹ, ததே³வ ஸந்தா⁴ய ‘‘கிம் மே பாபகம், கிம் மே து³க்³க³ந்த⁴’’ந்தி வுத்தம்.

291. ஸந்திகேதி யத்த² டி²தோ விஞ்ஞாபேதி. ‘‘பட²மவிக்³க³ஹே ஸசே பாளிவஸேன யோஜேதீதி காமஹேதுபாரிசரியாஅத்தோ². ஸேஸந்தி ‘அதி⁴ப்பாயோ’தி பத³ம் ப்³யஞ்ஜனம் அத்தா²பா⁴வதோ. து³தியே பாளிவஸேன காமஹேது-பதா³னி ப்³யஞ்ஜனானி தேஸம் தத்த² அத்தா²பா⁴வதோ. ஏவம் சத்தாரி பதா³னி த்³வின்னம் விக்³க³ஹானம் வஸேன யோஜிதானீதி அபரே வத³ந்தீ’’தி வுத்தம்.

295. ஏதேஸு ஸிக்கா²பதே³ஸு மேது²னராகே³ன வீதிக்கமே ஸதி ஸங்கா⁴தி³ஸேஸேன அனாபத்தி. தஸ்மா ‘‘கிம் ப⁴ந்தே அக்³க³தா³னந்தி. மேது²னத⁴ம்ம’’ந்தி இத³ம் கேவலம் மேது²னத⁴ம்மஸ்ஸ வண்ணப⁴ணனத்த²ம் வுத்தம், ந மேது²னத⁴ம்மாதி⁴ப்பாயேன தத³த்தி²யா வுத்தந்தி வேதி³தப்³ப³ம், பரஸ்ஸ பி⁴க்கு²னோ காமபாரிசரியாய வண்ணப⁴ணனே து³க்கடம். ‘‘யோ தே விஹாரே வஸதி, தஸ்ஸ அக்³க³தா³னம் தே³ஹீ’’தி பரியாயவசனேனபி து³க்கடம். ‘‘அத்தகாமபாரிசரியாய வண்ணம் பா⁴ஸேய்ய. யா மாதி³ஸம் ஸீலவந்த’’ந்தி ச வுத்தத்தாதி ஏகே. பஞ்சஸு அங்கே³ஸு ஸப்³பா⁴வா ஸங்கா⁴தி³ஸேஸோவாதி ஏகே. விசாரேத்வா க³ஹேதப்³ப³ம். க³ண்டி²பதே³ பன ‘‘இமஸ்மிம் ஸிக்கா²பத³த்³வயே காயஸம்ஸக்³கே³ விய யக்கி²பேதீஸு து³ட்டு²ல்லத்தகாமவசனே து²ல்லச்சய’ந்தி வத³ந்தி. அட்ட²கதா²ஸு பன நாக³த’’ந்தி லிகி²தம். ‘‘உப⁴தோப்³யஞ்ஜனகோ பன பண்ட³கக³திகோவா’’தி வத³ந்தி.

அத்தகாமபாரிசரியஸிக்கா²பத³வண்ணனா நிட்டி²தா.

5. ஸஞ்சரித்தஸிக்கா²பத³வண்ணனா

297. அஹம்ஹி து³க்³க³தாதி அஹம் அம்ஹி து³க்³க³தா. அஹம் க்²வய்யோதி ஏத்த² அய்யோதி ப³ஹுவசனம் ஹோதி.

298. ஓயாசந்தீதி நீசம் கத்வா தே³வே யாசந்தி. ஆயாசந்தீதி உச்சம் கத்வா ஆத³ரேன யாசந்தி. அலங்காராதீ³ஹி மண்டி³தோ கேஸஸம்விதா⁴னாதீ³ஹி பஸாதி⁴தோ. ‘‘மண்டி³தகரணே து³க்கட’’ந்தி வத³ந்தி.

பத³பா⁴ஜனீயவண்ணனா

303. ஸஹ பரித³ண்டே³ன வத்தமானாதி அத்தோ². ச²ந்த³வாஸினீ நாம ‘‘பியா பியம் வஸேதீ’’தி பாளி, புரிஸம் வாஸேதீதி அதி⁴ப்பாயோ. ‘‘பியோ பியம் வாஸேதீ’’தி அட்ட²கதா².

தம் கிரியம் ஸம்பாதே³ஸ்ஸதீதி அவஸ்ஸம் ஆரோசேந்தியா சே ஆரோசேதீதி அத்தோ². த்³வின்னம் மாதாபிதூனம் சே ஆரோசேதி, ஸங்கா⁴தி³ஸேஸோதி வினயவினிச்ச²யே ‘‘வத்து² ஓலோகேதப்³ப³’’ந்தி வுத்தம். வத்து²ம்ஹி ச ‘‘உதா³யித்தே²ரோ க³ணிகாய ஆரோசேஸீ’’தி வுத்தம். தம் ‘‘மாதாதீ³னம்பி வத³தோ விஸங்கேதோ நத்தீ²’’தி அட்ட²கதா²வசனதோ நிப்பயோஜனம். தம் பனேதந்தி ஆசரியஸ்ஸ வசனம். மாதுரக்கி²தம் ப்³ரூஹீதி பேஸிதஸ்ஸ க³ந்த்வா மாதாபிதுரக்கி²தம் வத³தோ தஸ்ஸ தஸ்ஸா மாதுரக்கி²தபா⁴வேபி ஸதி விஸங்கேதமேவ, கஸ்மா? ‘‘பிதுரக்கி²தாதீ³ஸு அஞ்ஞதரம் வத³ந்தஸ்ஸ விஸங்கேத’’ந்தி வுத்தத்தா இதரதா² ஆதி³-ஸத்³தோ³ நிரத்த²கோ ஸியா. ஏகம் த³ஸகம் இதரேன த³ஸகேன யோஜேத்வா புப்³பே³ ஸுக்கவிஸ்ஸட்டி²யம் வுத்தனயத்தா மாதுரக்கி²தாய மாதா அத்தனோ தீ⁴துஸந்திகம் பஹிணதீதி க³ஹேதப்³ப³ம்.

338. அனபி⁴னந்தி³த்வாதி வசனமத்தமேவ, யதி³பி அபி⁴னந்த³தி, யாவ ஸாஸனம் நாரோசேதி, தாவ ‘‘வீமம்ஸிதோ’’தி ந வுச்சதி. ஸாஸனாரோசனகாலேதி ஆணாபகஸ்ஸ ஸாஸனவசனக்க²ணே. ததியபதே³ வுத்தனயேனாதி ஏகங்க³ஸம்பத்தியா து³க்கடந்தி அத்தோ². வத்து²க³ணனாய ஸங்கா⁴தி³ஸேஸோதி உப⁴யவத்து²க³ணனாய கிர.

339. சதுத்தே² அனாபத்தீதி ஏத்த² பன ‘‘படிக்³க³ண்ஹாதி ந வீமம்ஸதி ந பச்சாஹரதி, அனாபத்தீதி ஏத்த² விய ‘க³ச்ச²ந்தோ ந ஸம்பாதே³தி, ஆக³ச்ச²ந்தோ விஸம்வாதே³தீ’தி அனாபத்திபாளியாபி ப⁴விதப்³ப³ந்தி த³ஸ்ஸனத்த²ம் வுத்த’’ந்தி வத³ந்தி, ஏகச்சேஸு போத்த²கேஸு ‘‘அத்தீ²’’திபி.

வினீதவத்து²வண்ணனா

341. அலம்வசனீயாதி ந வசனீயா, நிவாரணே அலம்-ஸத்³தோ³. தே²ரபிதா வத³தீதி ஜிண்ணபிதா வத³தீதி அத்தோ². கிஞ்சாபி ஏத்த² ‘‘இத்தீ² நாம மனுஸ்ஸித்தீ² ந யக்கீ² ந பேதீ ந திரச்சா²னக³தா, புரிஸோ நாம மனுஸ்ஸபுரிஸோ ந யக்கோ²’’திஆதி³ நத்தி², ததா²பி காயஸம்ஸக்³கா³தீ³ஸு ‘‘மனுஸ்ஸித்தீ²’’தி இத்தீ²வவத்தா²னஸ்ஸ கதத்தா இதா⁴பி மனுஸ்ஸித்தீ² ஏவாதி பஞ்ஞாயதி. மேது²னபுப்³ப³பா⁴க³த்தா மனுஸ்ஸஉப⁴தோப்³யஞ்ஜனகோ ச து²ல்லச்சயவத்து²கோவ ஹோதி, ஸேஸா மனுஸ்ஸபண்ட³கஉப⁴தோப்³யஞ்ஜனகதிரச்சா²னக³தபுரிஸாத³யோ து³க்கடவத்து²காவ மிச்சா²சாரஸாஸனங்க³ஸம்ப⁴வதோதி வேதி³தப்³ப³ம். யதா²ஸம்ப⁴வம் பன வாரா உத்³த⁴ரிதப்³பா³. பஞ்ஞத்திஅஜானனே விய அலம்வசனீயபா⁴வாஜானனேபி அசித்தகதா வேதி³தப்³பா³. து³ட்டு²ல்லாதீ³ஸுபீதி ‘‘இமஸ்மிம்பீ’’தி வுத்தமேவ ஹோதி. ‘‘லேக²ம் நேத்வா படிலேக²ம் ஆரோசிதஸ்ஸாபி ஸஞ்சரித்தம் நத்தி² ஸஞ்சரித்தபா⁴வமஜானந்தஸ்ஸா’’தி வத³ந்தி, வீமம்ஸித்வா க³ஹேதப்³ப³ம்.

ஸஞ்சரித்தஸிக்கா²பத³வண்ணனா நிட்டி²தா.

6. குடிகாரஸிக்கா²பத³வண்ணனா

342. யாசனாதி ‘‘தே³த² தே³தா²’’தி சோத³னா. விஞ்ஞத்தீதி இமினா நோ அத்தோ²தி விஞ்ஞாபனா. ‘‘ஹத்த²கம்மம் யாசிதோ உபகரணம், மூலம் வா த³ஸ்ஸதீ’’தி யாசதி, ந வட்டதீதி. வட்டதி ஸேனாஸனே ஓபா⁴ஸபரிகதா²தீ³னம் லத்³த⁴த்தாதி ஏகே. அனஜ்ஜா²வுத்த²கந்தி அஸ்ஸாமிகம். ந ஆஹடம் பரிபு⁴ஞ்ஜிதப்³ப³ந்தி ‘‘ஸூபோத³னவிஞ்ஞத்திது³க்கடம் ஹோதீ’’தி வுத்தம். ‘‘கிஞ்சாபி க³ருப⁴ண்ட³ப்பஹோனகேஸூதி வுத்தம், ததா²பி யம் வத்து²வஸேன அப்பம் ஹுத்வா அக்³க⁴வஸேன மஹா ஹரிதாலஹிங்கு³லிகாதி³, தம் யாசிதும் ந வட்டதீ’’தி வத³ந்தி.

344. ஸோ கிராதி இஸி. ததா³ அஜ்ஜ²க³மா தத³ஜ்ஜ²க³மா.

348-9. ந ஹி ஸக்கா யாசனாய காதும், தஸ்மா ஸயம் யாசிதகேஹி உபகரணேஹீதி அதி⁴ப்பாயோ. ப்³யஞ்ஜனம் ஸமேதி, ந அத்தோ². கஸ்மா? இத⁴ உப⁴யேஸம் அதி⁴ப்பேதத்தா, தம் த³ஸ்ஸேந்தோ ‘‘யஸ்மா பனா’’திஆதி³மாஹ. இத⁴ வுத்தனயேனாதி இமஸ்மிம் ஸிக்கா²பத³விப⁴ங்கே³ வுத்தனயேன. ‘‘ஸஞ்ஞாசிகாயா’’தி வசனதோ கரோந்தேனாபி, ‘‘பரேஹி பரியோஸாபேதீ’’தி வசனதோ காராபேந்தேனாபி படிபஜ்ஜிதப்³ப³ம். உபோ⁴பேதே காரககாராபகா. ப்³யஞ்ஜனம் விலோமிதம் ப⁴வேய்ய, ‘‘காரயமானேனா’’தி ஹி ப்³யஞ்ஜனம் ‘‘கரோந்தேனா’’தி வுத்தே விலோமிதம் ஹோதி அதத³த்த²த்தா. ந ஹி காராபேந்தோ நாம ஹோதி. ‘‘இத⁴ வுத்தனயேனாதி தே³ஸிதவத்து²கபமாணிகனயேன. ஏவம் ஸந்தே ‘கரோந்தேன வா காராபேந்தேன வா’தி வசனதோ கரோந்தேனாபி பரேஹி விப்பகதம் வத்தப்³ப³ந்தி சே, தத³த்த²விஸ்ஸஜ்ஜனத்த²ம் ‘யதி³ பனாதிஆதி³மாஹா’’’தி அனுக³ண்டி²பதே³ வுத்தம். ‘‘ஸஞ்ஞாசிகாய குடிம் கரோந்தோ’’தி வசனவஸேன வுத்தம். ‘‘ஆயாமதோ ச வித்தா²ரதோ சா’’தி அவத்வா விகப்பத்த²ஸ்ஸ வா-ஸத்³த³ஸ்ஸ க³ஹிதத்தா ஏகதோபா⁴கே³பி வட்³டி⁴தே ஆபத்தி ஏவ. பமாணயுத்தமஞ்சோ கிர நவவித³த்தி². ‘‘‘சதுஹத்த²வித்தா²ரா’தி வசனேன ‘திரியம் திஹத்தா² வா’தி வசனம்பி ஸமேதி ‘யத்த² பமாணயுத்தோ’திஆதி³ஸன்னிட்டா²னவசனாஸம்ப⁴வதோ’’தி வுத்தம். பமாணதோ ஊனதரம்பீதி வித்தா²ரதோ சதுபஞ்சஹத்த²ம்பி தீ³க⁴தோ அனதிக்கமித்வா வுத்தபமாணமேவ தே³ஸிதவத்து². அதே³ஸிதவத்து²ஞ்ஹி கரோதோ ஆபத்தி. பமாணாதிக்கந்தா குடி ஏவ பமாணாதிக்கந்தம் குடிம் கரேய்யாதி வுத்தத்தா. ‘‘த²ம்ப⁴துலா’’தி பாடோ². அனுஸ்ஸாவனானயேனாதி ஏத்த² ‘‘த³மிளபா⁴ஸாயபி வட்டதீ’’தி வத³ந்தி.

353. சாரபூ⁴மி கோ³சரபூ⁴மி. ந க³ஹிதாதி ந வாரிதா. அட்ட²கதா²யம் ‘‘காரணாய கு³த்திப³ந்த⁴னாகா³ரம், அகரணட்டா²னம் வா த⁴ம்மக³ந்தி⁴கா ஹத்த²பாத³ச்சி²ந்த³னகா க³ந்தி⁴கா’’தி லிகி²தம். த்³வீஹி ப³லிப³த்³தே³ஹீதி ஹேட்டி²மகோடியா கிர வுத்ததோ ஆவிஜ்ஜிதும் ந ஸக்கா சி²ன்னாவடத்தா, நிக³மனஸ்ஸாபி அத்த²ப்பகாஸனத்த²ம் வுத்தந்தி வேதி³தப்³ப³ம். பாசினந்தி வத்து² அதி⁴ட்டா²னம். தத³த்தா²யாதி தச்ச²னத்தா²ய. பண்ணஸாலம்பீதி உல்லித்தாவலித்தகுடிமேவ பண்ணச்ச²த³னம். தேனேவ ‘‘ஸபி⁴த்திச்ச²த³ன’’ந்தி வுத்தம், அலித்தம் கிர ஸப்³ப³ம் வட்டதி. புப்³பே³ தோ²கம் ட²பிதம் புன வட்³டே⁴த்வா. தஸ்மிந்தி த்³வாரப³ந்த⁴னே வா வாதபானே வா ட²பிதே. பட²மமேவாதி ஏத்த² பத்தகாலே ஏவாதி கிர த⁴ம்மஸிரித்தே²ரோ. உபதிஸ்ஸத்தே²ரோ ட²பிதகாலேவாதி கிர. புரிமேன லேபஸ்ஸ அக⁴டிதத்தா து³தியேன வத்தஸீஸேன கதத்தா உபி⁴ன்னம்பி அனாபத்தி. ஸசே ஆணத்தேன கதம், ‘‘கரோதி வா காராபேதி வா’’தி வசனதோ ஆபத்தி உபி⁴ன்னம் ஸதி அத்துத்³தே³ஸிகதாய, அஸதி மூலட்ட²ஸ்ஸேவ. ஹேட்டி²மப்பமாணஸம்ப⁴வே ஸதி ஸப்³ப³மத்திகாமயம் குடிம் கரோதோ ஆபத்தி து³க்கடேன ஸங்கா⁴தி³ஸேஸோதி ஆசரியஸ்ஸ தக்கோ.

354. ச²த்திம்ஸ சதுக்கானி நாம அதே³ஸிதவத்து²கசதுக்கம் தே³ஸிதவத்து²கசதுக்கம் பமாணாதிக்கந்தசதுக்கம் பமாணிகசதுக்கம் அதே³ஸிதவத்து²கபமாணாதிக்கந்தசதுக்கம் தே³ஸிதவத்து²கபமாணிகசதுக்கந்தி ச² சதுக்கானி, ஏவம் ஸமாதி³ஸதிவாராதீ³ஸுபி பஞ்சஸூதி ச²த்திம்ஸ. ஆபத்திபே⁴த³த³ஸ்ஸனத்த²ந்தி ஏத்த² யஸ்மா ‘‘ஸாரம்பே⁴ சே, பி⁴க்கு², வத்து²ஸ்மிம் அபரிக்கமனே…பே… ஸங்கா⁴தி³ஸேஸோ’’தி மாதிகாயம் அவிஸேஸேன வுத்தத்தா ஸாரம்ப⁴அபரிக்கமனேபி ஸங்கா⁴தி³ஸேஸோவாதி மிச்சா²கா³ஹவிவஜ்ஜனத்த²ம் ஆபத்திபே⁴தோ³ த³ஸ்ஸிதோ, தஸ்மா வுத்தானீதி அதி⁴ப்பாயோ. விப⁴ங்கே³ ஏவம் அவத்வா கிமத்த²ம் மாதிகாயம் து³க்கடவத்து² வுத்தந்தி சே? பி⁴க்கூ² அபி⁴னேதப்³பா³ வத்து²தே³ஸனாய, தேஹி பி⁴க்கூ²ஹி வத்து² தே³ஸேதப்³ப³ம். கீதி³ஸம்? அனாரம்ப⁴ம் ஸபரிக்கமனம், நேதரம், இதரஸ்மிம் ‘‘ஸாரம்பே⁴ சே பி⁴க்கு² வத்து²ஸ்மிம் அபரிக்கமனே’’தி ஏவம் ஆனிஸம்ஸவஸேன ஆக³தத்தா வுத்தம். யஸ்மா வத்து² நாம அத்தி² ஸாரம்ப⁴ம், அத்தி² அனாரம்ப⁴ம், அத்தி² ஸபரிக்கமனம், அத்தி² அபரிக்கமனம், அத்தி² ஸாரம்ப⁴ம் ஸபரிக்கமனம், அத்தி² ஸாரம்ப⁴ம் அபரிக்கமனம், அத்தி² அனாரம்ப⁴ம் ஸபரிக்கமனம், அத்தி² அனாரம்ப⁴ம் அபரிக்கமனந்தி ப³ஹுவித⁴த்தா வத்து² தே³ஸேதப்³ப³ம் அனாரம்ப⁴ம் ஸபரிக்கமனம், நேதரந்தி வுத்தம் ஹோதி. கிமத்தி²கா பனேஸா தே³ஸனாதி சே? க³ருகாபத்திபஞ்ஞாபனஹேதுபரிவஜ்ஜனுபாயத்தா². வத்து²தே³ஸனாய ஹி க³ருகாபத்திபஞ்ஞாபனஹேதுத்தா அகதவிஞ்ஞத்தி கி³ஹீனம் பீளாஜனனேன அத்தது³க்க²பரது³க்க²ஹேதுபூ⁴தோ ச ஸாரம்ப⁴பா⁴வோதி ஏதே வத்து²தே³ஸனாபதே³ஸேன உபாயேன பரிவஜ்ஜிதா ஹோந்தி. ந ஹி பி⁴க்கு² அகப்பியகுடிகரணத்த²ம் கி³ஹீனம் வா பீளானிமித்தம் ஸாரம்ப⁴வத்து². குடிகரணத்த²ம் வா வத்து²ம் தே³ஸேந்தீதி பட²மமேவ ஸாதி⁴தமேதம். வோமிஸ்ஸகாபத்தியோதி து³க்கடஸங்கா⁴தி³ஸேஸமிஸ்ஸகாபத்தியோ.

355. தத்த² ‘‘த்³வீஹி ஸங்கா⁴தி³ஸேஸேஹீ’’தி வத்தப்³பே³ ‘‘த்³வின்னம் ஸங்கா⁴தி³ஸேஸேனா’’தி விப⁴த்திப்³யத்தயேன, வசனப்³யத்தயேன ச வுத்தம். ‘‘ஆபத்தி த்³வின்னம் ஸங்கா⁴தி³ஸேஸான’’ந்திபி பாடோ².

364. ந க⁴டயதி ச²த³னலேபாபா⁴வதோ, அனாபத்தி, தம் பரதோ ஸாதி⁴யதி. ச²த³னமேவ ஸந்தா⁴ய உல்லித்தாவலித்ததா வுத்தாதி. ‘‘குக்குடச்சி²ககே³ஹம் வட்டதீதி வத்வா புன ச²த³னம் த³ண்ட³கேஹீதிஆதி³னா நயேன தம் த³ஸ்ஸேந்தேஹி திணபண்ணச்ச²த³னாகுடிகாவ வுத்தா. தத்த² ச²த³னம் த³ண்ட³கேஹி தீ³க⁴தோ திரியஞ்ச ஜாலம் விய ப³ந்தி⁴த்வா திணேஹி வா பண்ணேஹி வா சா²தே³தும் உல்லித்தாதி³பா⁴வோ ச²த³னமேவ ஸந்தா⁴ய வுத்தோதி யுத்தமித³ம். தஸ்மா மத்திகாமயம் பி⁴த்திம் வட்³டா⁴பேத்வா உபரி உல்லித்தம் வா அவலித்தம் வா உப⁴யம் வா பி⁴த்தியா க⁴டிதம் கரோந்தஸ்ஸ ஆபத்தி ஏவ வினாபி பி⁴த்திலேபேனா’’தி லிகி²தம். ‘‘‘ஸோ ச ச²த³னமேவ ஸந்தா⁴யா’தி பதா⁴னவஸேன வுத்தம், ந ஹேட்டா²பா⁴க³ம் படிக்கி²த்த’’ந்தி வத³ந்தி, வீமம்ஸிதப்³ப³ம். ஏத்தா²தி திணகுடிகாய. யதா²ஸமாதி³ட்டா²யாதி யதா²வுத்தப்பகாரந்தி அதி⁴ப்பாயோ. ‘‘ஆபத்தி காருகானம் திண்ணம் து³க்கடான’’ந்திஆதி³ம்ஹி ஸோ ஸுணாதிச²க்கம்பி லப்³ப⁴தி. உப⁴யத்த² ஸமாதி³ட்ட²த்தா ஆணாபகஸ்ஸ அனாபத்தி. ஆணத்தஸ்ஸ யதா² ஸமாதி³ட்ட²ம் ஆணாபகேன, ததா² அகரணபச்சயா து³க்கடம். ஸசே ‘‘அஹம்பேத்த² வஸாமீ’’தி அத்துத்³தே³ஸம்பி கரோதி, ஸங்கா⁴தி³ஸேஸோவ. ‘‘குடிம் கரோதா²’’தி அவிஸேஸேன வுத்தட்டா²னே பன ஆணாபகஸ்ஸாபி ஸங்கா⁴தி³ஸேஸோ அசித்தகத்தா ஸிக்கா²பத³ஸ்ஸ.

அஹஞ்ச வஸிஸ்ஸாமீதி ஏத்த² பரஸ்ஸ யஸ்ஸ கஸ்ஸசி உத்³தி³ட்ட²ஸ்ஸ அபா⁴வா ஆபத்தி ஏவ ‘‘கரோந்தஸ்ஸ வா’’தி நியமிதத்தா, அனாபத்தி அவிப⁴த்தத்தா. ‘‘இத⁴ பஞ்ஞத்திஜானனமத்தமேவ சித்த’’ந்தி ச லிகி²தம். அனுக³ண்டி²பதே³ பன அஹஞ்ச வஸிஸ்ஸாமீதி ஏத்த² யோ ‘‘மய்ஹம் வாஸாகா³ரஞ்ச ப⁴விஸ்ஸதீ’’தி இச்ச²தி, தஸ்ஸாபத்தி. யோ பன உபோஸதா²கா³ரம் இச்ச²தி, தஸ்ஸ அனாபத்தி, தஸ்மா ‘‘உப⁴யம் ஸமேதீ’’தி வத்வா ச ‘‘வினயவினிச்ச²யே ஆக³தே க³ருகே டா²தப்³ப³’’ந்தி வசனதோ மஹாபச்சரிவாத³தோ இதரோ பச்சா² வத்தப்³போ³தி சே? ந, ப³லவத்தா. ‘‘வாஸாகா³ரம் ட²பேத்வா ஸப்³ப³த்த², அனாபத்தீ’’தி வசனதோ, போ⁴ஜனஸாலாதீ³னம்பி அத்தா²ய இமினா கதத்தா ஸங்கரா ஜாதா. யதா² – த்³வே தயோ ‘‘ஏகதோ வஸிஸ்ஸாமா’’தி கரோந்தி, ரக்க²தி தாவாதி ஏத்த² விய. ‘‘இத³ம் டா²னம் வாஸாகா³ரம் ப⁴விஸ்ஸதி, இத³ம் உபோஸதா²கா³ர’’ந்தி விப⁴ஜித்வா கதேபி ஆபத்தி ஏவ. த்³வீஸு மஹாபச்சரிவாதோ³ ப³லவா, தஸ்மா ‘‘பச்சா² வுத்தோ’’திஆதி³னா அதீவ பபஞ்சிதம். கிம் தேன. ‘‘அத்தனா விப்பகதம் அத்தனா ச பரேஹி ச பரியோஸாபேதீ’’திஆதி³னா நயேன அபரானிபி சதுக்கானி யதா²ஸம்ப⁴வம் யோஜேத்வா த³ஸ்ஸேதப்³பா³னி, லேணாதீ³ஸு கிஞ்சாபி ஸங்கா⁴தி³ஸேஸேன அனாபத்தி, அகதவிஞ்ஞத்தியா ஸதி தப்பச்சயா ஆபத்தி ஏவ.

குடிகாரஸிக்கா²பத³வண்ணனா நிட்டி²தா.

7. விஹாரகாரஸிக்கா²பத³வண்ணனா

366. ஸத்தமே வா-ஸத்³தோ³ அவதா⁴ரணத்தோ²தி வேதி³தப்³போ³.

விஹாரகாரஸிக்கா²பத³வண்ணனா நிட்டி²தா.

8. பட²மது³ட்ட²தோ³ஸஸிக்கா²பத³வண்ணனா

380. ஸாவகேன பத்தப்³ப³ந்தி பகதிஸாவகம் ஸந்தா⁴ய வுத்தம், ந அக்³க³ஸாவகம். யதூ²பனிஸ்ஸயயதா²புக்³க³லவஸேன ‘‘திஸ்ஸோ விஜ்ஜா’’திஆதி³ வுத்தம். கேனசி ஸாவகேன திஸ்ஸோ விஜ்ஜா, கேனசி சதஸ்ஸோ படிஸம்பி⁴தா³, கேனசி ச² அபி⁴ஞ்ஞா, கேனசி கேவலோ நவலோகுத்தரத⁴ம்மோதி ஏவம் விஸும் விஸும் யதா²ஸம்ப⁴வம் வுத்தந்தி வேதி³தப்³ப³ம்.

382. ‘‘யே தே பி⁴க்கூ² ஸுத்தந்திகா’’திஆதி³வசனதோ த⁴ரமானேபி ப⁴க³வதி பிடகத்தயபரிச்சே²தோ³ அத்தீ²தி ஸித்³த⁴ம். த⁴ம்மகதி²காதி ஆபி⁴த⁴ம்மிகா ரதியா அச்சி²ஸ்ஸந்தீதிஆதி³ ஆயஸ்மதோ த³ப்³ப³ஸ்ஸ நேஸம் திரச்சா²னகதா²ய ரதினியோஜனம் விய தி³ஸ்ஸதி, ந ததா² த³ட்ட²ப்³ப³ம். ஸுத்தந்திகாதி³ஸம்ஸக்³க³தோ தேஸம் ஸுத்தந்திகாதீ³னம் பா²ஸுவிஹாரந்தராயம், தேஸம்பி திரச்சா²னகதா²ரதியா அபா⁴வேன அனபி⁴ரதிவாஸம், ததோ நேஸம் ஸாமஞ்ஞா சாவனஞ்ச பரிவஜ்ஜந்தோ ஏவம் சிந்தேஸீதி த³ட்ட²ப்³ப³ம். ‘‘நிம்மிதானம் த⁴ம்மதாதி ஸாவகேஹி நிம்மிதானம்யேவ, ந பு³த்³தே⁴ஹீ’’தி வத³ந்தி. ‘‘ஸாத⁴கதமம் கரண’’ந்தி ஏவம் வுத்தே கரணத்தே²யேவ ததியாவிப⁴த்தீதி அத்தோ².

383-4. யந்தி யேன. ‘‘கத்தாதி கத்தா, ந கத்தா’’தி லிகி²தம். ‘‘ப⁴ரியம் விய மம் அஜ்ஜா²சரதீ’’தி வத³ந்தியா ப³லவதீ சோத³னா. தேன ஹீதி ஏத்த² யதா² சு²பனமத்தே விப்படிஸாரீவத்து²ஸ்மிம் காயஸம்ஸக்³க³ராக³ஸம்ப⁴வா அபுச்சி²த்வா ஏவ ஸங்கா⁴தி³ஸேஸம் பஞ்ஞாபேஸி, ததே²வ புப்³பே³வஸ்ஸா து³ஸ்ஸீலபா⁴வம் ஞத்வா வுத்தந்தி வேதி³தப்³ப³ம். யதி³ தாவ பூ⁴தாய படிஞ்ஞாய நாஸிதா, தே²ரோ காரகோ ஹோதி. அத² அபூ⁴தாய, ப⁴க³வதா ‘‘நாஸேதா²’’தி ந வத்தப்³ப³ம், வுத்தஞ்ச, தஸ்மா வுத்தம் ‘‘யதி³ தாவ படிஞ்ஞாய நாஸிதா, தே²ரோ காரகோ ஹோதீ’’தி.

அத² அப்படிஞ்ஞாயாதி ‘‘அய்யேனம்ஹி தூ³ஸிதா’’தி இமம் படிஞ்ஞம் வினா ஏவ தஸ்ஸா பகதிது³ஸ்ஸீலபா⁴வம் ஸந்தா⁴ய நாஸிதா, தே²ரோ அகாரகோ ஹோதி. அப⁴யகி³ரிவாஸினோபி அத்தனோ ஸுத்தம் வத்வா ‘‘தும்ஹாகம் வாதே³ தே²ரோ காரகோ’’தி வத³ந்தி, கஸ்மா? து³க்கடம் முஸாவாத³பச்சயா லிங்க³னாஸனாய அனாஸேதப்³ப³த்தா. பாராஜிகஸ்ஸேவ ஹி லிங்க³னாஸனாய நாஸேதப்³பா³. ‘‘நாஸேதா²’’தி ச வுத்தத்தா பாராஜிகாவ ஜாதா, ஸா கிம் ஸந்தா⁴ய, ததோ தே²ரோ காரகோ ஆபஜ்ஜதி. ‘‘ஸகாய படிஞ்ஞாய நாஸேதா²’’தி வுத்தே பன அபாராஜிகாபி அத்தனோ வசனேன நாஸேதப்³பா³ ஜாதாதி அதி⁴ப்பாயோ. மஹாவிஹாரவாஸினோபி அத்தனோ ஸுத்தம் வத்வா ‘‘தும்ஹாகம் வாதே³ தே²ரோ காரகோ’’தி ச வத³ந்தி. கஸ்மா? ‘‘ஸகாய படிஞ்ஞாய நாஸேதா²’’தி ஹி வுத்தே படிஞ்ஞாய பூ⁴ததா ஆபஜ்ஜதி ‘‘நாஸேதா²’’தி வசனதோ. பூ⁴தாயேவ ஹி படிஞ்ஞாய நாஸேதப்³பா³ ஹோதி, நாபூ⁴தாயாதி அதி⁴ப்பாயோ. புரிமனயேதி து³க்கடவாதே³. புரிமோ யுத்திவஸேன பவத்தோ, பச்சி²மோ பாளிவசனவஸேன பவத்தோதி வேதி³தப்³போ³.

385-6. பீதிஸுகே²ஹீதி ஏத்த² ‘‘ஸுகே²னா’’தி வத்தப்³பே³ பீதிக்³க³ஹணம் ததியஜ்ஜா²னஸுக²ம், காயிகஞ்ச அபனேதும் ஸம்பயுத்தபீதியா வுத்தம். ஸசே சுதி³தகவஸேன கதம் அமூலகம் நாம, ‘‘அனஜ்ஜா²பன்னம் அகத’’ந்தி வதே³ய்ய, இமே கரிஸ்ஸந்தி, தஸ்மா ‘‘தாதி³ஸம் தி³ட்ட²ஸஞ்ஞீ ஹுத்வா சோதே³தீ’’தி பாடோ². ‘‘ஏதேன நயேன ஸுதமுதபரிஸங்கிதானிபி வித்தா²ரதோ வேதி³தப்³பா³னீ’’தி பாடோ². ‘‘சதுன்னம் அஞ்ஞதரேனா’’தி பாதிமோக்கு²த்³தே³ஸே ஏவ ஆக³தே க³ஹேத்வா வுத்தம், இதரேஸம் அஞ்ஞதரேனாபி அனுத்³த⁴ம்ஸேந்தஸ்ஸ ஸங்கா⁴தி³ஸேஸோவாதி நோ தக்கோதி ஆசரியோ. பி⁴க்கு²பா⁴வா ஹி சாவனஸமத்த²தோ. ‘‘ஸமீபே ட²த்வா’’தி வசனதோ பரம்முகா² சோதே³ந்தஸ்ஸ, சோதா³பேந்தஸ்ஸ வா ஸீஸம் ந ஏதி. தி³ட்ட²ஞ்சே ஸுதேன பரிஸங்கிதேன சோதே³தி சோதா³பேதி, ஸுதபரிஸங்கிதம் வா தி³ட்டா²தீ³ஹி சோதி³தே வா சோதா³பிதே வா ஸீஸம் ஏதி ஏவ அமூலகேன சோதி³தத்தா. வுத்தஞ்ஹேதம் ‘‘தி³ட்ட²ஸ்ஸ ஹோதி பாராஜிகம் த⁴ம்மம் அஜ்ஜா²பஜ்ஜந்தோ, தஞ்சே சோதே³தி ‘ஸுதோ மயா…பே… ஸங்கா⁴தி³ஸேஸஸ்ஸா’’தி (பாரா. 387). ‘‘அஸுத்³தோ⁴ ஹோதி புக்³க³லோ அஞ்ஞதரம் பாராஜிகம் த⁴ம்மம் அஜ்ஜா²பன்னோ, தஞ்சே அஸுத்³த⁴தி³ட்டி² ஸமானோ அனோகாஸம் காராபேத்வா சாவனாதி⁴ப்பாயோ வதே³தி, ஆபத்தி து³க்கடஸ்ஸ. ஓகாஸம் காராபேத்வா சாவனாதி⁴ப்பாயோ வதே³தி, அனாபத்தீ’’தி (பாரா. 389) இமினா ந-ஸமேந்தம் விய கா²யதி, கத²ம்? தி³ட்ட²ஸ்ஸ ஹோதி பாராஜிகம் த⁴ம்மம் அஜ்ஜா²பஜ்ஜந்தோ நாம அஸுத்³தோ⁴ புக்³க³லோ ஹோதி, ‘‘அஞ்ஞதரஸ்மிம் அஸுத்³த⁴தி³ட்டி² ஸமானோ தஞ்சே சோதே³தி ‘ஸுதோ மயா பாராஜிகம் த⁴ம்மம் அஜ்ஜா²பன்னோஸீ’தி, ஆபத்தி வாசாய வாசாய ஸங்கா⁴தி³ஸேஸஸ்ஸா’’தி வசனதோ புரிமனயேனாபத்தி. ‘‘சாவனாதி⁴ப்பாயோ வதே³தி, ஆபத்தி து³க்கடஸ்ஸா’’தி வசனதோ பச்சி²மனயேன ஸங்கா⁴தி³ஸேஸேன ஆபத்தீதி த்³வே பாளினயா அஞ்ஞமஞ்ஞம் விருத்³தா⁴ விய தி³ஸ்ஸந்தி, ந ச விருத்³த⁴ம் பு³த்³தா⁴ கத²யந்தி, தஸ்மா ஏத்த² யுத்தி பரியேஸிதப்³பா³. அட்ட²கதா²சரியா தாவாஹு ‘‘ஸமூலகேன வா ஸஞ்ஞாஸமூலகேன வா சோதே³ந்தஸ்ஸ அனாபத்தி, அமூலகேன வா பன ஸஞ்ஞாஅமூலகேன வா சோதே³ந்தஸ்ஸ ஆபத்தீ’’தி. தஸ்ஸத்தோ² – த³ஸ்ஸனஸவனபரிஸங்கனமூலேன ஸமூலகேன வா தத³பா⁴வேன அமூலகேனாபி ஸஞ்ஞாஸமூலகேன வா சோதே³ந்தஸ்ஸ அனாபத்தி, த³ஸ்ஸனாதி³மூலாபா⁴வேன அமூலகேன வா தப்³பா⁴வேன ஸமூலகேனாபி ஸஞ்ஞாஅமூலகேன வா சோதே³ந்தஸ்ஸ ஆபத்தி, தஸ்மா தி³ட்ட²ஸ்ஸ ஹோதி.

பாராஜிகம் த⁴ம்மம் அஜ்ஜா²பஜ்ஜந்தோதிஆதி³ம்ஹி த³ஸ்ஸனமூலேன ஸமூலகேனாபி ‘‘ஸுதோ மயா’’தி வசனதோ ஸஞ்ஞாஅமூலகேன வா சோதே³தி, ஆபத்தி ஸங்கா⁴தி³ஸேஸஸ்ஸ. தத³த்த²ஸ்ஸ ஆவிபா⁴வத்த²ம் ‘‘தி³ட்டே² வேமதிகோ’’திஆதி³ வாரா வுத்தாதி வேதி³தப்³பா³.

அஸுத்³தோ⁴ ஹோதி புக்³க³லோபி⁴ஆதி³ம்ஹி பன ஸமூலகேன, ஸஞ்ஞாஸமூலகேன வா சோதி³தத்தா அனாபத்தீதி. ஏவமேவம் பன தத³த்த²தீ³பனத்த²ம் தே வாரா வுத்தா. தத்த² ஹி ‘‘அதி³ட்ட²ஸ்ஸ ஹோதீ’’திஆதி³வாரா அமூலகேன சோதே³ந்தஸ்ஸ ஆபத்தி ஹோதீதி த³ஸ்ஸனத்த²ம் வுத்தா. ‘‘தி³ட்டே² வேமதிகோ’’திஆதி³னா ஸஞ்ஞாஅமூலகேன சோதே³ந்தஸ்ஸ ஆபத்தி ஹோதீதி த³ஸ்ஸனத்த²ம் வுத்தா. அஞ்ஞதா² ‘‘தி³ட்ட²ஸ்ஸ ஹோதி, தி³ட்டே² வேமதிகோ’’திஆதி³வாரா நிப்³பி³ஸேஸா ப⁴வேய்யும். இத³ம் பனேத்த² ஸன்னிட்டா²னம்-யதா² அஸுத்³த⁴ம் புக்³க³லம் அனோகாஸம் காராபேத்வா சோதே³ந்தஸ்ஸ து³க்கடம், அக்கோஸாதி⁴ப்பாயஸ்ஸ ச ஓமஸவாதே³ன து³க்கடஸ்ஸ, ததா² அஸுத்³த⁴தி³ட்டி²கோபி அஸுத்³த⁴ம் அஸுத்³த⁴தி³ட்டி² அமூலகேன சோதே³தி, ஆபத்தி. ஸமூலகேன வா சோதே³தி, அனாபத்தீதி தம் ஸன்னிட்டா²னம் யதா² ‘‘அனாபத்தி ஸுத்³தே⁴ அஸுத்³த⁴தி³ட்டி²ஸ்ஸ அஸுத்³தே⁴ அஸுத்³த⁴தி³ட்டி²ஸ்ஸா’’தி இமினா ஸம்ஸந்த³தி, ததா² க³ஹேதப்³ப³ம். அஞ்ஞதா² யுத்தி பரியேஸிதப்³பா³.

ஸீலஸம்பன்னோதி ஏத்த² ‘‘து³ஸ்ஸீலஸ்ஸ வசனம் அப்பமாணம். பி⁴க்கு²னீ ஹி பி⁴க்கு²ம்ஹி அனிஸ்ஸரா, தஸ்மா உக்கட்ட²னயே விதி⁴ம் ஸந்தா⁴ய தே²ரேன வுத்தம். து³தியத்தே²ரேன பி⁴க்கு²னீ அஜானித்வாபி சோதே³தி, ஸிக்க²மானாத³யோ வா சோதே³ந்தி, தேஸம் ஸுத்வா பி⁴க்கூ² ஏவ விசாரேத்வா தஸ்ஸ படிஞ்ஞாய காரேந்தி. கோ ஏத்த² தோ³ஸோதி இத³ம் ஸந்தா⁴ய வுத்தம். ததியேன தித்தி²யானம் வசனம் ஸுத்வாபி பி⁴க்கூ² ஏவ விசாரேந்தி, தஸ்மா ந கோசி ந லப⁴தீதி ஏவம் ஸப்³ப³ம் ஸமேதீதி அபரே’’தி வுத்தம். திம்ஸானி திம்ஸவந்தானி. அனுயோகோ³தி படிவசனம். ஏஹிதீதி ஆக³மிஸ்ஸதி. தி³ட்ட²ஸந்தானேனாதி தி³ட்ட²னயேன, தி³ட்ட²விதா⁴னேனாதி அதி⁴ப்பாயோ. பதிட்டா²யாதி பதிட்ட²ம் லபி⁴த்வா. டா²னேதி லஜ்ஜிட்டா²னே.

கா³ஹந்தி ‘‘அஹம் சோதே³ஸ்ஸாமீ’’தி அத்தாதா³னக்³க³ஹணம். சேதனாதி அத்தாதா³னக்³க³ஹணசேதனா. வோஹாரோதி இதோ, ஏத்தோ ச ஞத்வா பகாஸனம். பண்ணத்தீதி நாமபஞ்ஞத்தி. யா வசீகோ⁴ஸாரம்மணஸ்ஸ ஸோதத்³வாரப்பவத்தவிஞ்ஞாணஸந்தானஸ்ஸ அனந்தரம் உப்பன்னேன உபலத்³த⁴புப்³ப³ஸங்கேதேன மனோத்³வாரவிஞ்ஞாணேன விஞ்ஞாயதி, யஸ்ஸா விஞ்ஞாதத்தா தத³த்தோ² பரமத்தோ² வா அபரமத்தோ² வா ததியவாரம் உப்பன்னேன மனோவிஞ்ஞாணேன விஞ்ஞாயதீதி நாமாதீ³ஹி ச²ஹி ப்³யஞ்ஜனேஹி பாளியா பகாஸிதா, ஸா ‘‘விஜ்ஜமானபஞ்ஞத்தி அவிஜ்ஜமானபஞ்ஞத்தீ’’திஆதி³னா ச²தா⁴ ஆசரியேஹி த³ஸ்ஸிதா. தப்³பா⁴கி³யபா⁴வோ அதப்³பா⁴கி³யபா⁴வோ ச நிப்ப²ன்னத⁴ம்மஸ்ஸேவ யுஜ்ஜதி, ந பஞ்ஞத்தியா அதி⁴கரணீயவத்து²த்தா, அதி⁴கரணே பவத்தத்தா ச அதி⁴கரணோ மஞ்சட்டே² மஞ்சோபசாரோ வியாதி ச. ‘‘பரியாயேனாதி அமூலகா நாமபஞ்ஞத்தி நத்தி². பரியாயமத்தம், ஸபா⁴வதோ நத்தி². அபி⁴தா⁴னமத்தமேவ, அபி⁴தே⁴ய்யம் நத்தீ²’’தி ச லிகி²தம். இதே⁴வாதி இமஸ்மிம் ஏவ ஸிக்கா²பதே³. ந ஸப்³ப³த்தா²தி விவாதா³தி⁴கரணாதீ³ஸு. கஸ்மா? ந ஹீதிஆதி³. விவாதா³தி⁴கரணாதீ³னமத்தி²தா விய அமூலகம் அதி⁴கரணம் நத்தீ²தி. புப்³பே³ வுத்தஸமதே²ஹீதி ‘‘யம் அதி⁴கிச்ச ஸமதா² வத்தந்தீ’’தி வுத்தஸமதே²ஹீதி அதி⁴ப்பாயோ. அபிச ஸபா⁴வதோ நத்தீ²தி அப்படிலத்³த⁴ஸபா⁴வத்தா வுத்தம். அனுப்பன்னம் விய விஞ்ஞாணாதி³. ந ஹி விவாதா³தீ³னம் பண்ணத்தி அதி⁴கரணட்டோ²தி பண்ணத்திம் அதி⁴கிச்ச ஸமதா² ந பவத்தந்தி, தஸ்மா ந தஸ்ஸா அதி⁴கரணீயதாதி ந விவாதா³தீ³னம் பண்ணத்தி அதி⁴கரணட்டோ²தி அதி⁴ப்பாயோ. ஹோதி சேத்த² –

‘‘பாராஜிகாபத்தி அமூலிகா சே,

பண்ணத்திமத்தா ப²லமக்³க³த⁴ம்மா;

சதுத்த²பாராஜிகவத்து²பூ⁴தா,

பண்ணத்திமத்தாவ ஸியும் ததே²வ.

‘‘ததோ த்³விதா⁴ மக்³க³ப²லாதி³த⁴ம்மா,

ஸியும் ததா²தீதமனாக³தஞ்ச;

பண்ணத்திச²க்கம் ந ஸியா ததோ வா,

பரியாயதோ ஸம்முதிவாத³மாஹா’’தி.

அனுவத³ந்தீதி அக்கோஸந்தி. கிச்சயதாதி கரணீயதா. தம் கதமந்தி சே? அபலோகனகம்மந்திஆதி³. கிச்சந்தி விஞ்ஞத்திஸமுட்டா²பகசித்தம் கிர அதி⁴ப்பேதம்.

387. ஸுதாதீ³னம் அபா⁴வேன அமூலகத்தந்தி ஏத்த² யோ தி³ஸ்வாபி ‘‘தி³ட்டோ²ஸி மயா’’தி வத்தும் அஸக்கோந்தோ அத்தனோ தி³ட்ட²னியாமேனேவ ‘‘ஸுதோஸி மயா’’தி வத³தி. தஸ்ஸ தஸ்மிம் அஸுத்³த⁴தி³ட்டி²த்தா ஆபத்தி, இத⁴ பன யோ புப்³பே³ ஸுத்வா அனாபத்தி, பச்சா² தம் விஸ்ஸரித்வா ஸுத்³த⁴தி³ட்டி² ஏவ ஸமானோ வத³தி, தம் ஸந்தா⁴ய வுத்தம். ‘‘ஏஸ நயோ ஸப்³ப³த்தா²தி அபரே’’தி வுத்தம். ஜேட்ட²ப்³ப³திகோ காகேகப்படிவத்தா. யத³க்³கே³னாதி யாவதா, யதா³ வா. நோ கப்பேதீதிஆதி³ வேமதிகாபா⁴வதீ³பனத்த²மேவ வுத்தந்தி த³ஸ்ஸேதி. தேன வேமதிகோவ நஸ்ஸரதி ஸம்முட்டோ² நாமாதி ஆபஜ்ஜதி, தம் ந யுத்தம் தத³னந்தரபா⁴வதோ, தஸ்மா து³தியத்தே²ரவாதோ³ பச்சா² வுத்தோ.

389. ஸப்³ப³த்தா²தி ஸப்³ப³அட்ட²கதா²ஸு. ஓகாஸகம்மந்தி ஓகாஸகரணம். ‘‘ஓகாஸேன கம்மம் ஓகாஸகம்ம’’ந்தி லிகி²தம். அஸூரியம் பஸ்ஸதி கஞ்ஞாதி ஏத்த² யதா² கஞ்ஞா ஸூரியம் ந பஸ்ஸதீதி ப⁴வதி, ஏவம் ‘‘அனோகாஸம் காரேத்வா’’தி வுத்தே ஓகாஸம் ந காரேத்வாதி ஹோதி.

பட²மது³ட்ட²தோ³ஸஸிக்கா²பத³வண்ணனா நிட்டி²தா.

9. து³தியது³ட்ட²தோ³ஸஸிக்கா²பத³வண்ணனா

391. வேளுவனேயேவாதி இத³ம் தேஹி வுத்தவேலம் ஸந்தா⁴ய வுத்தம். ‘‘புப்³பே³ மயம் ஆவுஸோ ஸுதேன அவோசும்ஹா’’தி ‘‘அம்ஹேஹி ஸா உஸ்ஸாஹிதா குபிதேஹி அனத்தமனேஹீ’’திஆதி³வசனம் ஸந்தா⁴ய வுத்தம், அஞ்ஞபா⁴க³ஸ்ஸ இத³ந்தி மனுஸ்ஸபி⁴க்கு²பா⁴வதோ அஞ்ஞபா⁴க³ஸ்ஸ திரச்சா²னச²க³லகபா⁴க³ஸ்ஸ இத³ம் ச²க³லகஜாதம் அதி⁴கரணம். அஞ்ஞபா⁴கோ³ வா அஸ்ஸ அத்தீ²தி ஸோ திரச்சா²னச²க³லகபா⁴வஸங்கா²தோ அஞ்ஞபா⁴கோ³ அஸ்ஸ ச²க³லகஸ்ஸ அத்தீ²தி ஸ்வாயம் ச²க³லகோ அஞ்ஞபா⁴கி³யம் அதி⁴கரணம் நாம.

தத்த² படிமாய ஸரீரம், ஸிலாபுத்தகஸ்ஸ ஸரீரந்தி நித³ஸ்ஸனம், பட²மம் பனேத்த² நிப்³ப³சனம் ஜாதிபத³த்தோ²திவாதீ³னம் மதேன வுத்தம். ஸா ஹி ஸாமிபா⁴வேன, நிச்சபா⁴வேன ச பதா⁴னத்தா ஸத்திஸபா⁴வே டி²தா. தப்³பி³பரீதகத்தா ப்³யத்தாகதி ஜாதியோ து பத³த்தோ² இதி இமஸ்ஸ ஸுத்தஸ்ஸ வஸேன து³தியம் நிப்³ப³சனம் வுத்தந்தி வேதி³தப்³ப³ம். நாமகரணஸஞ்ஞாய ஆதா⁴ரோதி ஏத்த² நாமமேவ நாமகரணம். நாமம் கரோந்தானம் ஸஞ்ஞா நாமகரணஸஞ்ஞா, தஸ்ஸா. மனுஸ்ஸஜாதிகோ ச²க³லகஜாதிஆதா⁴ரோ நாம. ந ஹி தம் நாமம் கச்ச²பலோமம் விய அனாதா⁴ரந்தி அதி⁴ப்பாயோ. தம் பன ச²க³லகஸ்ஸ த³ப்³போ³தி தி³ன்னனாமம் ‘‘தே³ஸோ’’தி வுச்சதி. தஸ்மா தே²ரம் அமூலகேனாதிஆதி³னா அஞ்ஞம்பி வத்து²ம் தே²ரஸ்ஸ லிஸ்ஸதி ஸிலிஸ்ஸதி வோஹாரமத்தேனேவ, ந அத்த²தோ, ஈஸகம் அல்லீயதீதி லேஸோதி அதி⁴ப்பாயோ. யஸ்மா தே³ஸலேஸா அத்த²தோ நின்னானாகரணா, தஸ்மா ‘‘கஞ்சிதே³ஸம் லேஸமத்தம் உபாதா³யா’’தி உத்³த⁴ரித்வா ‘‘த³ஸ லேஸா ஜாதிலேஸோ’’திஆதி³ வுத்தந்தி வேதி³தப்³ப³ம். யதா² நிதா³னே, ஏவம் ஸிக்கா²பத³பஞ்ஞத்தியம்பி மாதிகாயம்பி அயமேவத்தோ². யஸ்மா அஞ்ஞபா⁴கி³யஸ்ஸ அதி⁴கரணஸ்ஸாதி ச²க³லகஸ்ஸ. கஞ்சிதே³ஸம் லேஸமத்தம் உபாதா³யாதி த³ப்³போ³தி நாமம் உபாதா³யாதி அயமத்தோ² அட்டு²ப்பத்திவஸேனேவ ஆவிபூ⁴தோ, தஸ்மா ந விப⁴த்தோ. கிஞ்ச பி⁴ய்யோ அனியமத்தா. ந ஹி மேத்தியபூ⁴மஜகானம் விய ஸப்³பே³ஸம்பி ச²க³லகமேவ அஞ்ஞபா⁴கி³யம் அதி⁴கரணம் ஹோதி. அஞ்ஞம் கோ³மஹிம் ஸாதி³கம்பி ஹோதி, ந ச மேத்தியபூ⁴மஜகா விய ஸப்³பே³பி நாமலேஸமத்தமேவ உபாதி³யந்தி. அஞ்ஞம்பி ஜாதிலேஸாதி³ம் உபாதி³யந்தி, தஸ்மா அனியமத்தா ச யதா²வுத்தனயேன ந விப⁴த்தம். கிஞ்ச பி⁴ய்யோ ததா² வுத்தே ச²க³லகஸ்ஸேவ அஞ்ஞபா⁴கி³யதா ஸம்ப⁴வதி, ந அஞ்ஞஸ்ஸ, யேன ஸோவ த³ஸ்ஸிதோ. லேஸோ ச நாம லேஸோவ, ந ஜாதிஆதி³, யேன ஸோவ த³ஸ்ஸிதோதி ஏவம் மிச்சா²கா³ஹப்பஸங்க³தோ ச ததா² ந விப⁴த்தோ.

393. அஞ்ஞபா⁴கி³யஸ்ஸாதி சுதி³தகதோ அஞ்ஞஸ்ஸ. அதி⁴கரணஸ்ஸாதி மனுஸ்ஸஸ்ஸ வா அமனுஸ்ஸஸ்ஸ வா திரச்சா²னக³தஸ்ஸ வாதி ஏவம் வத்தப்³ப³ம். ஏவஞ்ஹி வுத்தே மனுஸ்ஸாதீ³னம்யேவ ஜாதிலேஸாத³யோ வுத்தா ஹோந்தி, அஞ்ஞதா² சதுன்னம் அதி⁴கரணானம் தே ஆபஜ்ஜந்தி ‘‘அதி⁴கரணஸ்ஸ கஞ்சி தே³ஸம் லேஸமத்த’’ந்தி ஸாமிவசனம் புப்³ப³ங்க³மம் உத்³தி³ட்ட²த்தாதி சே? ந, நாமஸ்ஸ விய ஜாதிஆதீ³னம் மனுஸ்ஸாதீ³னம் ஆதா⁴ரபா⁴வனியமஸம்ப⁴வதோ, அதி⁴கரணபா⁴வானியமதோதி வுத்தம் ஹோதி. நியமே ச ஸதி ஜாதியா ஆதா⁴ரோ ஜாதி, லிங்க³ஸ்ஸ ச லிங்க³ம், ஆபத்தியா ச ஆபன்னோ ஆதா⁴ரோ, விருத்³தா⁴னம்பி அஸமாதி³ன்னானம்பி பத்தசீவரானம் ஸாமிகோ ஆதா⁴ரோ, யேன அதி⁴கரணஸங்க்²யம் க³ச்சே²ய்யாதி ஆபஜ்ஜதீதி அதி⁴கரணஸ்ஸாதி பத³ம் அபா⁴ஜேதப்³ப³மேவ ப⁴வேய்யாதி ந உத்³த⁴ரிதப்³ப³ம் ஸியா, உத்³த⁴ரிதப்³ப³ம். தஸ்மா ‘‘அதி⁴கரணந்தி வசனஸாமஞ்ஞதோ’’திஆதி³ ஸப்³ப³ம் வத்தப்³ப³ம். அபாகடா இதோ அஞ்ஞத்ர த³ஸ்ஸிதட்டா²னாபா⁴வதோ. ஜானிதப்³பா³ ச வினயத⁴ரேஹி யஸ்மா அஞ்ஞதா² பரிவாரே ‘‘விவாதா³தி⁴கரணம் சதுன்னம் அதி⁴கரணானம் விவாதா³தி⁴கரணம் ப⁴ஜதீ’’திஆதி³னா நயேன அனாக³தட்டா²னே ‘‘கஸ்மா’’தி வுத்தே காரணம் ந பஞ்ஞாயேய்ய, தஸ்மா தேஸம் தப்³பா⁴கி³யதா ச அஞ்ஞபா⁴கி³யதா ச ஜானிதப்³பா³ வினயத⁴ரேஹி. தாஸு ஹி விஞ்ஞாதாஸு விவாதா³தி⁴கரணம் விவாதா³தி⁴கரணம் ப⁴ஜதி. கஸ்மா? தப்³பா⁴கி³யத்தா. இதரம் ந ப⁴ஜதி அஞ்ஞபா⁴கி³யத்தாதி ஸுக²காரணதோ பஞ்ஞாயந்தி, தஸ்மா வசனஸாமஞ்ஞதோ லத்³த⁴ம் அதி⁴கரணம் நிஸ்ஸாயாதிஆதி³. தத்த² யஸ்மா ஆபத்தஞ்ஞபா⁴கி³யம் மஹாவிஸயம், இதரேஹி அஸதி³ஸனித்³தே³ஸஞ்ச, தஸ்மா தம் அதி⁴கரணபரியாபன்னம்பி ஸமானம் விஸும் வுத்தம் ‘‘ஆபத்தஞ்ஞபா⁴கி³யம் வா ஹோதீ’’தி. அதி⁴கரணபரியாபன்னத்தா ச ‘‘அதி⁴கரணஞ்ஞபா⁴கி³யம் வா’’தி ஏத்த² வுத்தந்தி வேதி³தப்³ப³ம். தத்தா²பி மஹாவிஸயத்தா, மாதிகாயம் ஆக³தத்தா ச பட²மம் அஞ்ஞபா⁴கி³யதா வுத்தா, பச்சா² தப்³பா⁴கி³யதாதி வேதி³தப்³பா³. தத்த² யஸ்மா அதி⁴கரணஞ்ஞபா⁴கி³யவசனேன அத்தா²பத்தினயேன ஸித்³த⁴ம். அதி⁴கரணம் தப்³பா⁴கி³யம், தஸ்மா ‘‘அதி⁴கரணம் தப்³பா⁴கி³யம் ஹோதீ’’தி ஏவம் உத்³தே³ஸம் அகத்வா ‘‘கத²ம் அதி⁴கரணம் அதி⁴கரணஸ்ஸ தப்³பா⁴கி³யம் ஹோதீ’’தி புச்சா²புப்³ப³ங்க³மனித்³தே³ஸோ கதோ. தத்தா²பி ஆபத்தாதி⁴கரணஸ்ஸ அஞ்ஞபா⁴கி³யதா கிஞ்சாபி பாராஜிகேன அனுத்³த⁴ம்ஸிபா⁴தி⁴காரத்தா பாராஜிகானம்யேவ வஸேன வுத்தா, அத² கோ² ஸேஸாபத்திக்க²ந்த⁴வஸேனாபி வேதி³தப்³பா³. யா ச ஸா சோத³னா ‘‘அஸுகோ நாம பி⁴க்கு² ஸங்கா⁴தி³ஸேஸம் அஜ்ஜா²பஜ்ஜந்தோ தி³ட்டோ² ஹோதீ’’திஆதி³கா, தத்த² ‘‘ஸங்கா⁴தி³ஸேஸே து²ல்லச்சயதி³ட்டி² ஹோதி, து³ப்³பா⁴ஸிதே ஸங்கா⁴தி³ஸேஸதி³ட்டி² ஹோதீ’’தி ஏவமாதி³கா வினயே அபகதஞ்ஞுதாய, தம்தம்வத்து²ஸரிக்க²தாய வா வுத்தாதி வேதி³தப்³பா³. ஸப்³ப³த்தா²பி ‘‘பாராஜிகதி³ட்டி² ஹோதீ’’தி ந வுத்தம். ததா²ஸஞ்ஞினோ அனாபத்திதோ. ‘‘தப்³பா⁴கி³யவிசாரணாய’’ந்தி தப்³பா⁴கி³யபத³னித்³தே³ஸே அஞ்ஞபா⁴கி³யதாயபி நித்³தி³ட்ட²த்தா வுத்தம்.

வத்து²ஸபா⁴க³தாயாதி அனுவாத³வத்து²ஸபா⁴க³தாயாதி அத்தோ². அஞ்ஞதா² ‘‘சதஸ்ஸோ விபத்தியோ’’தி வசனம் விருஜ்ஜே²ய்ய. ஸபா⁴வஸரிக்கா²ஸரிக்க²தோ சாதி ஸபா⁴வேன ஸதி³ஸாஸதி³ஸதோ. தத்த² ஜா²னாதி³வத்து²விஸபா⁴க³தாயபி ஸபா⁴வஸரிக்க²தாய உத்தரிமனுஸ்ஸத⁴ம்மபாராஜிகாபத்தி தஸ்ஸேவ தப்³பா⁴கி³யாவ ஹோதி. ததா² வத்து²வஸேன அனுவாதா³தி⁴கரணம், கிச்சாதி⁴கரணஞ்ச பாடேக்கம் சதுப்³பி³த⁴ம்பி வுத்தஞ்ஞபா⁴கி³யம் ந ஜாதம், தஸ்மா தத³ஞ்ஞபா⁴கி³யதாய விதி³தாய தப்³பா⁴கி³யதா பாரியேஸயுத்தியா அவுத்தாபி ஸிஜ்ஜ²தீதி கத்வா ‘‘அஞ்ஞபா⁴கி³யமேவ பட²மம் நித்³தி³ட்ட²’’ந்திபி வத்தும் யுஜ்ஜதி. ஏகம்ஸேன தப்³பா⁴கி³யம் ந ஹோதீதி ஸரிக்க²வஸேன அரஹத்தம் ஆபத்தி அனாபத்தீதி விவாத³ஸப்³பா⁴வதோ அப்³யாகதபா⁴வேன விவாதா³தி⁴கரணஸ்ஸபி அஞ்ஞபா⁴கி³யம் ஸியா, பாளியம் ஆபத்தாதி⁴கரணஸ்ஸ வுத்தத்தா ஏவம் வுத்தம், ஆதி³தோ பட்டா²யாதி ‘‘அஞ்ஞபா⁴கி³யஸ்ஸ அதி⁴கரணஸ்ஸா’’தி இதோ பட்டா²ய. ‘‘மேது²னராகே³ன மனுஸ்ஸவிக்³க³ஹோ தோ³ஸேனாதிஆதி³னா ஸரிக்க²தோ சா’’தி லிகி²தம். தம் வத்து²விஸபா⁴க³தாய ஏவ ஸித்³த⁴ம். அயம் பன வத்து²ஸபா⁴க³தாயபி ஸதி ஆபத்திஸபா⁴க³தா ஸரிக்க²தோதி நோ தக்கோதி ச, ஏகஸ்மிம்பி ஹி வத்து²ஸ்மிம் ஆபத்திபே⁴தோ³ ஹோதீதி ஆசரியோ. பரதோ வுத்தனயேன வேதி³தப்³ப³ந்தி ஸம்ப³ந்தோ⁴.

‘‘கிச்சமேவ கிச்சாதி⁴கரண’’ந்தி வுத்தத்தா ஸங்க⁴கம்மானமேதம் அதி⁴வசனம். கம்மலக்க²ணந்தி கம்மானம் ஸபா⁴வம். தம் நிஸ்ஸாயாதி புப்³பே³வ ஹி ஸம்விதா⁴ய ஸங்கோ⁴ கம்மம் கரோதி. அத² வா புரிமம் புரிமந்தி பரிவாஸஉக்கே²பனியாதீ³னி ஸங்க⁴கம்மானி நிஸ்ஸாய அப்³பா⁴னஓஸாரணாதி³ உப்பன்னந்தி கத்வா வுத்தம். தஸ்மா கிஞ்சாபி ஸங்க⁴கம்மமேவ கிச்சாதி⁴கரணம், ததா²பி ஸேஸவிஸேஸோ லப்³ப⁴தீதி த³ஸ்ஸேதி.

394. அத்த²தோ ஏகம், தஸ்மா தே³ஸஸ்ஸ அத்த²மவத்வா ‘‘லேஸோ’’திஆதி³ வுத்தம் கிர.

395. ஸவத்து²கம் கத்வாதி புக்³க³லஸ்ஸ உபரி ஆரோபேத்வா க²த்தியாதி³பா⁴வேன ஏகஜாதிகோபி தீ³க⁴ரஸ்ஸகாளகோதா³தாதீ³னம் தி³ட்ட²ஸுதபரிஸங்கிதானம் வஸேன அஞ்ஞபா⁴கி³யதா, தீ³க⁴ம் க²த்தியம் அஜ்ஜா²சரந்தம் தி³ஸ்வா ரஸ்ஸாதி³க²த்தியபஞ்ஞத்தியா ஆதா⁴ரபா⁴வதோ ஜாதிலேஸேன சோதே³தி, ஏகம் வா க²த்தியம் அஜ்ஜா²சரந்தம் தி³ஸ்வா ததோ விஸிட்ட²ஞ்ஞபா⁴க³பூ⁴தம் க²த்தியம் ஜாதிலேஸம் க³ஹேத்வா ‘‘க²த்தியோ தி³ட்டோ² த்வம் க²த்தியோஸீ’’தி சோதே³தி தி³ட்டா²தி³அஞ்ஞபா⁴கே³ன. ஏத்த² ச ‘‘தீ³கா⁴த³யோ, தி³ட்டா²த³யோ ச ஜாதினாமாதீ³னம் வத்து²பூ⁴தத்தா அதி⁴கரண’’ந்தி லிகி²தம். தம் ‘‘அதி⁴கரணபா⁴வானியமதோ’’தி வுத்ததோ³ஸம் நாதிக்கமதி, அட்ட²கதா²யம் ‘‘க²த்தியஜாதிபஞ்ஞத்தியா ஆதா⁴ரவஸேன அதி⁴கரணதா ச வேதி³தப்³பா³’’தி வுத்தம். தம்பி நாமகோ³த்ததோ அஞ்ஞிஸ்ஸா நாமகோ³த்தபஞ்ஞத்தியா நாம கஸ்ஸசி அபா⁴வதோ ந ஸப்³ப³ஸாதா⁴ரணம், தஸ்மா ‘‘அதி⁴கரணஸ்ஸா’’தி பது³த்³தா⁴ரணம் அதி⁴கரணசதுக்கத³ஸ்ஸனத்த²ம், தம் ஸமானவசனத³ஸ்ஸனத்த²ந்தி நோ தக்கோதி. தத்த² தீ³கா⁴தி³னோ வா தி³ட்டா²தி³னோ வாதி ஏத்த² தீ³கா⁴தி³தா, தி³ட்டா²தி³தா ச அஞ்ஞபா⁴கோ³, யோ சுதி³தகோ இதரஸ்ஸ விஸேஸோ யதோ அஞ்ஞோதி வுச்சதி.

399. லஹுகம் ஆபத்திந்தி பாராஜிகதோ லஹுகாபத்தி ஸங்கா⁴தி³ஸேஸாதி³. தேனேவ அந்தே தம் த³ஸ்ஸேந்தேன ‘‘பி⁴க்கு² ஸங்கா⁴தி³ஸேஸம் அஜ்ஜா²பஜ்ஜந்தோ தி³ட்டோ² ஹோதீ’’திஆதி³ வுத்தம். ஆபத்திலேஸோபி கிமத்த²ம் ஜாதிலேஸாத³யோ விய ந வித்தா²ரிதோதி சே? ததா² அஸம்ப⁴வதோதி வேதி³தப்³ப³ம்.

400. ஸாடகபத்தோ ஸரீரட்ட²பத்தோ. ஆபத்தியாதி பாராஜிகாபத்தியா அஞ்ஞபா⁴கி³யம் ஸங்கா⁴தி³ஸேஸாதி³, அதி⁴கரணஞ்ச ஆபத்திபஞ்ஞத்தியா. ‘‘லேஸோ நாம ஆபத்திபா⁴கோ³’’தி வுத்தத்தா ஆபத்திபா⁴வலேஸோ வுத்தோதி வேதி³தப்³போ³, தஸ்மா பாராஜிகாபத்திதோ அஞ்ஞபா⁴கி³யஸ்ஸ ஆபத்திபஞ்ஞத்தியா ஆதா⁴ரணட்டே²ன ‘‘அதி⁴கரண’’ந்தி ஸங்க்²யம் க³தஸ்ஸ ஸங்கா⁴தி³ஸேஸாதி³னோ ஆபத்தினிகாயஸ்ஸ ஆபத்திபா⁴வலேஸம் க³ஹேத்வா சோத³னா ஆபத்திலேஸசோத³னாதி வேதி³தப்³பா³.

408. அனாபத்தி ததா²ஸஞ்ஞீ சோதே³தி வா சோதா³பேதி வாதி ஆபத்தஞ்ஞபா⁴கி³யசோத³னாயமேவ, ந அஞ்ஞத்த². ஏத்தாவதா பட²மது³ட்ட²தோ³ஸே வுத்தவிசரணாய ஸம்ஸந்தி³தம் ஹோதி, தம் இத⁴ கத²ம் பஞ்ஞாயதீதி சே? கங்கா²விதரணியா வசனதோ. வுத்தஞ்ஹி ‘‘தத்த² இத⁴ ச ஆபத்தஞ்ஞபா⁴கி³யசோத³னாய ததா²ஸஞ்ஞினோபி அனாபத்தீ’’தி.

அஞ்ஞாபா⁴கி³யஸிக்க²ம் யோ, நேவ ஸிக்க²தி யுத்திதோ. க³ச்சே² வினயவிஞ்ஞூஹி, அஞ்ஞபா⁴கி³யதஞ்ச

ஸோதி.

து³தியது³ட்ட²தோ³ஸஸிக்கா²பத³வண்ணனா நிட்டி²தா.

10. பட²மஸங்க⁴பே⁴த³ஸிக்கா²பத³வண்ணனா

409. ‘‘வஜ்ஜம் ந பு²ஸேய்யா’’தி ச பாடோ².

410. தேஸம் அனுரூபாஜானனதோ அஸப்³ப³ஞ்ஞூ அஸ்ஸ. ‘‘ந, பி⁴க்க²வே, அஸேனாஸனிகேன வஸ்ஸம் உபக³ந்தப்³ப³’’ந்தி (மஹாவ. 204) வுத்தத்தா படிக்கி²த்தமேவ. திகோடிபரிஸுத்³த⁴ந்தி பரஸ்ஸ பாபபஸங்க³னிவாரணத்த²ம் வுத்தம், ந படிச்சகம்மனிவாரணத்த²ம் கோடீஹீதி ஆகாரேஹி. பரிஸுத்³த⁴ந்தி விமுத்தம். த³ஸஹி லேஸேஹி உத்³தி³ஸ்ஸ கதம் ஸமணா பரிபு⁴ஞ்ஜந்தி, அஸ்ஸமணா இமேதி ஸாஸனஸ்ஸ க³ரஹபா⁴வோ ஆக³ச்சே²ய்ய, க³ரஹபச்சயா லோகோ வா அபுஞ்ஞம் அரியூபவாத³ம் பஸவேய்ய, தேஹி விமுத்தந்தி அத்தோ². வாகு³ரந்தி மிக³ஜாலம். அத்தனோ அத்தா²ய வாதிஆதி³னா பரேஸம் அத்தா²ய கதே கப்பியபா⁴வம் த³ஸ்ஸேத்வா பி⁴க்கூ²னஞ்ச அஞ்ஞேஸஞ்ச அத்தா²ய கதே தம் த³ஸ்ஸேதும் ‘‘மதானம் பேதகிச்சத்தா²யா’’திஆதி³மாஹ.

யம் யம் ஹீதிஆதி³ தஸ்ஸ காரணஸ்ஸ த³ஸ்ஸனத்த²ம் வுத்தம். புன பஞ்சன்னம் ஸஹத⁴ம்மிகானம் அத்தா²ய கதம் ந கப்பதீதி வுத்தந்தி கிர த⁴ம்மஸிரித்தே²ரோ. க³ண்டி²பதே³ ‘‘பி⁴க்கூ²னமேவ ஸுத்³தா⁴னம் அத்தா²ய கதம் ந வட்டதீ’’தி லிகி²தம். அபரேஹி பன ‘‘மதானம் பேதகிச்சத்தா²யாதிஆதி³னா வுத்தேபி கப்பதி, பி⁴க்கூ²னம்யேவ அத்தா²யாதி இமினா ‘பி⁴க்கூ²னம்பி த³த்வா மயம் பு⁴ஞ்ஜிஸ்ஸாமா’தி கதம்பி வுத்தம். புன ‘பஞ்சஸு ஏகம் உத்³தி³ஸ்ஸகதம் இதரேஸம் ந கப்பதீ’தி த³ஸ்ஸனத்த²ம் ‘பஞ்சஸு ஹி ஸஹத⁴ம்மிகேஸூதிஆதி³ வுத்த’ந்தி வத³ந்தீ’’தி வுத்தம். அஞ்ஞதரஸ்மிம் பன க³ண்டி²பதே³ ‘‘அம்ஹாகந்தி ச ராஜயுத்தாதீ³னந்தி ச வுத்தே வட்டதீதி வத்வா ‘தும்ஹாக’ந்தி அவத்வா ‘பேதகிச்சத்தா²யாதி வுத்தேபி வட்டதீ’தி ச த³ஸ்ஸேத்வா ஸப்³ப³த்த² வுத்தானம், ஆதி³ஸத்³தே³ன ஸங்க³ஹிதானஞ்ச லக்க²ணம் ட²பேந்தேன ‘பி⁴க்கூ²னம்யேவா’திஆதி³ வுத்தம். தத்த² ‘பி⁴க்கூ²னம் உத்³தி³ட்டே² ஏவாதி அதி⁴ப்பாயேனா’தி வுத்தம். ந ‘தும்ஹாகம், அம்ஹாகஞ்சாதி வுத்தே அனாபத்தீ’தி த³ஸ்ஸனத்த²ம். கஸ்மா? மிஸ்ஸகவாரஸ்ஸ அபா⁴வா. லக்க²ணம் நாம வுத்தானம், வுத்தஸதி³ஸானஞ்ச ஹோதி. ‘ஸசே பேதகிச்சத்தா²யாதி வுத்தட்டா²னே பி⁴க்கூ²னம் போ⁴ஜனம் ஸந்தா⁴ய கரோந்தீ’தி வத³ந்தி மஹாஅட்ட²கதா²யஞ்ச ‘தஸ்மிம் வாரே ச ந தும்ஹாகந்தி வுத்தே வட்டதீ’தி வுத்தத்தா. தேனேவ இதா⁴பி ‘பேதகிச்சத்தா²ய, மங்க³லாதீ³னம் வா அத்தா²ய கதேபி ஏஸேவ நயோ’தி புப்³பே³ வுத்தத்த²வஸேன வுத்தம். ‘அவதா⁴ரணத்தே²ன மிஸ்ஸகே வட்டதீ’தி சே? ‘கப்பியமம்ஸஸ்ஸ ஹி படிக்³க³ஹணே ஆபத்தி நத்தீ²’தி வசனேன அகப்பியபடிக்³க³ஹணே ஆபத்தீதி ஆபன்னம், ‘தஞ்ச க³ஹேதப்³ப³ம் ஸியா’தி படிக்கி²பிதப்³பா³’’தி வுத்தம், தம் ஸுந்த³ரம் விய தி³ஸ்ஸதி, விசாரேத்வா க³ஹேதப்³ப³ம். யத்த² சாதி பி⁴க்கூ²னம் அத்தா²ய கதேபி. தமத்த²ம் ஆவி காதும் ‘‘ஸசே பனா’’திஆதி³ வுத்தம். ஏத்த² பன ‘‘பி⁴க்கு²னீனம் து³க்கடம், இதரேஸம் த³ண்ட³கம்மவத்தூ²’’தி வத³ந்தி. கப்பம் நிரயம்ஹீதி அஸங்க்²யேய்யகப்பம். விவட்டட்டா²யிகாலேயேவ ஸங்க⁴பே⁴தோ³ ஹோதீதி. கப்பந்தி ஆயுகப்பம்.

411. குஸலந்தி கே²மம். ஆபத்திப⁴யா கதா லஜ்ஜீஹீதி ஏத்த² ஆபத்திப⁴யேன அவஸ்ஸம் ஆரோசேந்தீதி த³ஸ்ஸனத்த²ம் ‘‘லஜ்ஜீ ரக்கி²ஸ்ஸதீ’’தி (விஸுத்³தி⁴. 1.42; பாரா. அட்ட². 1.45) போராணவசனஸ்ஸானுரூபதோ ‘‘அஞ்ஞேஹி லஜ்ஜீஹீ’’தி வுத்தம். அலஜ்ஜிஸ்ஸபி அனாரோசேந்தஸ்ஸ ஆபத்தியேவ ‘‘யே பஸ்ஸந்தி யே ஸுணந்தீ’’தி வசனதோ.

416. அஸமனுபா⁴ஸந்தஸ்ஸாதி கம்மகாரகே கத்துனித்³தே³ஸோ, ஸமனுபா⁴ஸனகம்மம் அகரியமானஸ்ஸாதி அத்தோ². ஓதி³ஸ்ஸ அனுஞ்ஞாதோ நாம உம்மத்தககி²த்தசித்தவேத³னட்டாதி³கோ ‘‘அனாபத்தி ஆதி³கம்மிகஸ்ஸா’’தி அரிட்ட²ஸிக்கா²பதே³ ஆக³தத்தா அத்தீ²தி சே? யம்பீதிஆதி³. ஸா பனேஸா அனாபத்தி. ஸோ வுச்சதீதி தத்த² ஆக³தோபி ஸகம்மப்³யாவடோபி ஏவம் வுச்சதி. ஏதேனுபாயேனாதி அஸமனுபா⁴ஸந்தஸ்ஸ ச ஆதி³கம்மிகஸ்ஸ ச வுத்தத்த²வஸேன. ட²பேத்வா அரிட்ட²ஸிக்கா²பத³ந்தி தத்த² ஆதி³கம்மிகபதா³பா⁴வா.

திவங்கி³கந்தி ஏத்த² வாசாய ஏவ படினிஸ்ஸஜ்ஜந்தஸ்ஸ ஓட்ட²சலனாதி³காயவிஞ்ஞத்தி ஹோதி, தஸ்மா து³வித⁴ம்பி விஞ்ஞத்திம் கதே²ந்தஸ்ஸ ஹோதி. வசீபே⁴த³ம் காதும் அஸக்கோந்தஸ்ஸ காயவிகாரம் கரோந்தஸ்ஸ அனாபத்தியா ப⁴விதப்³ப³ம். கஸ்மா? திவங்கே³ஸு ஏகஸ்ஸ பரிஹீனத்தா, தஸ்மா திவங்க³பா⁴வோ ஆபத்தியா, அங்க³ஹானிபா⁴வோ அனாபத்தியாதி க³ஹேதப்³ப³ம். ஏத்த² ஸியா – யதி³ அங்க³ஹானிபா⁴வேன அனாபத்தி, ஏவம் ஸந்தேபி விகாரம் அகத்வா சித்தேனேவ விஸ்ஸஜ்ஜேந்தஸ்ஸ அனாபத்தியா ப⁴விதப்³ப³ந்தி? தம் ந, கஸ்மா? அட்ட²கதா²யம் ‘‘காயவிகாரம் வா வசீபே⁴த³ம் வா அகரோந்தஸ்ஸேவ பன ஆபஜ்ஜனதோ அகிரிய’’ந்தி ஹி வுத்தம், ‘‘சித்தம் வா அனுப்பாதே³ந்தஸ்ஸ வா’’தி ந வுத்தம், தஸ்மா சித்தஞ்ச நாம விஞ்ஞத்திபடிப³த்³த⁴ம் ஏவாதி விஸும் அங்க³பா⁴வேனேவ வுத்தத்தா ஜானிதப்³ப³ந்தி சே? தம் ந, த்³வின்னம்யேவ அகிரியாதி, தஸ்மா சித்தேன விஸ்ஸஜ்ஜேந்தஸ்ஸாபி ஆபத்தி விய தி³ஸ்ஸதி, உபபரிக்கி²த்வா க³ஹேதப்³ப³ம். தத்த² ‘‘அகுஸலசித்த’’ந்தி வுத்தந்தி சே? ‘‘சித்தபா³ஹுல்லதோ வுத்த’’ந்தி வத³ந்தி. தேபி கிர பா³ஹுல்லதோ வத³ந்தி.

பட²மஸங்க⁴பே⁴த³ஸிக்கா²பத³வண்ணனா நிட்டி²தா.

11. து³தியஸங்க⁴பே⁴த³ஸிக்கா²பத³வண்ணனா

422. ஸஞ்ஞீதி ஸஞ்ஞினோ.

து³தியஸங்க⁴பே⁴த³ஸிக்கா²பத³வண்ணனா நிட்டி²தா.

12. து³ப்³ப³சஸிக்கா²பத³வண்ணனா

424. பதம் பதிதம் விவரி விவட்டயி. ஏகதோ உஸ்ஸாரேதி ச கி³ளிததோ ட²பேதி ச. ஏகபம்ஸுது²பகனதீ³ஸங்க²ம் தீ³க⁴மூலகபண்ணஸேவாலம் ஸேவாலம் த³ண்டி³ஸிபிப்பரிம் பணகம் பேஸிட்டி²ம் நிஸ்ஸாரேதி. திலபீ³ஜகந்தி ஸுகு²மமூலபண்ணகம் ஹுத்வா உத³கபிட்டே² பத்த²ரிகம் உத³கபப்படகம் நிஸ்ஸாரேதி.

425-6. ‘‘து³ப்³ப³ச்சஜாதிகோ’’திபி பட²ந்தி. அபதா³னேனாதி புராணகம்மேன. ‘‘கிம் புப்³பே³பி மயம் ஏவரூபம் கரோமாதிஆதி³னா ஏகூனவீஸதீ’’தி மஹாபச்சரியம் கிர வுத்தம். மஹாஅட்ட²கதா²யஞ்ச அனுமானஸுத்தட்ட²கதா²யஞ்ச ‘‘ஸோளஸவத்து²கா’’தி வுத்தம், தம் ஸமேதி.

து³ப்³ப³சஸிக்கா²பத³வண்ணனா நிட்டி²தா.

13. குலதூ³ஸகஸிக்கா²பத³வண்ணனா

431. ந கேவலம் விஹாரோ ஏவ கீடாகி³ரி, ஸோபி கா³மோ ‘‘கீடாகி³ரி’’ச்சேவ வுச்சதி. கா³மஞ்ஹி ஸந்தா⁴ய பரதோ ‘‘ந அஸ்ஸஜிபுனப்³ப³ஸுகேஹி பி⁴க்கூ²ஹி கீடாகி³ரிஸ்மிம் வத்த²ப்³ப³’’ந்தி வுத்தம். ஏகஸம்வச்ச²ரே த்³விக்க²த்தும் வஸ்ஸதி கிர, தம் ஸந்தா⁴ய ‘‘த்³வீஹி மேகே⁴ஹீ’’தி வுத்தம். ஸமதி⁴கந்தி ச² ஜனே ஸந்தா⁴ய. அகதவத்து²ந்தி நவம் அட்டு²ப்பத்திம். ‘‘ஜாபி⁴ஸுமனாதி³க³ச்ச²ம் அல்லானம் ஹரிதானம் ஏவா’’தி லிகி²தம். பூ⁴தகா³மபீ³ஜகா³மபே⁴த³தோ பனேஸ பே⁴தோ³. வதத்தா²யாதி வதிஅத்தா²ய. யம்கிஞ்சீதி ஸோத³கம் வா நிருத³கம் வா. ஆராமாதி³அத்தா²யாதி வனராஜிகாதி³அத்தா²ய. மாலாவச்ச²ரோபனம் குலதூ³ஸகம்யேவ ஸந்தா⁴ய, க³ந்த²னாதி³ஸப்³ப³ம் ந ஸந்தா⁴ய வுத்தந்தி. கத²ம் பஞ்ஞாயதீதி சே? தம் த³ஸ்ஸேதும் ‘‘பு³த்³தே⁴ன த⁴ம்மோ’’திஆதி³. ‘‘ஆவேளம் ஆபி³ள’’ந்திபி பாடோ².

கோ³ப்ப²னந்தி க³ந்த²னம். வேடி²மந்தி தக்³க³திகமேவ. வேதி⁴மம் அஞ்ஞேன கேனசி புப்ப²ம் வேதே⁴த்வா கதம். கண்டகம்பி ப³ந்தி⁴துந்தி ஏத்த² ‘‘ஸயம் விஜ்ஜ²னத்த²ம் ந வட்டதி. அஞ்ஞஸ்ஸத்தா²ய வட்டதீ’’தி வத³ந்தி. ஜாலமயம் விதானம் ஜாலவிதானம். புப்ப²படிச்ச²கம் க³வக்க²ம் விய ஸசி²த்³த³ம் கரோந்தி. தாலபண்ணகு³ளகந்தி தாலபண்ணமயம் புன கதம்பி படிசி²ஜ்ஜகமேவ. த⁴ம்மரஜ்ஜு சேதியம் வா போ³தி⁴ம் வா புப்ப²ப்பவேஸனத்த²ம் ஆவிஜ்ஜி²த்வா ப³த்³த⁴ரஜ்ஜு. ‘‘காஸாவேன ப³த்³த⁴ம்பி ஸுத்தவாகாதீ³ஹி ப³த்³த⁴ம் ப⁴ண்டி³தஸதி³ஸ’’ந்தி லிகி²தம். அம்ஸப⁴ண்டி³கம் பஸிப்³ப³கே பக்கி²த்தஸதி³ஸத்தா வேதி⁴மம் ந ஜாதம், தஸ்மா ‘‘ஸிதி²லப³த்³த⁴ஸ்ஸ அந்தரந்தரா பக்கி²பிதும் ந வட்டதீ’’தி வத³ந்தி. ‘‘அஞ்ஞமஞ்ஞம் அபு²ஸாபேத்வா அனேகக்க²த்தும்பி பரிக்கி²பிதும் வட்டதீ’’தி வத³ந்தி. பூரிதந்தி தீ³க⁴தோ பஸாரேத்வா பூரிதம். க⁴டிகதா³மஓலம்ப³கோதி ‘‘யமகதா³மஓலம்ப³கோ’’தி லிகி²தம். ‘‘கே³ண்டு³க²ரபத்ததா³மானம் படிக்கி²த்தத்தா சேலாதீ³ஹி கததா³மம்பி ந வட்டதி அகப்பியானுலோமத்தா’’தி வத³ந்தி.

‘‘ரேசகம் நாம ததா²லாஸியனாடனடானம் நச்ச’’ந்தி லிகி²தம். தம் ‘‘பரிவத்தந்தீ’’தி வுத்தம். ‘‘ஸாரியோ நாம ருதஸுனகா² ஸிங்கா³லகம்மகுருங்க³கேளிபனே டி²தா’’தி கிர பாடோ². ‘‘நிபு³ஜ்ஜ²ந்தீ’’தி பாளி.

432. அப³லப³லாதி³-பதா³னம் உப்படிபாடியா. யதா² பாமோக்கா²னம் வஸேன ஸப்³பே³பி ‘‘அஸ்ஸஜிபுனப்³ப³ஸுகா’’தி வுத்தா, ததா² பாமோக்க²ப்பத்தஸாவகஸ்ஸ வஸேன ததா³யத்தவுத்தினே ஸப்³பே³பி ‘‘ஸாரிபுத்தா’’தி. தேன வுத்தம் ‘‘க³ச்ச²த² தும்ஹே ஸாரிபுத்தா’’தி.