2. காயஸம்ஸக்³க³ஸிக்கா²பத³வண்ணனா

270. ‘‘ஓதிண்ணோ’’தி இமினாஸ்ஸ ஸேவனாதி⁴ப்பாயதா த³ஸ்ஸிதா. ‘‘விபரிணதேன சித்தேன மாதுகா³மேன ஸத்³தி⁴’’ந்தி இமினாஸ்ஸ வாயாமோ த³ஸ்ஸிதோ. ‘‘ஸத்³தி⁴’’ந்தி ஹி பத³ம் ஸம்யோக³ம் தீ³பேதி, ஸோ ச பயோகோ³ ஸமாக³மோ அல்லீயனம். கேன சித்தேன? விபரிணதேன சித்தேன, ந பத்தபடிக்³க³ஹணாதி⁴ப்பாயாதி³னாதி அதி⁴ப்பாயோ. ‘‘காயஸம்ஸக்³க³ம் ஸமாபஜ்ஜேய்யா’’தி இமினாஸ்ஸ வாயமதோ ப²ஸ்ஸபடிவிஜானனா த³ஸ்ஸிதா ஹோதி. வாயமித்வா ப²ஸ்ஸம் படிவிஜானந்தோ ஹி ஸமாபஜ்ஜதி நாம. ஏவமஸ்ஸ திவங்க³ஸம்பத்தி த³ஸ்ஸிதா ஹோதி. அத² வா ஓதிண்ணோ. கேன? விபரிணதேன சித்தேன யக்கா²தி³னா ஸத்தோ விய. உபயோக³த்தே² வா ஏதம் கரணவசனம். ஓதிண்ணோ விபரிணதம் சித்தம் கூபாதி³ம் விய ஸத்தோ. அத² வா ‘‘ராக³தோ உத்திண்ணோ ப⁴விஸ்ஸாமீ’’தி பி⁴க்கு²பா⁴வம் உபக³தோ, ததோ உத்திண்ணாதி⁴ப்பாயதோ விபரிணதேன சித்தேன ஹேதுபூ⁴தேன தமேவ ராக³ம் ஓதிண்ணோ. மாதுகா³மேன அத்தனோ ஸமீபம் ஆக³தேன, அத்தனா உபக³தேன வா. ஏதேன மாதுகா³மஸ்ஸ ஸாரத்ததா வா ஹோது விரத்ததா வா, ஸா இத⁴ அப்பமாணா, ந பி⁴க்கு²னீனம் காயஸம்ஸக்³கே³ விய உபி⁴ன்னம் ஸாரத்ததாய பயோஜனம் அத்தி².

காயஸம்ஸக்³க³ந்தி உபி⁴ன்னம் காயானம் ஸம்பயோக³ம். பத³பா⁴ஜனே பன ‘‘ஸமாபஜ்ஜேய்யாதி அஜ்ஜா²சாரோ வுச்சதீ’’தி வுத்தம், தம் ஸமாபஜ்ஜனம் ஸந்தா⁴ய, ந காயஸம்ஸக்³க³ம். காயஸம்ஸக்³க³ஸ்ஸ ஸமாபஜ்ஜனா ஹி ‘‘அஜ்ஜா²சாரோ’’தி வுச்சதி. அட்ட²கதா²யம் பன ‘‘யோ ஸோ காயஸம்ஸக்³கோ³ நாம, ஸோ அத்த²தோ அஜ்ஜா²சாரோ ஹோதீ’’தி வுத்தம், தம் பரதோ பாளியம் ‘‘ஸேவனாதி⁴ப்பாயோ, ந ச காயேன வாயமதி, ப²ஸ்ஸம் படிவிஜானாதி, அனாபத்தீ’’தி (பாரா. 279) வுத்தலக்க²ணேன விருஜ்ஜ²தீதி. ப²ஸ்ஸபடிவிஜானனாய ஹி ஸம்ஸக்³கோ³ தீ³பிதோ. ஸோ சே அஜ்ஜா²சாரோ ஹோதி, கத²ம் அனாபத்தி ஹோதீதி. ஸுவுத்தமேதம், கிந்து ‘‘காயஸம்ஸக்³க³ம் ஸமாபஜ்ஜேய்யா’’தி பத³ம் உத்³த⁴ரித்வா ‘‘அஜ்ஜா²சாரோ வுச்சதீ’’தி உபி⁴ன்னம்பி பதா³னம் ஸாமஞ்ஞபா⁴ஜனீயத்தா, ஸமாபஜ்ஜிதப்³பா³பா⁴வே ஸமாபஜ்ஜனாபா⁴வேன ‘‘ஸோ அத்த²தோ அஜ்ஜா²சாரோ ஹோதீ’’தி வுத்தம் ஸியா.

‘‘ஹத்த²க்³கா³ஹம் வா’’தி ஏத்த² ஹத்தே²ன ஸப்³போ³பி உபாதி³ன்னகோ காயோ ஸங்க³ஹிதோ, ந பி⁴ன்னஸந்தானோ தப்படிப³த்³தோ⁴ ஹத்தா²லங்காராதி³. வேணிக்³க³ஹணேன அனுபாதி³ன்னகோ அபி⁴ன்னஸந்தானோ கேஸலோமனக²த³ந்தாதி³கோ கம்மபச்சயஉதுஸமுட்டா²னோ க³ஹிதோதி வேதி³தப்³ப³ம். தேனேவாஹ அட்ட²கதா²யம் ‘‘அனுபாதி³ன்னகேனபி கேனசி கேஸாதி³னா உபாதி³ன்னகம் வா அனுபாதி³ன்னகம் வா பு²ஸந்தோபி ஸங்கா⁴தி³ஸேஸம் ஆபஜ்ஜதியேவா’’தி (பாரா. அட்ட². 2.274). தேன அனுபாதி³ன்னகானம்பி கேஸலோமாதீ³னம் அங்க³பா⁴வோ வேதி³தப்³போ³. ஏவம் ஸந்தேபி ‘‘ப²ஸ்ஸம் படிஜானாதீதி திவங்க³ஸம்பத்தியா ஸங்கா⁴தி³ஸேஸோ. ப²ஸ்ஸஸ்ஸ அப்படிவிஜானனதோ து³வங்க³ஸம்பத்தியா து³க்கட’’ந்தி இமினா பாளிஅட்ட²கதா²னயேன விருஜ்ஜ²தீதி சே? ந, தத³த்த²ஜானனதோ. பு²ட்ட²பா⁴வஞ்ஹி படிவிஜானந்தோபி ப²ஸ்ஸம் படிவிஜானாதி நாம, அயமேகோ அத்தோ², தஸ்மா மாதுகா³மஸ்ஸ, அத்தனோ ச காயபரியாபன்னானம் கேஸாதீ³னம் அஞ்ஞமஞ்ஞம் பு²ட்ட²பா⁴வம் பு²ஸித்வா தம் ஸாதி³யனம் ப²ஸ்ஸம் படிவிஜானாதி நாம, ந காயவிஞ்ஞாணுப்பத்தியா ஏவ. அனேகந்திகஞ்ஹேத்த² காயவிஞ்ஞாணம். மாதுகா³மஸ்ஸ உபாதி³ன்னகேன காயேன, அனுபாதி³ன்னகேன வா காயேன பி⁴க்கு²னோ உபாதி³ன்னககாயே பு²ட்டே² பஸன்னகாயிந்த்³ரியோ சே ஹோதி, தஸ்ஸ காயவிஞ்ஞாணம் உப்பஜ்ஜதி, தேனேவ ப²ஸ்ஸம் படிவிஜானாதி நாம ஸோ ஹோதி. அனுபாதி³ன்னககாயோ, லோலுப்போ அப்பஸன்னகாயிந்த்³ரியோ வா ஹோதி, திமிரவாதேன உபஹதகாயோ வா தஸ்ஸ காயவிஞ்ஞாணம் நுப்பஜ்ஜதி. ந ச தேன ப²ஸ்ஸம் படிவிஜானாதி நாம, கேவலம் ஸேவனாதி⁴ப்பாயேன வாயமித்வா காயஸம்ஸக்³க³ம் ஸமாபஜ்ஜந்தோ ப²ஸ்ஸம் படிவிஜானாதி நாம மனோவிஞ்ஞாணேன, தேன வுத்தம் ‘‘காயஸம்ஸக்³க³ம் ஸமாபஜ்ஜேய்யாதி இமினாஸ்ஸ வாயமதோ ப²ஸ்ஸபடிவிஜானனா த³ஸ்ஸிதா’’தி. அபரோபி பி⁴க்கு² மாதுகா³மஸ்ஸ காயபடிப³த்³தே⁴ன வா நிஸ்ஸக்³கி³யேன வா பு²ட்டோ² காயவிஞ்ஞாணம் உப்பாதே³ந்தேன ப²ஸ்ஸம் படிவிஜானாதி நாம, தஸ்மா வுத்தம் ‘‘அனேகந்திகஞ்ஹேத்த² காயவிஞ்ஞாண’’ந்தி. அபரோ வத்த²ம் பாருபித்வா நித்³தா³யந்தம் மாதுகா³மம் காயஸம்ஸக்³க³ராகே³ன வத்த²ஸ்ஸ உபரிபா⁴கே³ ஸணிகம் பு²ஸந்தோ வத்த²ந்தரேன நிக்க²ந்தலோமஸம்ப²ஸ்ஸம் அப்படிவிஜானந்தோபி ஸேவனாதி⁴ப்பாயோ காயேன வாயமித்வா ப²ஸ்ஸம் படிவிஜானாதி நாம, ஸங்கா⁴தி³ஸேஸம் ஆபஜ்ஜதி. ‘‘நீலம் க⁴ட்டேஸ்ஸாமீதி காயம் க⁴ட்டேதி, ஸங்கா⁴தி³ஸேஸோ’’தி ஹி வுத்தம். அயம் து³தியோ அத்தோ². ஏவம் அனேகத்த²த்தா, ஏவம் து³விஞ்ஞேய்யாதி⁴ப்பாயதோ ச மாதிகாட்ட²கதா²யம் ப²ஸ்ஸபடிவிஜானனம் அங்க³ந்த்வேவ ந வுத்தம். தஸ்மிஞ்ஹி வுத்தே டா²னமேதம் விஜ்ஜதி, யம் பி⁴க்கு² ஸங்கா⁴தி³ஸேஸம் ஆபஜ்ஜித்வாபி நகே²ன லோமேன ஸம்ஸக்³கோ³ தி³ட்டோ², ந ச மே லோமக⁴ட்டனேன காயவிஞ்ஞாணம் உப்பன்னம், திமிரவாதத²த்³த⁴க³த்தோ சாஹம் ந ப²ஸ்ஸம் படிவிஜானாமீதி அனாபன்னஸஞ்ஞீ ஸியாதி ந வுத்தம், அபிச ‘‘ப²ஸ்ஸம் படிவிஜானாதி, ந ச ப²ஸ்ஸம் படிவிஜானாதீ’’தி ச ஏதேஸம் பதா³னம் அட்ட²கதா²யம் வுத்தனயம் த³ஸ்ஸேத்வா ஸோ பஞ்ஞாபேதப்³போ³. ஏத்தாவதா ந தத³த்த²ஜானனதோதி காரணம் வித்தா²ரிதம் ஹோதி.

பத³பா⁴ஜனீயவண்ணனா

271. ‘‘ரத்தம் சித்தம் இமஸ்மிம் அத்தே² அதி⁴ப்பேதம் விபரிணத’’ந்தி கிஞ்சாபி ஸாமஞ்ஞேன வுத்தம், வினீதவத்தூ²ஸு ‘‘மாதுயா மாதுபேமேன ஆமஸதி…பே… ஆபத்தி து³க்கடஸ்ஸா’’தி வுத்தத்தா காயஸம்ஸக்³க³ராகே³னேவ ரத்தந்தி வேதி³தப்³ப³ம். ததா² ‘‘மாதுகா³மோ நாம மனுஸ்ஸித்தீ²’’தி கிஞ்சாபி அவிஸேஸேன வுத்தம், அத² கோ² அவினட்டி²ந்த்³ரியாவ மனுஸ்ஸித்தீ² இதா⁴தி⁴ப்பேதா ‘‘மதித்தி²யா காயஸம்ஸக்³க³ம் ஸமாபஜ்ஜி…பே… ஆபத்தி து²ல்லச்சயஸ்ஸா’’தி வுத்தத்தா. ‘‘மனுஸ்ஸித்தீ²’’தி ஏத்தாவதா ஸித்³தே⁴ ‘‘ந யக்கீ² ந பேதீ ந திரச்சா²னக³தா’’தி வசனம் அவினட்டி²ந்த்³ரியாபி ந ஸப்³பா³ மனுஸ்ஸவிக்³க³ஹா இத்தீ² இத⁴ மனுஸ்ஸித்தீ² நாம. யக்கி²ஆத³யோ ஹி அத்தனோ ஜாதிஸித்³தே⁴ன இத்³தி⁴விஸேஸேன இஜ்ஜ²ந்தியோ மனுஸ்ஸவிக்³க³ஹாபி ஹோந்தீதி த³ஸ்ஸனத்த²ம் வுத்தம். தாஸு யக்கீ² து²ல்லச்சயவத்து² ஹோதி வினீதவத்தூ²ஸு யக்கி²யா காயஸம்ஸக்³கே³ன து²ல்லச்சயஸ்ஸ வுத்தத்தா. தத³னுலோமத்தா பேதித்தீ², தே³வித்தீ² ச து²ல்லச்சயவத்து². திரச்சா²னக³தித்தீ² து³க்கடவத்து². திரச்சா²னக³தமனுஸ்ஸவிக்³க³ஹித்தீ² ச து²ல்லச்சயவத்து²மேவாதி ஏகே. விப⁴ங்கே³ பன ‘‘மனுஸ்ஸித்தீ² ச ஹோதி மனுஸ்ஸித்தி²ஸஞ்ஞீ’’தி பாளியா அபா⁴வேன ‘‘இத்தீ² ச ஹோதி யக்கி²ஸஞ்ஞீ’’திஆதி³வசனே ஸதி யக்கி²ஆதீ³னம் அனித்தி²தாபஸங்க³தோ, ‘‘இத்தீ² ச ஹோதி இத்தி²ஸஞ்ஞீ’’திஆதி³ம்ஹி யக்கி²ஆதீ³னம் அந்தோகரணே ஸதி தாஸம் ஸங்கா⁴தி³ஸேஸவத்து²பா⁴வப்பஸங்க³தோ ச யக்கி²ஆத³யோ ந வுத்தாதி வேதி³தப்³பா³. ஏகே பன ‘‘வினீதவத்து²ம்ஹி ‘அஞ்ஞதரோ பி⁴க்கு² திரச்சா²னக³தித்தி²யா காய…பே… து³க்கடஸ்ஸா’தி ஏத்த² அமனுஸ்ஸவிக்³க³ஹா பாகதிகதிரச்சா²னக³தித்தீ² அதி⁴ப்பேதா, தஸ்மா து³க்கடம் வுத்தம். ‘இத்தீ² ச ஹோதி திரச்சா²னக³தஸஞ்ஞீதி திரச்சா²னக³தா ச ஹோதி இத்தி²ஸஞ்ஞீ’திஆதி³வாரேஸுபி பாகதிகதிரச்சா²னக³தோவ அதி⁴ப்பேதோ, ஸோ ச திரச்சா²னக³தபுரிஸோவ. தேனேவ து³ட்டு²ல்லவாசாஅத்தகஆமபாரிசரியஸிக்கா²பதே³ஸு மனுஸ்ஸபுரிஸபடிஸம்யுத்தவாரா விய திரச்சா²னபடிஸம்யுத்தவாராபி நாக³தா’’தி வத³ந்தி. ததா² பண்ட³கோதி இத⁴ மனுஸ்ஸபண்ட³கோவ, புரிஸோதி ச இத⁴ மனுஸ்ஸபுரிஸோவ ஆக³தோ, தஸ்மா அமனுஸ்ஸித்தீ² அமனுஸ்ஸபண்ட³கோ அமனுஸ்ஸபுரிஸோ திரச்சா²னக³தித்தீ² திரச்சா²னக³தபண்ட³கோ மனுஸ்ஸாமனுஸ்ஸதிரச்சா²னக³தஉப⁴தோப்³யஞ்ஜனகா சாதி அட்ட² ஜனா இத⁴ நாக³தா, தேஸம் வஸேன வத்து²ஸஞ்ஞாவிமதிபே⁴த³வஸேன ஆபத்திபே⁴தா³பே⁴த³வினிச்ச²யோ, அனாக³தவாரக³ணனா ச அஸம்முய்ஹந்தேன வேதி³தப்³பா³, ததா² தேஸம் து³கமிஸ்ஸகாதி³வாரா, ஆபத்திஅனாபத்திபே⁴த³வினிச்ச²யோ ச. ‘‘தத்த² அமனுஸ்ஸபண்ட³கஅமனுஸ்ஸபுரிஸதிரச்சா²னக³தித்தி²திரச்சா²னக³தபண்ட³காதி சத்தாரோ து³க்கடவத்து²கா, அமனுஸ்ஸித்தி²மனுஸ்ஸஉப⁴தோப்³யஞ்ஜனகா து²ல்லச்சயவத்து²கா, அமனுஸ்ஸஉப⁴தோப்³யஞ்ஜனகா திரச்சா²னக³தஉப⁴தோப்³யஞ்ஜனகா து³க்கடவத்து²கா, பாளியம் பன அமனுஸ்ஸித்தி²யா அனாக³தத்தா அமனுஸ்ஸபண்ட³கா, உப⁴தோப்³யஞ்ஜனகா புரிஸா ச நாக³தா. திரச்சா²னக³தித்தி²பண்ட³கஉப⁴தோப்³யஞ்ஜனகா திரச்சா²னக³தபுரிஸேன ஸமானக³திகத்தா நாக³தா, மனுஸ்ஸஉப⁴தோப்³யஞ்ஜனகோ மனுஸ்ஸபண்ட³கேன ஸமானக³திகத்தா அனாக³தோ’’தி வத³ந்தி. அட்ட²கதா²யம் (பாரா. அட்ட². 2.281) பன ‘‘நாக³மாணவிகாயபி ஸுபண்ணமாணவிகாயபி கின்னரியாபி கா³வியாபி து³க்கடமேவா’’தி வுத்தத்தா ததே³வ பமாணதோ க³ஹேதப்³ப³ம்.

தத்ராயம் விசாரணா – ‘‘ந, பி⁴க்க²வே, திரச்சா²னக³தஸ்ஸ நிஸின்னபரிஸாய பாதிமோக்க²ம் உத்³தி³ஸிதப்³ப³’’ந்தி (மஹாவ. 183) ஏத்த² ‘‘திரச்சா²னக³தோதி யஸ்ஸ உபஸம்பதா³ படிக்கி²த்தா’’தி (கங்கா². அட்ட². நிதா³னவண்ணனா) அட்ட²கதா²யம் வுத்தத்தா திரச்சா²னக³தமனுஸ்ஸவிக்³க³ஹோ பாகதிகதிரச்சா²னக³ததோ விஸிட்டோ², ததா² யக்க²பேததிரச்சா²னக³தமனுஸ்ஸவிக்³க³ஹானம் ‘‘திரச்சா²னக³தஸ்ஸ ச து³க்கு²ப்பத்தியம் அபிச து³க்கடமேவா’’தி ஏத்த² விஸேஸேத்வா வுத்தத்தா ச ‘‘பதனரூபம் பமாணம், ந மரணரூப’’ந்தி ஏத்த² ஆபத்திவிஸேஸவசனதோ ச ‘‘உப⁴தோ அவஸ்ஸுதே யக்க²ஸ்ஸ வா பேதஸ்ஸ வா பண்ட³கஸ்ஸ வா திரச்சா²னக³தமனுஸ்ஸவிக்³க³ஹஸ்ஸ வா அத⁴க்க²கம் உப்³ப⁴ஜாணுமண்ட³லம் காயேன காயம் ஆமஸதி, ஆபத்தி து²ல்லச்சயஸ்ஸா’’தி (பாசி. 661) ஸாமஞ்ஞேன வசனதோ ச ஸோ விஸிட்டோ²தி ஸித்³த⁴ம். விஸிட்ட²த்தா ச திரச்சா²னக³தமனுஸ்ஸவிக்³க³ஹித்தி²யா காயஸம்ஸக்³க³ம் ஸமாபஜ்ஜந்தஸ்ஸாதி விஸேஸோ ஹோதி, தஸ்மா தத்த² ஆபத்திவிஸேஸேன ப⁴விதப்³ப³ம். யதி³ காயஸம்ஸக்³க³ஸிக்கா²பதே³ திரச்சா²னக³தமனுஸ்ஸவிக்³க³ஹித்தீ²பி அதி⁴ப்பேதா, ரூபஸாமஞ்ஞேன ஸஞ்ஞாவிராக³த்தாஸம்ப⁴வதோ து³ட்டு²ல்லவாசாஅத்தகாமபாரிசரியஸிக்கா²பதே³ஸுபி ஸா வத்தப்³பா³ ப⁴வேய்ய, ஸா சானாக³தா. ஸரூபேன ஸம்கி²த்தவாரத்தா நாக³தாதி சே? இத்தீ² ச ஹோதி திரச்சா²னக³தோ ச உபி⁴ன்னம் இத்தி²ஸஞ்ஞீதி இத⁴ ஆக³தத்தா புரிஸலிங்க³னித்³தே³ஸோ ந யுஜ்ஜதி, தஸ்மா திரச்சா²னக³தபுரிஸோ ச இத⁴ ஆக³தோ, திரச்சா²னக³தமனுஸ்ஸவிக்³க³ஹித்தி²யா பாளியம் அனாக³தாயபி து³க்கடமேவ அட்ட²கதா²யம் வுத்தத்தாதி இமஸ்ஸ வசனஸ்ஸ காரணச்சா²யா பரியேஸிதப்³பா³தி அதி⁴ப்பாயோ. இத³ம் ந யுஜ்ஜதி. கஸ்மா? இத்தீ²னம், புரிஸானஞ்ச ஏகதோ வசனே புரிஸலிங்க³ஸப்³பா⁴வதோ. இத⁴ திரச்சா²னக³தபுரிஸபண்ட³கித்தி²யோ திஸ்ஸோபி ஏகதோ ஸம்பிண்டே³த்வா ‘‘திரச்சா²னக³தோ’’தி வுத்தம்.

தத்த² ச மனுஸ்ஸவிக்³க³ஹாமனுஸ்ஸவிக்³க³ஹேஸு இத்தி²பண்ட³கபுரிஸஸஞ்ஞிதா யதா²ஸம்ப⁴வம் வேதி³தப்³பா³. து³ட்டு²ல்லவாசாதி³ஸிக்கா²பத³த்³வயே வாரானம் ஸம்கி²த்தத்தா புரிஸதிரச்சா²னக³தாத³யோ நாக³தா. யதா²வுத்தேஸு ஆபத்தி, ததா² தத்தா²பி. அஞ்ஞதா² புரிஸம் ஓபா⁴ஸந்தஸ்ஸ ச அனாபத்தீதி பண்ட³கம் ஓபா⁴ஸந்தஸ்ஸ ச து²ல்லச்சயந்தி மாதிகாட்ட²கதா²யம் வுத்தம். தஸ்மா தே வாரா ஸம்கி²த்தாதி பஞ்ஞாயந்தீதி. விஸேஸோ ச பண்ட³கே, புரிஸே, திரச்சா²னக³தே ச இத்தி²ஸஞ்ஞிஸ்ஸ அத்தி², ததா²பி தத்த² து³க்கடம் வுத்தம், தஸ்மா அட்ட²கதா²யம் வுத்தமேவ பமாணந்தி த்³வின்னமேதேஸம் வாதா³னம் யத்த² யுத்தி வா காரணம் வா அதிரேகம் தி³ஸ்ஸதி, தம் விசாரேத்வா க³ஹேதப்³ப³ந்தி ஆரிசயோ. ஏவரூபேஸு டா²னேஸு ஸுட்டு² விசாரேத்வா கதே²தப்³ப³ம்.

தத்த² பாளியம் ஆக³தவாரக³ணனா தாவ ஏவம் ஸங்கே²பதோ வேதி³தப்³பா³ – இத்தி²மூலகா பஞ்ச வாரா பண்ட³கபுரிஸதிரச்சா²னக³தமூலகா ச பஞ்ச பஞ்சாதி வீஸதி வாரா ஏகமூலகா, ததா² து³மூலகா வீஸதி, மிஸ்ஸகமூலகா வீஸதீதி ஸட்டி² வாரா, தானி தீணி வீஸதிகானி ஹோந்தி. ஏகேகஸ்மிம் வீஸதிகே ஏகேகமூலவாரம் க³ஹேத்வா காயேன காயபடிப³த்³த⁴வாரா தயோ வுத்தா. ஸேஸா ஸத்தபஞ்ஞாஸ வாரா ஸம்கி²த்தா, ததா² காயபடிப³த்³தே⁴ன காயவாரா தயோ வுத்தா, ஸேஸா ஸம்கி²த்தா, ஏவம் காயபடிப³த்³தே⁴ன காயபடிப³த்³த⁴வாரேபி நிஸ்ஸக்³கி³யேன காயவாரேபி நிஸ்ஸக்³கி³யேன காயபடிப³த்³த⁴வாரேபி நிஸ்ஸக்³கி³யேன நிஸ்ஸக்³கி³யவாரேபி தயோ தயோ வாரா வுத்தா, ஸேஸா ஸம்கி²த்தா. ஏவம் ச²ன்னம் திகானம் வஸேன அட்டா²ரஸ வாரா ஆக³தாதி ஸரூபதோ வுத்தா, ஸேஸா த்³வேசத்தாலீஸாதி⁴கானி தீணி வாரஸதானி ஸம்கி²த்தானி. ததோ பரம் மாதுகா³மஸ்ஸ ஸாரத்தபக்கே² காயேன காயந்தி ஏகமேகம் வட்³டே⁴த்வா புப்³பே³ வுத்தா அட்டா²ரஸ வாரா ஆக³தாதி ஏகவீஸதி வாரா ஸரூபேன ஆக³தா, நவனவுதாதி⁴கானி தீணி வாரஸதானி ஸம்கி²த்தானி. ததோ பரம் ஆபத்தானாபத்திதீ³பகா சத்தாரோ ஸேவனாதி⁴ப்பாயமூலகா சத்தாரோ மோக்கா²தி⁴ப்பாயமூலகாதி த்³வே சதுக்கா ஆக³தா.

தத்தா²யம் விஸேஸோ – யதி³த³ம் மாதிகாய பராமஸனபத³ம், தேன யஸ்மா ஆமஸனாதீ³னி சு²பனபரியோஸானானி த்³வாத³ஸபி பதா³னி க³ஹிதானி, தஸ்மா பது³த்³தா⁴ரம் அகத்வா ‘‘ஆமஸனா பராமஸனம் சு²பன’’ந்தி ஆஹ. பராமஸனம் நாம ஆமஸனா. ‘‘சு²பன’’ந்தி ஹி வுத்தே பராமஸனம்பி விஸும் ஏகத்தம் ப⁴வேய்யாதி வேதி³தப்³ப³ம். இத்தீ² ச ஹோதி இத்தி²ஸஞ்ஞீ சாதி இமஸ்மிம் பட²மவாரே ஏவ த்³வாத³ஸபி ஆமஸனாதீ³னி யோஜேத்வா த³ஸ்ஸிதானி. ததோ பரம் ஆதி³ம்ஹி த்³வே பதா³னீதி சத்தாரி பதா³னி ஆக³தானி, இதரானி ஸம்கி²த்தானீதி வேதி³தப்³பா³னி. நிஸ்ஸக்³கி³யேன காயவாராதீ³ஸு பன ஸப்³பா³காரேன அலாப⁴தோ ஆமஸனமேவேகம் ஆக³தம், நேதரானி. ‘‘ஸஞ்சோபேதி ஹரதீ’’தி பாடோ², ஸஞ்சோபேதி ச. க³ண்டி²பதே³ஸு பன ‘‘புரிமனயேனேவாதி ரஜ்ஜுவத்தா²தீ³ஹி பரிக்கி²பனே’’தி ச பச்சா² ‘‘புரிமனயேனேவாதி ஸம்மஸனா ஹோதீ’’தி ச ‘‘வேணிக்³கா³ஹே ஆபத்தியா பஞ்ஞத்தத்தா லோமபு²ஸனேபி ஸங்கா⁴தி³ஸேஸோ’’தி ச ‘‘தம் பகாஸேதும் உபாதி³ன்னகேன ஹீதிஆதி³ வுத்த’’ந்தி ச லிகி²தம்.

யதா²னித்³தி³ட்ட²னித்³தே³ஸேதி இமஸ்மிம்யேவ யதா²னித்³தி³ட்டே² நித்³தே³ஸே. ‘‘ஸதி³ஸம் அக்³க³ஹேஸீ’’தி வுத்தே தாதி³ஸம் அக்³க³ஹேஸீதி க³ருகம் தத்த² காரயேதி அத்தோ², காயஸம்ஸக்³க³விப⁴ங்கே³ வாதி அத்தோ². இதரோபி காயபடிப³த்³த⁴சு²பனகோ. க³ஹணே சாதி க³ஹணம் வா. விராகி³தேதி விரத்³தே⁴. ஸாரத்தந்தி காயஸம்ஸக்³க³ராகே³ன ரத்தம், அத்தனா அதி⁴ப்பேதந்தி அத்தோ². ‘‘மாதுப⁴கி³னிஆதி³விரத்தம் க³ண்ஹிஸ்ஸாமீ’’தி விரத்தம் ஞாதிபேமவஸேன க³ண்ஹி, ஏத்த² து³க்கடம் யுத்தம். ‘‘காயஸம்ஸக்³க³ராக³ம் வா ஸாரத்தம் க³ண்ஹிஸ்ஸாமீ’’தி விரத்தம் மாதரம் க³ண்ஹி, அனதி⁴ப்பேதம் க³ண்ஹி. ஏத்த² மஹாஸுமத்தே²ரவாதே³ன து²ல்லச்சயம் ‘‘காயம் க³ண்ஹிஸ்ஸாமீ’’தி காயப்படிப³த்³த⁴ம் க³ண்ஹாதி, து²ல்லச்சயந்தி லத்³தி⁴கத்தா. ‘‘இத்தீ² ச ஹோதி இத்தி²ஸஞ்ஞீ ஸாரத்தோ ச, பி⁴க்கு² ச நம் இத்தி²யா காயேன காயம் ஆமஸதி, ஆபத்தி ஸங்கா⁴தி³ஸேஸஸ்ஸா’’தி (பாரா. 273) வசனதோ ஸங்கா⁴தி³ஸேஸோபி கா²யதி. ‘‘விரத்தம் க³ண்ஹிஸ்ஸாமீ’’தி ஸாரத்தம் க³ண்ஹாதி, ஏத்த²பி ஸங்கா⁴தி³ஸேஸோவ கா²யதி ‘‘நீலம் க⁴ட்டேஸ்ஸாமீ’தி காயம் க⁴ட்டேதி, ஸங்கா⁴தி³ஸேஸோ’’தி வசனதோ. ஏத்த² பன ‘‘ந புப்³ப³பா⁴கே³ காயஸம்ஸக்³க³ராக³த்தா’’தி அனுக³ண்டி²பதே³ காரணம் வுத்தம். கேசி பன ‘‘க³ருகாபத்திப⁴யேன ‘நீலமேவ க⁴ட்டேஸ்ஸாமீ’தி வாயாமந்தோ காயம் க⁴ட்டேதி, புப்³ப³பா⁴கே³ தஸ்ஸ ‘காயபடிப³த்³த⁴ம் க⁴ட்டேஸ்ஸாமீ’தி பவத்தத்தா து³க்கடேன ப⁴விதப்³ப³’’ந்தி வத³ந்தி. த⁴ம்மஸிரித்தே²ரோ ‘‘ஏவரூபே ஸங்கா⁴தி³ஸேஸோ’’தி வத³தி கிர. ‘‘இத்தி²உப⁴தோப்³யஞ்ஜனகஇத்தி²யா புரிஸஉப⁴தோப்³யஞ்ஜனகபுரிஸே வுத்தனயேன ஆபத்திபே⁴தோ³, இத்தி²லிங்க³ஸ்ஸ படிச்ச²ன்னகாலேபி இத்தி²வஸேனேவ ஆபத்தீ’’தி வத³ந்தி.

வினீதவத்து²வண்ணனா

281. திணண்டு³பகந்தி ஹிரிவேராதி³மூலானி க³ஹேத்வா கத்தப்³ப³ம். தாலபண்ணமுத்³தி³கந்தி தாலபண்ணமயம் அங்கு³லிமுத்³தி³கம், தேன தாலபண்ணமயம் கடம், கடிஸுத்தகம், கண்ணபிளந்த⁴னாதி³ ஸப்³ப³ம் ந வட்டதீதி ஸித்³த⁴ம். தம்ப³பண்ணிவாஸினோ இத்தி²ரூபம் லிகி²தம், கடிகபடஞ்ச ந சு²பந்தி கிர. ஆகரதோ முத்தமத்தோ. ரதனமிஸ்ஸோதி அலங்காரத்த²ம் கதோ கஞ்சனலதாதி³வினத்³தோ⁴. ஸுவண்ணேன ஸத்³தி⁴ம் யோஜேத்வா பசித்வாதி ஸுவண்ணரஸம் பக்கி²பித்வா பசித்வா. பீ³ஜதோ தா⁴துபாஸாணதோ பட்டா²ய. தே²ரோ ந கப்பதீதி ‘‘தும்ஹாகம் பேஸித’’ந்தி வுத்தத்தா. ‘‘சேதியஸ்ஸ பூஜம் கரோதா²’’தி வுத்தே வட்டதி கிர. பு³ப்³பு³ளகம் தாரகம். ஆரகூடலோஹம்பி ஜாதரூபக³திகமேவ.

வுத்தஞ்ஹேதம் அந்த⁴கட்ட²கதா²யம் –

‘‘ஆரகூடலோஹம் ஸுவண்ணஸதி³ஸமேவ, ஸுவண்ணம் அனுலோமேதி, அனாமாஸ’’ந்தி.

‘‘பே⁴ஸஜ்ஜத்தா²ய பன வட்டதீ’’தி வசனதோ மஹாஅட்ட²கதா²யம் வுத்தனயேகதே³ஸோபி அனுஞ்ஞாதோ ஹோதீதி தத்த² தத்த² அதி⁴ப்பாயம் ஞத்வா விபா⁴வேதப்³ப³ம்.

காயஸம்ஸக்³க³ஸிக்கா²பத³வண்ணனா நிட்டி²தா.