1. பட²மஅனியதஸிக்கா²பத³வண்ணனா

444-5. உத்³தே³ஸந்தி உத்³தி³ஸனம், ஆஸாள்ஹினக்க²த்தம் நாம வஸ்ஸூபக³மபூஜா. ஸோதஸ்ஸ ரஹோதி ஏத்த² ரஹோ-வசனஸாமஞ்ஞதோ வுத்தம் து³ட்டு²ல்லஸாமஞ்ஞதோ து³ட்டு²ல்லாரோசனப்படிச்சா²த³னஸிக்கா²பதே³ஸு பாராஜிகவசனம் விய. தஸ்மா ‘‘சக்கு²ஸ்ஸ ரஹேனேவ பன பரிச்சே²தோ³ காதப்³போ³’’தி வுத்தம். கத²ம் பஞ்ஞாயதீதி சே? ‘‘மாதுகா³மோ நாம தத³ஹுஜாதாபி தா³ரிகா’’தி வசனதோ, ‘‘அலம்கம்மனியேதி ஸக்கா ஹோதி மேது²னம் த⁴ம்மம் படிஸேவிது’’ந்தி வசனதோ ச ரஹோனிஸஜ்ஜஸ்ஸாதோ³ சேத்த² மேது²னஸன்னிஸ்ஸிதகிலேஸோ, ந து³தியே விய து³ட்டு²ல்லவாசஸ்ஸாத³கிலேஸோ, தஸ்மா ச பஞ்ஞாயதி ‘‘ஸோதஸ்ஸ ரஹோ நாதி⁴ப்பேதோ’’தி. கேசி பன ‘‘தஞ்ச லப்³ப⁴தீதி வசனஸ்ஸ த³ஸ்ஸனத்த²ம் வுத்தம், தேன து³தியே வுத்தா விஞ்ஞூ படிப³லா க³ஹிதா ஹோதீ’’தி வத³ந்தி. யேன வா ஸாதி ஏத்த² வா-ஸத்³தோ³ ‘‘தேன ஸோ பி⁴க்கு² காரேதப்³போ³ வா’’தி யோஜேதப்³போ³, ஸோ ச விகப்பத்தோ², தஸ்மா காரேதப்³போ³ வா படிஜானமானோ, ந வா காரேதப்³போ³ அப்படிஜானமானோதி அத்தோ². தேன வுத்தம் அட்ட²கதா²யம் ‘‘படிஜானமானோவ தேன ஸோ பி⁴க்கு² காரேதப்³போ³…பே… ந காரேதப்³போ³’’தி. தஸ்மா ஏவ பாளியம் தத³த்த²த்³வயத³ஸ்ஸனத்த²ம் ‘‘ஸா சே ஏவம் வதே³ய்யா’’திஆதி³ வுத்தம். ‘‘ஸத்³தே⁴ய்யவசஸா’’தி இமினா ஸோதாபன்னா அத்த²ப⁴ஞ்ஜனகம் ந ப⁴ணந்தி, ஸேஸம் ப⁴ணந்தீதி வாதீ³னம் வாதோ³ படிஸேதி⁴தோ ஹோதி. ‘‘தி³ட்ட²’’ந்தி வுத்தத்தா ‘‘ஓலோகேஸீ’’தி ஸுந்த³ரம். ரக்கே²ய்யாஸீதி மம விஸேஸம் கஸ்ஸசி நாரோசேய்யாஸீதி அதி⁴ப்பாயோ.

446. ‘‘ஸா சே ஏவம் வதே³ய்ய ‘அய்யஸ்ஸ மயா ஸுதம் நிஸின்னஸ்ஸ மாதுகா³மம் து³ட்டு²ல்லாஹி வாசாஹி ஓபா⁴ஸேந்தஸ்ஸா’’’தி, இத³ம் கிமத்த²மேத்த² வுத்தம், ந அதி⁴ப்பேதஞ்ஹேதம் இத⁴ ஸோதஸ்ஸ ரஹோ நாதி⁴ப்பேதோதி கத்வாதி சே? அலம்கம்மனியட்டா²னே து³ட்டு²ல்லவாசாபி லப்³ப⁴தி, ந பன நாலம்கம்மனியட்டா²னே மேது²னந்தி த³ஸ்ஸனத்த²ம் வுத்தந்தி வேதி³தப்³ப³ந்தி. யதா² ஏதம், ததா² ‘‘ஸா சே ஏவம் வதே³ய்ய ‘அய்யஸ்ஸ மயா ஸுதம் மாதுகா³மஸ்ஸ ஸந்திகே அத்தகாமபாரிசரியாய வண்ணம் பா⁴ஸந்தஸ்ஸா’’’தி ஏதம்பி இத⁴ லப்³ப⁴தி, ந து³தியே நாலம்கம்மனியட்டா²னத்தாதி ஏகே. கங்கா²விதரணியம் (கங்கா². அட்ட². து³தியானியதஸிக்கா²பத³வண்ணனா) இதா⁴பி து³தியானியதாதி⁴காரே பாராஜிகாபத்திஞ்ச பரிஹாபேத்வா து³ட்டு²ல்லவாசாபத்தியா வுத்தத்தா பட²மானியதே து³ட்டு²ல்லவாசாபத்தி ந வுத்தாதி சே? ‘‘ஸா சே’’தி தஸ்ஸா பாளியா போத்த²கா ஸோதே⁴தப்³பா³. க³ண்டி²பதே³ ச ‘‘இத⁴ ஸிக்கா²பதே³ மேது²னகாயஸம்ஸக்³க³ரஹோனிஸஜ்ஜானமேவாக³தத்தா சக்கு²ஸ்ஸரஹோவ பமாண’’ந்தி லிகி²தம், து³தியானியதாதி⁴காரே ச ‘‘அனந்தோ⁴ காயஸம்ஸக்³க³ம் பஸ்ஸதி, அப³தி⁴ரோ து³ட்டு²ல்லம் ஸுணாதி, காயசித்ததோ காயஸம்ஸக்³கோ³, வாசாசித்ததோ து³ட்டு²ல்லம், உப⁴யேஹி உப⁴ய’’ந்தி ச லிகி²தம். அட்ட²கதா²யம் ‘‘ஸமுட்டா²னாதீ³னி பட²மபாராஜிகஸதி³ஸானேவா’’தி வுத்தத்தாபி து³ட்டு²ல்லவாதோ³ ந ஸுந்த³ரோ ‘‘தத³ஹுஜாதா’’தி வுத்தத்தாதி.

பட²மஅனியதஸிக்கா²பத³வண்ணனா நிட்டி²தா.