2. து³தியஅனியதஸிக்கா²பத³வண்ணனா

453. து³தியே கேஸுசி போத்த²கேஸு ‘‘ந ஹேவ கோ² பன படிச்ச²ன்னம் ஆஸனம் ஹோதி ஆஸன’’ந்தி லிகி²தம். ‘‘ஆஸனந்தி அதி⁴கம், உத்³த⁴ரிதானுரூப’’ந்தி லிகி²தம். த்³வேபி ரஹா இத⁴ அதி⁴ப்பேதா காயஸம்ஸக்³க³து³ட்டு²ல்லவாசாரஹோனிஸஜ்ஜக்³க³ஹணதோ. யதி³ ஏவம் ‘‘மாதுகா³மோ நாம விஞ்ஞூ படிப³லா’’தி கிமத்த²ம் வுத்தந்தி? அயமேவ ஹி மாதுகா³மோ த்³வின்னம்பி காயஸம்ஸக்³க³து³ட்டு²ல்லவாசானம் ஏகதோ வத்து²பூ⁴தோ, தஸ்மா வுத்தம். காயஸம்ஸக்³க³ஸ்ஸ வத்து²பூ⁴தோ த³ஸ்ஸிதோ, ந இதரஸ்ஸாதி கத்வா து³ட்டு²ல்லவாசமேவ ஸந்தா⁴ய தஸ்ஸா வத்து²ம் த³ஸ்ஸேந்தோ ஏவமாஹ.

ஏத்தா²ஹ – யதா² பட²மே அனதி⁴ப்பேதாபி து³ட்டு²ல்லவாசா ஸம்ப⁴வவிஸேஸத³ஸ்ஸனத்த²ம் வுத்தா, இதா⁴பி காயஸம்ஸக்³கோ³, கஸ்மா ந தஸ்ஸ வஸேன சக்கு²ஸ்ஸ ரஹோ க³ஹேதப்³போ³தி? ஆம ந க³ஹேதப்³போ³, ந ச க³ஹிதோ, க³ஹிதோ ஏவ பன நிஸஜ்ஜவஸேன, ந ஹி அங்க³ஸ்ஸ நிஸஜ்ஜா விஸேஸோதி. அப்படிச்ச²ன்னே ஸதி கத²ம் சக்கு²ஸ்ஸ ரஹோதி சே? தூ³ரத்தா. பட²மே கஸ்மா இத்தி²ஸதம்பி அனாபத்திம் ந கரோதி, இத⁴ கஸ்மா ஏகாபி கரோதீதி சே? நோ வுச்சதி ஸித்³த⁴த்தா. ஸித்³த⁴ம் ஹோதி, யதி³த³ம் அஞ்ஞதரோ பி⁴க்கு² வேஸாலியம் மஹாவனே…பே… த்³வாரம் விவரித்வா நிபன்னோ ஹோதி…பே… ஸம்ப³ஹுலா இத்தி²யோ யாவத³த்த²ம் கத்வா பக்கமிம்ஸூதி (பாரா. 77). தஸ்மா ந மேது²னஸ்ஸ மாதுகா³மோ து³தியோ ஹோதி. இத்தி²யோ ஹி அஞ்ஞமஞ்ஞிஸ்ஸா வஜ்ஜம் படிச்சா²தே³ந்தி, தேனேவ பி⁴க்கு²னீனம் வஜ்ஜபடிச்சா²த³னே பாராஜிகம் பஞ்ஞத்தம். ததா² ‘‘ஆயஸ்மா உதா³யீ தா இத்தி²யோ விஹாரம் பேக்கா²பேத்வா தாஸம் இத்தீ²னம் வச்சமக்³க³’’ந்தி (பாரா. 283) ஏத்த² ‘‘யா பன தா இத்தி²யோ ஹிரிமனா, தா நிக்க²மித்வா பி⁴க்கூ² உஜ்ஜா²பேந்தீ’’தி (பாரா. 283) வசனதோ து³ட்டு²ல்லஸ்ஸ மாதுகா³மோ து³தியோ ஹோதீதி ஸித்³த⁴ந்தி அதி⁴ப்பாயோ. உப⁴யத்தா²பி உம்மத்தகாதி³கம்மிகானம் அனாபத்தீதி தேஸம் பாடேக்கம் நிதா³னே ஆக³தம், ஆதி³கம்மிகானம் அனாபத்தீதி அத்தோ². அனுக³ண்டி²பதே³ பன ‘‘அசேலகவக்³கே³ ரஹோபடிச்ச²ன்னாஸனஸிக்கா²பதே³ ‘விஞ்ஞூ புரிஸோ து³தியோ ஹோதீ’தி (பாசி. 288) இமஸ்ஸ அனுரூபதோ ‘இத்தீ²னம் ஸதம்பி அனாபத்திம் ந கரோதீ’தி வுத்த’’ந்தி ச, ‘‘து³தியானியதே ‘இத்தீ²பி புரிஸோபீ’தி இத³ம் பி⁴க்கு²னீவக்³கே³ ஓஸானஸிக்கா²பத³ஸ்ஸ, அசேலகவக்³கே³ அப்படிச்ச²ன்னாஸனஸிக்கா²பத³ஸ்ஸ ச அனாபத்திவாரே ‘யோ கோசி விஞ்ஞூ புரிஸோ து³தியோ’தி வுத்தம். இமேஸம் அனுரூபதோ வுத்தந்தி வேதி³தப்³ப³’’ந்தி ச வுத்தம்.

து³தியஅனியதஸிக்கா²பத³வண்ணனா நிட்டி²தா.

பகிண்ணகவண்ணனா

அபிசேத்த² இத³ம் பகிண்ணகம், ஸேய்யதி²த³ம் – இத³ம் அனியதகண்ட³ம் நிப்பயோஜனம் அபுப்³பா³பா⁴வதோதி சே? ந, க³ருகலஹுகபே⁴த³பி⁴ன்னாபத்திரோபனாரோபனக்கமலக்க²ணதீ³பனப்பயோஜனதோ. ஏத்த² ஹி ‘‘ஸா சே ஏவம் வதே³ய்ய ‘அய்யோ மயா தி³ட்டோ² நிஸின்னோ மாதுகா³மஸ்ஸ மேது²னம் த⁴ம்மம் படிஸேவந்தோ’தி, ஸோ ச தம் படிஜானாதி, ஆபத்தியா காரேதப்³போ³…பே… நிஸஜ்ஜாய காரேதப்³போ³’’திஆதி³னா (பாரா. 446) ஆபத்தியா க³ருகாய லஹுகாய ச ரோபனக்கமலக்க²ணம், காரேதப்³போ³தி இமினா அனாரோபனக்கமலக்க²ணஞ்ச த³ஸ்ஸிதம். லக்க²ணதீ³பனதோ ஆதி³ம்ஹி, அந்தே வா உத்³தி³ஸிதப்³ப³ந்தி சே? ந, அஸம்ப⁴வதோ. கத²ம்? ந தாவ ஆதி³ம்ஹி ஸம்ப⁴வதி, யேஸமித³ம் லக்க²ணம், தேஸம் ஸிக்கா²பதா³னம் அத³ஸ்ஸிதத்தா. ந அந்தே, க³ருகமிஸ்ஸகத்தா, தஸ்மா க³ருகலஹுகானம் மஜ்ஜே² ஏவ உத்³தி³ஸிதப்³ப³ந்தி அரஹதி உப⁴யாமிஸ்ஸகத்தா. யா தத்த² லஹுகாபத்தி த³ஸ்ஸிதா, ஸாபி க³ருகாதி³கா. தேனேவாஹ ‘‘மேது²னத⁴ம்மஸன்னிஸ்ஸிதகிலேஸஸங்கா²தேன ரஹஸ்ஸாதே³னா’’திஆதி³, தஸ்மா க³ருகானம் ஏவ அனந்தரம் உத்³தி³ட்டா²திபி ஏகே. ஏவம் ஸந்தே பட²மமேவாலம் தாவதா லக்க²ணதீ³பனஸித்³தி⁴தோ, கிம் து³தியேனாதி சே? ந, ஓகாஸனியமபச்சயமிச்சா²கா³ஹனிவாரணப்பயோஜனதோ. ‘‘படிச்ச²ன்னே ஆஸனே அலம்கம்மனியே’’தி ஓகாஸனியமதோ ஹி தப்³பி³பரீதே ஓகாஸே இத³ம் லக்க²ணம் ந விகப்பிதந்தி மிச்சா²கா³ஹோ ஹோதி, தன்னிவாரணதோ து³தியம்பி ஸாத்த²கமேவாதி அதி⁴ப்பாயோ. கஸ்மா? ஓகாஸபே⁴த³தோ, ரஹோபே⁴த³தீ³பனதோ, ரஹோனிஸஜ்ஜஸ்ஸாத³பே⁴த³தீ³பனதோ. ஓகாஸனியமபா⁴வே ச ரஹோனிஸஜ்ஜஸ்ஸாத³பே⁴தோ³ ஜாதோ. த்³வின்னம் ரஹோனிஸஜ்ஜஸிக்கா²பதா³னம் நானதாஜானனஞ்ச ஸியா, ததா² காயஸம்ஸக்³க³பே⁴த³தீ³பனதோ. நாலம்கம்மனியேபி ஹி ஓகாஸே அப்படிச்ச²ன்னே, படிச்ச²ன்னேபி வா நிஸின்னாய வாதபானகவாடசி²த்³தா³தீ³ஹி நிக்க²ந்தகேஸாதி³க்³க³ஹணேன காயஸம்ஸக்³கோ³ லப்³ப⁴தீதி ஏவமாத³யோபி நயா வித்தா²ரதோ வேதி³தப்³பா³. ‘‘பி⁴க்கு²பாதிமோக்கே² ஆக³தனயத்தா பி⁴க்கு²னீபாதிமோக்கே² இத³ம் கண்ட³ம் பரிஹீனந்தி வேதி³தப்³ப³’’ந்தி வத³ந்தி. அத்து²ப்பத்தியா தத்த² அனுபன்னத்தாதி ஏகே. தம் அனேகத்த²பா⁴வதீ³பனதோ அயுத்தம். ஸப்³ப³பு³த்³த⁴காலே ஹி பி⁴க்கூ²னம் பஞ்சன்னம், பி⁴க்கு²னீனம் சத்தாரோ ச உத்³தே³ஸா ஸந்தி. பாதிமோக்கு²த்³தே³ஸபஞ்ஞத்தியா அஸாதா⁴ரணத்தா தத்த² நித்³தி³ட்ட²ஸங்கா⁴தி³ஸேஸபாசித்தியானந்தி ஏகே. தாஸம் பி⁴க்கு²னீனம் உப்³ப⁴ஜாணுமண்ட³லிகஅட்ட²வத்து²கவஸேன காயஸம்ஸக்³க³விஸேஸோ பாராஜிகவத்து², ‘‘ஹத்த²க்³க³ஹணம் வா ஸாதி³யேய்ய, காயம் வா தத³த்தா²ய உபஸம்ஹரேய்யா’’தி (பாசி. 674-675) வசனதோ ஸாதி³யனம்பி, ‘‘ஸந்திட்டே²ய்ய வா’’தி (பாசி. 675) வசனதோ டா²னம்பி, ‘‘ஸங்கேதம் வா க³ச்சே²ய்யா’’தி (பாசி. 675) வசனதோ க³மனம்பி, ‘‘ச²ன்னம் வா அனுபவிஸேய்யா’’தி (பாசி. 675) வசனதோ படிச்ச²ன்னட்டா²னபவேஸோபி, ததா² ‘‘ரத்தந்த⁴காரே அப்பதீ³பே படிச்ச²ன்னே ஓகாஸே ஏகேனேகா ஸந்திட்டே²ய்ய வா ஸல்லபேய்ய வா’’தி (பாசி. 838) வசனதோ து³ட்டு²ல்லவாசாபி பாசித்தியவத்து²கந்தி கத்வா தாஸம் அஞ்ஞதா² அனியதகண்ட³ஸ்ஸ அவத்தப்³ப³தாபத்திதோபி ந வுத்தந்தி தேஸம் அதி⁴ப்பாயோ.

பகிண்ணகவண்ணனா நிட்டி²தா.

அனியதகண்ட³ம் நிட்டி²தம்.