4. பட²மஸேனாஸனஸிக்கா²பத³வண்ணனா

மஞ்சம் வாதி மஸாரகோ, பு³ந்தி³காப³த்³தோ⁴, குளீரபாத³கோ, ஆஹச்சபாத³கோதி இமேஸு சதூஸு யம் கஞ்சி மஞ்சம் வா. பீட²ம் வாதி ஏத்தா²பி ஏஸேவ நயோ. பி⁴ஸிம் வாதி உண்ணபி⁴ஸி, சோளபி⁴ஸி, வாகபி⁴ஸி, திணபி⁴ஸி, பண்ணபி⁴ஸீதி இமாஸு பஞ்சஸு பி⁴ஸீஸு யம் கஞ்சி பி⁴ஸிம் வா. தேனாஹ ‘‘மஞ்சாதீ³ஸூ’’திஆதி³. தத்த² ‘‘மஞ்சஸங்கே²பேனா’’தி இமினா பீட²ஸங்கே²பம் படிக்கி²பதி. கப்பியசம்மேனாதி மிகா³ஜேளகசம்மேன. ஏத்த² பன மிக³சம்மே ஏணிமிகோ³, வாதமிகோ³, பஸத³மிகோ³, குருங்க³மிகோ³, மிக³மாதுகோ, ரோஹிதமிகோ³தி ஏதேஸம்யேவ சம்மானி வட்டந்தி, அஞ்ஞேஸம் பன –

மக்கடோ காளஸீஹோ ச, ஸரபோ⁴ கத³லீமிகோ³;

யே ச வாளமிகா³ கேசி, தேஸம் சம்மம் ந வட்டதீதி. (மஹாவ. அட்ட². 259);

தத்த² வாளமிகா³தி ஸீஹப்³யக்³க⁴அச்ச²தரச்சா². ந கேவலஞ்ச ஏதேயேவ, யேஸம் பன சம்மம் வட்டதீதி வுத்தம், தே ட²பேத்வா அவஸேஸா அந்தமஸோ கோ³மஹிம்ஸஸஸபி³ளாராத³யோபி ஸப்³பே³ இமஸ்மிம் அத்தே² ‘‘வாளமிகா³’’த்வேவ வேதி³தப்³பா³. ஏதேஸஞ்ஹி ஸப்³பே³ஸம் சம்மம் ந வட்டதி. தாலீஸபத்தந்தி ஸுத்³த⁴ம் தமாலபத்தம், அஞ்ஞேன மிஸ்ஸம் பன வட்டதி. திணவாகசோளேஸு அகப்பியம் நாம நத்தி². கிம் பனேத்த² பி³ப்³போ³ஹனே விய நிஸீதி³துஞ்ச நிபஜ்ஜிதுஞ்ச ந வட்டதீதி ஆஹ ‘‘தத்தா²’’திஆதி³. ந கேவலஞ்சேத³மேவாதி ஆஹ ‘‘பமாணபரிச்சே²தோ³பி சேத்த² நத்தீ²’’தி, ‘‘ஏத்தகமேவ காதப்³ப³’’ந்தி பி⁴ஸியா பமாணனியமோபி நத்தீ²தி அத்தோ². மஞ்சபி⁴ஸிபீட²பி⁴ஸிபூ⁴மத்த²ரணபி⁴ஸிசங்கமனபி⁴ஸிபாத³புஞ்ச²னபி⁴ஸீதி ஏதாஸம் பன அனுரூபதோ ஸல்லக்கே²த்வா அத்தனோ ருசிவஸேன பமாணம் காதப்³ப³ம். அந்தோ ஸம்வேல்லித்வா ப³த்³த⁴ந்தி யதா² வேமஜ்ஜ²ம் ஸம்கி²த்தம் ஹோதி, ஏவம் மஜ்ஜே² ஸுட்டு² வேடே²த்வா ப³த்³த⁴ம்.

யே அட்ட² மாஸாதி ஸம்ப³ந்தோ⁴. ‘‘அவஸ்ஸிகஸங்கேதா’’தி ஏதஸ்ஸேவ விவரணம் ‘‘வஸ்ஸானமாஸாதி ஏவம் அபஞ்ஞாதா’’தி, அப்பதிதா அப்பஸித்³தா⁴தி அத்தோ². ‘‘அஸஞ்ஞிதா’’திபி பாடோ², தத்த² அவிஞ்ஞாதாதி அத்தோ². அட்ட² மாஸாதி சத்தாரோ ஹேமந்திகா, சத்தாரோ கி³ம்ஹிகா மாஸாதி அட்ட² மாஸா. ஓவஸ்ஸகமண்ட³பேதி ஸாகா²மண்ட³பபத³ரமண்ட³பானம் யத்த² கத்த²சி ஓவஸ்ஸகே மண்ட³பே. யத்தா²தி யேஸு ஜனபதே³ஸு. ஸப்³ப³த்தா²தி ஸப்³பே³ஸு ஜனபதே³ஸு. காகாதீ³னம் நிப³த்³த⁴வாஸருக்க²மூலேதி யத்த² து⁴வனிவாஸேன காகா வா குலாலா வா அஞ்ஞே வா ஸகுந்தா குலாவகே கத்வா வஸந்தி, தாதி³ஸஸ்ஸ காகாதீ³னம் நிப³த்³த⁴வாஸஸ்ஸ யஸ்ஸ கஸ்ஸசி ருக்க²ஸ்ஸ ஹேட்டா². யத்த² பன கோ³சரப்பஸுதா ஸகுந்தா விஸ்ஸமித்வா க³ச்ச²ந்தி, தஸ்ஸ ருக்க²ஸ்ஸ மூலே நிக்கி²பிதும் வட்டதி. ‘‘கதா³சிபீ’’தி இமினா ந கேவலம் வஸ்ஸிகஸங்கேதேயேவாதி த³ஸ்ஸேதி. யத்தா²தி யஸ்மிம் பதே³ஸே. யதா³தி யஸ்மிம் காலே.

ஸோதி யஸ்ஸத்தா²ய ஸந்த²தோ, ஸோ. பகதிஸந்த²தேதி பகதியாவ ஸந்த²தே, யம் நேவத்தனா ஸந்த²தம், ந பரேன ஸந்த²ராபிதம், தஸ்மிந்தி வுத்தம் ஹோதி. லஜ்ஜீ ஹோதீதி லஜ்ஜனஸீலோ ஹோதி, பரிக்கா²ரவினாஸனே பீ⁴தோதி அத்தோ². தேனாஹ ‘‘அத்தனோ பலிபோ³த⁴ம் விய மஞ்ஞதீ’’தி, இமினா அலஜ்ஜிம் ஆபுச்சி²த்வா க³ந்தும் ந வட்டதீதி த³ஸ்ஸேதி. நிரபேக்கோ²தி ‘‘ஆக³ந்த்வா உத்³த⁴ரிஸ்ஸாமீ’’தி அபேக்கா²ரஹிதோ, இமினா ஸாபேக்கோ² சே க³ச்ச²தி, அனாபத்தீதி த³ஸ்ஸேதி. தேனேவ ஹி அனாபத்திவாரே ‘‘ஓதாபேந்தோ க³ச்ச²தீ’’தி (பாசி. 113) வுத்தம். அஞ்ஞத்த² க³ச்ச²ந்தோதி தம் மக்³க³ம் அதிக்கமித்வா அஞ்ஞத்த² க³ச்ச²ந்தோ. லேட்³டு³பாதூபசாரதோ ப³ஹி டி²தத்தா ‘‘பாது³த்³தா⁴ரேன காரேதப்³போ³’’தி வுத்தம், அஞ்ஞத்த² க³ச்ச²ந்தஸ்ஸ பட²மபாது³த்³தா⁴ரே து³க்கடம், து³தியபாது³த்³தா⁴ரே பாசித்தியந்தி அத்தோ².

திகபாசித்தியம் ஸங்கி⁴கே ஸங்கி⁴கஸஞ்ஞிவேமதிகபுக்³க³லிகஸஞ்ஞீனம் வஸேன. இமினாவ நயேன திகது³க்கடம்பி வேதி³தப்³ப³ம். சிமிலிகாதீ³னம் அத்தோ² து³தியஸிக்கா²பதே³ த³ஸ்ஸிதோவ. பாத³புஞ்ச²னீ (பாசி. அட்ட². 112) நாம ரஜ்ஜுகேஹி வா பிலோதிகாஹி வா பாத³புஞ்ச²னத்த²ம் கதா. ப²லகபீட²ம் நாம ப²லகமயம் பீட²ம். ந கேவலம் சிமிலிகாதீ³னியேவ அஜ்ஜோ²காஸே ட²பேத்வா க³ச்ச²ந்தஸ்ஸ து³க்கடந்தி ஆஹ ‘‘யம் வா பனா’’திஆதி³. யம் கிஞ்சி தா³ருப⁴ண்ட³ம், யம் கிஞ்சி மத்திகாப⁴ண்ட³ந்தி ஸம்ப³ந்தோ⁴. ‘‘அந்தமஸோ பத்தாதா⁴ரகம்பீ’’தி இமினா தாலவண்டபீ³ஜனிபத்தபானீயஉளஉங்கபானீயஸங்கா²தீ³ஸு வத்தப்³ப³மேவ நத்தீ²தி த³ஸ்ஸேதி.

அரஞ்ஞே (பாசி. அட்ட². 110) பண்ணகுடீஸு வஸந்தானம் ஸீலஸம்பதா³ய பஸன்னசித்தா மனுஸ்ஸா மஞ்சபீடா²தீ³னி தே³ந்தி ‘‘ஸங்கி⁴கபரிபோ⁴கே³ன பரிபு⁴ஞ்ஜதா²’’தி, தத்த² கிம் காதப்³ப³ந்தி ஆஹ ‘‘ஆரஞ்ஞகேன பனா’’திஆதி³. தத்த² அஸதி அனோவஸ்ஸகேதி பப்³பா⁴ராதி³அனோவஸ்ஸகட்டா²னே அஸதி. இத³ஞ்ச லக்க²ணவசனம் ‘‘ஸபா⁴கா³னம் அபா⁴வே’’தி ச இச்சி²தப்³ப³த்தா. ஆரஞ்ஞகேன ஹி பி⁴க்கு²னா தத்த² வஸித்வா அஞ்ஞத்த² க³ச்ச²ந்தேன ஸாமந்தவிஹாரே பி⁴க்கூ²னம் பேஸேத்வா க³ந்தப்³ப³ம். ஸபா⁴கா³னம் அபா⁴வே அனோவஸ்ஸகே நிக்கி²பித்வா க³ந்தப்³ப³ம். அனோவஸ்ஸகே அஸதி ருக்கே² லக்³கே³த்வா க³ந்தப்³ப³ம்.

ந கேவலம் இத³ம்யேவ கத்வா க³ந்தும் வட்டதீதி ஆஹ ‘‘யதா² வா’’திஆதி³. யதா² வா உபசிகாஹி ந க²ஜ்ஜதீதி யதா² ட²பிதே உபசிகாஹி ஸேனாஸனம் ந க²ஜ்ஜதி, ஏவம் ததா² பாஸாணானம் உபரி ட²பனம் கத்வாதி அத்தோ². இத³ம் வுத்தம் ஹோதி – சதூஸு (பாசி. அட்ட². 116) பாஸாணேஸு மஞ்சம் ட²பேத்வா மஞ்சே அவஸேஸமஞ்சபீடா²னி ஆரோபேத்வா உபரி பி⁴ஸிஆதி³கம் ராஸிம் கத்வா தா³ருப⁴ண்ட³ம் மத்திகாப⁴ண்ட³ம் படிஸாமேத்வா க³மிகவத்தம் பூரேத்வா க³ந்தப்³ப³ந்தி.

அப்³போ⁴காஸிகேனாபி ‘‘அஹம் உக்கட்ட²அப்³போ⁴காஸிகோ’’தி சீவரகுடிம்பி அகத்வா அஸமயே அஜ்ஜோ²காஸே பஞ்ஞபேத்வா நிஸீதி³தும் வா நிபஜ்ஜிதும் வா ந வட்டதீதி த³ஸ்ஸேந்தோ ஆஹ ‘‘அப்³போ⁴காஸிகேனா’’திஆதி³. ஸசே பன சதுக்³கு³ணேனபி சீவரேன கதகுடி அதேமேந்தம் ரக்கி²தும் நேவ ஸக்கோதி, ஸத்தாஹவத்³த³லிகாதீ³னி ப⁴வந்தி, பி⁴க்கு²னோ காயானுக³திகத்தா வட்டதி. ருக்க²மூலிகஸ்ஸாபி ஏஸேவ நயோ.

யஸ்மிம் விஸ்ஸாஸக்³கா³ஹோ ருஹதி, தஸ்ஸ ஸந்தகம் அத்தனோ புக்³க³லிகமிவ ஹோதீதி ஆஹ ‘‘விஸ்ஸாஸிகபுக்³க³லிகே’’தி. யஸ்மிம் பன விஸ்ஸாஸோ ந ருஹதி, தஸ்ஸ ஸந்தகே து³க்கடமேவ. அமனுஸ்ஸோதி யக்கோ² வா பேதோ வா. பலிபு³த்³த⁴ம் ஹோதீதி உபத்³து³தம் ஹோதி.

பட²மஸேனாஸனஸிக்கா²பத³வண்ணனா நிட்டி²தா.