2. பூ⁴தகா³மவக்³கோ³

1. பூ⁴தகா³மஸிக்கா²பத³வண்ணனா

‘‘ப⁴வந்தீ’’தி (ஸாரத்த². டீ. பாசித்திய 3.90) இமினா விருள்ஹமூலே நீலபா⁴வம் ஆபஜ்ஜித்வா வட்³ட⁴மானகே தருணக³ச்சே² த³ஸ்ஸேதி. ‘‘அஹேஸு’’ந்தி இமினா பன வட்³டி⁴த்வா டி²தே மஹந்தே ருக்க²க³ச்சா²தி³கே த³ஸ்ஸேதி. தேனாஹ ‘‘ஜாயந்தீ’’திஆதி³. ஏத்த² ச ‘‘ப⁴வந்தீ’’தி இமஸ்ஸ விவரணம் ‘‘ஜாயந்தி வட்³ட⁴ந்தீ’’தி, ‘‘அஹேஸு’’ந்தி இமஸ்ஸ ‘‘ஜாதா வட்³டி⁴தா’’தி. கா³மோதி ஸமூஹோ. பதிட்டி²தஹரிததிணருக்கா²தீ³னந்தி பூ⁴மியம் பதிட்டி²தஸ்ஸ ஹரிததிணஸ்ஸ சேவ ஹரிதருக்கா²தீ³னஞ்ச. ஆதி³ஸத்³தே³ன ஓஸதி⁴க³ச்ச²லதாத³யோ வேதி³தப்³பா³. நிமித்தத்தே² ச பு⁴ம்மம். யோ அத்தோ² ஸம்பஜ்ஜதி, தமாஹ ‘‘பூ⁴தகா³மபாதப்³யதாயா’’திஆதி³னா.

நனு ச ருக்கா²த³யோ சித்தரஹிததாய ந ஜீவா, சித்தரஹிததா ச பரிப²ந்தா³பா⁴வதோ, சி²ன்னேபி விருஹனதோ, விஸதி³ஸஜாதிகபா⁴வதோ, சதுயோனியம் அபரியாபன்னதோ ச வேதி³தப்³பா³, வுட்³டி⁴ பன பவாளஸிலாலவணானம்பி விஜ்ஜதீதி ந தேஸம் ஜீவபா⁴வே காரணம், விஸயக்³க³ஹணஞ்ச நேஸம் பரிகப்பனாமத்தம் ஸுபனம் விய சிஞ்சாதீ³னம், ததா² தோ³ஹளாத³யோ, அத² கஸ்மா பூ⁴தகா³மஸ்ஸ பாதப்³யதாய பாசித்தியம் இச்சி²தந்தி? ஸமணஅஸாருப்பதோ, தன்னிஸ்ஸிதஸத்தானுரக்க²ணதோ ச. தேனேவாஹ ‘‘ஜீவஸஞ்ஞினோ ஹி மோக⁴புரிஸா மனுஸ்ஸா ருக்க²ஸ்மி’’ந்திஆதி³ (பாசி. 89). ஸாஸபபீ³ஜகஸேவாலம்பீதி ஸாஸபபீ³ஜகஸங்கா²தம் ஸேவாலம்பி, ஸாஸபஸேவாலம், பீ³ஜகஸேவாலம்பீதி அத்தோ². தத்த² ஸாஸபஸேவாலோ நாம ஸாஸபமத்தோ கு²த்³த³கஸேவாலோ. பீ³ஜகஸேவாலோ நாம உபரி கு²த்³த³கபத்தோ ஹேட்டா² கு²த்³த³கமூலோ ஸேவாலோ.

மூலபீ³ஜக²ந்த⁴பீ³ஜப²ளுபீ³ஜஅக்³க³பீ³ஜபீ³ஜபீ³ஜானந்தி ஏத்த² மூலமேவ பீ³ஜம் மூலபீ³ஜம். ஏவம் ஸேஸேஸுபி. தத்த² மூலபீ³ஜம் ஹலித்³தி³ஆதி³கம். க²ந்த⁴பீ³ஜம் அஸ்ஸத்தா²தி³கம். ப²ளுபீ³ஜம் உச்சு²ஆதி³கம். அக்³க³பீ³ஜம் ஹிரிவேராதி³கம். பீ³ஜம்பீ³ஜம் புப்³ப³ண்ணாதி³கம். பா⁴ஜனக³தந்தி ஸராவாதி³பா⁴ஜனக³தம். நிக்க²ந்தம் மூலமத்தம் ஏதஸ்மாதி நிக்க²ந்தமூலமத்தம். மத்த ஸத்³தே³ன சேத்த² பண்ணஸ்ஸ நிக்க²மனம் படிக்கி²பதி. ஏஸ நயோ நிக்க²ந்தஅங்குரமத்தந்தி ஏத்தா²பி. ஸசே பன மூலஞ்ச பண்ணஞ்ச நிக்³க³தம், பூ⁴தகா³மஸங்க²ம் க³ச்ச²தி. வித³த்தி²மத்தா பத்தவட்டி நிக்³க³ச்ச²தீதி வித³த்தி²மத்தா அனீலவண்ணா பத்தவட்டி நிக்க²மதி. தேனாஹ ‘‘நிக்க²ந்தே’’திஆதி³. ஹரிதோ ந ஹோதீதி நீலவண்ணோ ந ஹோதி. முக்³கா³தீ³னம் பன பண்ணேஸு உட்டி²தேஸு, வீஹிஆதீ³னம் வா அங்குரே ஹரிதே பூ⁴தகா³மஸங்க³ஹம் க³ச்ச²ந்தி. ஏஸ நயோ அம்ப³ட்டி²ஆதீ³ஸு.

பூ⁴தகா³மபீ³ஜகா³மேதி ஏத்த² பூ⁴தகா³மதோ வியோஜிதம் விருஹனஸமத்த²மேவ மூலபீ³ஜாதி³கம் பீ³ஜகா³மோ நாமாதி வேதி³தப்³ப³ம். உப⁴யத்தா²தி பூ⁴தகா³மபீ³ஜகா³மேஸு. அததா²ஸஞ்ஞிஸ்ஸாதி அபூ⁴தகா³மாபீ³ஜகா³மஸஞ்ஞிஸ்ஸ. கோ பன வாதோ³ அபூ⁴தகா³மாபீ³ஜகா³மேஸு அபூ⁴தகா³மாபீ³ஜகா³மஸஞ்ஞிஸ்ஸ. அஸஞ்சிச்சாதி பாஸாணருக்கா²தீ³னி வா பவட்டேந்தஸ்ஸ, ஸாக²ம் வா கட்³ட⁴ந்தஸ்ஸ, கத்தரத³ண்டே³ன வா பூ⁴மிம் பஹரித்வா க³ச்ச²ந்தஸ்ஸ திணானி குப்பந்தி. தானி தேன ‘‘விகோபேஸ்ஸாமீ’’தி ஏவம் ஸஞ்சிச்ச அவிகோபிதத்தா அஸஞ்சிச்ச விகோபிதானி நாம ஹோந்தி. இதி அஸஞ்சிச்ச விகோபேந்தஸ்ஸ அனாபத்தி.

அஸதியாதி அஞ்ஞவிஹிதோ கேனசி ஸத்³தி⁴ம் கிஞ்சி கதே²ந்தோ பாத³ங்கு³ட்ட²கேன வா ஹத்தே²ன வா திணம் வா லதம் வா விகோபேந்தோ திட்ட²தி, ஏவம் அஸதியா விகோபேந்தஸ்ஸ அனாபத்தி.

அஜானித்வாதி ஏத்த² அப்³ப⁴ந்தரே ‘‘பீ³ஜகா³மோ’’தி வா ‘‘பூ⁴தகா³மோ’’தி வா ந ஜானாதி, ‘‘விகோபேமீ’’தி பன ஜானாதி. ஏவம் திணே வா பலாலபுஞ்ஜே வா க²ணித்திம் வா குதா³லம் வா ஸங்கோ³பனத்தா²ய ட²பேதி, ட³ய்ஹமானஹத்தோ² வா அக்³கி³ம் பாதேதி. தத்ர சே திணானி சி²ஜ்ஜந்தி வா ட³ய்ஹந்தி வா, ஏவம் அஜானித்வா விகோபேந்தஸ்ஸ அனாபத்தி.

யேன கேனசி அக்³கி³னாதி கட்ட²க்³கி³கோ³மயக்³கி³ஆதீ³ஸு யேன கேனசி அக்³கி³னா, அந்தமஸோ லோஹக²ண்டே³னபி ஆதி³த்தேன. ‘‘கப்பிய’’ந்தி வத்வாவாதி யாய காயசி பா⁴ஸாய ‘‘கப்பிய’’ந்தி வத்வாவ. ஏவ-ஸத்³தே³ன பட²மம் அக்³கி³னா பு²ஸித்வா பச்சா² ‘‘கப்பிய’’ந்தி வத்தும் ந வட்டதீ’’தி த³ஸ்ஸேதி. ‘‘பட²மம் அக்³கி³ம் நிக்கி²பித்வா தம் அனுத்³த⁴ரித்வாவ ‘கப்பிய’ந்தி வுத்தே பன வட்டதீ’’தி (ஸாரத்த². டீ. பாசித்திய 3.93) வத³ந்தி. ஏஸ நயோ ஸேஸேஸுபி. ததே²வாதி ‘கப்பிய’ந்தி வத்வாவ. அஸ்ஸமஹிம்ஸஸூகரமிக³கோ³ரூபானம் பன கு²ரா அதிகி²ணா, தஸ்மா தேஹி ந காதப்³ப³ம், கதம்பி அகதம் ஹோதீதி ஆஹ ‘‘ட²பேத்வா கோ³மஹிம்ஸாதீ³னம் கு²ரே’’தி. ஹத்தி²னகா² பன கு²ரா ந ஹோந்தி, தஸ்மா தேஹி வட்டதி. திரச்சா²னானந்தி ஸீஹப்³யக்³க⁴தீ³பிமக்கடானம், ஸகுந்தானஞ்ச. தேஸஞ்ஹி நகா² திகி²ணா ஹோந்தி, தஸ்மா தேஹி காதப்³ப³ம். ‘‘அந்தமஸோ சி²ந்தி³த்வா ஆஹடேனபீ’’தி இமினா யேஹி காதும் வட்டதி, தேஹி தத்த²ஜாதகேஹி காதப்³ப³ந்தி ஏத்த² வத்தப்³ப³மேவ நத்தீ²தி த³ஸ்ஸேதி. ‘‘ஸத்தே² வுத்தனயேனேவா’’தி இமினா சே²த³ம் வா வேத⁴ம் வா த³ஸ்ஸேந்தேன ‘‘கப்பியந்தி வத்வாவா’’தி வுத்தமதிதி³ஸதி. ஏத்த² ச கிஞ்சாபி ‘‘கப்பியந்தி வத்வாவ காதப்³ப³’’ந்திஆதி³னா கப்பியம் கரோந்தேன கத்தப்³பா³காரமேவ த³ஸ்ஸிதம், ததா²பி பி⁴க்கு²னா ‘‘கப்பியம் கரோஹீ’’தி வுத்தேயேவ அனுபஸம்பன்னேன ‘‘கப்பிய’’ந்தி வத்வா அக்³கி³பரிஜிதாதி³ காதப்³ப³ந்தி க³ஹேதப்³ப³ம். அவசனம் பன ‘‘புனபி கப்பியம் கரோஹீதி காரேத்வாவ பரிபு⁴ஞ்ஜிதப்³ப³’’ந்தி பட²மமேவ வுத்தத்தா.

ஏகஸ்மிம்…பே… கப்பியே கதே ஸப்³ப³ம் கதம் ஹோதீதி ஏகம்யேவ ‘‘கப்பியம் கரோமீ’’தி அதி⁴ப்பாயேனபி கப்பியே கதே ஏகாப³த்³த⁴த்தா ஸப்³ப³ம் கதம் ஹோதி. தா³ருகம் விஜ்ஜ²தீதி ஜானித்வா வா அஜானித்வா வா விஜ்ஜ²தி வா விஜ்ஜா²பேதி வா, வட்டதியேவ. ப⁴த்தஸித்தே² விஜ்ஜ²தீதி ஏத்தா²பி ஏஸேவ நயோ. தம் விஜ்ஜ²தி, ந வட்டதீதி வல்லிஆதீ³னம் பா⁴ஜனக³திகத்தாதி அதி⁴ப்பாயோ. பி⁴ந்தா³பேத்வா கப்பியம் காரேதப்³ப³ந்தி பீ³ஜதோ முத்தஸ்ஸ கடாஹஸ்ஸ பா⁴ஜனக³திகத்தா வுத்தம். அபீ³ஜந்தி அங்குரஜனனஸமத்த²பீ³ஜரஹிததருணம்ப³ப²லாதி³. தேனாஹ ‘‘யம் பன ப²லம் தருணம் ஹோதி, அபீ³ஜ’’ந்தி. நிப்³ப³த்தபீ³ஜம் நாம பீ³ஜம் நிப்³ப³த்தேத்வா விஸும் கத்வா பரிபு⁴ஞ்ஜிதும் ஸக்குணேய்யம் அம்ப³பனஸாதி³ப²லம். தேனாஹ ‘‘பீ³ஜம் அபனேத்வா பரிபு⁴ஞ்ஜிதப்³ப³’’ந்தி. தத்த² கப்பியகரணகிச்சம் நத்தி², ஸயமேவ கப்பியானீதி அதி⁴ப்பாயோ.

பூ⁴தகா³மஸிக்கா²பத³வண்ணனா நிட்டி²தா.

2. அஞ்ஞவாத³கஸிக்கா²பத³வண்ணனா

யமத்த²ந்தி ‘‘த்வம் கிர து³க்கடாபத்திம் ஆபன்னோ’’திஆதி³கம் யம் கிஞ்சி அத்த²ம். ததோ அஞ்ஞந்தி புச்சி²தத்த²தோ அஞ்ஞமத்த²ம். அஞ்ஞேனஞ்ஞம் படிசரணஸ்ஸாதி வினயத⁴ரேன யம் வசனம் தோ³ஸபுச்ச²னத்த²ம் வுத்தம், ததோ அஞ்ஞேன வசனேன படிச்சா²த³னஸ்ஸ. படிச்சா²த³னத்தோ²பி ஹி சரஸத்³தோ³ ஹோதி அனேகத்த²த்தா தா⁴தூனம். வுத்தந்தி பாளியம் வுத்தம்.

ஸாவஸேஸம் ஆபத்திம் ஆபன்னோதி ஏத்த² ட²பேத்வா பாராஜிகம் ஸேஸா ஸாவஸேஸாபத்தி நாம, தம் ஆபன்னோ. அனுயுஞ்ஜியமானோதி ‘‘கிம், ஆவுஸோ, இத்த²ன்னாமம் ஆபத்திம் ஆபன்னோஸீ’’தி புச்சி²யமானோ. அஞ்ஞேன வசனேனாதி ‘‘கோ ஆபன்னோ? கிம் ஆபன்னோ? கிஸ்மிம் ஆபன்னோ? கத²ம் ஆபன்னோ? கம் ப⁴ணத²? கிம் ப⁴ணதா²’’தி அஞ்ஞேன வசனேன. அஞ்ஞந்தி ‘‘கிம் த்வம் இத்த²ன்னாமம் ஆபத்திம் ஆபன்னோஸீ’’திஆதி³கம் அனுயுஞ்ஜகவசனம். ததா² ததா² விக்கி²பதீதி தேன தேன பகாரேன விக்கி²பதி. கிம் வுத்தம் ஹோதி? ஸோ (பாசி. அட்ட². 94) கிஞ்சி வீதிக்கமம் தி³ஸ்வா ‘‘ஆவுஸோ, ஆபத்திம் ஆபன்னோஸீ’’தி ஸங்க⁴மஜ்ஜே² ஆபத்தியா அனுயுஞ்ஜியமானோ ‘‘கோ ஆபன்னோ’’தி வத³தி. ததோ ‘‘த்வ’’ந்தி வுத்தே ‘‘அஹம் கிம் ஆபன்னோ’’தி வத³தி. அத² ‘‘பாசித்தியம் வா து³க்கடம் வா’’தி வுத்தே ‘‘அஹம் கிஸ்மிம் ஆபன்னோ’’தி வத³தி. ததோ ‘‘அமுகஸ்மிம் நாம வத்து²ஸ்மி’’ந்தி வுத்தே ‘‘அஹம் கத²ம் ஆபன்னோ, கிம் கரோந்தோ ஆபன்னோம்ஹீ’’தி புச்ச²தி. அத² ‘‘இத³ம் நாம கரோந்தோ ஆபன்னோ’’தி வுத்தே ‘‘கம் ப⁴ணதா²’’தி வத³தி. ததோ ‘‘தம் ப⁴ணாமா’’தி வுத்தே ‘‘கிம் ப⁴ணதா²’’தி ஏவமனேகேஹி பகாரேஹி விக்கி²பதீதி வுத்தம் ஹோதி.

யோ பன பி⁴க்கு² ஸாவஸேஸம் ஆபத்திம் ஆபன்னோ, தம் ந கதே²துகாமோ துண்ஹீபா⁴வேன விஹேஸேதீதி ஸம்ப³ந்தோ⁴. விஹேஸேதீதி சிரனிஸஜ்ஜாசிரபா⁴ஸனேஹி பிட்டி²ஆகி³லாயனதாலுஸோஸாதி³வஸேன ஸங்க⁴ம் விஹேஸேதி, பரிஸ்ஸமம் தேஸம் கரோதீதி அத்தோ². பரிஸ்ஸமோ ஹி விஹேஸா நாம. அஞ்ஞவாத³ககம்மந்தி அஞ்ஞவாத³கஸ்ஸ பி⁴க்கு²னோ அஞ்ஞவாத³காரோபனத்த²ம் காதப்³ப³ம் ஞத்திது³தியகம்மம். விஹேஸககம்மந்தி ஏத்தா²பி ஏஸேவ நயோ. தஸ்மிம் ஸங்கே⁴ன கதேதி தஸ்மிம் அஞ்ஞவாத³ககம்மே ச விஹேஸககம்மே ச ஸங்கே⁴ன ஞத்திது³தியகம்மவாசாய கதே. ததா² கரோந்தானந்தி தம் பகாரம் கரோந்தானம், அஞ்ஞவாத³கஞ்ச விஹேஸகஞ்ச கரோந்தானந்தி அத்தோ².

‘‘விஹேஸகேதி அயமேத்த² அனுபஞ்ஞத்தீ’’தி அவசனஞ்சேத்த² ‘‘ஆபத்திகரா ச ஹோதி அஞ்ஞவாத³கஸிக்கா²பதா³தீ³ஸு வியா’’தி (கங்கா². அட்ட². பட²மபாராஜிகவண்ணனா) வுத்தத்தாயேவ பஞ்ஞாயதீதி கத்வா. ஏஸ நயோ உபரி ஸிக்கா²பதே³ஸு. த⁴ம்மகம்மே திகபாசித்தியந்தி த⁴ம்மகம்மே த⁴ம்மகம்மஸஞ்ஞிவேமதிகஅத⁴ம்மகம்மஸஞ்ஞீனம் வஸேன தீணி பாசித்தியானி. அத⁴ம்மகம்மே திகது³க்கடந்தி ஏத்தா²பி ஏஸேவ நயோ. அனாரோபிதேதி கம்மவாசாய அனாரோபிதே, அப்பதிட்டா²பிதேதி அத்தோ². கே³லஞ்ஞேனாதி யேன கதே²தும் ந ஸக்கோதி, முகே² தாதி³ஸேன ப்³யாதி⁴னா. ஸங்க⁴ஸ்ஸ ப⁴ண்ட³னாதீ³னி ப⁴விஸ்ஸந்தீதி ஸங்க⁴மஜ்ஜே² கதி²தே தப்பச்சயா ஸங்க⁴ஸ்ஸ ப⁴ண்ட³னம் வா கலஹோ வா விக்³க³ஹோ வா விவாதோ³ வா ஸங்க⁴பே⁴தோ³ வா ஸங்க⁴ராஜி வா ப⁴விஸ்ஸந்தீதி இமினா வா அதி⁴ப்பாயேன ந கதே²ந்தஸ்ஸ. ஏத்த² ச அத⁴ம்மேனாதி அபூ⁴தேன வத்து²னா.

‘‘ஸமுட்டா²னாதீ³னி அதி³ன்னாதா³னஸதி³ஸானீ’’தி அவிஸேஸம் அதிதி³ஸித்வா விஸேஸம் த³ஸ்ஸேதும் ‘‘இத³ம் பனா’’திஆதி³ வுத்தம். ஸியா கிரியம் அஞ்ஞேனஞ்ஞம் படிசரந்தஸ்ஸ. ஸியா அகிரியம் துண்ஹீபா⁴வேன விஹேஸேந்தஸ்ஸ.

அஞ்ஞவாத³கஸிக்கா²பத³வண்ணனா நிட்டி²தா.

3. உஜ்ஜா²பனகஸிக்கா²பத³வண்ணனா

யேன வசனேனாதி ‘‘ச²ந்தா³ய இத்த²ன்னாமோ இத³ம் நாம கரோதீ’’திஆதி³கேன யேன வசனேன. தேனாஹ ‘‘ச²ந்தா³யா’’திஆதி³. தத்த² ச²ந்தா³யாதி ச²ந்தே³ன பக்க²பாதேன. ‘‘அக்க²ராய வாசேதீ’’திஆதீ³ஸு (பாசி. 46) விய லிங்க³விபல்லாஸோ ஏஸ. இத³ம் நாம கரோதீதி அத்தனோ ஸந்தி³ட்ட²ஸம்ப⁴த்தானம் பணீதம் ஸேனாஸனம் வா பஞ்ஞபேதி, ப⁴த்தாதி³கம் வாதி அதி⁴ப்பாயோ. ஸேனாஸனபஞ்ஞாபகாதி³பே⁴த³ந்தி ஏத்த² ஆதி³ஸத்³தே³ன ப⁴த்துத்³தே³ஸகயாகு³பா⁴ஜகப²லபா⁴ஜகாதீ³னம் க³ஹணம். அனேகத்த²த்தா தா⁴தூனம் ஜே²-ஸத்³தோ³ ஓலோகனத்தோ²பி ஹோதீதி ஆஹ ‘‘அவஞ்ஞாய ஓலோகாபேந்தீ’’தி. சிந்தனத்தோ²யேவ வா க³ஹேதப்³போ³தி ஆஹ ‘‘லாமகதோ வா சிந்தாபேந்தீ’’தி. ததே²வ வத³ந்தாதி ‘‘ச²ந்தா³ய இத்த²ன்னாமோ இத³ம் நாம கரோதீ’’திஆதீ³னி வத³ந்தா. வுத்தந்தி பாளியம் வுத்தம். ‘‘கி²ய்யனகே’’தி (பாசி. அட்ட². 105) அயமேத்த² அனுபஞ்ஞத்தி.

அஸம்மதஸ்ஸாதி ஸங்கே⁴ன கம்மவாசாய அஸம்மதஸ்ஸ. கேவலம் ‘‘தவேஸோ பா⁴ரோ’’தி ஸங்கே⁴ன ஆரோபிதபா⁴ரஸ்ஸ, பி⁴க்கூ²னம் வா பா²ஸுவிஹாரத்தா²ய ஸயமேவ பா⁴ரம் வஹந்தஸ்ஸ, யத்ர வா த்³வே தயோ பி⁴க்கூ² விஹரந்தி, தத்ர தாதி³ஸம் கம்மம் கரோந்தஸ்ஸாதி அதி⁴ப்பாயோ. யஸ்ஸ கஸ்ஸசீதி உபஸம்பன்னஸ்ஸ வா அனுபஸம்பன்னஸ்ஸ வா யஸ்ஸ கஸ்ஸசி. அனுபஸம்பன்னஸ்ஸ பன ஸம்மதஸ்ஸ வா அஸம்மதஸ்ஸ வாதி ஏத்த² பன (பாசி. அட்ட². 106) கிஞ்சாபி அனுபஸம்பன்னஸ்ஸ தேரஸ ஸம்மதியோ தா³தும் ந வட்டந்தி, ததா²பி யோ உபஸம்பன்னகாலே லத்³த⁴ஸம்முதிகோ பச்சா² அனுபஸம்பன்னபா⁴வே டி²தோ, தம் ஸந்தா⁴ய ‘‘ஸம்மதஸ்ஸ வா’’தி வுத்தம். யஸ்ஸ பன ப்³யத்தஸ்ஸ ஸாமணேரஸ்ஸ கேவலம் ஸங்கே⁴ன வா ஸம்மதேன வா பி⁴க்கு²னா ‘‘த்வம் இத³ம் கம்மம் கரோஹீ’’தி பா⁴ரோ கதோ, தம் ஸந்தா⁴ய ‘‘அஸம்மதஸ்ஸ வா’’தி வுத்தம். யஸ்மா உஜ்ஜா²பனஞ்ச கி²ய்யனஞ்ச முஸாவாத³வஸேன பவத்தம், தஸ்மா ஆதி³கம்மிகஸ்ஸ இமினாவ அனாபத்தி, முஸாவாதே³ன பன ஆபத்தியேவாதி க³ஹேதப்³ப³ம்.

உஜ்ஜா²பனகஸிக்கா²பத³வண்ணனா நிட்டி²தா.

4. பட²மஸேனாஸனஸிக்கா²பத³வண்ணனா

மஞ்சம் வாதி மஸாரகோ, பு³ந்தி³காப³த்³தோ⁴, குளீரபாத³கோ, ஆஹச்சபாத³கோதி இமேஸு சதூஸு யம் கஞ்சி மஞ்சம் வா. பீட²ம் வாதி ஏத்தா²பி ஏஸேவ நயோ. பி⁴ஸிம் வாதி உண்ணபி⁴ஸி, சோளபி⁴ஸி, வாகபி⁴ஸி, திணபி⁴ஸி, பண்ணபி⁴ஸீதி இமாஸு பஞ்சஸு பி⁴ஸீஸு யம் கஞ்சி பி⁴ஸிம் வா. தேனாஹ ‘‘மஞ்சாதீ³ஸூ’’திஆதி³. தத்த² ‘‘மஞ்சஸங்கே²பேனா’’தி இமினா பீட²ஸங்கே²பம் படிக்கி²பதி. கப்பியசம்மேனாதி மிகா³ஜேளகசம்மேன. ஏத்த² பன மிக³சம்மே ஏணிமிகோ³, வாதமிகோ³, பஸத³மிகோ³, குருங்க³மிகோ³, மிக³மாதுகோ, ரோஹிதமிகோ³தி ஏதேஸம்யேவ சம்மானி வட்டந்தி, அஞ்ஞேஸம் பன –

மக்கடோ காளஸீஹோ ச, ஸரபோ⁴ கத³லீமிகோ³;

யே ச வாளமிகா³ கேசி, தேஸம் சம்மம் ந வட்டதீதி. (மஹாவ. அட்ட². 259);

தத்த² வாளமிகா³தி ஸீஹப்³யக்³க⁴அச்ச²தரச்சா². ந கேவலஞ்ச ஏதேயேவ, யேஸம் பன சம்மம் வட்டதீதி வுத்தம், தே ட²பேத்வா அவஸேஸா அந்தமஸோ கோ³மஹிம்ஸஸஸபி³ளாராத³யோபி ஸப்³பே³ இமஸ்மிம் அத்தே² ‘‘வாளமிகா³’’த்வேவ வேதி³தப்³பா³. ஏதேஸஞ்ஹி ஸப்³பே³ஸம் சம்மம் ந வட்டதி. தாலீஸபத்தந்தி ஸுத்³த⁴ம் தமாலபத்தம், அஞ்ஞேன மிஸ்ஸம் பன வட்டதி. திணவாகசோளேஸு அகப்பியம் நாம நத்தி². கிம் பனேத்த² பி³ப்³போ³ஹனே விய நிஸீதி³துஞ்ச நிபஜ்ஜிதுஞ்ச ந வட்டதீதி ஆஹ ‘‘தத்தா²’’திஆதி³. ந கேவலஞ்சேத³மேவாதி ஆஹ ‘‘பமாணபரிச்சே²தோ³பி சேத்த² நத்தீ²’’தி, ‘‘ஏத்தகமேவ காதப்³ப³’’ந்தி பி⁴ஸியா பமாணனியமோபி நத்தீ²தி அத்தோ². மஞ்சபி⁴ஸிபீட²பி⁴ஸிபூ⁴மத்த²ரணபி⁴ஸிசங்கமனபி⁴ஸிபாத³புஞ்ச²னபி⁴ஸீதி ஏதாஸம் பன அனுரூபதோ ஸல்லக்கே²த்வா அத்தனோ ருசிவஸேன பமாணம் காதப்³ப³ம். அந்தோ ஸம்வேல்லித்வா ப³த்³த⁴ந்தி யதா² வேமஜ்ஜ²ம் ஸம்கி²த்தம் ஹோதி, ஏவம் மஜ்ஜே² ஸுட்டு² வேடே²த்வா ப³த்³த⁴ம்.

யே அட்ட² மாஸாதி ஸம்ப³ந்தோ⁴. ‘‘அவஸ்ஸிகஸங்கேதா’’தி ஏதஸ்ஸேவ விவரணம் ‘‘வஸ்ஸானமாஸாதி ஏவம் அபஞ்ஞாதா’’தி, அப்பதிதா அப்பஸித்³தா⁴தி அத்தோ². ‘‘அஸஞ்ஞிதா’’திபி பாடோ², தத்த² அவிஞ்ஞாதாதி அத்தோ². அட்ட² மாஸாதி சத்தாரோ ஹேமந்திகா, சத்தாரோ கி³ம்ஹிகா மாஸாதி அட்ட² மாஸா. ஓவஸ்ஸகமண்ட³பேதி ஸாகா²மண்ட³பபத³ரமண்ட³பானம் யத்த² கத்த²சி ஓவஸ்ஸகே மண்ட³பே. யத்தா²தி யேஸு ஜனபதே³ஸு. ஸப்³ப³த்தா²தி ஸப்³பே³ஸு ஜனபதே³ஸு. காகாதீ³னம் நிப³த்³த⁴வாஸருக்க²மூலேதி யத்த² து⁴வனிவாஸேன காகா வா குலாலா வா அஞ்ஞே வா ஸகுந்தா குலாவகே கத்வா வஸந்தி, தாதி³ஸஸ்ஸ காகாதீ³னம் நிப³த்³த⁴வாஸஸ்ஸ யஸ்ஸ கஸ்ஸசி ருக்க²ஸ்ஸ ஹேட்டா². யத்த² பன கோ³சரப்பஸுதா ஸகுந்தா விஸ்ஸமித்வா க³ச்ச²ந்தி, தஸ்ஸ ருக்க²ஸ்ஸ மூலே நிக்கி²பிதும் வட்டதி. ‘‘கதா³சிபீ’’தி இமினா ந கேவலம் வஸ்ஸிகஸங்கேதேயேவாதி த³ஸ்ஸேதி. யத்தா²தி யஸ்மிம் பதே³ஸே. யதா³தி யஸ்மிம் காலே.

ஸோதி யஸ்ஸத்தா²ய ஸந்த²தோ, ஸோ. பகதிஸந்த²தேதி பகதியாவ ஸந்த²தே, யம் நேவத்தனா ஸந்த²தம், ந பரேன ஸந்த²ராபிதம், தஸ்மிந்தி வுத்தம் ஹோதி. லஜ்ஜீ ஹோதீதி லஜ்ஜனஸீலோ ஹோதி, பரிக்கா²ரவினாஸனே பீ⁴தோதி அத்தோ². தேனாஹ ‘‘அத்தனோ பலிபோ³த⁴ம் விய மஞ்ஞதீ’’தி, இமினா அலஜ்ஜிம் ஆபுச்சி²த்வா க³ந்தும் ந வட்டதீதி த³ஸ்ஸேதி. நிரபேக்கோ²தி ‘‘ஆக³ந்த்வா உத்³த⁴ரிஸ்ஸாமீ’’தி அபேக்கா²ரஹிதோ, இமினா ஸாபேக்கோ² சே க³ச்ச²தி, அனாபத்தீதி த³ஸ்ஸேதி. தேனேவ ஹி அனாபத்திவாரே ‘‘ஓதாபேந்தோ க³ச்ச²தீ’’தி (பாசி. 113) வுத்தம். அஞ்ஞத்த² க³ச்ச²ந்தோதி தம் மக்³க³ம் அதிக்கமித்வா அஞ்ஞத்த² க³ச்ச²ந்தோ. லேட்³டு³பாதூபசாரதோ ப³ஹி டி²தத்தா ‘‘பாது³த்³தா⁴ரேன காரேதப்³போ³’’தி வுத்தம், அஞ்ஞத்த² க³ச்ச²ந்தஸ்ஸ பட²மபாது³த்³தா⁴ரே து³க்கடம், து³தியபாது³த்³தா⁴ரே பாசித்தியந்தி அத்தோ².

திகபாசித்தியம் ஸங்கி⁴கே ஸங்கி⁴கஸஞ்ஞிவேமதிகபுக்³க³லிகஸஞ்ஞீனம் வஸேன. இமினாவ நயேன திகது³க்கடம்பி வேதி³தப்³ப³ம். சிமிலிகாதீ³னம் அத்தோ² து³தியஸிக்கா²பதே³ த³ஸ்ஸிதோவ. பாத³புஞ்ச²னீ (பாசி. அட்ட². 112) நாம ரஜ்ஜுகேஹி வா பிலோதிகாஹி வா பாத³புஞ்ச²னத்த²ம் கதா. ப²லகபீட²ம் நாம ப²லகமயம் பீட²ம். ந கேவலம் சிமிலிகாதீ³னியேவ அஜ்ஜோ²காஸே ட²பேத்வா க³ச்ச²ந்தஸ்ஸ து³க்கடந்தி ஆஹ ‘‘யம் வா பனா’’திஆதி³. யம் கிஞ்சி தா³ருப⁴ண்ட³ம், யம் கிஞ்சி மத்திகாப⁴ண்ட³ந்தி ஸம்ப³ந்தோ⁴. ‘‘அந்தமஸோ பத்தாதா⁴ரகம்பீ’’தி இமினா தாலவண்டபீ³ஜனிபத்தபானீயஉளஉங்கபானீயஸங்கா²தீ³ஸு வத்தப்³ப³மேவ நத்தீ²தி த³ஸ்ஸேதி.

அரஞ்ஞே (பாசி. அட்ட². 110) பண்ணகுடீஸு வஸந்தானம் ஸீலஸம்பதா³ய பஸன்னசித்தா மனுஸ்ஸா மஞ்சபீடா²தீ³னி தே³ந்தி ‘‘ஸங்கி⁴கபரிபோ⁴கே³ன பரிபு⁴ஞ்ஜதா²’’தி, தத்த² கிம் காதப்³ப³ந்தி ஆஹ ‘‘ஆரஞ்ஞகேன பனா’’திஆதி³. தத்த² அஸதி அனோவஸ்ஸகேதி பப்³பா⁴ராதி³அனோவஸ்ஸகட்டா²னே அஸதி. இத³ஞ்ச லக்க²ணவசனம் ‘‘ஸபா⁴கா³னம் அபா⁴வே’’தி ச இச்சி²தப்³ப³த்தா. ஆரஞ்ஞகேன ஹி பி⁴க்கு²னா தத்த² வஸித்வா அஞ்ஞத்த² க³ச்ச²ந்தேன ஸாமந்தவிஹாரே பி⁴க்கூ²னம் பேஸேத்வா க³ந்தப்³ப³ம். ஸபா⁴கா³னம் அபா⁴வே அனோவஸ்ஸகே நிக்கி²பித்வா க³ந்தப்³ப³ம். அனோவஸ்ஸகே அஸதி ருக்கே² லக்³கே³த்வா க³ந்தப்³ப³ம்.

ந கேவலம் இத³ம்யேவ கத்வா க³ந்தும் வட்டதீதி ஆஹ ‘‘யதா² வா’’திஆதி³. யதா² வா உபசிகாஹி ந க²ஜ்ஜதீதி யதா² ட²பிதே உபசிகாஹி ஸேனாஸனம் ந க²ஜ்ஜதி, ஏவம் ததா² பாஸாணானம் உபரி ட²பனம் கத்வாதி அத்தோ². இத³ம் வுத்தம் ஹோதி – சதூஸு (பாசி. அட்ட². 116) பாஸாணேஸு மஞ்சம் ட²பேத்வா மஞ்சே அவஸேஸமஞ்சபீடா²னி ஆரோபேத்வா உபரி பி⁴ஸிஆதி³கம் ராஸிம் கத்வா தா³ருப⁴ண்ட³ம் மத்திகாப⁴ண்ட³ம் படிஸாமேத்வா க³மிகவத்தம் பூரேத்வா க³ந்தப்³ப³ந்தி.

அப்³போ⁴காஸிகேனாபி ‘‘அஹம் உக்கட்ட²அப்³போ⁴காஸிகோ’’தி சீவரகுடிம்பி அகத்வா அஸமயே அஜ்ஜோ²காஸே பஞ்ஞபேத்வா நிஸீதி³தும் வா நிபஜ்ஜிதும் வா ந வட்டதீதி த³ஸ்ஸேந்தோ ஆஹ ‘‘அப்³போ⁴காஸிகேனா’’திஆதி³. ஸசே பன சதுக்³கு³ணேனபி சீவரேன கதகுடி அதேமேந்தம் ரக்கி²தும் நேவ ஸக்கோதி, ஸத்தாஹவத்³த³லிகாதீ³னி ப⁴வந்தி, பி⁴க்கு²னோ காயானுக³திகத்தா வட்டதி. ருக்க²மூலிகஸ்ஸாபி ஏஸேவ நயோ.

யஸ்மிம் விஸ்ஸாஸக்³கா³ஹோ ருஹதி, தஸ்ஸ ஸந்தகம் அத்தனோ புக்³க³லிகமிவ ஹோதீதி ஆஹ ‘‘விஸ்ஸாஸிகபுக்³க³லிகே’’தி. யஸ்மிம் பன விஸ்ஸாஸோ ந ருஹதி, தஸ்ஸ ஸந்தகே து³க்கடமேவ. அமனுஸ்ஸோதி யக்கோ² வா பேதோ வா. பலிபு³த்³த⁴ம் ஹோதீதி உபத்³து³தம் ஹோதி.

பட²மஸேனாஸனஸிக்கா²பத³வண்ணனா நிட்டி²தா.

5. து³தியஸேனாஸனஸிக்கா²பத³வண்ணனா

யம் கிஞ்சி சம்மந்தி கப்பியாகப்பியம் யம் கிஞ்சி சம்மம். நனு ‘‘ந, பி⁴க்க²வே, மஹாசம்மானி தா⁴ரேதப்³பா³னி ஸீஹசம்மம் ப்³யக்³க⁴சம்மம் தீ³பிசம்மம், யோ தா⁴ரேய்ய, ஆபத்தி து³க்கடஸ்ஸா’’தி (மஹாவ. 255) க²ந்த⁴கே ஸீஹசம்மாதீ³னம் படிக்கே²போ கதோதி ஆஹ ‘‘ஸீஹசம்மாதீ³னஞ்ஹீ’’திஆதி³. பரிஹரணேயேவ படிக்கே²போதி அத்தனோ ஸந்தகம் கத்வா தம் தம் விஹாரம் ஹரித்வா மஞ்சபீடா²தீ³ஸு அத்த²ரித்வா பரிபோ⁴கே³யேவ படிக்கே²போ, ஸேனாஸனஸந்தகம் கத்வா பூ⁴மத்த²ரணவஸேன பன பரிபோ⁴கே³ நேவத்தி² தோ³ஸோ. தேனாஹ ‘‘ஸேனாஸனபரிபோ⁴கே³ பன அகப்பியசம்மம் நாம நத்தீ²’’தி. பாவாரேந்தி ஸஞ்சா²தே³ந்தி ஸரீரம் ஏதேனாதி பாவாரோ. கோஜவோதி உத்³த³லோமிஏகந்தலோமிஆதி³கோஜவத்த²ரணம். ஸேஸந்தி பி⁴ஸி நிஸீத³னம் திணஸந்தா²ரோ பண்ணஸந்தா²ரோதி அவஸிட்ட²ம் ஸேனாஸனம். தத்த² பி⁴ஸீதி மஞ்சகபி⁴ஸி வா பீட²கபி⁴ஸி வா. நிஸீத³னந்தி ஸத³ஸம் வேதி³தப்³ப³ம். திணஸந்தா²ரோதி யேஸம் கேஸஞ்சி திணானம் ஸந்தா²ரோ. ஏஸ நயோ பண்ணஸந்தா²ரே. ஏத்த² ச பி⁴ஸி ஹேட்டா² வுத்தத்தா பாகடா. நிஸீத³னம் நிஸீத³னஸிக்கா²பதே³னேவ (பாசி. 531 ஆத³யோ) பாகடம். திணஸந்தா²ரபண்ணஸந்தா²ரானி பன லோகபஸித்³தா⁴னியேவ. தேனேவாஹ ‘‘பாகடமேவா’’தி.

நேவ உத்³த⁴ரேய்ய, ந உத்³த⁴ராபேய்யாதி அத்தனா வா உத்³த⁴ரித்வா பதிரூபே டா²னே ந ட²பேய்ய, பரேன வா ததா² ந காரேய்ய. தேனாஹ ‘‘யதா² ட²பித’’ந்திஆதி³. தம் ட²பேந்தேன ச ‘‘சதூஸு பாஸாணேஸூ’’திஆதி³னா (பாசி. அட்ட². 116) புப்³பே³ வுத்தனயேனேவ அந்தோகே³ஹே அனோவஸ்ஸகே நிக்கி²பிதப்³ப³ம். ஸசே பன ஸேனாஸனம் ஓவஸ்ஸதி, ச²த³னத்த²ஞ்ச திணம் வா இட்ட²கா வா ஆனீதா ஹோந்தி. ஸசே உஸ்ஸஹதி, சா²தே³தப்³ப³ம். நோ சே ஸக்கோதி, யோ ஓகாஸோ அனோவஸ்ஸகோ, தத்த² நிக்கி²பிதப்³ப³ம். ஸசே ஸப்³ப³ம்பி ஓவஸ்ஸதி, உஸ்ஸஹந்தேன அந்தோகா³மே உபாஸகானம் க⁴ரே ட²பேதப்³ப³ம். ஸசே தேபி ‘‘ஸங்கி⁴கம் நாம, ப⁴ந்தே, பா⁴ரியம், அக்³கி³தா³ஹாதீ³னம் பா⁴யாமா’’தி ந ஸம்படிச்ச²ந்தி, அஜ்ஜோ²காஸே பாஸாணானம் உபரி மஞ்சம் ட²பேத்வா ஸேஸம் புப்³பே³ வுத்தனயேனேவ நிக்கி²பித்வா திணேஹி ச பண்ணேஹி ச படிச்சா²தே³தப்³ப³ம். யஞ்ஹி தத்த² அங்க³மத்தம்பி அவஸிஸ்ஸதி, தம் அஞ்ஞேஸம் தத்த² ஆக³தானம் பி⁴க்கூ²னம் உபகாரம் ப⁴விஸ்ஸதீதி. உபசாரந்தி ஸப்³ப³பச்சி²மஸேனாஸனதோ த்³வே லேட்³டு³பாதா.

அயமேத்த² ஆபுச்சி²தப்³பா³னாபுச்சி²தப்³ப³வினிச்ச²யோ – (பாசி. அட்ட². 118) யா தாவ பூ⁴மியம் தீ³க⁴ஸாலா வா பண்ணஸாலா வா ஹோதி, யம் வா ருக்க²த்த²ம்பே⁴ஸு கதகே³ஹம் உபசிகானம் உட்டா²னட்டா²னம் ஹோதி, ததோ பக்கமந்தேன ஆபுச்சி²த்வாவ பக்கமிதப்³ப³ம். தஸ்மிஞ்ஹி கதிபயானி தி³வஸானி அஜக்³கி³யமானே வம்மிகாவ ஸந்திட்ட²ந்தி. யம் பன பாஸாணபிட்டி²யம் வா பாஸாணத்த²ம்பே⁴ஸு வா கதஸேனாஸனம் ஸிலுச்சயலேணம் வா ஸுதா⁴லித்தஸேனாஸனம் வா, யத்த² உபசிகாஸங்கா நத்தி², ததோ பக்கமந்தஸ்ஸ ஆபுச்சி²த்வாபி அனாபுச்சி²த்வாபி க³ந்தும் வட்டதி. தேனாஹ ‘‘யத்த² பனா’’திஆதி³. ஸசே தாதி³ஸேபி ஸேனாஸனே ஏகேன பஸ்ஸேன உபசிகா ஆரோஹந்தி, ஆபுச்சி²த்வாவ க³ந்தப்³ப³ம். ஆபுச்ச²னம் பன வத்தந்தி ஆபுச்ச²னம் க³மிகவத்தம். இத³ஞ்ச இதிகத்தப்³ப³தாத³ஸ்ஸனத்த²ம் வுத்தம், ந பன வத்தபே⁴த³து³க்கடந்தி (ஸாரத்த². டீ. பாசித்திய 3.118) த³ஸ்ஸனத்த²ம். கேசி பன ‘‘து³க்கடந்தி த³ஸ்ஸனத்த²’’ந்தி வத³ந்தி, தம் ந யுஜ்ஜதி வத்தக்க²ந்த⁴கட்ட²கதா²ய ‘‘யம் பாஸாணபிட்டி²யம் வா பாஸாணத்த²ம்பே⁴ஸு வா கதஸேனாஸனம், யத்த² உபசிகானாரோஹந்தி, தம் அனாபுச்ச²ந்தஸ்ஸாபி அனாபத்தீ’’தி (சூளவ. அட்ட². 360) வுத்தத்தா. ஆபுச்ச²ந்தேன பன பி⁴க்கு²ம்ஹி (பாசி. அட்ட². 116) ஸதி பி⁴க்கு² ஆபுச்சி²தப்³போ³, தஸ்மிம் அஸதி ஸாமணேரோ, தஸ்மிம் அஸதி ஆராமிகோ, தஸ்மிம்பி அஸதி யேன விஹாரோ காராபிதோ, ஸோ விஹாரஸாமிகோ, தஸ்ஸ வா குலே யோ கோசி ஆபுச்சி²தப்³போ³.

‘‘உபசாரே’’தி ஏதஸ்ஸேவ விவரணம் ‘‘ப³ஹி ஆஸன்னே’’தி, விஹாரஸ்ஸ ப³ஹி ஆஸன்னட்டா²னேதி அத்தோ². உபட்டா²னஸாலாய வாதி போ⁴ஜனஸாலாயம் வா. து³க்கடமேவாதி வுத்தப்பகாரஞ்ஹி த³ஸவித⁴ம் ஸேய்யம் அந்தோக³ப்³பா⁴தி³ம்ஹி கு³த்தட்டா²னே பஞ்ஞபேத்வா க³ச்ச²ந்தஸ்ஸ யஸ்மா ஸேய்யாபி ஸேனாஸனம்பி உபசிகாஹி பலுஜ்ஜதி, வம்மிகராஸியேவ ஹோதி, தஸ்மா பாசித்தியம் வுத்தம். ப³ஹி பன உபட்டா²னஸாலாதீ³ஸு பஞ்ஞபேத்வா க³ச்ச²ந்தஸ்ஸ ஸேய்யாமத்தமேவ நஸ்ஸேய்ய டா²னஸ்ஸ அகு³த்ததாய, ந ஸேனாஸனம், தஸ்மா ஏத்த² து³க்கடம் வுத்தம். மஞ்சபீட²ம் பன யஸ்மா ந ஸக்கா ஸஹஸா உபசிகாஹி கா²யிதும், தஸ்மா தம் விஹாரேபி ஸந்த²ரித்வா க³ச்ச²ந்தஸ்ஸ து³க்கடம் வுத்தம். விஹாரூபசாரே பன தம் விஹாரசாரிகம் ஆஹிண்ட³ந்தா தி³ஸ்வாவ படிஸாமேந்தி.

உத்³த⁴ரணானி கத்வாதி ஏத்த² உத்³த⁴ரித்வா க³ச்ச²ந்தேன மஞ்சபீட²கவானம் ஸப்³ப³ம் அபனேத்வா (பாசி. அட்ட². 118) ஸம்ஹரித்வா சீவரவம்ஸே லக்³கே³த்வா க³ந்தப்³ப³ம். பச்சா² ஆக³ந்த்வா வஸனகபி⁴க்கு²னாபி புன மஞ்சபீட²ம் வா பஞ்ஞபேத்வா ஸயித்வா க³ச்ச²ந்தேன ததே²வ காதப்³ப³ம். அந்தோகுட்டதோ ஸேய்யம் ப³ஹிகுட்டே பஞ்ஞபேத்வா வஸந்தேன க³மனகாலே புன க³ஹிதட்டா²னேயேவ படிஸாமேதப்³ப³ம். உபரிபாஸாத³தோ ஓரோபேத்வா ஹேட்டா²பாஸாதே³ வஸந்தஸ்ஸாபி ஏஸேவ நயோ. ரத்திட்டா²னதி³வாட்டா²னேஸு மஞ்சபீட²ம் பஞ்ஞபேத்வாபி க³மனகாலே புன க³ஹிதட்டா²னேயேவ ட²பேதப்³ப³ம். உத்³த⁴ராபேத்வா க³மனேபி ஏஸேவ நயோ. ஆபுச்சி²த்வா க³ச்ச²ந்தேன பன ‘‘பி⁴க்கு²ம்ஹி ஸதி பி⁴க்கு² ஆபுச்சி²தப்³போ³’’திஆதி³னா (பாசி. அட்ட². 116) ஹேட்டா² வுத்தனயேனேவ ஆபுச்சி²த்வா க³ந்தப்³ப³ம்.

து³தியஸேனாஸனஸிக்கா²பத³வண்ணனா நிட்டி²தா.

6. அனுபக²ஜ்ஜஸிக்கா²பத³வண்ணனா

‘‘ஜான’’ந்தி வுத்தே ‘‘அனுட்டா²பனீயோ ‘அய’ந்தி ஜானந்தோ’’தி அயம் விஸேஸோ குதோ லப்³ப⁴தீதி ஆஹ ‘‘தேனேவஸ்ஸா’’திஆதி³. நனு பத³பா⁴ஜனேபி வுட்³ட⁴பா⁴வாதி³ஜானனமேவ வுத்தம், ந து அனுட்டா²பனீயபா⁴வந்தி அனுயோக³ம் ஸந்தா⁴யாஹ ‘‘வுட்³டோ⁴ ஹீ’’திஆதி³. ப³ஹூபகாரதந்தி ‘‘ப⁴ண்டா³கா³ரிகத்தாதி³ப³ஹுஉபகாரபா⁴வம்’’. ந கேவலம் இத³மேவாதி ஆஹ ‘‘கு³ணவிஸிட்ட²தஞ்சா’’திஆதி³, தேன ப³ஹூபகாரத்தேபி கு³ணவிஸிட்ட²த்தாபா⁴வே, கு³ணவிஸிட்ட²த்தேபி ப³ஹூபகாரத்தாபா⁴வே தா³தும் ந வட்டதீதி த³ஸ்ஸேதி. ‘‘ப⁴ண்டா³கா³ரிகஸ்ஸ ப³ஹூபகாரதம், த⁴ம்மகதி²காதீ³னம் கு³ணவிஸிட்ட²தஞ்ச ஸல்லக்கே²த்வா’’தி (ஸாரத்த². டீ. பாசித்திய 3.119-121) கேசி. து⁴வவாஸத்தா²யாதி நிச்சவாஸத்தா²ய. ஸம்மன்னித்வாதி அபலோகனேன கம்மேன ஸம்மன்னித்வா. காமஞ்சேத்த² கி³லானஸ்ஸாபி ஸங்கோ⁴யேவ அனுச்ச²விகம் ஸேனாஸனம் தே³தி, கி³லானோ பன அபலோகேத்வா ஸங்கே⁴ன அதி³ன்னஸேனாஸனோபி ந பீளேதப்³போ³ அனுகம்பிதப்³போ³தி த³ஸ்ஸேதும் விஸும் வுத்தோ.

ஸமந்தா தி³யட்³டோ⁴ ஹத்தோ²தி மஜ்ஜே² பஞ்ஞத்தம் மஞ்சபீட²ம் ஸந்தா⁴ய வுத்தம். ஏகபஸ்ஸேன சே பஹோனகதி³ஸா தி³ஸ்ஸதி, ததோ க³ஹேதப்³ப³ம். பாத³தோ⁴வனபாஸாணதோதி த்³வாரே நிக்கி²த்தபாத³தோ⁴வனபாஸாணதோ. நிஸீத³ந்தஸ்ஸ வா நிபஜ்ஜந்தஸ்ஸ வா பாசித்தியந்தி ஏத்த² நிஸீத³னமத்தேன, நிபஜ்ஜனமத்தேனேவ வா பாசித்தியம். புனப்புனம் கரோந்தஸ்ஸாதி உட்டா²யுட்டா²ய நிஸீத³தோ வா நிபஜ்ஜதோ வா.

ஸங்கி⁴கே ஸங்கி⁴கஸஞ்ஞிவேமதிகபுக்³க³லிகஸஞ்ஞீனம் வஸேன திகபாசித்தியம் வேதி³தப்³ப³ம். திகது³க்கடம் பன புக்³க³லிகே ஸங்கி⁴கஸஞ்ஞிவேமதிகஅஞ்ஞபுக்³க³லிகஸஞ்ஞீனம் வஸேன. விஹாரஸ்ஸ உபசாரேதி தஸ்ஸ ப³ஹி ஆஸன்னப்பதே³ஸே.

அனுபக²ஜ்ஜஸிக்கா²பத³வண்ணனா நிட்டி²தா.

7. நிக்கட்³ட⁴னஸிக்கா²பத³வண்ணனா

அனேககோட்ட²கானீதி அனேகத்³வாரகோட்ட²கானி. ‘‘நிக்க²மாதி வசனம் ஸுத்வா அத்தனோ ருசியா சே நிக்க²மதி, அனாபத்தீ’’தி (ஸாரத்த². டீ. பாசித்திய 126) வத³ந்தி.

தஸ்ஸ பரிக்கா²ரனிக்கட்³ட⁴னேதி தஸ்ஸ ஸந்தகம் யம் கிஞ்சி பத்தசீவரபரிஸ்ஸாவனத⁴ம்மகரணமஞ்சபீட²பி⁴ஸிபி³ப்³போ³ஹனாதி³பே⁴த³ம் அந்தமஸோ ரஜனச²ல்லிபி அத்தி², தஸ்ஸ பரிக்கா²ரஸ்ஸ நிக்கட்³ட⁴னே. தஞ்சாதி து³க்கடம் பராமஸதி. நிக்கட்³டா⁴பனேபி ஏஸேவ நயோ. கா³ள்ஹம் ப³ந்தி⁴த்வா ட²பிதேஸு பன ஏகாவ ஆபத்தி.

ப⁴ண்ட³னகாரககலஹகாரகமேவ ஸகலஸங்கா⁴ராமதோ நிக்கட்³டி⁴தும் லப⁴தி. ஸோ ஹி பக்க²ம் லபி⁴த்வா ஸங்க⁴ம்பி பி⁴ந்தே³ய்ய. அலஜ்ஜிஆத³யோ பன அத்தனோ வஸனட்டா²னதோயேவ நிக்கட்³டி⁴தப்³பா³. ஸகலஸங்கா⁴ராமதோ நிக்கட்³டி⁴தும் ந வட்டதி. தேனாஹ ‘‘ஸகலஸங்கா⁴ராமதோபீ’’திஆதி³.

நிக்கட்³ட⁴னஸிக்கா²பத³வண்ணனா நிட்டி²தா.

8. வேஹாஸகுடிஸிக்கா²பத³வண்ணனா

உபரிவேஹாஸகுடியாதி உபரிமதலே அஸந்த²தபத³ராய குடியா. தேனாஹ ‘‘உபரி அச்ச²ன்னதலாயா’’திஆதி³. யா ஹி காசி உபரி அச்ச²ன்னதலா த்³விபூ⁴மிககுடிகா வா திபூ⁴மிகாதி³குடிகா வா, ஸா ‘‘வேஹாஸகுடீ’’தி வுச்சதி. இத³ஞ்ஹி வேஹாஸகுடிலக்க²ணம். யதி³ ஏவம் கஸ்மா பத³பா⁴ஜனே ‘‘மஜ்ஜி²மஸ்ஸ புரிஸஸ்ஸ அஸீஸக⁴ட்டா’’தி (பாசி. 131) வுத்தந்தி ஆஹ ‘‘பத³பா⁴ஜனே பனா’’திஆதி³. இத⁴ அதி⁴ப்பேதம் குடிம் த³ஸ்ஸேதுந்தி இமஸ்மிம் ஸிக்கா²பதே³ அதி⁴ப்பேதம் வேஹாஸகுடிம் த³ஸ்ஸேதும். மஜ்ஜி²மஸ்ஸ புரிஸஸ்ஸாதி பமாணமஜ்ஜி²மஸ்ஸ புரிஸஸ்ஸ. ஸப்³ப³ஹேட்டி²மாஹி துலாஹி ஸீஸம் ந க⁴ட்டேதீதி அஸீஸக⁴ட்டா. அங்கே³ விஜ்ஜி²த்வாதி அடனியோ விஜ்ஜி²த்வா. பவேஸிதபாத³கந்தி பவேஸிதபாத³ஸிக²ம். தஸ்மாதி ‘‘பூ⁴மத்தே² வா’’திஆதி³னா வுத்தமேவத்த²ம் காரணபா⁴வேன பச்சாமஸதி. யஸ்மா ஆஹச்சபாத³காதீ³ஸு யதா²வுத்தோ அத்தோ² ஹோதி, தஸ்மாதி வுத்தம் ஹோதி.

ஸஹஸாதி அபி⁴ப⁴வித்வா அஜ்ஜோ²த்த²ரித்வா. அவேஹாஸகுடிகாயாதி பூ⁴மியம் கதபண்ணஸாலாதீ³ஸு, தத்த² அனாபத்தி. ந ஹி ஸக்கா தத்த² பரஸ்ஸ பீளா காதும். ஸீஸக⁴ட்டாயாதி யா ஸீஸம் க⁴ட்டா ஹோதி, தத்தா²பி அனாபத்தி. ந ஹி ஸக்கா தத்த² ஹேட்டா²பாஸாதே³ அனோணதேன விசரிதும், தஸ்மா அஸஞ்சரணட்டா²னத்தா பரபீளா ந ப⁴விஸ்ஸதி. உபரிதலம் வா பத³ரஸஞ்சிதந்தி உபரிமதலம் தா³ருப²லகேஹி க⁴னஸந்த²தம். கிஞ்சி க³ண்ஹாதி வாதி உபரி நாக³த³ந்தகாதீ³ஸு லக்³கி³தம் சீவராதி³ம் யம் கிஞ்சி க³ண்ஹாதி வா. லக்³க³தி வாதி ஏத்தா²பி ஏஸேவ நயோ. படிபக்க²பூ⁴தா ஆணி படாணி. யஸ்ஸா தி³ன்னாய நிஸீத³ந்தேபி பாதா³ ந நிபதந்தி, ஏவம்பூ⁴தா ஆணி மஞ்சபீடா²னம் பாத³ஸிகா²ஸு தி³ன்னா ஹோதீதி அத்தோ². தேனாஹ ‘‘பாத³ஸீஸான’’ந்திஆதி³.

வேஹாஸகுடிஸிக்கா²பத³வண்ணனா நிட்டி²தா.

9. மஹல்லகவிஹாரஸிக்கா²பத³வண்ணனா

பிட்ட²ஸங்கா⁴டஸ்ஸாதி த்³வாரப³ந்த⁴ஸ்ஸ. ஸாமந்தா அட்³ட⁴தேய்யஹத்தோ² பதே³ஸோதி யஸ்ஸ (பாசி. அட்ட². 135) வேமஜ்ஜே² த்³வாரம் ஹோதி, உபரிபா⁴கே³ ச உச்சா பி⁴த்தி, தஸ்ஸ தீஸு தி³ஸாஸு ஸாமந்தா அட்³ட⁴தேய்யஹத்தோ² பதே³ஸோ. கு²த்³த³கஸ்ஸ பன விஹாரஸ்ஸ த்³வீஸு தி³ஸாஸு. தத்ராபி யம் பி⁴த்திம் விவரியமானம் கவாடம் ஆஹனதி, ஸா அபரிபுண்ணூபசாராபி ஹோதி. ஸசே பன த்³வாரஸ்ஸ அதோ⁴பா⁴கே³பி லேபோகாஸோ அத்தி², தம்பி லிம்பிதும் வட்டதி. அக்³க³ளட்ட²பனாயாதி ஏத்த² அக்³க³ளஸத்³தே³ன தம்ஸம்ப³ந்த⁴தோ த்³வாரப²லகஸஹிதம் த்³வாரப³ந்த⁴னம் அதி⁴ப்பேதம். தேனாஹ ‘‘ஸகவாடகஸ்ஸா’’திஆதி³. ‘‘நிச்சலபா⁴வத்தா²யா’’தி இமினா தஞ்ச கோ² ட²பனம் இத⁴ நிச்சலபா⁴வேனாதி த³ஸ்ஸேதி. கோ பனேத்த² அதி⁴ப்பாயோதி ஆஹ ‘‘கவாடஞ்ஹீ’’திஆதி³. கம்பதீதி சலதி. யாவ த்³வாரகோஸா அக்³க³ளட்ட²பனாய புனப்புனம் லிம்பிதப்³போ³ வா லேபாபேதப்³போ³ வாதி அக்³க³ளட்ட²பனத்தா²ய யாவ த்³வாரகோஸா புனப்புனம் அத்தனா லிம்பிதப்³போ³ வா, பரேஹி லேபாபேதப்³போ³ வாதி அத்தோ².

நனு சாயமத்தோ² நேவ மாதிகாயம், ந பத³பா⁴ஜனே வுத்தோ, அத² குதோ த³ட்ட²ப்³போ³தி ஆஹ ‘‘தத்தா²’’திஆதி³. கிஞ்சாபீதி யதி³பி. அட்டு²ப்பத்தியந்தி ஸிக்கா²பத³ஸ்ஸ நிதா³னே. அதி⁴காரதோதி அனுவத்தனதோ. ஆலோகம் ஸந்தே⁴தி பிதே⁴தீதி ஆலோகஸந்தி⁴. தேனாஹ ‘‘ஆலோகஸந்தீ⁴தி வாதபானகவாடகா வுச்சந்தீ’’தி. தத்த² வாதபானகவாடகாதி வாதபானப²லகா. அனுஞ்ஞாதப்பதே³ஸதோ பன அஞ்ஞத்த² புனப்புனம் விலிம்பிதும் வா விலிம்பாபேதும் வா ந வட்டதி. ‘‘மத்திகாய கத்தப்³ப³கிச்சம் நிட்டா²பேத்வா புன சதுத்த²லேபே தி³ன்னே பாசித்திய’’ந்தி (ஸாரத்த². டீ. பாசித்திய 3.135) கேசி. ‘‘புனப்புனம் லேபதா³னஸ்ஸ வுத்தப்பமாணதோ அஞ்ஞத்த² படிக்கி²த்தமத்தம் ட²பேத்வா பாசித்தியஸ்ஸ அவுத்தத்தா து³க்கட’’ந்தி அபரே.

அதி⁴ட்டா²தப்³ப³ந்தி ஸம்விதா⁴தப்³ப³ம். அப்பஹரிதேதி ஏத்த² அப்பஸத்³தோ³ ‘‘அப்பிச்சோ²’’திஆதீ³ஸு (ம. நி. 1.252, 336; ஸம். நி. 2.148) விய அபா⁴வத்தோ²தி ஆஹ ‘‘அஹரிதே’’தி. ஸாலிவீஹிஆதி³ (ஸாரத்த². டீ. 2.30) புப்³ப³ண்ணம் ‘‘புரக்க²தம் ஸஸ்ஸப²ல’’ந்தி கத்வா, தப்³பி³பரியாயதோ முக்³க³மாஸாதி³ அபரண்ணம். வுத்தந்தி வபிதம். ‘‘தஸ்மிம் ட²த்வா அதி⁴ட்ட²ஹந்தோ து³க்கடம் ஆபஜ்ஜதீ’’தி இமினா யஸ்மிம் பதே³ஸே ஸமந்தா வுத்தப்பமாணே பரிச்சே²தே³ புப்³ப³ண்ணாதீ³னி ந ஸந்தி, தத்த² விஹாரோ காரேதப்³போ³. யத்த² பன ஸந்தி, தத்த² காராபேதும் ந வட்டதீதி த³ஸ்ஸேதி. ததே²வாதி முக²வட்டிஅந்தேன. தஸ்மிம் டா²தப்³ப³ம் பதந்தஸ்ஸ விஹாரஸ்ஸ அபதனோகாஸத்தா, தஸ்ஸ பி⁴க்கு²னோ உபரி ந பதேய்யாதி அதி⁴ப்பாயோ. யதா²பரிச்சி²ன்னஸ்ஸ பன ஓகாஸஸ்ஸ அப்³ப⁴ந்தரம் விஹாரஸ்ஸ பதந்தஸ்ஸ ஓகாஸோ ஹோதீதி அப்பஹரிதேபி தஸ்மிம் ட²த்வா அதி⁴ட்டா²தும் ந லப⁴தி. தேனாஹ ‘‘தஸ்ஸ அந்தோ அஹரிதேபி டா²தும் ந லப⁴தீ’’தி.

ததோ சே உத்தரீதி திண்ணம் மக்³கா³னம் வா பரியாயானம் வா உபரி சதுத்தே² மக்³கே³ வா பரியாயே வாதி அத்தோ². தேனாஹ ‘‘மக்³கே³ன சா²தி³யமானே’’திஆதி³. தத்த² மக்³கே³ன சா²தி³யமானேதி அபரிக்கி²பித்வா உஜுகமேவ சா²தி³யமானே. பரியாயேனாதி பரிக்கே²பேன. தத்த² மக்³கே³ன சா²த³னம் இட்ட²கஸிலாஸுதா⁴ஹி லப்³ப⁴தி, பரியாயேன சா²த³னம் திணபண்ணேஹீதி ஆஹ ‘‘இட்ட²கஸிலாஸுதா⁴ஹீ’’திஆதி³. தஸ்மா யதா² இச்ச²தி, ததா² த்³வே மக்³கே³ வா த்³வே பரியாயே வா அதி⁴ட்ட²ஹித்வா ததியம் மக்³க³ம் வா பரியாயம் வா ‘‘ஏவம் சா²தே³ஹீ’’தி ஆணாபேத்வா பக்கமிதப்³ப³ம். ஸசே ந பக்கமதி, துண்ஹீபா⁴வேன டா²தப்³ப³ம். ஸப்³ப³ம்பி சேதம் ச²த³னம் ச²த³னூபரி வேதி³தப்³ப³ம். உபரூபரிச²ன்னோ ஹி விஹாரோ சிரம் அனோவஸ்ஸகோ ஹோதீதி மஞ்ஞமானா ஏவம் சா²தே³ந்தி. திணமுட்டி²க³ணனாயாதி திணகரளக³ணனாய.

திகபாசித்தியந்தி அதிரேகத்³வத்திபரியாயே அதிரேகஸஞ்ஞிவேமதிகஊனகஸஞ்ஞீனம் வஸேன தீணி பாசித்தியானி. ஸேதவண்ணாதி³கரணேதி ஸேதவண்ணகாளவண்ணகே³ருகபரிகம்மமாலாகம்மலதாகம்மமகரத³ந்தகபஞ்சபடிகானம் கரணே. லேணகு³ஹாதிணகுடிகாதீ³ஸூதி ஏத்த² லேணந்தி த்³வாரப³த்³த⁴ம். கு³ஹாதி கேவலா பப்³ப³தகு³ஹா. திணகுடிகா பாகடா ஏவ.

மஹல்லகவிஹாரஸிக்கா²பத³வண்ணனா நிட்டி²தா.

10. ஸப்பாணகஸிக்கா²பத³வண்ணனா

ஏகஸ்மிம் க⁴டே ஏகாவ ஆபத்தீதி ஏகஸ்மிம் உத³கக⁴டே ஏகாவ ஆபத்தி. ஏஸ நயோ ஸப்³ப³பா⁴ஜனேஸு. விச்சி²ந்த³ந்தஸ்ஸாதி தா⁴ரம் விச்சி²ந்த³ந்தஸ்ஸ. ஏகேகம் பக்கி²பந்தஸ்ஸாதி ஏகேகம் திணம் வா பண்ணம் வா மத்திகம் வா அஞ்ஞம் வா கட்ட²கோ³மயாதி³ம் பக்கி²பந்தஸ்ஸ. பரியாதா³னந்தி க²யம்.

‘‘பதீ³பே (ஸாரத்த². டீ. பாசித்திய 3.140) பதித்வா படங்கா³தி³பாணகா மரிஸ்ஸந்தீ’’தி ஜானந்தஸ்ஸாபி குஸலசித்தேன பதீ³புஜ்ஜலனம் விய ‘‘ஸிஞ்சனேன பாணகா மரிஸ்ஸந்தீ’’தி புப்³ப³பா⁴கே³ ஜானந்தஸ்ஸாபி ‘‘இத³ம் ஜலம் ஸிஞ்சாமீ’’தி ஸிஞ்சந்தஸ்ஸ வத⁴கசித்தம் ந ஹோதீதி ஆஹ ‘‘வினா வத⁴கசேதனாயா’’திஆதி³. ஏவஞ்ச கத்வா ‘‘பண்ணத்திவஜ்ஜ’’ந்தி இத³ம்பி ஸமத்தி²தம் ஹோதி. திசித்தந்தி குஸலாகுஸலாப்³யாகதவஸேன திசித்தம். ததா² ஹி பண்ணத்திம் மத்³தி³த்வா ஸிஞ்சந்தஸ்ஸ வா ஸிஞ்சாபேந்தஸ்ஸ வா அகுஸலசித்தேன ஹோதி, ‘‘ஆஸனம் தோ⁴விஸ்ஸாமீ’’தி சித்தேன தோ⁴வனத்த²ம் ஸிஞ்சந்தஸ்ஸ வா ஸிஞ்சாபேந்தஸ்ஸ வா குஸலசித்தேன ஹோதி, பண்ணத்திம் அஜானதா அரஹதா ஸிஞ்சனாதி³கரணே அப்³யாகதசித்தேன ஹோதீதி குஸலாகுஸலாப்³யாகதசித்தவஸேன திசித்தம் ஹோதி.

ஸப்பாணகஸிக்கா²பத³வண்ணனா நிட்டி²தா.

பூ⁴தகா³மவக்³கோ³ து³தியோ.